《《一位台灣女信徒ê自述》》

 | | | 轉寄

第一章 我ê背景kah少女時代_ 1）父母

作者 吳月娥, 台譯：Lîm Chùn-io̍k 2020.03.22

1）父母 我是1921年十一月出世ê台灣人。當時ê台灣是日本ê殖民地。日清戰爭中，中國清朝被日本phah敗，而且根據tī下關（しものせき）簽署ê和平條約（即《馬關條約》），台灣開始受日本統治。

我ê本籍地是台灣宜蘭郡頭圍庄，背山向海，人口約一萬人，是一个農業兼漁業ê鄉村。阮阿媽生十个kiáⁿ，八个cha-po͘ kah兩个cha-bó͘；阮老父吳來發是大kiáⁿ，18歲ê時kah大伊一歲ê cha-bó͘人結婚，to̍h是阮老母林阿換。

阮老母八歲ê時，她ê老母往生；隔tńg年她ê老父koh娶，後母ài她做家事ê差用，致使阮老母soah無法度去學校讀冊。所以，tī她嫁hō͘ 阮老父一個月後，她chiah koh再進入公學校ê六年級。1895年日本佔領台灣了後，tī各地建立公學校，等於是日本ê小學。真chē日本人tòa ê所在chiah有日本小學，to̍h是hō͘ 日本政府官員、警察、學校教師kah seng-lí人ê子弟讀ê小學。台灣人讀ê公學校是hō͘ 七歲以上ê gín-á入學，讀完六年畢業。

結婚後無gōa久，阮老母有娠ā。Tùi我tī阮老母ê腹肚開始，我to̍h一直teh讀冊，所以我hō͘ 人笑講：「你應該比任何人koh khah聰明。」

阮老母是一个文雅端莊koh賢明ê好主婦，她是宜蘭郡出名總舖師ê cha-bó͘ kiáⁿ，所以她m̄-nā真gâu煮食，而且tī裁縫方面mā真熟練。阮老母為阮kui个家庭製作所有ê衫褲，包括老父ê九个兄弟姊妹kah祖父母。好字運ê是，阮老母有一台阿公tùi美國進口ê裁縫車á，她暝日無停teh踏ê情景，我到taⁿ iáu ē記得。

阮老父tùi頭圍庄公學校畢業，而且kah阿公tī頭圍庄停車場前開設一間運送店。日本佔領台灣以後無gōa久，tī台灣建立一條南北縱貫鐵路，而且tī 1908年開通基隆到高雄。無gōa久了後，宜蘭線，to̍h是台北到蘇澳線mā開通。因為頭圍庄是農產品kah魚類ê產地，所以chit條鐵路成做商業不可缺ê交通線。頭圍庄有兩間互相競爭ê運送店，阮老父ta̍k早起，天iáu未光to̍h醒起來，騎自轉車去離街á真遠ê作穡人á是漁民ê厝，去bāu運送ê khang-khòe。阮老母kā我講，阮老父非常認真koh負責任。阮tau m̄是富裕，mā m̄是sàn-chhiah，ē-sái講是中等ê家庭。我是長男ê長女，tī父母、祖父母kah老父五个小弟ê疼之下長大。