《Kah陳小小做伙讀台語》

 | | | 轉寄

疼tùi耶穌基督開始

作者 洪奕蕾，台譯：Lîm Chùn Io̍k 2022.05.15

陳小小踏話頭：

這是真殘酷ê真相，人ê疼是有「賞味期限」ê！

Chitê賞味期限chìn前，愛情有siōng好ê品質，tī賞味期限了後，愛情to̍h變質à。我幾年前tī報紙開設婚姻交友ê專欄，看過bē少ê統計研究報告，愛情ê「賞味期限」平均to̍h是兩年！Kiámchhái chitmá ê「賞味期限」koh khah kē？藝人kah公眾人物ê愛情，hō͘我ánne懷疑。

真chē人m̄相信，想講kakī ê愛siōng無仝款，ē tàng直到永永遠遠。M̄ koh真失禮，永永遠遠是屬tī上帝，平凡人類ê疼to̍h是bē堪得時間ê考驗。

我kah tjm ê疼，mā是tī交往滿兩年，to̍h成做雞ê排骨，食無味，beh tàn掉koh可惜。伊tī新竹交大讀研究所，我tī台南成大做助教，電話中冤家用了一張koh一張ê電話卡。真正是teh燒錢，koh燒心。

真慶幸kakī決志信主，是tī kah tjm交往ê前一年。我心內底人ê疼jú來jú少，m̄ koh上帝ê疼jú來jú chē，to̍h kahná信望愛主打文魯益師（C. S. Lewis）ê話：「當我kā siōng重要ê放tī siōng頭前ê時，次要ê bē削弱，顛倒ē因為ánne增強。」

兩人同行到taⁿ三十gōa年，若是基於愛ê感覺，應該早to̍h分開à。幾nā pái兩人關係tùi kē谷爬升tńg來平原á是高原ê經驗，佐證文章所講「情感是tùi行動產生！」Ta̍k pái我怨氣對方，m̄ koh the̍h出愛ê行動，負面ê感覺to̍h koh漸漸回歸正面。

M̄ kantaⁿ是愛情，友情mā是ánne。上帝ê疼，hō͘信祂ê人改變行動，了後感受to̍h ē tòe leh慢慢á改變。保羅kah巴拿巴tī第二pái宣教之旅，為tio̍h馬可soah來相辭，各行kakī ê路，m̄ koh後來，馬可是保羅ê重要同工。信望愛同工之間、教會同工之間，mā是有bē合、bē爽ê時。M̄ koh，上帝hō͘我看tio̍h，疼tùi tó位來？Tùi耶穌基督來，tùi上帝ê話語來。

【疼tùi耶穌基督開始】文/洪奕蕾

#疼是一種訓練，卻m̄是一種感覺

1952年，英國作家魯益師（C. S. Lewis）tī一張phoe中講起一段真有意思ê話：「當我學習疼上帝比疼我siōng疼ê人koh khah chē ê時，我to̍h ē jú來jú疼我所疼ê人。當我無疼上帝，á去疼我所疼ê人，á是用我siōng疼ê人來取代上帝，我to̍h ē漸漸無koh疼我所疼ê人。當我kā siōng重要ê khǹg tī siōng頭前ê時，次要ê bē削弱，顛倒ē因為ánne來增強。」

當咱談論án怎經營疼，咱一定tio̍h先知影上帝to̍h是疼，基督耶穌to̍h是疼。總ê來講，疼是一種訓練，卻m̄是一種感覺。「親像天父有疼我，我mā有疼lín，lín tio̍h tiàm tī我ê疼內面。 Lín若遵守我ê誡命，lín to̍h ē tiàm tī我ê疼內面；親像我有遵守我ê天父ê誡命，tiàm tī祂ê疼內面。我kā lín講chiahê tāichì，是beh hō͘ lín內面有我ê歡喜 ，ánne lín ê歡喜to̍h ē滿滿。 親像我有疼lín，lín tio̍h相疼；這是我ê命令。」（約翰福音15章9～12節，《全民台語聖經》）四福音書講tio̍h疼上帝kah疼人兩大誡命ê時，lóng是先講疼上帝，了後chiah講疼人。人無法度疼上帝，是上帝先疼人，人回應上帝ê疼，chiah有夠額ê能力來疼上帝、疼人。

