《《一位台灣女信徒ê自述》》

 | | | 轉寄

第一章 15）我ê朋友

作者 吳月娥, 台譯：Lîm Chùn-io̍k 2020.06.28

好字運ê是，我ê真chē朋友lóng是熱心ê基督徒。阮相信若是阮有仝款ê宗教信仰，阮被召ê hit工ē照上帝ê旨意見面；這是Argo kah Tyler老師教ê。

邱秀梅女士，我細漢ê時to̍h用日語稱她做「梅/うめ」；她畢業後第三年，to̍h嫁去遙遠ê廈門，聽講新郎是廈門siōng好額ê富豪，有真chē奴僕，她ê生活ná親像女王。M̄-koh，tī共產黨落南ê無gōa久chìn前，她帶五萬美金ê銀票，kā kui个家庭徙tńg來台灣，tī台北市太平町買厝，koh開始投資金礦，m̄-koh，無幾年to̍h kā所有ê財產了kah空空空，她ê翁婿koh患tio̍h憂鬱症來往生。她ê翁婿本來to̍h是一个富裕ê放蕩kiáⁿ，kah thàn錢lóng無緣，致使家庭ê債務tio̍h由梅來phāiⁿ，koh tio̍h養飼兩个gín-á kah她ê ta-ke。Hit當時，美軍進駐台北，梅想beh去做管家thàn錢，所以來拜託阮紹介一个想beh chhiàⁿ管家ê人。Hit當時，tī台北tú成立一間新ê國華保險公司，她to̍h成做一个招保險ê人員。她ê頭一个客戶是阮用兩个cha-po͘ kiáⁿ ê名義，買一人一萬元ê保險。梅ê後頭厝mā是基督教徒，她自細漢to̍h讀過主日學，所以她對ta-ke mā盡sim-pū ê本份，做一切該做ê khang-khòe。Ta-ke hō͘ 她ê有孝感動來信教；雖然無負責任ê翁婿病倒，而且死tī外口，m̄-koh，梅猶原獻身，照顧她ê ta-ke到底。Chit-má，梅kah商業界出名ê功學社ê總裁謝敬忠先生再婚，而且建立一个老來ê幸福家庭。她耐心kā翁婿引chhōa來會堂，做伙行信仰ê道路，充滿得勝ê喜樂。

曹從鄉女士ê日本名叫順子，她嫁hō͘ 林榮彰先生，是一个一生無風波ê幸福ê人。她ê翁婿疼她，她ē-sái講是tī溫室長大ê一蕊花。她有一男一女，cha-bó͘ kiáⁿ嫁醫生，chit-má tī洛杉磯開業。伊ê kiáⁿ林神佑先生是婦產科醫生，是一位出名ê醫生，專門治療女性ê不孕症。我ta̍k pái tńg去台灣，lóng ē得tio̍h從鄉女士ê盛情款待。榮彰先生兩年前往生；從鄉ê全家mā是熱心ê基督徒。

李妙好女士（妙子），她是出名ê作曲家郭子究先生ê牽手。她ê翁婿以音樂、作曲來出名，m̄-koh，伊是一个自學成才ê人，無上過正規學校。伊人真謙卑；伊bat對我講：「我對不起妙子。我出世tī一个sàn-chhiah ê家庭，無法度讀中學，妙子卻是高等女學校畢業，m̄-koh她無棄嫌嫁hō͘ 我。」郭先生是花蓮港長老教會ê長老。

黃彩鸞女士（千鶴子）。千鶴子女士chit-má是雲林縣ê議員，是一个照字面ê女強人；她行路ê pān kah講話ê氣口lóng有真吸引人ê所在。以下是阮做伙坐計程車ê時發生ê故事：她問司機tī選舉中beh支持tó一個派系，民進黨á是國民黨？司機回答講民進黨ê時，她大歡喜，落車ê時，除了付計程車錢以外koh hō͘ 伊100元，拜託伊繼續支持民進黨。

