《綠色短評》

 | | | 轉寄

向以色列人行最敬禮！

作者 李南衡, ChoânTâijī/全台字 by Chng Hūi-phêng 2023.10.22




Choânbîn Tâioânjī pán/全民台灣字版簡稱ChoânTâiJī


《 Le̍ksek toánphêng 》　 Lí Lâmhêng

Hiòng Isulael lâng kiâⁿ chòe kèng lé!

　　 Cha̍pgoe̍h chhechhit, Pale̍ksuteng kek chìn cho͘chit 哈瑪斯(Hamas), soanchheng tī nn̄g tiámcheng lāi ùi 加薩走廊 hiòng Isulael hoatsiā 5,000 lia̍p hóechìⁿ, Isulael chosiūtio̍h pòaⁿ sèkí ílâi siōng tōa ê kongkek sūkiāⁿ, Hamas chhèng chhiú thu̍tphòa Isulael ōe tēng ê oānchhiongkhu kah anchoân ûinôa, ùi háilio̍kkhong chìnji̍p Isulael lâmpō͘, tī 27 ê tētiám chìnhêng siámtiānsek ê kongkek, siàu kah khòaⁿtio̍h lâng tō sàusiā, chhèngsat ê thêngtō͘.


Cha̍pgoe̍h chhechhit thàuchá, 50 miâ 哈瑪斯chhèngchhiú ùi thiⁿténg kànglo̍h, tu̍tsi̍p(突襲) 加薩 tēkhu chiupiⁿ, Isulael ê soabô͘ tēkhu tngteh kípān chi̍t tiûⁿ ū kúi chheng lâng chhamka ê imga̍k cheh. 哈瑪斯 khòaⁿtio̍h lâng tio̍h khui chhèng, sí bô khì cháu bē lī hō͘哈瑪斯lia̍h khì 150 lâng choh jînchit·ê ū chin chē miâ gōakok lâng, 哈瑪斯 ū khólêng ēng chhiú lāi ê jînchit uihia̍p Isulael. Tējī kang tī imga̍k ē hiān tiûⁿ ū hoathiān tio̍h 260 ê sithé.

　　 Cha̍pgoe̍h chhechhit cháikhí, ū chhiaukòe 70 miâ 哈瑪斯 búchong hūnchú chhimji̍p óa 加薩走廊 ê chi̍tê Iôtáiah lâng îbînkhu卡法阿札, tùi tongtē kubîn chìnhêng tōa tô͘sat, hiāntiûⁿ hoathiān tāiiok 200 ê Isulael lâng ê síthé, pauhâm 40 ê iù gíná ê sithé, ū ê iù gíná ê thâu hông chām tiāu.

　　 Cha̍pgoe̍h chhechhit, Isulael hoat pò͘"chiàncheng chōngthāi kéngpò", chiamtùi 哈瑪斯 ê kongkek, Isulael kokhông pō͘tiúⁿ kiôngtiāu, in hoān liáu giâmtiōng chhògō͘. Isulael chónglí Netânyáhu誓言beh tùi 加薩走廊 hoattōng pòho̍k sèng hoánkek. Kàu cha̍pgoe̍h cha̍pit ûichí, sianghong ū chhiaukòe 2,400 lâng síbông, ū 7,500 lâng siūsiong.

　　 Cha̍pgoe̍h chhechhit, Isulael kokhôngkun khaisí tōa kuibô͘ chūchi̍p pengla̍t, tengtiàu āupī e̍k kunjîn thiánkhui hoánkek, koklān tngthâu, Isulael īpī e̍k jînoân hunhun hióngèng hōtiàu, chêng chónglí 班奈特 mā kaji̍p īpī e̍k hânglia̍t. Kàu cha̍pgoe̍h chhecha̍p Isulael āupī kun tāngoân jînsò͘ íkeng ta̍tkàu 36 bān.

　　 Cha̍pgoe̍h chhepeh sinbûn pòtō, sa 31 hòe ê阿夫拉哈米 íkeng tī Bíkok Newiok sengoa̍h sì nî, i kóng i kakī chin hēngūn, bó͘ kah chhitkò goe̍h tōa ê châbó͘kiáⁿ lóng bián siū pōle̍k chhimhoān, tānsī koklān tng chêng, i tio̍h sûisî khoán hó hênglí, bé "tan chōa kiphiò", chhepeh tio̍h ē kàu chi̍tê kitē pòtò.

