《Kah陳小小做伙讀台語》

 | | | 轉寄

真假福音，你kám信tio̍h à？

作者 Virginia Yip，台譯：Lîm Chùn Io̍k 2021.09.26

陳小小踏話頭：

我因為上帝ê疼信耶穌。自卑ê我，特別歡喜福音對自我ê肯定，以及上帝ê安慰、賜福。Ta̍k个信耶穌ê，lóng帶無仝ê想像進入信仰群體。無人tī初信ê時chūn，to̍h清楚福音ê全貌。

M̄ koh，若是我一直停留tī hia，to̍h ē衍生其它ê問題。親像本篇信望愛主打文所講，ē無法度承受苦難衝擊，甚至ē因為自我感覺siuⁿ過好，soah繼續活tī罪中kakī m̄知。

上帝意愛kah人同在。信ê人lóng有聖神內住，幫贊咱kah上帝做伙行人生ê路，tī其中經歷福音ê豐富。文章beh破除hiahê「自認為無m̄ tio̍h ê福音」，我想講kiámchhái to̍h是停留tī原地。咱來跟tòe主向前行，無停留tī原地。

【真假福音，你kám信tio̍h à？】文/荊墨

咱相信ê，kám是自認為無m̄ tio̍h ê福音？泰文‧維克斯（Trevin Wax）察覺，對福音ê生疏，就ánne講tio̍h扭曲，是基督徒軟chiáⁿ ê原因。本來是ē tàng徹底改變人、贏過死權、帶來屬天ǹg望ê福音，因為錯誤ê認知soah變kah疲勞厭倦。

維克斯tī著作《真假福音》（Counterfeit Gospels）中，思考啥物是真正ê福音。伊kā福音分做三部分，分別是福音ê故事（story）、宣告（announcement）kah社群（community），而且tùi chit三方面拆破分析六種假福音，來探查是án怎假福音ē受歡迎，kám是因為假福音滿足人性所需要ê？Á是kantaⁿ是失去完全ê準備？

一、心理治療ê福音

無人歡喜被指控做罪人，聖經見證ê福音對世間人來講是鑿耳ê。心理治療chit類假福音kā咱講，人問題ê結頭m̄是在tī得罪上帝，卻是在tī人ê潛力受tio̍h克制，人ê本相其實無hiahni̍h慘淡，á解決方案to̍h是鼓勵咱人來肯定自我。

親像聖經所講，人是完全敗壞koh無力自救ê。Chit種福音衍生ê信仰團體，往往專心斟酌追求個人ê幸福kah滿足。

Chit類假福音肯定人ê價值，聚焦tī上帝ê安慰、賜福等等人人喜愛ê屬性，因為ánne受tio̍h歡迎。Kantaⁿ是這hō͘人無法度面對苦難ê衝擊，親像大日頭曝，無根ê植物to̍h ē隨時枯乾。Koh khah驚人ê是，忽略問題ê本質，hō͘人繼續活tī罪中kakī m̄知。為tio̍h ánne，維克斯呼籲咱人正面來面對聖經中ê福音，tio̍h算起初ē鑿耳koh鑿心，到尾卻hō͘人行出虛假白賊，看tio̍h福音贏過死亡，koh有除去罪惡ê莫大能力。

二、無審判ê福音

心理治療ê福音忽略問題ê嚴重性，無審判ê福音就ánne疏忽問題ê結果，to̍h是聖潔、公義ê上帝對罪惡ê審判。Chit種假福音hō͘人免去福音債ê壓力，mā hō͘咱m̄免面對kakī ê罪惡。因為無審判，陷落去普救論（Christian Universalism）ê危險，mā無法度處理聖經中關係審判ê記述。

維克斯提醒咱，審判是好消息，因為審判是上帝公義ê顯明，是受壓迫、受冤屈、受患難ê人ê安慰（啟示錄6章10節）。試想看māi，tī chitê罪惡、悖逆ê世代，若無審判、無伸冤，ē何等hō͘人絕望？無審判ê假福音，帶來ê m̄是好消息，卻是pháiⁿ消息。

Án怎正確面對審判ê問題？基督ê福音叫咱看向各各他。審判ê時，受揀選ê罪人thang坦然無驚惶講，咱ê罪已經歸tī上帝預備ê羊羔身chiūⁿ à。

三、道德主義ê福音

Chit種假福音kā解決方案寄望tī人ê身chiūⁿ。接受chit種福音ê人，kiámchhái ē同意得救是恩典kah因為信，m̄ koh in mā想講，了後ê成聖tio̍h靠kakī努力，總是感覺kakī應該做kóa啥物，thang得tio̍h上帝ê恩典。

