《《一位台灣女信徒ê自述》》

| | | 轉寄

第一章 6)養女ê風俗kah小妹月美

當時tī台灣,有一種風俗大家lóng知,to̍h是嬰á出世了後,若是cha-bó͘ gín-á tio̍h ē隨時pun人。阮老母是一个溫柔順良ê好sim-pū,m̄-koh,她無考慮ta-ke ê想法,無想beh kā頭胎ê cha-bó͘ kiáⁿ pun人;阮老母有teh考慮,beh kā我留tī厝裡養飼。我三歲ê時,老母第二pái有娠。她暝日私下祈禱koh來ê是cha-po͘ gín-á,m̄-koh,iáu是cha-bó͘ gín-á。Chit-ê cha-bó͘ kiáⁿ月美五個月大ê有一工,我ê三叔吳金枝ê bó͘ chhōa她後頭厝ê老母來;三嬸mā是十二歲ê時to̍h pun hō͘ 人做養女,m̄-koh我嬰á ê時差不多lóng是她teh kā我照顧。

「阮sim-pū ê嬰á最近死去,hō͘ 她非常艱苦心,所以想beh pun一个sim-pū-á....」

阮老母聽tio̍h ê時,to̍h想beh kā月美pun hō͘ 她。Hit當時,beh撫養兩个cha-bó͘ kiáⁿ,對父母來講真不利,所以老母to̍h趕緊kā ta-ke kah全家ê人報告,結果ta̍k人lóng無異議;hit工,阮老母kā月美ê衫褲款款leh,to̍h隨時hō͘ 她由養母āiⁿ走。

阮老母hit工暗時無法度睏落眠,她思念她ê嬰á,哭kui暝ê款。Hit時,月美已經五個月大ā,若是她無食母奶,koh驚chheⁿ份,to̍h ē啼哭,若án-ne,kiám-chhái明á載to̍h ē hông chhōa tńg來;若是發生chit種狀況ê時,阮老母to̍h有理由tī厝裡養飼她。她心內án-ne想來想去,m̄-koh,月美無hông送tńg來。出世to̍h註定做養女ê月美,tùi五個月大ê嬰á時起,to̍h kah父母分離,由tī田庄收養她ê父母撫養長大。

月美ê養父母是田庄ê做sit人,in無ka-kī ê土地,生活mā m̄是真富裕。她七歲hit年,ta̍k工一定tio̍h行約一點鐘ê路chiah ē-tàng去到公學校讀冊。她ê養父母tòa tī一个叫做白石腳ê所在,m̄是頭圍庄,是屬tī隔壁庄ê礁溪,所以月美去讀礁溪公學校。月美八歲,我十一歲hit年,阮阿公tī礁溪車頭前買一間運送店,阿公koh命令阮老父去管理hit間運送店,所以阮全家伙mā搬去tòa tī hia。Hit間運送店是tī白石腳kah礁溪公學校ê中間,所以,月美讀公學校二年ê時,經常來tòa親生父母ê厝,tùi hia去學校讀冊。

M̄-koh,嬰á時代to̍h遠離親生父母去別位生活ê月美,有gín-á ê自卑感,無親像做阿姊ê我án-ne,無憂無慮teh自由自在行踏。M̄-koh,我kah意我ê小妹,她mā是kah我siōng相好,她tiāⁿ-tiāⁿ問我講:「阿母為啥物kan-taⁿ kā我pun人?阿姊、小弟光輝kah小妹lóng留tī厝裡.…」Τio̍h算她長大ā,甚至年紀老ā,chit種不平kah不滿lóng無tùi她ê頭殼內消失。

Tī hit-ê時代,人ê生活普遍真貧困,思想mā真封建,cha-po͘ 人一定tio̍h tī 20歲左右「成家立業」,to̍h是娶bó͘ 來繼承家庭。M̄-koh,成年了後beh娶bó͘ ê費用hiah-ni̍h-á koân,普通人負擔bē起。所以,siōng理想ê方法to̍h是採用chit種養女ê方式。Sim-pū-á自細漢to̍h tòa做伙,ē-tàng幫贊家庭ê工作,到十七、八歲ê時,養父母tī厝裡辦一个簡單ê宴客,邀請親chiâⁿ來,對眾人宣布講:「今á日是in兩人ê洞房花燭夜(結婚)。」,án-ne,in to̍h成做夫婦。這意思是講,我ê kiáⁿ一生m̄免成做羅漢腳(無bó͘ ê流浪者)ā。

