《《一位台灣女信徒ê自述》》

 | | | 轉寄

第一章 12）盧溝橋事件發生

作者 吳月娥, 台譯：Lîm Chùn-io̍k 2020.06.07

1938年，tī中國大陸ê盧溝橋事件爆發了後，日本ê侵略戰爭湠開到kui个中國。「替天行道，打擊不義；我是忠勇無比ê戰士；歡呼ê聲teh送別；chit-má khiā tī父母ê祖國；無戰贏無beh tńg來，勇氣ê心來chiù-chōa」；學生頭殼頂pa̍k布條，身穿運動服，手gia̍h國旗，沿路唱chit首軍歌，沿路穿過淡水街á teh遊行。回想起來，日本ê野心實在真可恨。Hit當時，雖然我對日本統治台灣並無任何怨嘆，m̄-koh，我討厭in siàu想別人土地ê野心。總是，tī 1895年日本軍隊進駐台灣了後，真chē文化kah建築，親像公學校、中學校、大學、病院、南北縱貫鐵路、總督府、博物館、動物園等等，無人ē-tàng否認hia-ê lóng是日本人ê手起造ê。

阮gín-á人唯一接觸ê日本人kan-taⁿ是學校ê老師；我認bat ê日本人老師lóng是溫柔koh有疼心ê老師。有坂校長盡全力teh重建淡水中學，因為淡中kah淡女chìn前是由外國人經營，因為án-ne，soah無法度得tio̍h日本學校ê畢業資格，所以學生畢業了後beh升學，一定tio̍h先轉學到政府認可ê學校，koh再讀一年去the̍h tio̍h畢業證書，了後chiah ē-tàng參加升學考試。M̄-koh，tùi淡水中學畢業beh轉學去台灣ê公立中學是無可能ê，所以，淡水中學ê畢業生tio̍h先轉入東京ê私立中學，tī hia得tio̍h畢業證書了後，chiah ē-tàng繼續讀大學。有坂校長鼓勵老師專心斟酌來提高學生ê學業能力，一年後，beh向教育部申請淡水中學kah淡水女學院ê升級考試。我tī三年級ê第一學期尾，chit項考試開始實施。Tùi一年級到四年級，ta̍k个年級所有課程ê考試題由台北第三高等女學校ê老師出題，監考老師mā是第三高女ê老師。