　　 Engkok 《BBC》 kìchiá seng poe khì 賽普勒斯, bô siūⁿ kóng chiânóng Isulael ê kiphiò lóng chóng tēng móa, lóng sī beh kóaⁿ tńgkhì chohpeng·ê. I choán poe khì 伊斯坦堡, chúnpī choánki khì Isulael, tánthāi 9 tiámcheng. Chin chē lúkheh lio̍ksio̍k chiūⁿki, kantāⁿ i bô. Hângkhong kongsi tēkhûn jînoân kā i kóng, hiahê hângpan sī "Isulael lâng hôekok ê kínkip panki".

Isulael khétāng tengtiàu tòatī kokgōa ê āupī kunjîn hôekok, cha̍pgoe̍h chhepeh, Isulael chù Athénè tāisàikoán chhōa thâu hióngèng, tēng 20 chiah panki sàng Isulael kokchek āupī kunjîn kóaⁿ tńgkhì chó͘kok chham chiàn.

Cha̍pgoe̍h cha̍pit sinbûn pòtō, Bíkok Newiok 甘迺迪 kokchè kitiûⁿ chit kúi kang chhuthiān chi̍t miâ sînpì lâmchú khiā tī Isulael kokka hângkhong kūitâi hūkīn, tiāmtiām ūi siutio̍h Isulael kokhôngkun tengtiàu thongti hôekok ê lâng bé kiphiò, ki0cho͘ jînoân kóng hitê lâng chóngkiōng íkeng ū bé 250 tiuⁿ poe óng Isulael ê kiphiò.

Àikok piàⁿ tāiseng ê Isulael lâng, goán hiòng lín kiâⁿ chòekèng lé! (231013)

Chù, 哈瑪斯 加薩走廊 卡法阿札　班奈特 阿夫拉哈米 賽普勒斯 伊斯坦堡　甘迺迪　chhiáⁿ liām Hôagí


Pe̍h-ōe-jī-pán/白話字版


《 Le̍k-sek toán-phêng 》　 Lí Lâm-hêng

Hiòng I-su-la-el lâng kiâⁿ chòe-kèng lé!

　　 Cha̍p-goe̍h chhe-chhit, Pa-le̍k-su-teng kek chìn cho͘-chit 哈瑪斯(Hamas), soan-chheng tī nn̄g tiám-cheng lāi ùi 加薩走廊 hiòng I-su-la-el hoat-siā 5,000 lia̍p hóe-chìⁿ, I-su-la-el cho-siū-tio̍h pòaⁿ sè-kí í-lâi siōng tōa ê kong-kek sū-kiāⁿ, Hamas chhèng chhiú thu̍t-phòa I-su-la-el ōe tēng ê oān-chhiong-khu kah an-choân ûi-nôa, ùi hái-lio̍k-khong chìn-ji̍p I-su-la-el lâm-pō͘, tī 27 ê tē-tiám chìn-hêng siám-tiān-sek ê kong-kek, siàu kah khòaⁿ-tio̍h lâng tō sàu-siā, chhèng-sat ê thêng-tō͘.


Cha̍p-goe̍h chhe-chhit thàu-chá, 50 miâ 哈瑪斯chhèng-chhiú ùi thiⁿ-téng kàng-lo̍h, tu̍t-si̍p(突襲) 加薩 tē-khu chiu-piⁿ, I-su-la-el ê soa-bô͘ tē-khu tng-teh kí-pān chi̍t tiûⁿ ū kúi chheng lâng chham-ka ê im-ga̍k cheh. 哈瑪斯 khòaⁿ-tio̍h lâng tio̍h khui chhèng, sí bô khì cháu bē lī hō͘哈瑪斯lia̍h khì 150 lâng choh jîn-chit-·ê ū chin chē miâ gōa-kok lâng, 哈瑪斯 ū khó-lêng ēng chhiú lāi ê jîn-chit ui-hia̍p I-su-la-el. Tē-jī kang tī im-ga̍k ē hiān tiûⁿ ū hoat-hiān tio̍h 260 ê si-thé.