Chit兩條誡命hông稱做律法ê總綱，第二條誡命依賴第一條誡命，mā是應用第一條誡命ê時bē tàng欠缺ê表現。所以tī加拉太書5章14～15節，保羅苦勸加拉太人：「因為全部律法lóng包含tī「疼厝邊親像kakī 」chit條誡命內面。 Lín tio̍h謹慎，lín若kah禽獸仝款相咬相吞，到尾一定ē互相剿滅。」續落來16節講：「我ê意思是：Lín tio̍h照聖神ê引chhōa來生活，絕對m̄ thang求滿足kakī 肉體ê私慾。」保羅關心ê義m̄是儀式上ê清氣（行割禮），卻是通過疼來表達kakī ê信仰，「kantāⁿ藉tio̍h疼表達出來ê信，chiah有路用。」若是咱用牽手來取代上帝，婚姻肯定ē出問題；咱tio̍h疼人，á疼是tùi耶穌基督開始ê。

#疼人是事奉，m̄是操控

咱不時ǹg望牽手來服事kakī，m̄ koh上帝教導咱tio̍h服事牽手；這是一个事奉，家庭是一个服事ê崗位。Chitê意思m̄是咱永遠bē冤家，卻是需要先想看咱為對方做tāichì ê動機是啥物？beh ài ê是啥物？若是我為翁婿做所有ê tāichì，是因為我ǹg望伊疼我，這是tùi私ê疼。因為我是ǹg望透過我做ê tāichì得tio̍h回報，伊ē tàng接納我á是bē kah我冤家，這m̄是疼。有kóa人接受輔導ê時，感覺kakī tī牽手面前無價值，所以牽手講啥物lóng聽從，其實這mā m̄是疼。

啥物是疼？疼是我看牽手ê時，以上帝ê眼光來看她，m̄是kantaⁿ看tio̍h她有gōa chē缺點，卻是看tio̍h上帝tī她身chiūⁿ ê旨意kah目的。這意思是講，我一定tio̍h看chitê人是為tio̍h上帝，卻m̄是我kakī ê目的來存在，á我是因為疼上帝來服事她。

反tńg來講，啥物是操控？是無論冤家á是無冤家，lóng是為tio̍h hō͘ kakī得tio̍h好處；是無kā牽手當做一个人來對待，卻是當做一種為tio̍h我ê快樂來存在ê物件。比論講，我加讓她幾pái，to̍h ē tàng買siōng新ê iPhone；我為tio̍h無想beh kah她冤家，to̍h閃避問題m̄談；我同意翁婿ê請求，來hō͘伊答應我ê請求……chiahê其實lóng是操控，卻m̄是疼。

羅馬書12章9～10節講：「疼人tio̍h誠心誠意，tio̍h討厭邪惡，親近良善。 10 Tio̍h相疼親像親兄弟，tio̍h互相尊敬。」Beh án怎服事對方卻m̄是操控對方？Thang tùi服事ê態度開始，看人ê時tio̍h用恩典ê眼光，to̍h是講，我m̄是為tio̍h kakī ē tàng得tio̍h啥物，卻是單純對伊好，tio̍h算伊m̄值得。M̄是因為對方gōa無好á是gōa好，á是因為我白白接受上帝ê恩典，所以我願意kā上帝hō͘我ê恩典kah我siōng親密ê兄弟á是姊妹來分享──這to̍h是一種服事ê態度。

#疼是選擇，m̄是感覺

真chē時chūn，咱現此時ê文化講：疼是一種感覺。當感覺無koh疼，á是tú tio̍h痛苦kah傷害ê時，to̍h ē結束chit段關係。

M̄ koh，聖經m̄是ánne教導ê。若疼是基於感覺án怎，ánne早慢ē改變，因為你對人ê感覺，ē因為in對你做啥物來改變。M̄ koh，真正ê疼是一種選擇，m̄是一種感覺。

文化mā kā咱講：tio̍h 跟tòe感覺來行，感覺疼對方，所以chiah有行動。M̄ koh，實際狀況kiámchhái是顛倒ê：當咱有行動ê時，to̍h ē有感覺。疼當然牽涉tio̍h情感，m̄ koh，咱tiāⁿtiāⁿ ē tàng發見，情感mā ē tàng tùi行動來產生！

