《Kah陳小小做伙讀台語》

 | | | 轉寄

祈禱ê對象是天父

作者 陳小小，台譯：Lîm ChùnIo̍k 2023.04.09





祈禱ê對象是天父
陳鳳翔


民間信仰混入基督教，連祈禱lóng受tio̍h嚴重ê扭曲。Kachài是馬太福音第六章留落來主耶穌對祈禱ê完整教導。Ta̍k pái祈禱，lóng應該tńg來chit段經文，省察kakī ê祈禱是m̄是有符合主ê心意？Á是有參雜世俗異教之風？

耶穌教導〈主禱文〉chìn前，tāi先講tio̍h祈禱ê兩件要項。第一點是，祈禱tio̍h暗暗á做。「Lín祈禱ê時，m̄ thang親像假好ê人，為tio̍h ài beh hō͘人看tio̍h，thiau故意khiā tī會堂á是大街路口祈禱。我實在kā lín講，in已經得tio̍h in ê報賞à。 6 你祈禱ê時，tio̍h入去你ê房間內，門關起來，對你ê天父祈求，tī暗中teh看ê天父ē kā你報賞。」（太6:4-5）

現代對祈禱ê主流教導卻是，祈禱siōng好公開hō͘眾人看見，tio̍h算tī室內mā tio̍h大聲呼求hō͘厝外ê人mā聽tio̍h。甚至iáu kā kakī ê祈禱文貼到面冊、LINE，hō͘大家lóng知影kakī是gōani̍h'á敬虔ê基督徒。馬太福音6:4-5 m̄是拒絕一切ê公禱，聖經中mā有真chē公禱ê例，重點是tī「祈禱ê對象是上主，祈禱m̄是用來表演kakī ê敬虔」。

祈禱要項ê第二點是，m̄ thang一直重複。「Lín祈禱ê時，m̄ thang親像外邦人講了koh再講。因為in想講，tio̍h講khah chē話，上主chiah ē聽tio̍h。 8 Lín m̄ thang kah in仝款，因為lín iáu未求chìn前，天父已經知影lín ê需要。」（太6:7-8）耶穌tī chia用重複句，伊講兩pái「bē tàng」！表示當時真chē偤太人祈禱mā愛重複，一件tāichì不斷重複真chē pái，驚上主聽bē tio̍h，甚至是後面帶有異教徒祈禱積功德ê動機，掠準祈禱幾nā pái，累積達tio̍h某數目，心願to̍h ē實現。Chitê差謬甚至iáu開發成做計數器ê十字架商品，幫贊計算祈禱ê次數。

基督徒是án怎無需要重複仝一个事項ê祈禱？因為咱祈禱ê對象是天父上主。做gín'á ê嘴phóe iáu未thí開，發出祈求chìn前，咱所需要用ê，阿爸早to̍h知影à。所以〈主禱文〉ê第一句to̍h是「阮tī天裡ê父」。Kui个祈禱ê基礎是，chit位上主是疼咱ê阿爸！只要bē記得chit點，to̍h真容易墮落到使用外邦人ê祈禱積功德方式。

〈主禱文〉內文，mā是kah當今教會界常常聽tio̍h ê祈禱詞完全無仝！〈主禱文〉是阿爸ê tāichì khǹg tī頭前，gín'á ê tāichì khǹg tī後面。「願人lóng尊你ê號做聖。願你ê國降臨；願你ê旨意行在地上，親像同行tī天頂。」祈禱者ài kā「你ê名、你ê國、你ê旨意」khǹg tī頭前。M̄ koh chitmá ê祈禱大部份是「我」、「我」、「我」，我ê就業、我ê婚姻、我ê交友、我ê考試、我ê健康…所有一切食衣住行育樂，內容千篇一律「願『我』ê旨意行在地上」，上主祢tio̍h hō͘「我」ê想法、「我」ê旨意lóng通順通行。Chia並m̄是講lóng總無法度bē tàng kah阿爸說明kakī ê人生ê需要kah想beh ài ê物件，卻是chit種類型ê祈禱siuⁿ chē，siōng尾ē kā上主當做實現kakī心願ê工具人。Chit段koh khah重要ê是，天父上主ài基督徒lóng有興趣而且主動了解祂ê計畫，渴望參與永遠ê事工，老父意愛kiáⁿ兒 kah祂做伙同工，祂美好ê旨意行tī地chiūⁿ，救贖chitê世界。

〈主禱文〉後半段是kiáⁿ兒 ê tāichì。「阮日用ê lim食，今á日賜hō͘咱。免阮ê債，親像阮免別人ê債。M̄ thang hō͘阮tú tio̍h試探；救阮脫離pháiⁿ ê。」注意，chia是「阮」，卻m̄是「我」；意思是講祈禱ê時，想tio̍h ê m̄是單一個體kakī「我」，卻是群體。因為ánne馬太福音第六章ê siōng尾，主耶穌koh一pái提醒祈禱m̄ thang親像外邦人，「所以，m̄ thang煩惱講，食啥物？Lim啥物？穿啥物？這lóng是外邦人所求ê，lín需用ê這一切物件，lín ê天父是知影ê。Lín tio̍h先求伊ê國kah伊ê義，chiahê物件lóng tio̍h加hō͘ lín à。所以，m̄ thang為明á載煩惱，因為明á載自有明á載ê煩惱；一工ê難處一工當就有夠。」（太6:31-34）

Chabó͘ kiáⁿchìn前beh考公職社會行政ê時，我帶領她用主禱文ê範例祈禱：

親愛ê天父：

多謝祢hō͘ kiáⁿ兒注意tio̍h社會ê邊緣人，多謝祢支持kiáⁿ兒報考社會行政。求祢幫贊kiáⁿ兒tī預備考試ê讀冊過程中，mài hō͘ 我tú tio̍h試探，救我脫離pháiⁿ ê撒旦。當我疲勞、akchak、鬱卒、對kakī無信心、pîn惰ê時，hō͘ kiáⁿ兒仰望祢ê十字架，體會祢疼世間人ê心，得tio̍h能力繼續堅持落去。因為國度、權柄、榮光，lóng是你ê，直到永遠。阿們！

願咱lóng用主耶穌教導ê〈主禱文〉祈禱，就ánne阮koh khah疼天父，koh khah了解kakī tī上主永遠計畫中ê角色。