《Kah陳小小做伙讀台語》

 | | | 轉寄

啟示錄ê七个得勝大禮包

作者 陳小小，台譯：Lîm Chùn Io̍k 2023.02.26




第一世紀基督徒讀者閱讀啟示錄，回應耶穌講ê：「Tio̍h，我liâmpiⁿ來！」是充滿感動、用phutphuttiô teh期待ê心情大聲hoah咻：「阿們！主耶穌，求祢降臨！」」（啟22:20）M̄ koh，廿一世紀ê基督徒讀者閱讀啟示錄，in ê反應卻是完全無仝。充滿驚惶、驚死，看tio̍h毀滅、災害、病症、死亡等世界末日ê景象，心內暗想：「主ah，請你m̄ thang來。」

兩pêng ê閱讀感受有差大碼ê差別，稽考原因，在tī現代基督徒對kakī ê歸屬認知有錯誤，bē記得kakī是屬tī耶穌ê第三聖殿祭司。耶穌koh活hit年（公元30年）ê五旬節，聖靈降臨，耶穌ê身軀—教會建立，也to̍h是第三聖殿建立！耶穌bat對偤太人講：「Lín拆毀chitê殿，我三日內beh koh再建立起來。」耶穌chit句話是用祂ê身軀為殿。所以到祂tùi死裡koh活以後，門徒to̍h想起祂講過chit句話，就ánne來信聖經kah耶穌所講ê。（約翰福音2:19-22）

第三聖殿ê聖址無親像第一聖殿、第二聖殿tī以色列ê耶路撒冷，它向外擴展到福音所到ê所在，也to̍h是信耶穌ê人聚集ê所在。保羅寫hō͘以弗所教會ê書信，咱thang知影第三聖殿來到亞西亞省ê以弗所，現今ê土耳其：「Lín kah偤太人仝款，是起造tī使徒kah先知ê地基頂面，基督耶穌kakī mā做厝角頭siōng重要ê基石。 21 Kui個建築物靠基督來結合，互相接連，漸漸擴展，成做聖殿來獻hō͘主。Óa靠聖靈ê幫贊，lín mā做伙受起造，來成做上帝所tòa ê所在。」（以弗所書2:21-22）保羅寫hō͘哥林多教會ê書信中，第三聖殿mā來到亞該亞省ê哥林多城，現今ê希臘：「Lín kám m̄知lín是上帝ê殿，上帝ê聖靈tiàm tī lín內面？人若毀壞上帝ê殿，上帝ē kā伊毀滅；因為上帝ê殿是神聖，lín to̍h是hitê殿。」（哥林多前書3:16-17）

約翰是耶穌揀選ê代筆人，伊kā所看見、所聽tio̍h ê寫落來，結果完成啟示錄，koh再kā它寄hō͘以弗所、士每拿、別迦摩、推雅推喇、撒狄、非拉鐵非、老底嘉等等七間教會。In深深明白kakī是第三聖殿ê一部分，是有聖靈tòa tī心內ê祭司。收tio̍h《啟示錄—耶穌ê家書》來讀，自然是感動歡喜kah目屎chho̍pchho̍p滴。

耶穌tī異象中顯現，頭毛ná雪，親像羊毛仝款白siaksiak，目chiu親像火焰ánne閃sih；祂身穿長衫，一直垂落來到腳，胸坎á束金帶，是大祭司kah君王ê妝thāⁿ。祂khiā tī七个金燈台中間，正手the̍h七粒星。「七粒星是七間教會ê天使；七个燈台to̍h是七間教會。」（啟示錄1:12, 13, 16, 20）意思是講榮光tī天頂ê耶穌，mā tī教會ê中間，祂不時teh看顧地chiūⁿ教會ê一切。

