《歷史上ê主耶穌》

| | | 轉寄

第十三章_一 試煉kah受難

(公元30年四月)

一)有信心一定ē-tàng移山投海(公元30年四月2日禮拜一)
偤太人ta̍k年慶祝Poâⁿ過節ê時,tòa tī各國各地ê偤太僑民lóng ē tńg來耶路撒冷參加;因做人數真chē,所以慶祝活動前後約有7天之久。

耶穌ta̍k年lóng ē chhōa門徒來耶路撒冷參加節慶,chit pái tńg來特別騎驢á-kiáⁿ進入聖城,受tio̍h群眾the̍h棕樹枝沿路歡迎,koh沿途歡呼o-ló上帝講:「和散那,奉主ê名來ê hit位應該得tio̍h o-ló!」(約翰12:13)。當時參雜tī歡迎耶穌入城做王ê偤太人群眾中ê法利賽人、撒都該人(真chē人是祭司)kah文士,看tio̍h此情此景,心內無無因為嫉妒生厭恨(iàm-hīn),soah叫耶穌tio̍h阻止祂ê門徒mài kah眾人同聲án-ne喊hoah;同時in koh想起經上ê話記載:「錫安ê cha-bó͘ kiáⁿ,m̄免驚!看!Lín ê王騎驢á-kiáⁿ teh來ā。」(約12:15)。就án-ne,in真驚chit句預言真正to̍h tī chit時應驗,而且應驗tī拿撒勒人耶穌ê身chiūⁿ,所以,in koh khah積極想beh用陰謀除掉耶穌。M̄-koh,chit項tāi-chì恐驚hō͘一般人民知影,起來反抗,顛倒ē the̍h石頭kā in phah死,所以,in m̄敢隨便下手。 M̄-koh,chit時in mā chhōe-tio̍h一个政治上ê理由thang聲請羅馬總督彼拉多,以「偤太人ê王」ê罪名控告耶穌講:「耶穌beh背叛羅馬帝國,帶領偤太人起革命,反抗羅馬ê統治,而且重建Ta-bi̍t王國,thang好脫離kah羅馬ê關係。」了後,當in看tio̍h耶穌tī聖殿教導人ê時,lóng ē趁機會chhōe出真chē偤太人ê律法kah政治問題來試探耶穌,想beh掠耶穌回答in ê話柄,來kā耶穌定罪,處死。

話講:耶穌tī猶太人慶祝Poâⁿ過節活動ê第二工早起時,tùi伯大尼來聖城ê時,因為祂透早lóng ē出去野外靈修祈禱,無tī馬大、馬利亞kah拉撒路ê厝食早頓就離開伯大尼,所以,祂餓ā,看見路邊有一欉樹葉茂盛ê無花果樹,就行到頭前,想beh tī樹á頂chhōe一kóa果chí來食,m̄-koh chhōe bē-tio̍h,就對chit欉樹講:「Tùi taⁿ以後,永遠無人食你ê果chí。」就án-ne,hit欉無花果樹連根都隨時枯乾去;祂ê門徒看tio̍h,lóng驚kah gāng去,講:「老師,請看!你所咒詛ê無花果樹已經枯乾去。」耶穌回答in講:「Lín當信服上帝。我實在kā lín講,無論啥人對chit座山講:『徙去thiām海!』伊ê心內若無憢疑,相信伊所講ê一定會實現,chit-ê tāi-chì to̍h一定會照伊ê意思實現。所以,我kā lín講,lín祈禱無論求啥物,tio̍h相信已經得tio̍h,就lóng會照án-ne實現。」Lín Lín khiā-teh祈禱ê時,若想tio̍h有人得罪你啥物,tio̍h kā伊赦免,lín ê天父mā會赦免lín ê過失:「若想起有人得罪lín,就當赦免伊,thang hō͘ lín tī天頂ê父mā赦免lín ê犯錯誤。」(馬可11:12~14 kah 20~26,馬太21:18~22)。

究竟該赦免得罪咱ê人幾pái chiah好?關係chit-ê問題,耶穌bat對門徒講:「Lín家己mā tio̍h謹慎!Lín ê兄弟若犯罪,tio̍h kā伊責備。伊若悔改,tio̍h kā伊赦免。 4 若你ê兄弟一日得罪你七pái,伊koh七pái lóng有倒tńg來kā你講:『我悔改à。』你mā lóng tio̍h kā伊赦免。。」(路加17:3-4);彼得mābat問耶穌講究竟tio̍h赦免伊gōa chē pái chiah夠額?耶穌回答伊講:「七十个七pái。」(馬太18:21~22),意思是講,tio̍h無條件完全赦免hit-ê得罪咱ê人;因為tī主禱文內底,耶穌bat坦誠教導咱講:「求祢赦免阮ê辜負,親像阮mā有赦免辜負阮ê人。」koh講:「因為lín若赦免人ê過失,天父mā會赦免lín。Lín若無赦免人ê過失,天父mā無beh赦免lín ê過失。」(馬太6:12,14,15)

Koh再講:耶穌對門徒講:「祈禱ê時,lín所求ê,若有信心就會得tio̍h。」(馬太21:22)kah「赦免人ê道理」了後,門徒就對耶穌講:「使徒kā主講:「求祢加添阮ê信心。」主應講:「Lín若有親像一粒芥菜籽hiah大ê信心,to̍h是命令chit叢桑材樹講:『拔你ê根去栽tī海裡』,hit叢樹mā會順服lín。」(路加17:5、6),究竟芥菜種sêng啥物?耶穌講:「芥菜chí是種chí中間siōng細粒ê,m̄-koh,大欉起來,比所有ê菜蔬koh khah大欉,成做一欉樹,連空中ê鳥á都飛來tī樹枝做巢。」(馬太13:32,馬可4:30~32,路加13:18~19)

請大家摸心肝想看māi:「做任何tāi-chì ê時,我ê信心kám有親像芥菜種hiah-ni̍h細?Á是koh khah大?」所謂信心m̄是「食好膽藥á,phah胸坎á講大聲話」,卻是「謙卑專心信靠上帝,只要盡力來做,上帝一定幫贊你完成」。英文是講 “Do your best, God will do the rest!” M̄-koh,一般人kan-taⁿ ē記得“Do your best”,soah bē記得下半句 “God will do the rest”!這m̄是信心。Kan-taⁿ靠ka-kī盡力來做,大多數ê事件lóng是ē事倍功半;若是一旦成功,伊ê成功kan-taⁿ ē風神ka-kī ê努力,bē榮光上帝。