《綠色短評》

 | | | 轉寄

「在野大聯盟」、「執政大聯盟」是啥物碗糕？

作者 李南衡, ChoânTâijī/全台字 by Chng Hūiphêng 2023.08.06




Choânbîn Tâioânjī pán/全民台灣字版簡稱ChoânTâiJī

《 le̍ksek toánphêng》　　 Lí Lâmhêng

　　　　"Chāṳá tōa liânbêng","Chipchèng tōa liânbêng" sī siáⁿmi̍h óaⁿko ?

Chhitgoe̍h jīsaⁿ, Tiongkok Kokbîntóng choânkok tāipiáu tāihōe, tóngchúse̍k Chu Li̍plûn soanpò͘, chit piàn chóngthóng tōa soán Tiongkok Kokbîntóng beh thoânkiat só͘ū hui Le̍k ê pêngiú kiōng cho͘ "tōa tôngbêng","Chāṳá tōa liânbêng", bīlâi Tiongkok Kokbîntóng koh tò tńglâi chipchèng liáuāu, koh beh kah ta̍kê kiōngtông kiànli̍p chi̍tê hôpêng, antēng, kongpêⁿ, chènggī ê "chipchèng tōa liânbêng", kiōngtông kā Tâioân péng· kòelâi, hō͘ Tâioân koh khah hó.

Chhitgoe̍h jīgō͘, Tiongkok Kokbîntóng chóngthóng chhamsoánjîn Hāu Iúgî kēngsoán pānkongsek chiphêngtiúⁿ金溥聰siū hóngbūn ê sî kóng, oânchoân m̄ chaiiáⁿ siáⁿmi̍h sī "chipchèng tōa liânbêng", i kóng, i kah Hāu Iúgî lóng m̄ chai chit hāng tāichì, i mā tùi Chu chúse̍k hutjiânkan tàn chhut chit ê sin miâsû kámkak kîkoài. Hit ēpo͘ Tiongkok Kokbîntóng hoatgiânjîn Iûⁿ Tìû to̍h hôeèng kóng, Chu Li̍plûn chúse̍k tī choântāihōe thêkhí "chipchèng tōa liânbêng" ê kài liām, tio̍hsī beh thoânkiat só͘ū hoān Nâ, hui Le̍k, chāṳá ê le̍kliōng, iā tio̍hsī kiatha̍p só͘ū líliām kāngkhoán ê le̍kliōng, oânsêng hō͘ Bînchìntóng lo̍htâi, chèngtóng lûnthè ê bo̍kphiau.

Tiongkok Kokbîntóng hoatgiânjîn ánne káisoeh, m̄chai thâunáu itliû ê 金小刀 thiaⁿ ū ah bô? chhiūⁿ goán chit chióng phó͘thong lâng si̍tchāi sī thiaⁿ bô. Tàuté sī tōa soán chêng beh "chāṳá tōa liânbêng"? ah sī tōasoán liáu chiah beh "chipchèng tōa liânbêng" leh? nāsī tōasoán chêng beh "chāṳá tōa liânbêng", tàuté beh ánchóaⁿ liân ánchóaⁿ bêng? káⁿ ū kah Bînchiòngtóng chúse̍k Koa Bûntiat kóng chi̍tsiaⁿ? bô. Chu Li̍plûn chúse̍k kóng Koa Bûntiat chúse̍k chin bôêng. Bo̍kchêng Koa Bûntiat ê bîntiāu sī iâⁿ kòe Tiongkok Kokbîntóng ê Hāu Iúgî, ná ēsái bô kah lâng kóng ·chi̍tsiaⁿ to̍h beh kah lâng "chāṳá tōa liânbêng"? Nâ iâⁿ phó͘soán jînsū ū thánpe̍k kóng, hiān kaitōaⁿ soán chêng ha̍pchok khongkan bô tōa, kantaⁿ ū khólêng chhuthiān tī soán āu ê Li̍phoatīⁿ. Ánne "chāṳá tōa liânbêng" sī siáⁿmi̍h óaⁿko ?

　　 Bo̍kchêng chāṳá sèle̍k tējī tōa ê Bînchiòngtóng chúse̍k Koa Bûntiat jīnûi, hiānchāi kokhōe 3 tóng lóng bô kòe pòaⁿ ê kilu̍t chiâⁿ koân, i iûgoân kámkak, kèta̍t, chèngchhek, líliām saⁿ hāng lóng ē ha̍h chiah ū pānhoat ha̍pchok.