Chitmá，耶穌ê金燈台不止是七座，手頂ê星不止是七粒。兩千年來，耶穌金燈台chē kah ná海邊ê沙，耶穌手頂ê星，mā算bē了。世界各地ê教會—長老教會、信義會、浸信會、循理會、聚會所、地方教會……，lóng是耶穌ê金燈台，lóng是上主藉tio̍h聖靈teh tòa ê所在。耶穌tī金燈台中間teh行，祂深深明白各地信徒無仝ê遭遇kah試探。

現代信徒看了七間教會ê家書，真chē是驚惶，驚耶穌ê責備kah嚴厲ê處罰，親像：「Kā你ê燈台tùi原所在sóa走」、「用我嘴中ê劍攻擊in」、「我一定tùi我嘴中kā你吐出去。」M̄ koh對收phoe ê當事人來講，看tio̍h ê是kah真實狀況互相符合ê oló kah責備，ē感覺信仰ê道路裡，耶穌祂真正kah咱同在！準講有時á失覺察，mā bē致到kui身軀phak倒，因為主耶穌tī咱ê身邊，隨時用手teh kā咱扶持。

用第一張hō͘以弗所教會ê書信做例，耶穌ê oló有幾nā條：「我知你ê所做kah你ê勞苦以及吞忍。你mā bē容允hiahê做pháiⁿ ê人，你mā有考驗hiahê kakī 講是使徒其實m̄是ê人，看出in是teh講白賊。 3 你有吞忍，koh bat為tio̍h我ê名忍受苦難lóng無厭倦。」（2:2-3）「M̄ koh，你iáu有一項可取ê tāichì，to̍h是你mā kah我仝款，怨恨跟tòe尼哥拉hit陣人所做ê tāichì。」（2:6）以弗所信徒ē驚嘆：咱ê優點，耶穌有看tio̍h！咱對義ê堅持，耶穌有看tio̍h！世界上有啥物oló kah獎勵，ē tàng贏過主耶穌ê oló？

耶穌對以弗所教會ê ê責備kantaⁿ有一條：「M̄ koh，有一項tāichì，我tio̍h kā你責備，to̍h是你已經棄sak當初對我ê疼。」（2:4）實在是因為hit條缺點實在siuⁿ危險，一定tio̍h處理。耶穌嚴嚴地講：「所以，你tio̍h ē記得你tùi tó位poa̍h倒，tio̍h悔改，回復你起頭疼ê行踏；若無，我ē去你hia，kā你ê燈台sóa走。」（啟示錄2:5）

「Kā起初ê疼心棄sak à」，chitê缺點tī咱看起來，kahná無gōa嚴重。M̄ koh，τὴν ἀγάπην翻譯做「疼」ē比較khah tú好。基督徒棄sak了「疼」，伊ê危險性請看下面：

基督徒án怎知影kakī是tùi上主來生（重頭生）tio̍h看「疼」。「親愛ê兄弟姊妹，咱tio̍h相疼，因為疼是tùi上主來ê。有疼心ê人是上主ê kiáⁿ兒，mā bat上主。」（約翰壹書 4:7）

門徒ê記號mā是「疼」，耶穌講：「我hō͘ lín一條新ê誡命：Lín tio̍h相疼，親像我bat疼lín。Lín mā tio̍h照ánne相疼。」（約翰福音 13:34-35）

判斷信徒是m̄是有聖靈？M̄是在tī是m̄是ē曉講預言、講方言、醫病、趕鬼、祈禱有熱流通過等等ê超自然現象，卻是看伊ê性命是m̄是有不斷結出聖靈ê 果chí—「疼」。以弗所教會ê信徒已經無起初ê「疼」，in棄sak起初ê「疼」，是gōani̍h’á危險！

