《Kah陳小小做伙讀台語》

 | | | 轉寄

無名ê老母，奪bē走ê榮光

作者 陳小小，台譯：Lîm ChùnIo̍k 2023.06.25



無名ê老母，奪bē走ê榮光
陳鳳翔

早期台灣人重男輕女，因為chabó͘ gíná是beh嫁出去ê，對原生ê家族無路用，號名m̄免浪費大人ê頭腦，號名做「罔市」á是「罔腰」，隨便養飼大漢ê意思。聖經記載chhng過幾nā千年ê故事，thang看tio̍h古早時代以色列mā呈現重男輕女ê狀況。士師記13-16章，陳述以色列人受非利士人苦毒40年，上主興起士師參孫。參孫ê老母是真重要ê角色，卻被稱做「瑪挪亞ê bó͘」，甚至連她屬tó一个支派mā m̄知。Chit種文學筆法暗示參孫ê老母無hông重視，甚至是hông看輕。M̄ koh耶和華ê使者to̍h是向chit位無名ê婦人顯現，而且iáu顯現兩pái！

Chit位無名ê婦人原本bē懷孕。耶和華ê使者向她顯現，對她講：「看ah，妳是bē懷孕ê，bē生kiáⁿ，m̄ koh妳一定ē有娠，生一个kiáⁿ。Chitmá，妳tio̍h謹慎，薄酒kah厚酒妳lóng m̄ thang lim，一切禮儀上規定ê無清氣ê物，妳mā bē sái食。因為，看ah，妳一定有娠beh生一个kiáⁿ，m̄ thang用剃頭刀剃伊ê頭！因為chitê gíná tùi tī子宮裡，to̍h歸上主做拿細耳人。伊一定ē做頭來拯救以色列脫離非利士人ê手。」（士師記13:3-5原文直譯）

她to̍h去kā in翁講耶和華ê使者對她講話。瑪挪亞無願意聽信婦人ê話，to̍h向耶和華祈禱：「主ah，求祢hō͘祢所差上主ê人koh來阮chia，thang教示阮án怎來款待chitê beh生ê kiáⁿ。」（士師記13:8，《全民台語聖經》）

M̄ koh耶和華ê使者並無向瑪挪亞顯現，顛倒koh一pái去向hit位無名ê婦人顯現，而且顯現ê時，iáu揀瑪挪亞無tī伊身邊ê時。所以，她kantaⁿ tio̍h緊走去chhōe in翁，講：「看ah！Hit工來chhōe我ê hitê人，koh向我顯現。」（10節原文直譯）

瑪挪亞kantaⁿ ē tàng跟tòe牽手到耶和華ê使者hia（正常狀況應該是牽手跟tòe翁婿），耶和華ê使者對瑪挪亞講ê話，kah chìn前對in牽手講過ê話，並無真大無仝，甚至iáu koh khah簡略。「m̄ thang用剃頭刀剃伊ê頭」，「歸上主做拿細耳人」lóng真簡略。

翁á-bó͘兩人感謝上主，獻祭ê火燄tùi祭壇頂chhèng起來，hit位使者tī火燄中上天。In chiah確定hit人是耶和華ê使者，就thánphak tī地上。瑪挪亞真tio̍h驚，對牽手講：「咱一定ē死，因為看tio̍h上主。」她回答：「上主若beh hō͘咱死，一定無對咱ê手接納燒祭kah素祭，koh無kā chiahê一切ê tāichì指示咱，chit時mā無kā咱講chitê tāichì。」（士師記13:23，《全民台語聖經》） 瑪挪亞ê驚惶，反映chit位無名婦人ê冷靜koh khiáu，mā凸顯出她比翁婿koh khah認bat耶和華。

社會文化á是有歧視女性，上主iáu kā該有ê榮光hō͘女性。Hit位無姓名ê婦人，無論hông稱做「瑪挪亞ê bó͘」á是「參孫ê老母」，她被尊榮，耶和華ê使者向她顯現，tio̍h算翁婿祈禱，耶和華ê使者iáu選擇向她顯現。Á她mā親像所有ê老母，委身tī養育gín'á。參孫tī她ê腹肚裡，她kui个有娠期間，to̍h tòe tī拿細耳人ê誓約生活，薄酒kah厚酒lóng無lim，一切禮儀上規定ê無清氣ê物，mā bē sái食。總算，她生一个kiáⁿ，是由她kā嬰á號名叫做參孫。Chitê號名ê殊榮，通常是hō͘家族中尊貴ê長輩á是翁婿，m̄ koh大家願意kā chitê權柄交hō͘ chit位無名ê婦人。

1850年，女性平權運動興起，beh扭轉性別無平等ê問題。傳統觀念裡，「女性」tio̍h透過「老母」、「母職」chiah ē得tio̍h榮光。所以女性主義者盡力推翻「老母是chabó͘人宿命」ê傳統觀念，極力提倡女性無結婚無生kiáⁿ mā有自我ê價值，鼓勵女性tīkhangkhòe場頂面發光發熱。真chē女性連連行出家庭，mā有證明女性ê工作kah thàn錢能力bē輸男性，女性ê地位大幅提高。M̄ koh m̄ thang siuⁿ離經，chitmá kui个主流觀點看bē起全職老母，女性chit pái變成無法度退出khangkhòe場，照kakī ê意願選擇tī厝裡做老母。

世俗ê想法流轉變動無soah，基督徒有gŏa幸運，跟tòe ê是永遠ê上主。Tī chìn前，主流文化看輕無結婚、無生kiáⁿ ê女性，真chē單身基督徒女性mā完成上主ê呼召，得tio̍h榮光。到chitmá，主流文化看輕全職ê老母，已經結婚ê基督徒女性ē tàng選擇做職業婦女，mā ē tàng安心自在選擇tī厝裡做全職ê老母，兩者lóng有對上主ê委託盡忠。Á to̍h是親像hit位無名ê婦人被稱呼做「某某人ê bó͘」á是「某某人ê老母」， koh有tùi天頂來、啥人mā奪bē走ê榮光。Tī基督裡ê女性，有真正ê自由，無koh受限制tī世俗社會文化。