　　 Cha̍p-goe̍h chhe-chhit chái-khí, ū chhiau-kòe 70 miâ 哈瑪斯 bú-chong hūn-chú chhim-ji̍p óa 加薩走廊 ê chi̍t-ê Iô-tá-iah lâng î-bîn-khu卡法阿札, tùi tong-tē ku-bîn chìn-hêng tōa tô͘-sat, hiān-tiûⁿ hoat-hiān tāi-iok 200 ê I-su-la-el lâng ê sí-thé, pau-hâm 40 ê iù gín-á ê si-thé, ū ê iù gín-á ê thâu hông chām tiāu.

　　 Cha̍p-goe̍h chhe-chhit, I-su-la-el hoat pò͘"chiàn-cheng chōng-thāi kéng-pò", chiam-tùi 哈瑪斯 ê kong-kek, I-su-la-el kok-hông pō͘-tiúⁿ kiông-tiāu, in hoān liáu giâm-tiōng chhò-gō͘. I-su-la-el chóng-lí Ne-tân-yá-hu誓言beh tùi 加薩走廊 hoat-tōng pò-ho̍k sèng hoán-kek. Kàu cha̍p-goe̍h cha̍p-it ûi-chí, siang-hong ū chhiau-kòe 2,400 lâng sí-bông, ū 7,500 lâng siū-siong.

　　 Cha̍p-goe̍h chhe-chhit, I-su-la-el kok-hông-kun khai-sí tōa kui-bô͘ chū-chi̍p peng-la̍t, teng-tiàu āu-pī e̍k kun-jîn thián-khui hoán-kek, kok-lān tng-thâu, I-su-la-el ī-pī e̍k jîn-oân hun-hun hióng-èng hō-tiàu, chêng chóng-lí 班奈特 mā ka-ji̍p ī-pī e̍k hâng-lia̍t. Kàu cha̍p-goe̍h chhe-cha̍p I-su-la-el āu-pī kun tāng-oân jîn-sò͘ í-keng ta̍t-kàu 36 bān.

　　 Cha̍p-goe̍h chhe-peh sin-bûn pò-tō, sa 31 hòe ê阿夫拉哈米 í-keng tī Bí-kok New-iok seng-oa̍h sì nî, i kóng i ka-kī chin hēng-ūn, bó͘ kah chhit-kò goe̍h tōa ê châ-bó͘-kiáⁿ lóng bián siū pō-le̍k chhim-hoān, tān-sī kok-lān tng chêng, i tio̍h sûi-sî khoán hó hêng-lí, bé "tan chōa ki-phiò", chhe-peh tio̍h ē kàu chi̍t-ê ki-tē pò-tò.

　　 Eng-kok 《BBC》 kì-chiá seng poe khì 賽普勒斯, bô siūⁿ kóng chiân-óng I-su-la-el ê ki-phiò lóng chóng tēng móa, lóng sī beh kóaⁿ tńg-khì choh-peng-·ê. I choán poe khì 伊斯坦堡, chún-pī choán-ki khì I-su-la-el, tán-thāi 9 tiám-cheng. Chin chē lú-kheh lio̍k-sio̍k chiūⁿ-ki, kan-tāⁿ i bô. Hâng-khong kong-si tē-khûn jîn-oân kā i kóng, hiah-ê hâng-pan sī "I-su-la-el lâng hôe-kok ê kín-kip pan-ki".

I-su-la-el khé-tāng teng-tiàu tòa-tī kok-gōa ê āu-pī kun-jîn hôe-kok, cha̍p-goe̍h chhe-peh, I-su-la-el chù A-thé-nè tāi-sài-koán chhōa thâu hióng-èng, tēng 20 chiah pan-ki sàng I-su-la-el kok-chek āu-pī kun-jîn kóaⁿ tńg-khì chó͘-kok chham chiàn.

