《《一位台灣女信徒ê自述》》

 | | | 轉寄

第一章_2）小學生時代ê我kah日語演講比賽ê回憶

作者 吳月娥, 台譯：Lîm Chùn-io̍k 2020.03.29

Tī我四歲hit年ê四月，我入學，去讀頭圍公學校。開學ê前一工暗時，我kā阿母替我做ê新衫褲khǹg tī枕頭邊，koh kā買hō͘ 我ê白色新運動鞋mo͘h-leh睏。Hit時ê生活真正是真質素，真少人有鞋thang穿，大人kah gín-á lóng thǹg赤腳。我mā是kan-taⁿ tī開學hit工chiah穿鞋，tùi第二工起to̍h thǹg赤腳去學校。我一直kā鞋顧kah真好勢，kan-taⁿ tī節日kah遊覽ê時chiah ē穿鞋。

阮hit班總共有40名，男生25名，女生15名，老師是一位tùi台北第三高等女學校畢業ê少年cha-bó͘ 老師；校長是日本人加藤先生。女生tùi四年級開始to̍h有裁縫ê時間，教阮án怎製作簡單ê衫褲、刺繡kah編織品。因為公學校ê裁縫教育，阮老母chiah ē-tàng製作家庭服裝。春季ê公學校運動會是田庄ê一个大活動，運動埕周圍四界lóng是村民，對各種運動比賽kah跳舞表演，掌聲一直無停。Tī舊曆新年，學校koh有舉行遊藝會，兩個月前to̍h選出siōng優秀ê學生來表演戲劇，我mā被選做主角。

六年級ê時，有一个宜蘭郡舉辦ê日語演講比賽，男生代表是班裡第一名ê簡阿財，女生是選我做代表。Tùi比賽ê一個月前，阮to̍h開始下課後ê特別培訓，由稻田老師指導。阮去老師ê宿舍，hō͘ 老師糾正tī台頂ê講話方式、姿勢kah語氣聲調。阮m̄知演講ê主題是啥物，因為題目是臨時決定ê，m̄-koh老師有hō͘ 阮各種各樣ê題目，來kā阮訓練。 稻田先生是一年前tùi東京來就任ê老師，伊新婚ê牽手是一个細枝骨koh白phau-phau ê美人，特別培訓ê時，她一定ē請阮食羊羹（ようかん）。

Chit-ê演講比賽關係tio̍h學校ê名譽，致使老師比學生koh khah關心。校長kah稻田先生為tio̍h beh試看阮ê膽量，所以兩pái tī早起ê聚會中，叫阮tī全校學生ê面前講話。校長非常滿意，因為兩pái lóng真好勢。

Tī宜蘭男生公學校舉行演講比賽ê日子終其尾到à。我身穿老母做ê有十六个kéng ê烏百kéng裙kah白色運動服，kah稻田老師、校長阮四人，做伙坐早起七點發ê火車去宜蘭。Tī男校大禮堂，八點半開始抽籤決定順序kah題目。我排第三名，題目是「禮拜日」。我到taⁿ iáu m̄-bat練習過「禮拜日」chit-ê題目，所以，忽然感覺操心kah不安，kah-ná ka-kī kui个身軀漂浮tī空中。頭一个，第二个了後，叫「第三號」ê時，我趕緊khiā起lih講台頂，開始演講。

「我ê題目是禮拜日。禮拜日是我siōng kah意ê一工，tùi拜一到拜六我一定tio̍h去學校讀冊，第七工是禮拜日，學校歇睏。禮拜日m̄-nā學校關門，銀行mā無服務。禮拜日，我mā ē chhōa小弟kah小妹做伙去sńg。阮是基督教徒家庭，禮拜日我ē去參加主日學。To̍h是án-ne，到chia為止。」

演講真短koh無啥物內容，我心內充滿非常gāi-gio̍h ê感覺。Tī回程ê火車頂，老師恬恬無講話，阮彼此lóng感覺真gāi-gio̍h。對我來講，chit-ê演講比賽並m̄是一个美好ê回憶，m̄-koh因為某種原因，hit當時ê情景猶原tī我ê眼中teh發燒。Hit時我chiah 12歲。