《Kah陳小小做伙讀台語》

 | | | 轉寄

《主禱文》

作者 陳小小，台譯：Lîm Chùn Io̍k 2022.06.19

《主禱文》

陳鳳翔


主耶穌教導ê〈主禱文〉有一句kah食有關係：「求祢賞賜阮今á日所需要ê食物。」（《全民台語聖經》馬太福音6章11節）傳統上，chit節照字面意義解說，to̍h是信徒m̄ thang驕傲自大，掠準靠kakī工作kah chhun錢to̍h ē tàng衣食無煩惱，一定tio̍h明白一切lóng是óa靠上主供應，謙卑祈求天父ta̍k工賞賜咱需用ê lim食。



M̄ koh，馬太福音6章tī〈主禱文〉ê頂下文koh記載，耶穌明明白白koh再三教導門徒無需要親像外邦人為tio̍h日用lim食來祈禱：「Lín m̄ thang kah in仝款，因為lín iáu未求chìn前，天父已經知影lín ê需要。」（8節）「所以，m̄ thang煩惱講，食啥物？Lim啥物？穿啥物？這lóng是外邦人所求ê，lín需要用ê一切物件，lín ê天父知影。」（31～32節）意思是講，上主是阿爸，祂一定顧念祂gín'á一切ê需要，gín'á kantaⁿ需要kā注意力集中tī阿爸ê國kah阿爸ê義，其它hiahê食、lim、穿ê需要，阿爸lóng ē負責。Ánne講起來，〈主禱文〉ê「阮日用ê lim食」真可能有另外一个層屬靈ê意義。



「阮日用ê lim食」ê「lim食」，希臘原文τὸν ἄρτον無「飲」ê意思，卻是「米糧、餅」ê意思，應該翻譯做「阮日用ê米糧」。回溯（sok）到舊約時代，有一个真特別ê ἄρτος「米糧」──嗎哪，是耶和華帶領以色列人出埃及，tī汛ê曠野tùi天頂賞賜（希臘文七十士譯本ê出埃及記16章4節；尼希米記9章15節；詩篇78篇24節、105篇40節）。


Á約翰福音記載耶穌bat the̍h嗎哪kah kakī對比，而且宣告kakī是比天頂降落ê嗎哪koh khah好ê米糧：「我是性命ê餅。來我chia ê人絕對bē iau，信我ê人永遠bē嘴乾。」（6章35節）「我to̍h是性命ê米糧。」（6章48節）「我to̍h是tùi天降落hitê活ê米糧，人若食chitê米糧to̍h ē永遠活leh。我所beh hō͘人ê米糧to̍h是我ê肉，是為tio̍h beh hō͘世間有性命來獻ê。」」（6章51節）


耶穌chiahê話真正是teh嚇驚以色列人，ná ē有人敢自誇kakī比嗎哪khah hó？而且，iáu宣稱kakī ê肉ē tàng食？眾人to̍h起爭論：「Chitê人án怎ē tàng kā祂ê肉hō͘咱食？」耶穌就ánne補充koh khah chē細節：「我實在kā lín講，lín若無食人子ê肉，無lim祂ê血，lín ê內面to̍h無活命。食我ê肉，lim我ê血ê人，有永遠ê活命，tī末日，我ē hō͘伊koh活。 我ê肉是真實ê食物，我ê血是真實ê飲料。食我ê肉，lim我ê血ê人，伊tiàm tī我內面，我mā tiàm tī伊內面。」（約翰福音6章53～56節）原本有一大陣人因為五餅二魚ê神跡phah算beh加入耶穌ê陣容，聽tio̍h耶穌chit種驚人ê言論，lóng相爭beh離開。門徒中真chē人聽了mā講：「Chiahê話真oh了解，啥人ē tàng接受？」就ánne行離開。Siōng尾耶穌iáu問十二个門徒講：「Lín kám mā想beh離開？」


耶穌kah一般講道ê人無仝，一般講道ê人無m̄是希望kakī大大受tio̍h歡迎，有時甚至teh講道ê時扶tháⁿ會眾。M̄ koh，耶穌kantaⁿ重視傳講真理，tio̍h算眾人一个一个離開，祂照常無嫌費氣說明kakī to̍h是性命ê米糧、永生ê米糧，ài大家食祂。可見chit篇信息何等重要！實在是因為受造ê人類一定tio̍h kah造物主—上主有關聯，食耶穌chiah有性命tī內面。食天頂ê米糧──嗎哪，iáu是ē死，食另外一个天頂ê米糧—耶穌，ē有永生，tī末日耶穌beh hō͘咱koh活。Á〈主禱文〉要求ê「今á日所需要ê食物」，kám m̄是koh khah可能是指天頂來ê性命ê米糧、永生ê米糧──耶穌？


