《Kah陳小小做伙讀台語》

 | | | 轉寄

悔改，是起身行一條正確ê路

作者 陳小小，台譯：Lîm ChùnIo̍k 2023.11.12

悔改，是起身行一條正確ê路

「悔改」是啥物意思？Chiahni̍h簡單，我kám m̄ bat？若我得罪啥人，to̍h去kah天父上主認罪祈禱，續接去kah hitê人道歉，這to̍h是悔改ah。M̄ koh入來原文內面，chit種只有算是「一半ê悔改」。

這是因為華語聖經ê「悔改」，譯自希臘文μετανοέω，偏向一種心理層面ê感受，指當事人對現有ê性命狀況，感覺見笑、自責kah悔悟。M̄ koh，新約聖經chih載ê是使用希伯來文ê以色列人思想，因為ánne「悔改」tio̍h對應到希伯來文ê「迴轉」（שׁוּב）。後者ê意思m̄是kantaⁿ停留tī心理層面，koh khah在tī當事人原本行tī錯誤道路，心內有察覺m̄ tio̍h，就ánne「回頭轉向」正確道路行。也to̍h是，שׁוּב比起μετανοέω koh khah富含連續ê行為。

「悔改」kah「迴轉」兩者ê差別，thang用路加福音十五章耶穌講ê浪子故事情節去理解：一个人有兩个kiáⁿ，不肖（putsiàu）ê屘á kiáⁿ對老父要求分財產，老父to̍h kā產業分hō͘ in。屘á kiáⁿ無幾工to̍h kā伊一切所有khoánkhoánleh，往遠遠ê所在去à。伊tī hia，隨便使癖（sáiphiah）樂暢開錢，就ánne kā所分tio̍h ê財產開了了，koh tú tio̍h hit所在大饑荒，to̍h變sàn，koh chhōe bē tio̍h好頭路，就ánne去做以色列人看做是siōng lâsâm kē賤ê飼豬khangkhòe。Tio̍h算有一份食ē飽ê工作，伊iáu三不五時餓kah苦bē得thang the̍h豬食ê物來充飢，m̄ koh人寧可kā食物hō͘豬食，mā bē giàn hō͘伊食。

屘á kiáⁿ sànchhiah kah悽慘落魄，行到人生ê siōng kē層，就ánne醒悟lah，想tio̍h老父有真chē chhiàⁿ工，口糧有chhun。伊心內按算講：「我behtńg去，去阮老父hia，向伊講：老父！我得罪天，koh得罪你；tùi taⁿ以後，我無資格做你ê kiáⁿ，kā我當做一个chhiàⁿ工好lah！」（路加福音15:18-19）

Chia「kā我當做一个chhiàⁿ工好lah！」表現屘á kiáⁿ是徹底知影kakī m̄ tio̍h à，明白過去ê分財產離家舉動是何等个忤逆，伊連做老父厝裡ê奴僕都無資格，而且想tio̍h tńg去厝裡chhōe老父。Chia ê心理層面ê後悔感受，óa近希臘文「悔改」（μετανοέω），對現有ê性命狀況感覺見笑、自責kah悔悟。

M̄ koh，屘á kiáⁿ續落來ê動作，chiah真正表現希伯來文ê「迴轉」שׁוּבê真諦。「就ánne起來，往in老父hia去。相離iáu遠，in老父看見，to̍h動起慈心，走去攬伊ê頷頸，連續kah伊chim。」（路加福音15:20）

「迴轉」（שׁוּב）帶有「道路」ê概念，hō͘我注意tio̍h人生各種連續行為帶來ê後果。有人原本是溫柔善良、疼gín'á ê老母，m̄ koh道路行leh行leh，後來soah kā gín'á當做工具人，beh tùi gín'á身chiūⁿ得tio̍h各種好處。Á gín'á jú來jú擋bē tiâu，就ánne親子關係疏遠。有人原本是為主獻出koh疼羊群ê牧者，m̄ koh道路行leh、行leh，後來kā會眾當做kakī趁錢ê工具。會友jú來jú擋bētiâu，就ánne就換教會。有人原本kantaⁿ看māi開黃腔ê kún笑節目，m̄ koh道路行leh行leh，看A片mā無要無緊，siōng尾chhòng無清楚現實kah想像，向女性腳來手來，soah來食官司。有人起初kantaⁿ是隨手the̍h辦公室ê文具，m̄ koh道路行leh行leh，siōng尾soah來動用公款。無人一開始to̍h是大pháiⁿ人，lóng是行leh行leh，連續行為ê累積，性命ê粒á jú來jú大，終其尾to̍h來爆炸，霧kah霧sàsà。

了解「道路行leh行leh，連續行為累積」ê驚人，hō͘我開始重視每一个細細ê決定。親像去市場買菜，頭家加找kóa錢；我kám tio̍h退還hō͘頭家？Á是偷偷á歡喜ka收落來？若是我選擇後者，無人知影，m̄ koh可能就ánne行上一條貪婪之路，未來真有可能貪其它ê物件。

關係希伯來文ê「迴轉」（שׁוּב），mā ē tàng用詩篇第一篇來體會。詩中提起人生有兩條道路：義人ê道路kah pháiⁿ人ê道路，以及有福ê人喜愛耶和華ê律法。律法（תּוֹרָה）ê意思久長以來hō͘ 人誤會，它m̄ kantaⁿ是一條條誡命，koh khah óa近原文ê意思是「教導」。תּוֹרָה（koh翻譯做「妥拉」）是上主ê教導、上主ê話語，是人tī道路行leh行leh hit時ê腳前ê燈kah路chiūⁿ ê光。

人生道路是連續行為ê累積，每一件行為若牽涉tio̍h善惡，lóng tio̍h用上帝ê話語來檢視，了解kakī到底是行tī義ê道路，á是惡ê道路裡？靈修ê時讀經，暝日思想kah出聲誦讀上主ê教導，ná親像kā路裡ê燈the̍h起來照，徹底了解生活中ê連續行為，若有偏差，行路ê人ē tàng及時「迴轉」（שׁוּב），這to̍h是悔改ê真實意義。悔改是起身行一條正確ê路！