呂相宜女士（千代子）。她四十歲ê時，她ê翁婿tī山球（golf）場因為心臟病發作，忽然往生。她無再婚，獨自撫養kiáⁿ兒過她ê一生。她ê屘cha-bó͘ kiáⁿ來美國留學，tī chia結婚，夫婦lóng tī IBM工作，所以，千代子有幾nā pái來New York看她ê cha-bó͘ kiáⁿ。 劉德音女士（德子）。她是tī淡水高女kah我爭一、二名ê對手，m̄-koh阮並無嫉妒，顛倒彼此相疼，做伙學習；大學畢業了後，她mā tī琦玉縣岩槻ê金子齒科病院kah我做伙學習，阮是互相照顧ê密友。我比她khah先結婚，tī我kah翁婿疏開去北海道，tī hia beh生產ê時，她無先kah我參詳，to̍h停止工作，ka-kī一个tùi岩槻來到北海道ê夕張炭礦病院，來照顧我做月內。她無聽金子齒科病院頭家娘ê阻擋，執意講：「若是我無去照顧tī hiah-nih寒冷ê北海道生產ê南海子，我真bē放心。」頭家娘kah-ná無法度理解台灣人chit款ê友情。Tńg來台灣了後，德子tú-tio̍h蔡清満醫師，而且kah伊結婚，生一男兩女，過tio̍h健康ê家庭生活。德子是牧師ê cha-bó͘ kiáⁿ，信仰真好，是一位虔誠koh友善ê女醫生，患者真疼惜她；她tī 1994年六月往生。

鄭雲女士（晴美）。她、德子kah我三人tī畢業典禮後ê隔tńg工，to̍h坐富士丸來chhōe日本ê好朋友。她ê阿兄來神戶kā阮迎接，mā chhōa阮去看寶塚少女歌劇，hō͘ 阮實現少女ê夢。Tī學校開學chìn前，阮一直tòa tī in tī東京ê厝。晴美是台中縣田中大富豪ê千金，tńg來到台灣了後，她成做基隆病院ê藥劑師，tī hia kah一位婦產科醫生結婚，生育一男二女，m̄-koh，in翁無phah算soah來往生，享年40歲。她bat幾nā pái chhōa三个gín-á來台北阮tau chhit-thô，猶原真開朗。M̄-koh，有一工她卻自殺離世；為啥物她beh放下幼兒neh？我感覺真奇怪。十三年前，她ê長女悧悧khà電話hō͘ 我，我kah阮翁去機場接她，chhōa她來阮tau tòa幾工，阮翁chiah koh送她tńg去費城ê學校；了後，她有時ē來紐約拜訪阮。

石芬陸女士(睦子)。阮ta̍k人lóng承認睦子是一个文學少女，她有真chē夢想kah詩情畫意，嘴裡tiāⁿ-tiāⁿ大聲teh吟和歌（日本詩、俳句）。她kah我仝款去東京學習齒科，tī東京結婚，生一个cha-po͘ kiáⁿ。當我tùi日本tńg來ê時，阮tī台北車頭相tú，hit當時，我kah她lóng手抱gín-á；he已經是五十年前ê tāi-chì à。她有四个gín-á，m̄-koh，不幸ê是tī一pái交通事故中，她失去她ê翁婿。她ê四个gín-á lóng有好成就。Tio̍h算是chit-má，當我tńg來到台灣ê時，她iáu是ē專工tùi台中來，繼續teh加深阮ê友誼。

黃菊鄉女士（鄉子)。她是一个可愛ê細粒chí cha-bó͘ gín-á，她人瘦koh矮。她熱愛音樂，比班裡其他任何人lóng khah gâu彈鋼琴，有她來伴奏ê合唱，lóng ē hō͘ 人bē記得時間ê流失。她ê溫柔ê翁婿六十歲ê時，tī練習網球ê時，忽然跋倒soah往生。In ê兩个cha-po͘ kiáⁿ tī西雅圖留學，koh lóng tī hia結婚、定居。她mā tiāⁿ-tiāⁿ ē來西雅圖，有時ē kā我khà電話。五、六年前，我kah翁婿去加拿大洛磯山脈遊覽，tńg來ê時經過西雅圖，她ê cha-po͘ kiáⁿ溫明豐先生來chhōa阮去參觀水族館。她是主耶穌ê忠實奴僕，chit-má iáu是台北市濟南教會ê長老。她是一个非常致力tī傳福音ê人，有一工teh kah阮做伙坐計程車前往士林ê時，她想beh向計程車司機傳福音。M̄-koh，當司機對基督教有pháiⁿ評論ê時，阮感覺真狼狽，m̄-koh，她真大方講：「馬太福音5：11-12，耶穌講：Lín若為tio̍h我ê緣故hō͘ 人侮辱、迫害、譭謗，就實在有福氣。Tio̍h歡喜快樂，因為lín tī天頂有真大ê報賞。Lín古早ê先知mā是án-ne hō͘ 人迫害。」