《Kah陳小小做伙讀台語》

 | | | 轉寄

以寫作來事奉

作者 張文亮，台譯：Lîm Chùn Io̍k 2022.05.08

陳小小踏話頭：

Ta̍k个基督徒領受ê呼召、使命無仝，無閒ê生活，thang講是對呼召、使命ê考驗。

信望愛電子報本期主打文是張文亮老師所寫。提起無閒ê大學教學工作，hō͘伊bat想beh棄sak寫作，m̄ koh主耶穌連續勉勵伊進前。Hō͘我想起一kóa兄弟姊妹以及信望愛ê義工，chiahê基督徒tī各種無仝êkhangkhòe場，因為回應耶穌ê疼，tī無閒ê鐵爐中，iáu堅持抱tio̍h使命teh進前。

摩根勉勵：「蒙主心意ê事奉，m̄是用事奉ê結果來量測，卻是事奉過程kah主同行kah同在。真正ê得勝是tī隱藏ê性命，m̄是明處ê所見kah所得。」我想講這to̍h是án怎堅持使命ê秘訣。

【以寫作來事奉】文/張文亮

1981年，我去美國讀冊，tī California州戴維斯華人教會集會，mā參加華語查經班。因為查經班ê學生大部分是慕道友，所以我需要帶領查經。我tī帶領查經有m̄ bat ê所在，to̍h先kah教會ê李革順牧師預備查經。牧師看我歡喜讀聖經，鼓勵我閱讀摩根（G. Campbell Morgan）ê作品、司布真（Charles Spurgeon）ê講道信息、《馬太．Henry聖經註釋》（Matthew Henry’s Commentary）kah《史特朗經文彙編》（Strong’s Exhaustive Concordance of the Bible）。Chit四套冊陪伴我幾nā年，我差不多ta̍k工讀。

Tú去美國ê時，我iáu是sànchhiah留學生，因為有人為我奉獻，所以我tī 1982年6月18，kā chit四套冊全部買齊。我ē特別記落來chit日期，完全是因為有chiahê冊ê時，心內真正是非常喜樂。牧師鼓勵我，摩根ê部分thang tùi《西敏講壇：摩根ê講道》（The Westminster Pulpit: The Preaching of G. Campbell Morgan，共十冊）讀起。

我tùi郵購買tio̍h了後，tiāⁿtiāⁿ閱讀。有kóa信息，我有讀幾nā遍，jú讀jú歡喜。摩根對聖經ê分享，ná像谷中ê清泉。我tī第一冊ê冊封面寫講：「Tī hitê狹chiⁿchiⁿ ê日子，我tī上帝ê話語中，看tio̍h廣闊。」了後，我koh買kah閱讀摩根其它ê著作，親像《Siōng大ê醫生》（The Great Physician，1937年出版）、《耶穌對約伯ê回應》（The Answer of Jesus to Job，1935年出版）、《聖經闡解》（The Exposition of the Bible，1959年出版）等等。

＊　＊　＊

1989年，我tńg來台灣教冊，beh出發chìn前，送掉真chē冊，m̄ koh我kā chiahê冊帶tńg來台灣。2004年5月18，我寫講：「Kiámchhái我ê一生，kantaⁿ是為chit代ê gín'á加讀一點á冊，thang hō͘ in認bat主耶穌ê真理。」我開始有負擔寫摩根ê傳記；寫冊是奉獻hō͘主ê祭。

學校ê工作壓力真大，我bat想beh棄sak寫作：「Siuⁿ chē ê情緒kah壓力，失去額外寫作ê體力kah時間。」主耶穌連續勉勵我。有一工，我tī祈禱簿á頂寫講主hō͘我ê提醒：「當你持有siuⁿ chē，是hō͘ siuⁿ chē持有你」、「上帝tī我ê心內khǹg一支筆，稿紙成做我ê佳美地」、「寫作動機ê純正是上帝恩典連續ê保守」等等。

撰寫摩根傳記ê負擔，漸漸tùi祈禱中ê自我期待，成做實踐實際參訪ê行動。2014年，我kah牽手、chabó͘ kiáⁿ去英國倫敦參加「西敏教會」ê集會。我chiah知影，原來chit間教會ê位置是tī泰晤士河邊á ê貧民區。西敏教會ê牧師熱心接待阮，chhōa我參訪教會大ê管風琴、摩根講道ê講桌kah講台、摩根ê冊房，甚至hō͘我坐tī摩根冊桌前ê椅á頂。

這是對一个kah意摩根著作ê讀者，無比美好ê招待。我想tio̍h摩根bat寫講：「我ê學生無應該是盲目ê跟tòe者、無條件ê跟tòe者kah永遠ê跟tòe者；卻是聽tùi主ê呼召，成做祂ê跟tòe者。」我期待kakī ê寫作，一定tio̍h是主ê跟tòe者，kah主耶穌做伙行。