　　 Tiongkok Kokbîntóng chúse̍k Chu Li̍plûn "tōa liânbêng"ê siūⁿhoat sī ùi tóūi lâi ê?

　　 La̍kgoe̍h cha̍pgō͘, Tiongkok Kokbîntóng Tâipak chhī gīoân, chit piàn Tāiankhu li̍púi chhamsoánjîn Lô Tìkiông piáusī,I beh tiûpī cho͘chit "chèngtóng lûnthè tōa liânbêng", tùikhòng Le̍k iâⁿ ké bînchú tōa liânbêng, jîchhiáⁿ jīnûi chāṳátóng tio̍h chhiú khan chhiú ha̍pchok, siáⁿ lâng choh chóngthóng sī chhùiàu būntê; i mā kiôngtiāu, i bô kóng bô chichhî Tiongkok Kokbîntóng chóngthóng chhamsoánjîn Hāu Iúgî, siōng tiōngiàu·ê bo̍kphiau sī chèngtóng lûnthè. Nā chiàu Lô Tìkiông ê kónghoat, soán chêng nā itti̍t îchhî hiānchhúsî ê bîntiāu piáuhiān, kàusî tongjiân tio̍h ē khì Hāu Iúgî pó Koa Bûntiat. Bo̍kkoài ínkhí Nâ iâⁿ lāipō͘ pō͘hūn jînsū kā i tèng kah chhàuthâu. Tējī kang, Lô Tìkiông tī bīnchheh téngbīn hoatchhut tōkhiam sengbêng, goânpún ītēng ê kìchiáhōe mā chhúsiau.

　　 Tiongkok Kokbîntóng chúse̍k Chu Li̍plûn kóng beh thoânkiat só͘ū hui Le̍k ê pêngiú kiōng cho͘ "chāṳá tōa liânbêng","chipchèng tōa liânbêng". Che tàuté sī siáⁿmi̍h óaⁿ ko? Mài kóng 金小刀 m̄chai siáⁿ ìsù, lán itpoaⁿ lâng khòaⁿ m̄bat. Lán si̍tchāi chin hoâigî, Chu Li̍plûn chúse̍k káⁿ chaiiáⁿ i kakī teh kóng siáⁿ? (230728)


Chù, 金溥聰 金小刀 chhiáⁿ liām Hôagí


Pe̍h-ōe-jī-pán/白話字版


《 le̍k-sek toán-phêng》　　 Lí Lâm-hêng

　　　　"Chāi-iá tōa liân-bêng","Chip-chèng tōa liân-bêng" sī siáⁿ-mi̍h óaⁿ-ko ?

Chhit-goe̍h jī-saⁿ, Tiong-kok Kok-bîn-tóng choân-kok tāi-piáu tāi-hōe, tóng-chú-se̍k Chu Li̍p-lûn soan-pò͘, chit piàn chóng-thóng tōa soán Tiong-kok Kok-bîn-tóng beh thoân-kiat só͘-ū hui Le̍k ê pêng-iú kiōng cho͘ "tōa tông-bêng","Chāi-iá tōa liân-bêng", bī-lâi Tiong-kok Kok-bîn-tóng koh tò tńg-lâi chip-chèng liáu-āu, koh beh kah ta̍k-ê kiōng-tông kiàn-li̍p chi̍t-ê hô-pêng, an-tēng, kong-pêⁿ, chèng-gī ê "chip-chèng tōa liân-bêng", kiōng-tông kā Tâi-oân péng-· kòe-lâi, hō͘ Tâi-oân koh khah hó.

Chhit-goe̍h jī-gō͘, Tiong-kok Kok-bîn-tóng chóng-thóng chham-soán-jîn Hāu Iú-gî kēng-soán pān-kong-sek chip-hêng-tiúⁿ金溥聰siū hóng-būn ê sî kóng, oân-choân m̄ chai-iáⁿ siáⁿ-mi̍h sī "chip-chèng tōa liân-bêng", i kóng, i kah Hāu Iú-gî lóng m̄ chai chit hāng tāi-chì, i mā tùi Chu chú-se̍k hut-jiân-kan tàn chhut chit ê sin miâ-sû kám-kak kî-koài. Hit ē-po͘ Tiong-kok Kok-bîn-tóng hoat-giân-jîn Iûⁿ Tì-û to̍h hôe-èng kóng, Chu Li̍p-lûn chú-se̍k tī choân-tāi-hōe thê-khí "chip-chèng tōa liân-bêng" ê kài- liām, tio̍h-sī beh thoân-kiat só͘-ū hoān Nâ, hui Le̍k, chāi-iá ê le̍k-liōng, iā tio̍h-sī kiat-ha̍p só͘-ū lí-liām kāng-khoán ê le̍k-liōng, oân-sêng hō͘ Bîn-chìn-tóng lo̍h-tâi, chèng-tóng lûn-thè ê bo̍k-phiau.