Cha̍p-goe̍h cha̍p-it sin-bûn pò-tō, Bí-kok New-iok 甘迺迪 kok-chè ki-tiûⁿ chit kúi kang chhut-hiān chi̍t miâ sîn-pì lâm-chú khiā tī I-su-la-el kok-ka hâng-khong kūi-tâi hū-kīn, tiām-tiām ūi siu-tio̍h I-su-la-el kok-hông-kun teng-tiàu thong-ti hôe-kok ê lâng bé ki-phiò, ki-0cho͘ jîn-oân kóng hit-ê lâng chóng-kiōng í-keng ū bé 250 tiuⁿ poe óng I-su-la-el ê ki-phiò.

Ài-kok piàⁿ tāi-seng ê I-su-la-el lâng, goán hiòng lín kiâⁿ chòe-kèng lé! (231013)

Chù, 哈瑪斯 加薩走廊 卡法阿札　班奈特 阿夫拉哈米 賽普勒斯 伊斯坦堡　甘迺迪　chhiáⁿ liām Hôa-gí





　　十月初七，巴勒斯坦激進組織哈瑪斯（Hamas），宣稱tī兩點鐘內ùi加薩走廊向以色列發射5,000粒火箭，以色列遭受tio̍h半世紀以來上大ê攻擊事件，哈馬斯銃手突破以色列畫定ê緩衝區kah安全圍欄，ùi海陸空進入以色列南部，tī27个地點進行閃電式ê攻擊，siàu kah看tio̍h人tio̍h掃射銃殺ê程度。


十月初七透早，50名哈瑪斯銃手ùi天頂降落，突襲加薩地區週邊、以色列ê沙漠地區當teh舉辦一場有幾千人參加ê音樂節。哈瑪斯看tio̍h人tio̍h開銃，死無去走bē離hō͘哈瑪斯lia̍h去150人作人質ê有真chē名外國人，哈瑪斯有可能用手內ê人質威脅以色列。第二工tī音樂會現場有發現tio̍h 260 ê死體。

　　十月初七早起，有超過70名哈瑪斯武裝份子侵入óa加薩走廊ê一个猶太人屯墾區卡法阿札，對當地居民進行大屠殺，現場發現大約200 ê以色列人ê死體，包含40 ê具幼gín-á ê死體，有ê幼gín-á ê頭hông chām掉。

　　十月初七，以色列發布「戰爭狀態警報」，針對哈瑪斯ê攻擊，以色列國防部長強調，in犯了嚴重錯誤。以色列總理Ne-tân-yá-hu誓言beh對加薩走廊發動報復性反擊。到十月十一為止，雙方有超過2,400人死亡、有7,500人受傷。

　　十月初七，以色列國防軍開始大規模聚集兵力，徵召後備役軍人展開反擊，國難當頭，以色列預備役人員紛紛響應號召，前總理班奈特mā加入預備役行列。到十月初十以色列後備軍動員人數已經達到36萬。

　　十月初八新聞報導，卅一歲ê阿夫拉哈米已經tī美國紐約生活四年，伊講伊家己真幸運，某kah七個月大ê查某kiáⁿ lóng免受暴力侵犯，但是國難當前，伊tio̍h隨時khoán好行李，買「單chōa機票」，初八tio̍h ē到一个基地報到。

　　英國《BBC》記者先飛去賽普勒斯，無想講前往以色列ê機票lóng總訂滿，lóng是beh趕轉去作兵ê。伊轉飛去伊斯坦堡，準備轉機去以色列，等待9點鐘。真chē旅客陸續上機，干單伊無。航空公司地勤人員kā伊講，hiah-ê航班是「以色列人回國ê緊急班機」。

以色列啟動徵召旅居國外ê後備軍人回國，十月初八，以色列駐雅典大使館chhōa頭響應，訂20隻班機送以色列國籍後備軍人趕轉去祖國參戰。

十月十一新聞報導，美國紐約甘迺迪國際機場chit幾工出現一名神秘男子khiātī以色列國家航空櫃台附近，tiām-tiām為收tio̍h以色列國防軍徵召通知回國ê人買機票，機組人員講hit-ê人總共已經有買250張飛往以色列ê機票。

愛國拼代先ê以色列人，阮向恁行最敬禮！ (231013)

註：哈瑪斯　　加薩走廊　　卡法阿札　　班奈特　　阿夫拉哈米　　賽普勒 　　斯　　伊斯坦堡　　甘迺迪　　　請唸華語