幾年前，我beh讀冊、tio̍h會上班、ài chhōa gín’á，tiāⁿtiāⁿ thiám kah倦tahtah。有一工，我已經上了十二點鐘ê班，tńg去厝裡又ài開兩點鐘ê車，就ánne我tī路上一直想tio̍h tńg到厝beh先洗身軀、食飯、送gín'á去睏，了後好好á歇睏。M̄ koh，我tńg到厝一phah開門，看見gín’á穿kah整整齊齊坐tī樓梯teh等我，了後翁婿講：「妳tńg來ah！我今á日hō͘妳一个驚喜，我beh chhōa你出去食飯。」你thang想像ē tio̍h，我一點á都無ài chitê驚喜。我已經想了兩點鐘beh tńg來厝裡睏，先生卻講beh chhōa我出去食飯。

M̄ koh，我看tio̍h gín’á真歡喜坐tī hia teh等，我mā知影這是先生表達疼ê方式，伊想beh hō͘我知影伊體貼我ê辛苦，想beh幫我分擔。所以我想了想，講：「好lah！你hō͘我五分鐘換衫褲。」

我小khóa洗面，換了衫褲，心內無願意，m̄ koh á是去à。Tùi厝裡到餐廳大概ài二十分鐘，過程中我聽tio̍h gín’á興奮teh討論beh點啥物菜，阮翁mā講伊有研究兩點鐘，chiah決定beh去chit間餐廳。我慢慢á投入in ê交談，當車停tī餐館前，我是真歡喜。因為我ê行動有變，我ê感受mā慢慢á變à。

真chē時chūn，世俗觀念主張ê kah聖經無仝款。事實上，靠感覺去疼人真容易變成自私ê疼，因為若是疼是一種感覺，ánne，你kantaⁿ ē對 ē tàng激發你心內情感ê時chiah疼伊。M̄ koh，聖經教導ê疼m̄是咱tùi別人身chiūⁿ得tio̍h啥物、á是根據我對別人ê感覺，是我願意付出啥物，kā別人ê需要khǹg tī頭一位。

盟約疼ê關係tī自我ê頭前

Tī消費者型態ê愛情中，自我ê重要性hông khǹg tī關係chìn前，咱想beh tùi其中得tio̍h一kóa物件。M̄ koh，tī婚姻盟約ê疼中間，關係hông khǹg tī自我ê頭前。

婚姻盟約ê愛中間，啥物是siōng重要ê？M̄是咱kakī，卻是咱kah上帝、kah人之間ê關係。Tī婚姻ê盟約裡，咱無koh kantaⁿ看tio̍h kakī，卻是兩个人變成一體—你ê需要to̍h是我ê需要，tio̍h算hit kóa m̄是我想beh ài ê。

杜克大學倫理學教授Stanley Hauerwas指出，真chē時chūn咱ē結婚，是認為chhōe tio̍h siōng適合ê人。Ánne，咱kantaⁿ是kah一个「感覺siōng適合」ê人結婚。咱了解對方ê方式，是tùi kakī ê視角去看伊適合á ·sī無適合kah kakī結婚。M̄ koh，準講chhōe tio̍h感覺適合ê人，其實咱á是chhōe m̄ tio̍h人à。是án怎？因為咱每一个人lóng ē變，你ē變，我mā ē變。所以，Hauerwas ê結論是，咱siōng重要ê課題，是ài學習án怎連續去疼kah關心hitê「kah kakī結婚ê生份人」，因為咱ta̍k人無時無刻lóng teh改變。

Timothy Keller牧師mā講：「有人疼你卻bē了解你，he kiámchhái是一種安慰，卻真膚淺。有人了解你卻無疼你，he kiámchhái是你siōng大ê驚惶。M̄ koh，若是有人完全了解你而且疼你，ánne這to̍h親像上帝ê疼，mā是咱siōng需要ê。Chit種ê疼hō͘咱tùi虛假中解脫出來，hō͘咱tùi「自認是tio̍h」謙卑落來，hō͘咱tī生活ê任何困難中，lóng ē tàng堅強起來。」Chit種ê疼tùi tó位來？Kantaⁿ是tùi耶穌基督來，tùi上帝ê話語來。