《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 31：Kì góa ê "Sènglêng éngchū" ê óngsū
作者 Sòng Te̍klâi 2026.10.04
Chútê 31：Kì góa ê "Sènglêng éngchū" ê óngsū
Góa ēkìtit 2013 nî（chìnchêng góa lóng lia̍hchò sī 2104 nî） Gō͘ goe̍h chhe 4, tī Chionghòa chhīli̍p tô͘sukoán ê iauchhiáⁿ hā, chò chi̍t tiûⁿ "hoán Hu̍t-sì" iánkáng, têba̍k sī, "Tùi bílē sin sèkài" kàu " hòehi Tâioân ".
Tongsî, hoán Hu̍t-sì ê le̍kliōng íkeng sênghêng, hōetiûⁿ thiaⁿchiòng thatthat tīⁿ; m̄koh Má Engkiú iáu teh chò chóngthóng, iónghō͘ Hu̍t-sì kèsio̍k khí ê húnsi khìsè iáu sī huisiông sángsè. To̍h tī góa iánkáng teh beh kiatsok ê sî, chi̍tê lúsū（āu lâi phòaⁿtoàn engkai sī chi̍t ūi choangia̍p ê tóngkang）khiā khílâi khònggī, i jīnûi hiānjīm chhītiúⁿ bô engkai chhiáⁿ góa chit chióng hoán Hu̍t-sì ê lâng lâi iánkáng, jîchhiáⁿ pàngsiaⁿ ē chi̍t kài ê chhītiúⁿ soánkí ê sî, beh hō͘ chhītiúⁿ lo̍ksoán. Tāikhài sī i ê ōe bô thâusū, thāitō͘ ahpà, to̍h ín lâi hoán hu̍t jînsū ê hoánkek, sianghong ngē tú ngē tùichhiâng, hō͘siong bô beh saⁿniū, chhaputto beh phah khí lâi, tiûⁿbīn huisiông hūnloān. Góa huisiông bē sóngkhoài.
Tiongtàu 12 tiám iánkáng kiatsok liáuāu, siū iauchhiáⁿ khì kàu Chionghòa chhī siōng tōa ê chi̍t keng Chin Iésu Kàuhōe chia̍h tiongtàu, hit sî túhó sī in ê pò͘tō tāihōe, góa kah chin chē ê thoântō kah tiúⁿló tī kâng chi̍ttè toh chia̍hpn̄g. Chia̍hpn̄g liáuāu, tōatīn lâng chūchi̍p tī lâuténg ê hiohkhùn sek tapchhùikó͘.
Góa seng piáusī góa mā ēhiáu honggiân（chi̍t chióng te̍ksû ê ētàng kah sîn kauthong ê lênggí）, in chi̍t thiaⁿ, lóng huisiông hoaⁿhí. Ū chi̍t ūi chuchhim ê thèhiu tiúⁿló khaisí tùi góa siāukài Chin Iésu Kàuhōe ê honggiân, jīnûi in ê honggiân siōng ū sînle̍k, kah kîtha ê kàuhōe chin bôkâng. Góa kantaⁿ choansim thiaⁿ i ê siāukài, pēng bô piáusī gōa chē ìkiàn. Tng chit ūi tiúⁿló kóng kah khípōng ê sî, hutjiân góa hoatkiàn seklāi thianpông ū Sènglêng liûtōng ê iáⁿchiah, I to̍h thêng tī góa chiàⁿchhiú pêng thianpông ê kaklo̍h téngbīn, góa tng teh kámkak kîkoài ê sî, to̍h hoatkiàn Sènglêng chin kín lâu ji̍pkhì góa ê hengkhám'á, ū chi̍t káng loánliû thêng tī simchōng sìkho͘ûi. Tongsî góa ê simsîn bô chengchhái, hit káng loánliû khiok hō͘ góa ê sinsim bānbān'á ū unloán ê kámkak sóngkhoài khí lâi. Chit káng loánliû bô sûisî līkhui góa, itti̍t kàu góa kah in kòpia̍t, kiâⁿ lī Chin Iésu Kàuhōe, sīmchì tńglâi Lo̍kkáng ê chhù, I iáu sī chûnchāi tī góa ê hengkhám'á, huisiông sóngkhoài. Góa púnlâi lia̍hchún chitê sī góa ê théla̍t hiônghiông kakiông ê hiānsiōng, keh chi̍t tōaⁿ sîkan chóng sī ē siausit ê. M̄koh chi̍t lépài, chi̍t kògoe̍h, chi̍t nî kòe khì, á sī koh khah kú liáuāu, I iáu sī chûnchāi tī góa ê hengkhám'á, góa khaisí liáukái chit káng loánliû tekkhak to̍h sī Sènglêng.