Tiong-kok Kok-bîn-tóng hoat-giân-jîn án-ne kái-soeh, m̄-chai thâu-náu it-liû ê 金小刀 thiaⁿ ū ah bô? chhiūⁿ goán chit chióng phó͘-thong lâng si̍t-chāi sī thiaⁿ bô. Tàu-té sī tōa soán chêng beh "chāi-iá tōa liân-bêng"? ah sī tōa-soán liáu chiah beh "chip-chèng tōa liân-bêng" leh? nā-sī tōa-soán chêng beh "chāi-iá tōa liân-bêng", tàu-té beh án-chóaⁿ liân án-chóaⁿ bêng? káⁿ ū kah Bîn-chiòng-tóng chú-se̍k Koa Bûn-tiat kóng chi̍t-siaⁿ? bô. Chu Li̍p-lûn chú-se̍k kóng Koa Bûn-tiat chú-se̍k chin bô-êng. Bo̍k-chêng Koa Bûn-tiat ê bîn-tiāu sī iâⁿ kòe Tiong-kok Kok-bîn-tóng ê Hāu Iú-gî, ná ē-sái bô kah lâng kóng -·chi̍t-siaⁿ to̍h beh kah lâng "chāi-iá tōa liân-bêng"? Nâ iâⁿ phó͘-soán jîn-sū ū thán-pe̍k kóng, hiān kai-tōaⁿ soán chêng ha̍p-chok khong-kan bô tōa, kan-taⁿ ū khó-lêng chhut-hiān tī soán āu ê Li̍p-hoat-īⁿ. Án-ne "chāi-iá tōa liân-bêng" sī siáⁿ-mi̍h óaⁿ-ko ?

　　 Bo̍k-chêng chāi-iá sè-le̍k tē-jī tōa ê Bîn-chiòng-tóng chú-se̍k Koa Bûn-tiat jīn-ûi, hiān-chāi kok-hōe 3 tóng lóng bô kòe pòaⁿ ê ki-lu̍t chiâⁿ koân, i iû-goân kám-kak, kè-ta̍t, chèng-chhek, lí-liām saⁿ hāng lóng ē ha̍h chiah ū pān-hoat ha̍p-chok.

　　 Tiong-kok Kok-bîn-tóng chú-se̍k Chu Li̍p-lûn "tōa liân-bêng"ê siūⁿ-hoat sī ùi tó-ūi lâi ê?

　　 La̍k-goe̍h cha̍p-gō͘, Tiong-kok Kok-bîn-tóng Tâi-pak chhī- gī-oân, chit piàn Tāi-an-khu li̍p-úi chham-soán-jîn Lô Tì-kiông piáu-sī,I beh tiû-pī cho͘-chit "chèng-tóng lûn-thè tōa liân-bêng", tùi-khòng Le̍k iâⁿ ké bîn-chú tōa liân-bêng, jî-chhiáⁿ jīn-ûi chāi-iá-tóng tio̍h chhiú khan chhiú ha̍p-chok, siáⁿ lâng choh chóng-thóng sī chhù-iàu būn-tê; i mā kiông-tiāu, i bô kóng bô chi-chhî Tiong-kok Kok-bîn-tóng chóng-thóng chham-soán-jîn Hāu Iú-gî, siōng tiōng-iàu-·ê bo̍k-phiau sī chèng-tóng lûn-thè. Nā chiàu Lô Tì-kiông ê kóng-hoat, soán chêng nā it-ti̍t î-chhî hiān-chhú-sî ê bîn-tiāu piáu-hiān, kàu-sî tong-jiân tio̍h ē khì Hāu Iú-gî pó Koa Bûn-tiat. Bo̍k-koài ín-khí Nâ iâⁿ lāi-pō͘ pō͘-hūn jîn-sū kā i tèng kah chhàu-thâu. Tē-jī kang, Lô Tì-kiông tī bīn-chheh téng-bīn hoat-chhut tō-khiam seng-bêng, goân-pún ī-tēng ê kì-chiá-hōe mā chhú-siau.

