《宋澤萊新著《天路拾穗》TOJ/台灣字版》

 | | | 轉寄

Chútê 32："SiōngChú ê lêng tòa tī lín simlāi" sī siáⁿmi̍h ìsù?

作者 Sòng Te̍klâi 2026.10.11

Chútê 32："SiōngChú ê lêng tòa tī lín simlāi" sī siáⁿmi̍h ìsù?

Lômá Su 8：9, Páulô kóng, "Nāsī SiōngChú ê lêng tòa tī lín simlāi, lín to̍h bē sio̍k jio̍kthé, chiū ánne sio̍k Sènglêng à." Tùi chit kù ōe, góa bongchhōe chin chē pái, m̄koh bô hoattō͘ tittio̍h khaktēng ê ìgī. Chúiáu sī chitê "sim" jī hō͘ góa kámkak tiûtû kiaⁿhiâⁿ, "sim"chitê miâsû tī siusûha̍k téngbīn sī chin oh tēnggī ê.

Ēkha ū nn̄gê káisoeh, chi̍tê bē thong, chi̍tê biánkióng ē thong. Kású kóng "sim" chitê jī sī teh chí "kìek", ánne "SiōngChú ê lêng tòa tī lín simlāi" to̍h ētàng káisek chò "SiōngChú ê lêng chûnchāi tī lín ê kìek ni̍h", piáubīnsiōng ê ìsù sī huisiông chhengchhó. Pílūn kóng, bó͘ chi̍t pái, lí khì chhamka te̍khōe, pī kokchè ūmiâ ê thoântōchiá hōaⁿchhiú tī thâukhak téngbīn, lí hutjiân chi̍tsî kámsiūtio̍h Sènglêng sûnkhoân liûchoán tī sinthé ni̍h, saⁿkhatiô-nn̄gkhathiàu, tongtiûⁿ tó tī thô͘kha, chhiùⁿkhí lêngkoa. Tāichì kòeliáu 3 kògoe̍h á sī 3 nî, lí iáu sī ētàng kìtiâu tongsî Sènglêng thêngliû tī lí sengkhu téng ê kenggiām, lí chin iông’ī to̍h hôeekkhí tongchho͘ Sènglêng tī lí sengkhu téng só͘ chò ê SiōngChú sèngkang, lí póliû Sènglêng ê ìnsiōng tī lí ê "kìek" ni̍h. Ánne, che to̍h sī "SiōngChú ê lêng tòa tī lín simlāi" ê chi̍t chióng káisoeh. M̄koh, lí ittàn chháṳōng "sim" to̍h sī "kìek" chitê káisoeh, to̍h chin oh tùi āubīn "Lín to̍h bē sio̍k jio̍kthé, chiū ánne sio̍k Sènglêng" chit kù ōe chò ha̍plí ê líkái. Kám kóng kengkòe kokchè ūmiâ ê thoântōchiá hōaⁿchhiú tī thâukhak téngbīn, ētàng chhiùⁿ lêngkoa ê lâng, kám kóng ta̍k lâng khòtio̍h i tùi Sènglêng ê ê "kìek" to̍h "bô sio̍k jio̍kthé, chiū ánne sio̍k Sènglêng"? Kám kóng kengkòe kokchè ūmiâ ê thoântōchiá hōaⁿchhiú tī thâukhak téngbīn, ta̍kê ētàng chhiùⁿ lêngkoa ê lâng, khòtio̍h i tùi Sènglêng ê ê "kìek", chiū ánne oânchoân chiâⁿsèng（bô sio̍k jio̍kthé）? Góa siūⁿ beh tī sìngióng ê lō͘ ni̍h bô chiahni̍h sio̍k ê tāichì! Kàu bo̍kchêng ûichí, góa mā bô thiaⁿkòe ū lâng kengkòe bó͘ thoântōchiá hōaⁿchhiú, khòtio̍h tùi Sènglêng ê "kìek" to̍h oânchoân līkhui siâchêng suio̍k ê si̍tlē; góa mā m̄ siongsìn sèkan lâng ê "kìek" ū chiahni̍h tōa ê konglêng thang chhútāi Sènglêng si̍tthé ê úitāi sūkang. Kású ánne, Páulô to̍h bô suiàu tùi Kolîmto Chiânsu hit tīn ū Sènglêng kengle̍k khiok chêngio̍k ōngsēng ê sìntô͘ hoat tōa siūkhì. Só͘í tī chia kā "sim" káisek chò "kìek" sī kóng bē thong!

Kású kóng "sim" chitê jī sī teh chí sîsî-khekkhek Sènglêng éngchū sengkhu liáuāu ê "chhâkak á sī kámkak" to̍h píkàu khah sùphòe. Ánchóaⁿ kóng leh? inūi Sènglêng éngchū tī sin ni̍h sī ētàng kámkak tio̍h ê, tùi Sènglêng lāichū tī sinthé ê tó chi̍tê ūitì á sī Sènglêng só͘ hō͘ in ê pêngan hílo̍k, á sī jīnchōe hóekái, sīmchì sī hō͘ lí éngoán ê sèⁿmiā, lóng ē ū bêngkhak ê chhâkak. Tôngsî tng lí choánhiòng sèngkiat ê tāitō tōa pō͘ chìnchêng ê sî, lí ē kámkak lí tittio̍h kàu taⁿ bô lâng ū ê chūiû, che mā sī chi̍t chióng tiāⁿtiāⁿ ū ê kámkak. Chóng kóng chi̍t kù, tng lí ū chiahê sîsî-khekkhek Sènglêng éngchū sengkhu liáuāu ê "chhâkak á sī kámkak" liáuāu, lí chiah ē hoathiān kakī chiâⁿchò sèngkiat, iā to̍h sī "bô sio̍k jio̍kthé, chiū ánne sio̍k Sènglêng" à.

Só͘í góa jīnûi kā "SiōngChú ê lêng tòa tī lín simlāi" káisek chò "sîsî-khekkhek Sènglêng éngchū sengkhu liáuāu ê chhâkak á sī kámkak" chiah kóng ē thong!

──2014, 08, 08 tī Lo̍kkáng