Ánne ê假福音存在兩个根本ê錯誤，tāi先是降kē上帝律法ê高標準，立kakī ê義（羅馬書10：3）；其次是bē記得福音m̄是道德ê教示，卻是上帝ê大能（羅馬書1：16），是過去用手鋪張諸天、立定大地根基ê全能者，藉tio̍h基督內面成就新ê創造（哥林多後書5：17）。

基督福音聚焦ê是上帝ê作為，道德主義ê福音卻看重人ê行為。保羅對加拉太人ê聖神入門、靠肉身成全ê艱苦心（加拉太書3：3），chiok適合探討chit類假福音。

四、恬恬主義ê福音

Chit種假福音限制縮小福音ê影響力，想講福音「kantaⁿ」有關個人ê得救。確實是ánne，福音是有關個人得救，若siuⁿ過敏感tī政治、社會，ē存在失焦ê危險。M̄ koh，若完全對所處環境冷淡無關心，mā是疏忽福音ê重大影響乃是全人ê，bē記得基督對門徒關係做光、做鹽ê教導。

五、活動家ê福音

Kah恬恬主義ê福音顛倒，活動家ê福音對改造社會有極大ê狂熱。維克斯觀察tio̍h，教會因為群眾基礎帶有對社會、政治kah文化ê影響力，有kóa人因為ánne soah積極投入運動。相對tī個人性命ê更新、永遠價值ê追求，社會革新ê效果kahná是比較khah緊koh明顯，而且符合大眾ê期待，所以非常有吸引力。

M̄ koh，福音ê本身kah福音ê效果是兩回事。社會ê改革當然是好事，m̄ koh m̄是福音本身，卻是福音ê效果。若是無法度平衡兩者，一定ē倦tahtah kah bē堪得，總是感覺做kah無夠。基督徒若單單聚焦chiahê事務，mā kiámchhái ē落入治標不治本ê困境。純正ê福音乃是拯救罪人，tùi根本改變人ê本質，ánne，社會問題chiah有可能得tio̍h根本ê解決。

六、無教會ê福音

相對tī活動家ê福音想beh利用教會對社會ê影響力，無教會ê福音就ánne想講基督徒無需要教會。

咱不得不承認，教會有真chē無súi、無聖潔ê所在，hō͘真chē有心追求真理、敬虔ê人停腳，mā有某一kóa無ài權威ê人，對教會敬而遠之。M̄ koh，這mā無符合聖經ê教導。咱thang思想，當保羅看tio̍h加拉太人ê無知kah哥林多教會ê hàm古，使徒ê反應kám是就ánne kah教會隔絕？若是ánne，咱to̍h無hiahni̍h chē教會書信thang讀à。

咱thang思想，當耶利米看tio̍h偤大全國頂下ê敗壞，伊kám是遠離世俗、眼不見做清淨？若是ánne，咱對先知ê見證to̍h bē流目屎à。

咱koh khah thang思想，當世界充滿罪惡，天頂ê君王kám是端正坐koân天無顧祂所造ê世界？咱知影m̄是；顛倒是，祂道成肉身，親自來到罪惡ê中間，成做光照烏暗ê真理。所以，若咱看tio̍h教會無好款ê所在，求主hō͘咱體會基督疼教會ê心（以弗所書5：25）。

《真假福音》對今á日基督教ê診斷，提醒咱應當嚴肅來面對，探查聖經啟示ê福音，分辨kakī所信是m̄是受tio̍h世俗ê影響siuⁿ過深。

真正福音有指出人siōng根本ê問題，是得罪天地ê主宰，背逆用kakī形像造人ê上帝。

真正ê福音指向治本之道，m̄是人kakī提出解決方案，卻是上帝做人預備羊羔，tī各各他山頂為咱來死，koh用koh活來向咱啟明新ê性命。

真正福音mā有表明，教會是基督ê身軀，世間人藉tio̍h教會，ē tàng看一下á屬天性命ê樣式，tùi chiahê人ê彼此相疼，明白in相疼chìn前已經有耶穌疼in，為祂ê羊犧牲性命，chit陣人ê彼此相疼，只不過是效法in ê牧者而已。