《宋澤萊新著《天路拾穗》TOJ/台灣字版》

 | | | 轉寄

Chútê 9：Siāukài chi̍tê ke̍k kántan, ū hāukó, siōng bíhó ê kîtó hoat!

作者 Sòng Te̍klâi 2026.03.01

Tē it pō͘ Chhenggī titkiù
Chútê 9：Siāukài chi̍tê ke̍k kántan, ū hāukó, siōng bíhó ê kîtó hoat!

Tùi Kitoktô lâi kóng, óngóng jīnûi kantaⁿ ū siūsé chiah ē bông SiōngChú kiùchō͘, só͘í kîtó sī bô ēng ê. Tùi Kitoktô lâi kóng, tiāⁿtiāⁿ kámkak chi̍t kang kantaⁿ ētàng kîtó chi̍t, nn̄g pái, chhùsò͘ bênghián siuⁿ chió; hôhòng kîtó sû lòlòtn̂g, tiāⁿtiāⁿ m̄chai teh kóng siáⁿ, inūi ánne, kîtó óngóng bôhāu.

Kám ū chi̍tê honghoat ētàng boánchiok hui Kitoktô kah Kitoktô, sûisî hō͘ in chìnji̍p Kitokkàu ê òpì tiong, chiū ánne tit tio̍h ìgōa ê konghāu leh?
Tapàn sī, ū!

Ēkha to̍h sī pitchiá só͘ thêkiong ê chi̍t chióng ke̍k līpiān koh ūhāu ê honghoat. Sī ánne chò：

1, Lí chíiàu kìtiâu sìê jī, to̍h sī "Iésu kiù góa" chit sìê jī to̍h ēsái, kîî ê kîtó sû lóng sénglio̍k biánkóng.

2, Lí tī khùn chêng, chhaputto 15 hun cheng, liânsòa choansim be̍kliām "Iésu kiù góa" chit kù ōe, chi̍t kù koh chi̍t kù tha̍k, liânsòa liām, m̄bián chhut siaⁿ, tiāmtiām liām. Lí thang chē leh liām, khiā leh liām, kiâⁿ leh liām, á sī chò ūntōng ê sî liām lóng bē ū būntê. 15 hun cheng liáuāu, to̍h khì khùn. Nāsī kámkak 15 hun cheng bô kàu, thang iânsio̍k kàu 30 hun cheng mā bē ū būntê. Chóng kóng chi̍t kù, kîtó oân lí to̍h khì khùn; chit chióng óngóng ē hoatseng lí sióngsiōng bē kàu ê kîchek! Kású lí ētàng chi̍t kang liânsòa ánne chò, só͘ siu ê konghāu to̍h ē koh khah puttekliáu.

Góa bô hoattō͘ kā lí kóng ē hoatseng siáⁿmi̍h kîchek kah hāukó, inūi lâng kiámchhái lóng bô kângkhoán; m̄koh hoatseng kîchek kah hāukó ê sî, lí kakī ē chaiiáⁿ! Te̍kpia̍t sī tùi hit kóa ke̍k suiàu kiùoān ê lâng. 1, Chù’ì! Lí tio̍h choansim liām, phòeha̍p ho͘khip liânsòa liām. Kantaⁿ ū chitê pìkoat!

Ēkha sī saⁿê lâng ê kiànchèng：
Bó͘ chi̍tê lāulâng, chìnchêng góa khùnbîn chin chhián, inūi ū liaphō͘sòaⁿ ê būntê, siōngchió múi mê lóng tio̍h chhéⁿ khí lâi chi̍t pái khì piānsó͘, m̄koh liām Iésu kiù góa liáuāu, óngóng chi̍t mê kàu thiⁿkng, khùn kah chin lo̍hbîn, bô suiàu pòaⁿmê khí lâi. Chhinchhiūⁿ chahng góa cha̍pjī tiám pòaⁿ khùn, khí lâi ê sî sī káu tiám pòaⁿ, tahtah khùn káu tiámcheng kú, bô siáⁿmi̍h bāng, chengsîn chin hó, chin khoàilo̍k!

Bó͘ chi̍tê siàuliânlâng, chhì kiâⁿ chi̍t kang íāu, cha mê kèngjiân káu tiám gōa to̍h hunhun khùn khì, tōa khùn 11 tiámcheng kú, kin'áji̍t chákhí chhéⁿ khí lâi, chengsîn bē bái. Kèsio̍k chhì khòaⁿ māi. Góa liām "Iésu kiù góa" ê sî, bô gōa kú ē kámkak sengkhu ni̍h ê Sènglêng chòngtāi khí lâi, huisiông līhāi! Góa kakī ê cha̍pliām chiū ánne ē bô khòaⁿ tio̍h! Kòekhì góa thiám kah ūsî bô siūⁿ beh hiankhui "sèngkeng", chit chióng kántan liânsòa ê kîtó liáuāu, kah "sèngkeng" chi kan khòaⁿ khí lâi chin chhinkīn, tiāⁿtiāⁿ chin siūⁿ beh hiankhui. Che chin kîbiāu! Sī m̄sī kántan ê kîtó chiah ētàng pâitû kakī ê ìliām, góa túchiah teh siūⁿ, i kah honggiân kîtó ū chi̍t tiám'á lūisū ê só͘chāi, m̄koh tī ìsek chânbīn koh khah chiautiám chi̍ptiong.

Bó͘ chi̍tê bo̍ksu, cha mê chhìthàm lâi liânsòa kîtó, 22:00~04:00 khùn chi̍tchhéⁿ, chengsîn hó. Kámsiā Chú Iésu! Liânsòa sèng ê kîtó chinchiàⁿ sī chin hósè.

Chit chióng kîtó sī bô hun Kitoktô á sī hui Kitoktô. Ū kóa hui Kitoktô, pitchiá bat kà i chò chit chióng kîtó ê sî, kângkhoán siu tio̍h chin tōa ê hāukó.

Góa siūⁿ SiōngChú to̍h sī chènglâng ê SiōngChú, bē kantaⁿ sī Kitoktô ê SiōngChú. I beh kiù só͘ū ê lâng, put chísī te̍ktēng ê lâng!

Só͘í hui Kitoktô m̄bián khehkhì, siūⁿ beh sùnkan théhōe Kitok òpì ê lâng, lí thang ánne chò!
—2019, 01, 12