　　 Tiong-kok Kok-bîn-tóng chú-se̍k Chu Li̍p-lûn kóng beh thoân-kiat só͘-ū hui Le̍k ê pêng-iú kiōng cho͘ "chāi-iá tōa liân-bêng","chip-chèng tōa liân-bêng". Che tàu-té sī siáⁿ-mi̍h óaⁿ ko? Mài kóng 金小刀 m̄-chai siáⁿ ì-sù, lán it-poaⁿ lâng khòaⁿ m̄-bat. Lán si̍t-chāi chin hoâi-gî, Chu Li̍p-lûn chú-se̍k káⁿ chai-iáⁿ i ka-kī teh kóng siáⁿ? (230728)


Chù, 金溥聰 金小刀 chhiáⁿ liām Hôa-gí




七月二三，中國國民黨全國代表大會，黨主席朱立倫宣布，chit遍總統大選中國國民黨beh團結所有非綠ê朋友共組「大同盟」、「在野大聯盟」，未來中國國民黨koh倒轉來執政了後，koh beh kahta̍k个共同建立一個和平、安定、公平、正義ê「執政大聯盟」，共同kā台灣péng-·過來，hō͘台灣koh khah好。

七月二五，中國國民黨總統參選人侯友宜競選辦公室執行長金溥聰受訪問ê時講，完全m̄知影啥物是「執政大聯盟」，伊講，伊kah侯友宜lóng m̄知chit項代誌，伊mā對朱主席忽然間tàn出chit个新名詞感覺奇怪。Hit下晡中國國民黨發言人楊智伃（û）to̍h回應講，朱立倫主席tī全代會提起「執政大聯盟」ê概念，tio̍h是beh團結所有泛藍、非綠、在野ê力量，也tio̍h是結合所有理念仝款ê力量，完成hō͘民進黨落台、政黨輪替ê目標。

中國國民黨發言人án-ne解說，m̄知頭腦一流ê金小刀聽有ah無？像阮chit種普通人實在是聽無。到底是大選前beh「在野大聯盟」？ah是大選了chiahbeh「執政大聯盟」leh？若是大選前beh「在野大聯盟」，到底beh án-chóaⁿ聯án-chóaⁿ盟？敢有kah民眾黨主席柯文哲講一聲？無。朱立倫主席講柯文哲主席真無閒。目前柯文哲ê民調是嬴過中國國民黨ê侯有宜，náē-sái無kah人講一聲to̍h beh kah人「在野大聯盟」？藍營輔選人士有坦白講，現階段選前合作空間無大，kan-taⁿ有可能出現tī選後ê立法院。Án-ne「在野大聯盟」是啥物碗糕？

　　目前在野勢力第二大ê民眾黨主席柯文哲認為，現在國會3黨lóng無過半ê機率chiâⁿ koân，伊猶原感覺，價值、政策、理念三項lóngēha̍hchiah有辦法合作。

　　中國國民黨主席朱立倫「大聯盟」ê想法是ùi tó位來ê？

　　六月十五，中國國民黨台北市議員、chit遍大安區立委參選人羅智強表示， 伊beh籌備組織「政黨輪替大聯盟」，對抗綠營假民主大聯盟，而且認為在野黨tio̍h手牽手合作，啥人作總統是次要問題；伊mā強調，伊無講無支持中國國民黨總統參選人侯友宜，上重要ê目標是政黨輪替。若照羅智強ê講法，選前若一直維持現此時ê民調表現，到時當然tio̍hē棄侯友宜保柯文哲。莫怪引起藍營內部部分人士kā伊釘kah臭頭。第二工，羅智強tī面冊頂面發出道歉聲明，原本預定ê記者會mā取消。

　　中國國民黨主席朱立倫講beh團結所有非綠ê朋友共組「在野大聯盟」、「執政大聯盟」。Che到底是啥物碗糕？Mài講金小刀m̄知啥意思，咱一般人看m̄-bat。咱實在真懷疑，朱立倫主席敢知影伊家己teh講啥？ (230728)


註：金溥聰 金小刀　　請唸華語