《各各他e5目屎--苦難得安慰》

 | | | 轉寄

約拿ê抗議

作者 紀福讚 2006.07.16

約拿tī尼尼微城宣告上帝所吩咐ê話，繞城一日，尼尼微城通城ê人lóng信服上帝，宣佈禁食，對大到細lóng穿麻衫。對án-ni，上帝看in ê行做有離開in ê歹路。這是歷史以來上成功ê一擺佈道，gín-á無算，有十二萬人悔改，連精牲都有份。這款紀錄，歷史明記（列王紀下十四章25節），連耶穌也o-ló（馬太福音十二章41節）。Che是何等大ê氣力kap thang歡喜ê代誌，總是傳道者約拿反轉受氣，甚至求死（約拿四章3節）。

為啥物約拿會受氣？親像耶和華所問ê，「你án-ni受氣，kiám合理mah？」約拿講，「我受氣到死，亦合理。我死比活khah好！」（約拿四章4、9節）這是一款真無理性ê受氣，連上帝也bē理解，啥物hō͘約拿表現這款bē當理解ê受氣？答案是：民族ê情結。

上帝命令約拿到以色列國ê對敵亞述帝國首都－－尼尼微城去傳道，m̄ koh伊無願意將上帝ê信息傳hō͘這個毀滅以色列國ê對敵，所以伊逃閃伊ê責任。上帝反悔m̄滅尼尼微，hō͘伊koh khah受氣。因為上帝若是憐憫尼尼微城十二萬人，為啥物伊無beh憐憫以色列，致到hō͘ in受掠，家破國亡，死失無數？上帝講：「我kiám m̄ tio̍h疼惜尼尼微這個大城mah？」約拿kiám-chhái beh質問講：「你kiám m̄ tio̍h疼惜以色列這個你所揀選ê民族mah？」這是約拿最後「無言ê抗議」（聖經最後無記載約拿ê回答，m̄是代表伊接納耶和華ê辯解）。

Tī這個故事，咱會tàng得tio̍h幾項教示：

第一，無疼ê傳信息，也會hō͘濟濟人悔改，因為主權在tī上帝。約拿所傳ê，是無憐憫ê信息，也無呼叫尼尼微tio̍h悔改。事實上，伊是無ài尼尼微ê人悔改。伊kan-taⁿ傳：「koh四十工，尼尼微beh倒壞！」Tī伊ê經驗內底，上帝是威嚴有氣力ê上帝，但伊m̄ bat體驗上帝ê憐憫。上帝hō͘伊做蔭影遮日曝ê苧麻枯焦，koh khah印證伊所想ê。上帝beh伊去警戒尼尼微，因為in ê罪惡透到上帝ê面前。伊m̄願去，因為伊向望尼尼微城tī罪惡中受滅亡，會tang3hou7伊出一口氣，因為民族ê情結伊怨恨尼尼微人。伊m̄願看tio̍h尼尼微人ê轉變，伊歡喜上帝降災禍hō͘ in。尼尼微三日才行會完ê路程，伊一日就行完。因為伊想tio̍h koh四十工，尼尼微城beh倒壞，伊就內心爽快，伊歡喜看tio̍h威嚴責罰人ê上帝，卻是上帝無照伊所期待ê，表現了祂ê憐憫，所以約拿大受氣。

第二，上帝ê憐憫tī咱ê身上，獨獨咱m̄知。上帝對約拿ê吞忍，表現了祂ê憐憫，約拿代先要求同船ê人kā伊hiat落海，hō͘海平定，但hiah-ê人無án-ni做，iáu是盡力划船beh近倚山。到tī最後海湧愈來愈大，in才kā伊hiat落海（約拿一章13節）。耶和華備辦大魚吞約拿，hō͘伊tī魚腹內三日三暝默想祈禱。耶和華也備辦一欉苧麻，hō͘伊發生khah koân約拿，做蔭影遮伊ê頭殼，hō͘伊免艱苦（四章6節）。上帝是án-ni體貼人ê上帝。耶和華也容忍約拿ê諷刺。約拿諷刺：「我知你是有恩典ê上帝，充滿憐憫、無快受氣、有豐盛ê慈愛。」（四章2節）伊也為tio̍h家己ê逃閃做辯解：「我tī本國ê時kiám m̄是án-ni講？所以我趕緊走去他施。」這是約拿ê「死鴨á，硬嘴poe」，m̄願認錯反悔。伊去傳上帝ê信息，是出tī受迫，是出tī報復ê心態，是出tī對上帝ê驚畏。總是上帝iáu-kú吞忍伊，使用伊，用逐款ê方式，向望伊認識上帝憐憫ê本性。

第三，上帝ê主權kap憐憫是kāng時發生ê。尼尼微城得tio̍h憐憫ê原因，是in通城徹底悔改，離開歹ê路，挽回上帝ê受氣。上帝命令人回轉，離開歹路，是表明祂完全ê主權。上帝命令約拿去傳所吩咐ê，也是表明祂完全ê主權。上帝hō͘苧麻一暝發生，一暝枯焦，也是表明祂ê主權，tī表明chiah-ê主權ê時，上帝表現了祂ê憐憫。上帝對約拿ê主權，表明了祂對尼尼微城ê憐憫。上帝表明主權ê目的，是為tio̍h憐憫，m̄是為tio̍h beh顯出祂ê威嚴。這是約拿ê誤解，所以伊講：「我死比活khah好！」因為伊無體驗tio̍h上帝ê憐憫，kan-taⁿ驚惶上帝ê威嚴，伊kap浪子譬喻中ê大kiáⁿ kāng款，雖然tī老父ê身邊，但m̄ bat體驗tio̍h老父ê憐憫，所以怨妒老父對浪子ê憐憫、疼痛。Tī浪子譬喻裡，耶穌說明了老父赦免ê主權kap伊ê憐憫是kāng時陣發生ê。親像耶穌每擺 ī醫治ê時，lóng會宣告赦免，這是宣告伊ê主權，但目的是beh憐憫hiah-ê hō͘病痛苦楚、hō͘污鬼轄制ê人（馬可福音二章10節）。

台灣最近ê犯罪殘酷kap公權力ê無能，hō͘家己驚惶。濟濟人感受tio̍h「台灣破病lah」，親像耶和華對約拿講--ê，「因為in ê罪惡透到我面前」（約拿一章2節）。結果，in通城禁食，對大到細lóng穿麻衫。領導者也tùi伊ê座位起來，褪去禮服，穿麻，坐tī火灰，出告示，通城禁食穿麻，大聲求叫上帝，逐人離開伊ê歹路。Án-ni，尼尼微避免受滅無ê災難，che kiám m̄是今á日ê台灣人tio̍h三思ê呢？