以色列人食天頂ê米糧──嗎哪，是上主ta̍k工賞賜，以色列人ta̍k工lóng tio̍h去收，到第六工收兩倍，因為續落來hit工tio̍h守安息。Á咱gōa久食一pái另外一款 ê米糧──耶穌？馬太福音版〈主禱文〉：「求祢賞賜阮今á日所需要ê食物。」路加福音版chiah是：「求祢ta̍k日照時賜阮食物。」（11章3節）意思是咱tio̍h ta̍k工向天父上主祈禱，求祂ta̍k工賞賜性命ê米糧、永生ê米糧──耶穌hō͘咱食。

講tio̍h是án怎tio̍h ta̍k工食性命ê米糧、永生ê米糧──耶穌？除了性命、永生、koh活ê恩典，iáu有〈主禱文〉中唯一要求祈禱ê人做一个「赦免者」，若無食耶穌，根本無能力辦到。


〈主禱文〉有六个祈求：1.「願人lóng尊祢ê名做聖」；2.「願祢ê國降臨」；3.「願祢ê旨意行tī地chiūⁿ，親像行tī天頂。」；4.「ta̍k日照時賜阮食物。」；5.「赦免阮ê債，親像阮赦免人ê債。」；6.「m̄ thang hō͘阮tú tio̍h試探；救阮脫離兇惡」。這中間kantaⁿ有第五个祈求「赦免阮ê債，親像阮赦免人ê債。」上主ê作為ē根據祈禱ê人ê行為來做回應，其它ê祈求lóng是上主beh做ê tāichì。第五个祈求清楚暗示祈禱ê人，若是ǹg望得tio̍h上主赦免，kakī一定tio̍h赦免人。


甚至，耶穌tī〈主禱文〉教導了後，隨時強調赦免ê重要性，等於老師驚學生bē記得，特別koh一pái畫出重點：「因為lín若赦免人ê過失，天父mā ē赦免lín。Lín若無赦免人ê過失，天父mā無beh赦免lín ê過失。」（馬太福音6章14～15節）ē tàng想像，耶穌想講基督徒生活中siōng重要mā是siōng困難ê tāichì，to̍h是赦免別人。信仰總綱兩大項是「疼上主」kah「愛人親像kakī」，á赦免to̍h是彼此相疼ê實際行為。


耶穌道成肉身來到世間、tī十字架頂受死，to̍h是beh醫治來復原上主kah人、人kah人之間破碎ê關係。罪人三不五時互相得罪，彼此傷害，赦免是siōng基本ê疼ê行動，hō͘關係bē致使行向永遠斷裂、隔絕。M̄ koh，人性to̍h是ē翻舊帳，to̍h是ē想起過去ê傷害，tio̍h算明明知影無赦免ē帶來真chē負面ê影響，明明知影赦免對kakī身心靈lóng有幫贊kah利益，to̍h是真oh赦免別人。〈主禱文〉hō͘咱來知影，想beh赦免別人，一定tio̍h先食性命ê米糧、永生ê米糧──耶穌。


我ta̍k工lóng用〈主禱文〉祈禱，siōng歡喜用路加福音版本簡短有力ê第一句講：「父ah！」（按古卷）造物主—上主竟然是我ê阿爸！日用lim食lóng無需要擔心。Ta̍k工起床我問阿爸，gín'á ē tàng幫忙啥物？「願祢ê國降臨；願祢ê旨意行tī地chiūⁿ，親像行tī天頂。」先關心注意阿爸ê tāichì，求祂ê國kah祂ê義。「ta̍k日照時賜阮食物。」祈求阿爸tùi天頂降落來性命ê米糧、永生ê米糧──耶穌hō͘我食，hō͘我ta̍k工有夠用ê恩典來做阿爸ê tāichì。


無論tī家庭、khangkhòe場、教會生活，koh再親密ê牽手kah厝裡ê人、koh再有默契ê朋友、同事、同工，lóng避免不了摩擦，m̄ koh耶穌tī我內面，我tī耶穌內面，祂hō͘我赦免ê力量，維繫kah享受一切疼ê關係。