《Kah陳小小做伙讀台語》

 | | | 轉寄

享受工作ê福氣

作者 陳小小，台譯：Lîm ChùnIo̍k 2023.06.11

享受工作ê福氣
陳鳳翔

啥物是siōng有福氣ê tāichì？我chìn前掠準是：錢chē到m̄免工作，kui工遊山玩水，而且有真chē人煮飯、lù土kha、洗頭、SPA掠龍來服事我。M̄ koh，信主了後開始讀聖經，創世記講上主mā工作，耶和華開天闢地，kā世界tùi「混亂」整理到「有次序」。第七工，上主mā歇祂一切ê工。

Á人類是照上主ê「形像」（צֶלֶם）所造ê！צֶלֶם chit字mā用來指君王塑像ê建立。人類是上主tī受造世界ê代表，六工工作是teh反映上主造天地，一工安歇來記念上主ê榮光。Chit種六比一循環ê生活模式to̍h是福氣！大大倒péng我過去「ta̍k日免工作是福氣」ê想法。

對chit種全新ê福氣觀，我半信半疑。M̄ koh聖經是上主ê話，信主了後，我真正tī工作中體會tio̍h上主kā世界tùi「混亂」整理到「有次序」ê成就感kah快樂。 Tùi小小ê家事，kā水槽內kui堆ê lahsap碗盤變成清氣koh有次序ê碗盤，lóng thang經驗tio̍h工作本身帶來ê心花開。

人生經歷siōng sêng開天闢地ê過程是搬厝。Tú結婚ê時，先生是博士班學生，我是神學生，兩个sànchhiah學生租一間公寓裡ê小房間，兩塊冊桌á，一个衫á櫥；無床，直接睏土͘kha，簡單到完全m̄免整理房間，he是「混亂」時期。工作、生kiáⁿ後，租一間三房兩衛，搬厝工人kā 家伙lóngkhǹg tī客廳，我kā集中khǹg ê家伙一一「分開」，「物各照它ê類」。親像耶和華kā光kah暗分開，各種水分開，水kah旱地分開，安設植物tī旱地，安設日月星辰tī天頂，tī天頂安設飛鳥，tī海裡安設水族，tī旱地安設chengseⁿ、蟲thōa kah野獸。上主一項一項「分開」，「物各照它ê類」，hō͘ kui个環境漸漸適合人類來tòa。Á我kā各種物件照使用ê目的一一排列，tùi混亂到有秩序，主人房安設兩人ê物件，gín'á房安設孩童物件，客廳安設電腦kah冊桌；灶kha起火loh，食物chūnchūnê phang味滿四kè，thèng候先生kah gín'á tńg來厝裡享受使用。

上主創造大工ê高峰是創造人類。耶和華先創造亞當，「Hitê人to̍h kā一切ê chengseⁿ、空中ê飛鳥kah山野一切ê走獸lóng號名；總是，chhōe無一个thang做hitê人ê幫贊，來kah伊匹配。」（創2:20）Chit節透露上主ê智慧，祂並無一pái to̍h同時創造男kah女。祂hō͘亞當tī工作中感受tio̍h kakī欠缺相對等ê幫贊者，了後上主chiah創造夏娃。就ánne，當亞當看tio̍h夏娃to̍h讚嘆：「chit pái，是我骨中ê骨，肉中ê肉！Thang稱她做chabó͘人，因為她是tùi chapo͘人身chiūⁿ the̍h出來ê。」（創2:23直譯）華語譯本有漏譯真重要ê「chit pái」（זֹאת הַפַּעַם），to̍h無法度展現亞當早to̍h teh期待，以及願望實現帶來ê興奮。Chit pái，總算出現了一位kah伊相對等ê幫贊者！亞當有夏娃，ē tàng做伙討論參詳chit隻飛鳥，hit隻走獸beh號啥物名。聖經中，工作是兩个人做伙做，比一个人單獨做koh khah有意思。這mā 是日常生活中tiāⁿtiāⁿ有ê感受。

古早時代近東ê創世故事kah聖經完全無仝。創世ê上主無tùi開天闢地ê工作享受tio̍h快樂，á眾神是因為無想beh工作chiah創造人類；人類被造是做眾神á是王室ê苦力。M̄ koh耶和華tī起初to̍h存在，祂自給自足，完全無需要人類做奴隸來幫祂做tāichì。祂是一个享受工作ê上主，祂每做一个段落，tāichì就ánne to̍h成就，iáu ē欣賞kakī所做ê，「上主看tio̍h是好ê」。祂造人類，hō͘人類代表祂來管理世界萬物，也kah祂仝款tùi工作中享受tio̍h智慧kah新意來激tōng，反映出上主ê本質。男女之間，地位mā無分高kē，兩人做伙工作，做伙安歇，做伙榮光上主。

M̄ koh亞當kah夏娃違背上主了後，上主對chabó͘人講：「你一定戀慕你ê翁婿；你ê翁婿一定管轄你。」意思是講夏娃一定ē纏tiâu亞當，控制亞當，m̄ koh亞當mā一定ē管轄夏娃。創3:16 ê「戀慕」（תְּשׁוּקָה）kah「管轄」（מָשַׁל），仝款ê句型mā tī下一章創4:7出現。上主想beh阻止該隱殺害小弟，tāi先警告講：「罪一定戀慕（תְּשׁוּקָה）你，你卻tio̍h制伏（מָשַׁל）它。」提醒該隱罪惡ē纏tiâu伊，控制伊，mā ná親像teh預告人類kah罪惡kôkô纏一生ê悲哀。Á，男女原本ê互相幫贊，成全ê同伴關係，soah扭曲成做互相奴役，管轄對方ê敵對關係。M̄ koh基督徒被救贖了後，應該ē漸漸重頭tńg來到創世之初ê兩性合作狀態。

免工作m̄是福氣；享受工作chiah是福氣！工作前，我謝恩，ē tàng ná親像chitê榮幸teh代表上主，參與治理chit塊地帶來ê成就。工作結束，我學上主欣賞kakī所做ê，感謝上主賞賜智慧kah能力。Ta̍k日享受工作，享受kah別人做伙工作，享受工作了後ê安歇，享受kah別人做伙安歇來敬拜上主。