《Kah陳小小做伙讀台語》

 | | | 轉寄

你kám ē是一个m̄ bat十字架ê人？

作者 Virginia Yip，台譯：Lîm Chùn Io̍k 2021.10.31

陳小小踏話頭：

華人大部分是實用主義者，我mā無例外。信耶穌lóng有chit个想法：「信耶穌有啥物好處？」，我當然mā是。

M̄ koh，信耶穌三十gōa年，我漸漸發見當初想beh ài ê好處，chitmá看起來lóng是次要ê恩典。當初感覺無án怎ê好處[親像—上帝kakī、愛ê關係]，後來chiah發見hiah个 chiah是核心ê恩典。

本期信望愛電子報提醒ta̍k位基督徒，「若是因為順境、因為一切lóng達到願望chiah來做基督徒，chit个人乃是m̄ bat十字架ê人。」

Ta̍k人lóng ǹg望順境，我mā無例外，m̄ koh耶穌賞賜hō͘我當初意想bē到ê恩典：「tī逆境，有祂同在。」靠上帝ê恩典，我chiah jú來jú認bat十字架。願你我無停留tī初信ê時，滿腦kantaⁿ想beh ài次要ê恩典，看bē tio̍h koh khah重要ê核心恩典。


【你kám ē是一个m̄ bat十字架ê人？】文/Virginia Yip

Any person who only sticks with Christianity as long as things are going his or her way, is a stranger to the cross. ──Timothy Keller


若是有人因為順境、因為一切lóng達到願望chiah來做基督徒ê話，chit个人乃是m̄bat十字架ê人。

──提摩太‧凱樂
Ē記得我讀大學ê時，to̍h是Chiná tútú改革開放無gōa久ê時，hit時ê Chiná留學生來到海外，tī接觸tio̍h基督教信仰ê時，in問ê第一个問題是：「你án怎證明上帝是真實ê？」意思to̍h是講，若是基督徒ē tàng證明基督教是真理，伊to̍h信。

M̄ koh，今á日ê Chiná人neh，你傳福音hō͘ in，in問ê第一个問題卻是：「信耶穌有啥物好處？」


真正ê需要




有一工，有基督徒tī社群裡問我chit个問題，我kā她ê問題kah我ê回答列tī下kha。

問：Virginia，我想beh問一下，若是有人問妳為啥物beh信，信有啥物好處，妳án怎回答？

答：Chit種問ê人，背後有一个前提，to̍h是「信耶穌有好處，我chiah信」。Ánne，妳to̍h問伊，伊想beh ài啥物款ê好處？了後妳koh再解說hō͘伊聽，伊想beh ài ê hiah个好處lóng m̄是真正ê好處，伊ē hiah追求hiah个物件，to̍h是因為伊心內有一个koh khah大ê需要。Á伊ē hiah有hit種需要，to̍h是因為伊ê罪hō͘伊kah造伊ê主斷絕關係，致使心靈產生一个大ê空虛。

事實上，真正ē tàng滿足伊ê需要，真正ē tàng填滿伊hit个心靈深深所在ê空虛，kantaⁿ有耶穌基督ê福音，因為chit个福音to̍h是beh解決人根本ê問題，mā to̍h是罪ê問題。當然，這只不過是一个原則，講tio̍h妳án怎ē tàng針對每一个人ê問題去回答，án怎ē tàng chhōe出in ê心靈究竟ǹg望啥物，án怎用基督豐富ê福音來對症下藥，tio̍h看妳ê功力，mā to̍h是ài靠妳對chit个信仰ê認bat lah。


真正ê滿足



其實chit个原則，基督徒並m̄是m̄知，m̄ koh in竟然ē問出ánne ê問題，to̍h表示in kakī mā m̄知基督ê福音是啥物，koh khah m̄知基督ê福音án怎ē tàng滿足人心靈各式各種ê渴望kah需要。換句話來講，in kakī mā講bē清楚信耶穌有啥物好處。

Á是in想講，對人傳福音，一開始to̍h講罪，別人真oh接受，所以，先講kóa信耶穌hō͘人帶來ê好處，先kā人siâⁿ來到教會裡，了後koh再慢慢á kah in講關係罪ê tāichì。

結果，教會裡to̍h充滿一大堆向上帝ài好處，ài上帝保平安，卻m̄知kakī有罪ê「基督徒」。M̄知kakī有罪ê人，當然mā bē感覺in需要十字架ê救贖，所以，十字架ê信息對in來講，除了主日敬拜ê時有tang時á ē唱tio̍h幾句以外，基本上是生份ê，是一个無實際ê概念，是無要無緊ê，是thang有thang無ê。

有一pái，一个會友kā我講：「是án怎咱ta̍k禮拜lóng tio̍h唱十字架ê詩歌？這人人lóng知影à，總是唱chiah个，kám m̄是真煩？基督教iáu有chiahni̍h chē詩歌thang唱，kahná〈主是我力量〉之類ê ah！」 一个真正認bat基督十字架ê人，ē對十字架有唱bē完ê oló kah感恩，m̄ koh，一个認為kakī早to̍h明白十字架ê救恩，卻對he jú唱jú煩ê人，伊定tio̍h是一个m̄ bat十字架ê人。換句話來講，伊前到taⁿ m̄ bat是基督徒。遺憾ê是，咱今á日傳福音所帶入教會中ê，tútú to̍h是一批koh一批chit種ê人。