耶穌指出七間教會各自ê優缺點，好ê繼續持守，pháiⁿ ê及時改進，卻m̄是jú行jú m̄ tio̍h，嚴重到無法度挽回ê地步。M̄ koh，罪人無ài hō͘ 人指正；真chē時chūn別人kantaⁿ是陳述事實，m̄ koh咱ē感覺kakī hông否定、tú tio̍h侮辱。我信主三十gōa年，chiah漸漸被調整，ē tàng有健康ê態度去體會出tī善意ê提醒、指正、責備，而且kā它kah侮辱ê感受分開。Chit七間教會是何等幸福！指出伊ê錯誤ê是主耶穌，kantaⁿ需要照ánne改進。畢竟，若是其他人指出問題，iáu tio̍h深思判斷究竟對方評論ê是m̄是正確？

七張phoe並m̄是kah咱無關係。七張phoe ê七段結尾kài重要，不斷出現「凡若有耳ê，tio̍h聽！」ê提醒，m̄ koh過去常常hông誤會是hō͘單一教會，實際上是聖靈向「眾教會」teh講ê話，是hō͘眾教會ê獎勵，經過流目屎ê山谷了後，上主有預備七个得勝ê大禮包teh等待你kah我：

得勝ê人食上主ê樂園中hit欉活命樹ê果chí。（2:7），一定bē受tio̍h第二pái死亡ê災害，（2:11），我beh kā保存起來ê嗎哪hō͘伊。我mā beh hō͘伊一塊白石，（2:17）。甚至，iáu有權柄thang治理萬國，koh有晨星（2:26-28）。另外，穿白衫，伊ê名tùi活命冊擦消。耶穌ē tī天父面前，kah眾天使面前，承認得勝者ê名（3:5）。得勝ê，iáu ē tī神殿中做柱á，頂面寫上主ê名kah上主城ê名，而且有耶穌ê新名（3:12）。Siōng尾，ē tàng kah耶穌做伙坐桌。甚至tī榮耀寶座頂面kah耶穌同坐桌，to̍h kahná耶穌得勝，tī天父ê寶座頂kah祂同坐桌一般（3:20-21）。

啟示錄ê目的是beh hō͘信徒大大感受tio̍h耶穌ê得勝！上主得勝！M̄ koh實際狀況soah顛倒péng，讀者感受tio̍h khah chē是獸ê猖狂。Siōng chia̍p hông heⁿh驚ê話ê獸印記666，「牠koh強迫眾人，無論大細，好額á是sànchhiah，自由ê á是做奴僕ê，lóng tio̍h tī正手á是頭額蓋印做記號。」（13:16）一kóa基督徒真擔心kakī被印chiūⁿ獸ê印記，iáu koh誤傳電腦條碼是666，千萬bē tàng使用。提出chit種講法ê人m̄ bat電腦資訊，mā m̄ bat聖經希臘文。電腦條碼ê間隔碼是666數字，m̄ koh六百六十六是數目！甚至有一kóa抄本內是六百一十六，m̄是六百六十六。

若beh防備獸ê印記hit个變動ê數目，閱讀ê重點koh khah應該khǹg tī信耶穌ê你kah我，lóng早to̍h已經有耶穌ê印記。「祂mā kā咱蓋印做記號，koh賞賜聖靈tī咱ê心內做擔保。」（林後1:22）「Lín有聽tio̍h真理ê信息，to̍h是hō͘ lín得救ê福音。Lín有信，上帝to̍h kā祂所應允ê聖靈賞賜hō͘ lín，做lín歸向祂ê記號。」（弗 1:13）

獸gōa可怕mā贏bē過咱ê君王耶穌基督。啟示錄宣告耶穌基督君王一定得勝！身為第三聖殿ê祭司，lóng受tio̍h聖靈ê印記，有聖靈tòa tī心內ê咱，m̄管環境án怎險惡，to̍h是選擇khiā tī三一上主hit pêng。七个得勝ê大禮包，鼓勵你kah我，tī人生各種遭遇中堅持到底。耶穌講：「Tio̍h，我liâmpiⁿ來！」，眾祭司回應tio̍h：「阿們！主耶穌，求祢降臨！」