Che to̍h sī góa ê "Sènglêng éngchū" ê sùnkan kenggiām. Sènglêng éngchū tī góa ê sengkhu liáuāu, tī chi̍t nî lāité, tiāⁿtiāⁿ hō͘ góa chhiongmóa hílo̍k, pêngan, jîchhiáⁿ ngē āmkún ê sèngchêng ū bē chió ê káipiàn, phîkhì jiûnńg chin chē. Che to̍h sī só͘ūi Sènglêng hō͘ lâng ê "chio̍h sim piànsêng bah sim" ê khaisí, mā sī kiat Sènglêng kóechí ê khaitoan. M̄koh chi̍t nî liáuāu, Sènglêng khaisí hiánlō͘ I bôpí sèngkiat ê púnsèng, hoánchiò chhut góa ê púnsiōng, hō͘ góa khaisí chùì tio̍h kakī ê lōechāi lâsâm bē khamtit, khòaⁿ chhut chi̍tchân-chi̍tchân ê chōeok khûn tī kakī ê sèⁿmiā tiong. Suijiân góa íchêng mā ū siókhóa thianjiân ê chènggī hó kiâⁿta̍h, m̄koh góa ithiòng kakī jīnûi liôngsiān sī bô khókhò ê; sūsi̍tsiōng, góa ê púnsèng sī kah'ì hoānchōe ê. Tùi chìnchêng kàu chitmá, só͘ hoān ê chōeok ēsái kóng sī móa sìkè lóng sī, chísī góa bô thóngkè i ê sò͘liōng jîí. Só͘ū ê chōeok lóng ûi tī "bô kongpêⁿ putgī" chitê te̍ksim, iā to̍h sī kā "súnhāi thajîn" ûi teh ê tiongsim tiám khílâi tiánkhui. Chiónglūi chóngkiōng ū Páulô tī Gala̍htia su só͘ kóng ê "kanîm, lâsâm, siâok, pài ngó͘siōng, siâsu̍t, siûhūn, siocheⁿ, khioh hūn, keksim, kiattóng, huncheng, ītoan, chi̍ttò͘（ū kò͘koàn tī chia ū hiongsat nn̄g jī）, chiúchùi, tîmlûn ê iànse̍k" téngténg ê pháiⁿ si̍pkoàn; tûliáu che ígōa, iáu ū koh khah chē bētàng kā lâng kóng ê chōehêng.
Hutjiânkan, góa bêngpe̍k góa to̍h sī chōeok ê chi̍pha̍pthé, kahná chi̍tê kui sengkhu nōakhì seⁿ chhng ê lâng, kahná íkeng bô io̍h thang i!
Sènglêng khaisí giâmlē khí lâi, sihêng I ê koánkà, puttoān tī góa ê lōechāi, appek hitê ìài hoānchōe ê "góa", kìmchí góa ê chōehêng, sianghong tiánkhui keklia̍t chiàncheng. Sènglêng chóng sī hiánlō͘ góa só͘ hoān ta̍k tiâu ê chōe, ài góa chi̍ttiâu-chi̍ttiâu jīnchōe, chi̍ttiâu-chi̍ttiâu khì káichèng. Tng góa tékhòng kah siōng līhāi ê sî, tī bînbāng tiong, I ē phahkhui imkan ê mn̂g, hō͘ góa chham'ú tī chhim nâ ê imkan ni̍h, khòaⁿ hit kóa chin chē hoānchōe ê lâng ê bōng'ápo͘, kéngkò góa che sī chionglâi góa khì ê só͘chāi! Á sī kiâⁿ tī móa sìkè lóng sī chheⁿ hoeh ê kelō͘, hō͘ góa kiaⁿhiâⁿ phi̍hphi̍h chhoah, bētàng tôsiám tit! Góa hām lo̍hkhì boa̍tji̍t símphòaⁿ ê kongkéng ni̍h, chi̍tlîsi’á ê chōe lóng ohtit tôsiám SiōngChú ê gánsîn. Góa chíhó pī pek ta̍k tiâu jīnchōe, ta̍k tiâu káichèng, kiatkio̍k tìsú góa ê chōehêng bānbān kiámchió. Hitê chōeok só͘ lúichek ê "góa" khaisí sitkhì tēpôaⁿ, thèsiú kàu lōechāi ê chi̍tê phianphiah kaklo̍h khì, kantaⁿ ētàng beh sí bē tn̄gkhùi, khōngkhōng hián, kahná hong tiong teh beh hoa khì ê la̍hchek!
"Sènglêng éngchū" só͘ tòa lâi ê kiatkó to̍h sī chōeok ê "lāu góa" kah "Sènglêng" chi kan ê bô thêng chiàncheng, píchhú bô hoattō͘ pēngchûn, chhùn thô͘ pit cheng!
──2017, 07, 26 siá tī Lo̍kkáng