＊　＊　＊

2019年，我tùi大學退休，先寫司布真正傳記；2020年，chiah koh再下筆寫摩根ê傳記。我相信主kā寫作ê khangkhòe託付hō͘我，一定tio̍h是我ài先謙卑tī主前；若無，主耶穌bē hō͘我寫完成祂奴僕ê傳記。

我讀過真chē摩根ê書籍傳記，親像摩根ê新婦吉兒（Jill Morgan）所著ê《屬神話語ê人：摩根生平》（A Man of the Word: Life of G. Campbell Morgan，1951年出版）、哈里斯（John Harries）所著ê《摩根傳》（Campbell Morgan: The Man and His Ministry，1930年出版）、哈洛德．莫瑞（Harold Murray）所著ê《聖經教師摩根》（Campbel lMorgan: Bible Teacher，1995年出版）等等，一kóa已經絕版ê冊，iáu有chabó͘ kiáⁿ tùi美國寄tńg來有關摩根ê一kóa近代出版作品，以及馬里蘭大學（University of Maryland）圖書館ê一kóa早期新聞報導等等。

我發見，退休後ê寫作kah退休前有一个無仝。Tī學校ê時chūn，有kóa基督徒學生ē來問問題，in問ê一kóa問題ē成做點to̍h我寫作ê引線。退休了後（koh tú好是 COVID-19疫情期間），差不多kah學生斷線，我寫作ê時，容易感覺驚惶。欠學生，欠四kho͘圍熱phutphut ê目神。

當我讀tio̍h摩根所寫：「寫作相對ê價值是teh做人，絕對ê價值是teh為主，無價值ê是teh為錢。」這成做我寫作時ê鼓勵。摩根出版真chē著作（在生約有七十二本，安息後koh有chē本出版），內容大部分是來自伊ê講道。雖然伊ê著作有出版ê年代，m̄ koh伊tī英國、美國、加拿大、澳洲、法國等所在，四kè講道ê行程kah日期，大部分lóng無記錄落來，soah致使講道ê內容kah事奉ê行程tàu bē óa，這是我teh撰寫ê時siōng困難ê部分。我相信chit位上帝ê奴僕是ài人ke認bat聖經真理，卻m̄是伊kakī。

所以我一定tio̍h tùi伊講道ê內容、年分kah特別講座ê事件，tńg來推算伊是tī啥物狀況下講chiahê內容，這是我teh寫作ê時，開siōng chē時間teh考查ê部分。有時專心斟酌siuⁿ久，koh對bē ha̍h時間kah地點，我ē siān tahtah kah操心。Chit時，我koh讀tio̍h伊寫ê：「寫作用趕ê，he是工作。寫作無趕，chiah是事奉。用寫作來事奉主，m̄是成做出版ê奴隸。」這koh成做對我ê安慰。

摩根ê講道稿真長，我其實ta̍k篇lóng kah意。伊一生講道超過兩萬篇，m̄是ta̍k篇lóng留落來，我kantaⁿ全文譯出十二篇，其它就ánne選譯比較khah關鍵ê部分。Chit本冊ê取材內容，chē少帶有我ê主觀，所以chit本冊iáu無完全。

M̄ koh，我讀tio̍h摩根tī 1939年hō͘後繼者鍾馬田（Martyn Lloyd Jones）ê勉勵：「蒙主心意ê事奉，m̄是用事奉ê結果來量測，卻是事奉過程kah主ê同行kah同在。真正得勝是tī隱藏ê性命，m̄是明處ê所見kah所得。」真正得tio̍h激勵。

＊　＊　＊

我難忘1983年讀摩根tī西敏教會講壇信息時ê感動，四十年後，chiah真正提筆寫落來伊ê生平kah信息。寫作ê時chūn，我ê記憶力已經不如以前，編輯kah引用索引資料已經有kóa食力，kiámchhái以後ê兄弟姊妹thang接棒，寫出koh khah好ê版本。寫作是永遠無完美ê一工，摩根寫講：「寫作，是用作品kā街裡四kè sô ê人，趕進入上帝ê教會。」我mā勉勵kakī盡心寫作，m̄ thang因iáu無夠完美，顛倒tùi上帝ê教會滾出去街á。摩根對事奉主、意愛查考聖經ê人，有真chē勉勵ê話，其中以「疼上帝ê話kah了解上帝ê話是一體ê」chit句話帶來hō͘我一生ê幫贊。

2021年五月，台灣ê疫情開始變kah嚴重，台北ê居民bē tàng自由出外，我tī厝裡顛倒寫kah siōng通順。感謝主耶穌，hō͘我差不多無外務ê日子，我體會tio̍h摩根所寫ê：「跟tòe主耶穌，是hō͘主tī咱ê心內成做量一切ê準則，hō͘咱tī任何ê環境裡，有一个koh khah koân ê順服。」

寫作，mā是為tio̍h koh khah koân ê順服，這是我ê期待kah祈禱。