Tī阮tau,我ê三嬸以外,五嬸mā是養女,她iáu嬰á ê時to̍h hông pun來飼。阮阿媽to̍h kā出世無到一個月ê長女pun hō͘人,過無gōa久,她to̍h tùi附近一个庄頭pun一个cha-bó͘ 嬰á來飼;chit-ê嬰á mā是長女。阮阿媽tú-tú生產了,所以ē-tàng用ka-kī ê奶來飼chit-ê sim-pū-á;chit-ê嬰á後來成做五男金福ê bó͘,kui个家庭就án-ne來接納她。Hit當時ê風俗,一般並無hō͘ 養女去接受公學校ê教育;我ê兩个阿嬸lóng無讀過公學校,三嬸照顧我,五嬸照顧阮小弟光輝。Chit兩个阿嬸lóng kah我真親密,五嬸chit-má iáu活leh,tòa tī洛杉磯。

月美公學校六年ê暑假,她ê養父tùi一个農民ê厝,用li-á-kah(拖車)kā米運搬來到車頭前ê倉庫ê時,她tī車後幫贊老父tàu sak。台灣ê熱天真炎熱,thǹg赤腳,戴笠á,tī peh崎ê路裡出力sak車á,對一个十二歲ê gín-á來講,實在有khah可憐。Chit-ê倉庫是阮老父ê運送店ê倉庫,所以,li-á-kah tio̍h經過阮tau ê門口。後來,月美kā我講:
「當我對厝內lió一下ê時,我看tio̍h阿姊當teh吹電風讀冊,真涼爽ê款。我目屎teh流,對阿姊充滿怨恨kah欣羨。」

月美完成公學校六年制課程ê一年後,宜蘭郡開設一間高等女學校。老父kā她講:「宜蘭ē-tàng坐火車通學,m̄免親像月娥去淡水,to̍h ē-tàng讀冊,而且無需要tòa宿舍,所以你去讀蘭陽高女to̍h好。」Chit筆費用當然mā是由阮老父支付。M̄-koh,月美講:「Chit-má宜蘭病院當teh招募護士kah助產士,若是入去to̍h ē-tàng領薪水,thang幫贊收養我ê貧困父母。」她就án-ne成做宜蘭病院ê護士。Hit當時她十三歲,阮老母為月美準備新衫褲kah棉被。

月美十八歲ê時,阮老母因為tī準備節日ê辦桌ê時,去hō͘ chìⁿ天婦羅(てんぶら)ê油燙傷kah真嚴重,所以被送去宜蘭病院。Hit當時,仝一个房間ê女士是頭圍庄真好額ê林家ê夫人。月美有閒ê時,to̍h來chhōe阿母講話。十八歲ê月美皮膚白,穿護理服真sù配,講話聲音koh穩當,看起來to̍h是一个優雅謙虛ê cha-bó͘ gín-á。林家ê夫人真kah意月美,講想beh ài她來做ka-kī獨生kiáⁿ ê bó͘;伊18歲,iáu teh讀宜蘭農業學校。當chiah ê話漸漸浮現ê時,月美終其尾準備beh結婚ā。

月美ê未來翁婿林再萬先生一直夢想beh做醫生,m̄-koh,tī宜蘭農業學校讀冊,根本都無法度通過醫學院ê考試,所以伊真想beh轉去東京讀高中。Hit年,to̍h是1942年ê暑假,我tùi留學ê東京tńg來度假,tī我決定九月beh koh去東京ê時,伊就kah我做伙去。

阮阿媽tī我四歲ê時koh生一个cha-bó͘ kiáⁿ,因為是阮老父ê小妹,所以是阮阿姑,chit-ê阿姑mā beh去東京讀助產士學校;所以我to̍h tī九月份kah chit兩人做伙去東京。阮租兩間公寓,我開始一段煮飯hō͘ 大家做伙食ê生活。再萬是阮小妹ê未來翁婿,所以,我像小弟án-ne照顧伊。再萬是一位冷靜koh認真ê少年人,伊tī東京ê私立中學phah拚讀冊。

1945年八月,戰爭結束ê時,留學生ē-tàng tńg來台灣。再萬比我緊一步tńg來到台灣,kah月美結婚。伊進入台大醫學院,繼續未完成ê學業。月美做林家ê sim-pū-á,受tio̍h翁婿ê信任,mā受tio̍h所有ê人ê喜愛;她養育二个kiáⁿ kah五个cha-bó͘ kiáⁿ,teh過幸福ê生活。