《宋澤萊新著《天路拾穗》TOJ/台灣字版》

 | | | 轉寄

Tē it pō͘ chhenggī titkiù Chútê 1_6. Bôpí bílē ê thiantông

作者 Sòng Te̍klâi 2026.01.04

Tē it pō͘ chhenggī titkiù
Chútê 1, góa ūisiáⁿmi̍h beh sélé? _6

6. Bôpí bílē ê thiantông
Lí kám chaiiáⁿ thiantông ê bílē? lí kám chaiiáⁿ Thiankok ū chin ū siān koh sī chi̍tê huisiông bílē ê só͘chāi?

Kângkhoán sī cha̍p kúi nî chêng, inūi Sènglêng liâmpiⁿ ū liâmpiⁿ bô teh hia̍pchō͘ góa chò hóekái jīnchōe ê kangchok. Ū chi̍t tōaⁿ sîkan, itti̍t kámkak kakī ê sinsim huisiông lahsap; lóng kámkak chit khoán kútn̂g tîmbê tī koa bú, lúsek, chhī káu, khiâ bé tán hiónglo̍k ê sinsim, tāikhài íkeng bô hoattō͘ thang kiù, to íkeng sìcha̍p hòe à, só͘ lúichek ê lâsâm liân kakī to m̄ káⁿ ka chimchiok khòaⁿ. Á kí ba̍k khòaⁿ khílâi, chitê sèkài tîmbê tī koa bú, lúsek, chhī káu, khiâ bé tán hiónglo̍k sī bē thêngchí ê, lí chin oh bē kèsio̍k bak tio̍h i, lán lâng tī Kang ô͘, sī bô hoattō͘ siámpī ê, lâi kàu sin thiⁿ sin tē sī bô bāng ê, SiōngChú bē ài chiahni̍h lahsap ê sengkhu. Siōng bóe chiah sī lán kā só͘ū tîmbê tī koa bú, lúsek, chhī káu, khiâ bé tán hiónglo̍k, chòhóe hông tâi lo̍hkhì tēga̍k ê hóe ô͘tiong.

Tongsî, góa siūⁿ beh chia̍h chhài jîchhiáⁿ kìm choa̍ttùi itchhè ê io̍kbōng, tú chhinchhiūⁿ tiongkó͘ ê siu sū, piàⁿmiā tī khó͘ siu ê tiongkan. Ū chi̍t kang, mā sī beh khùn chìnchêng, góa kā SiōngChú sîn kóng,"SiōngChú ah, góa íkeng bô pānhoat à, chitê tūilo̍h ê sengkhu sī bô hoattō͘ khǹg tī thiantông ni̍h, tī SiōngChú ê bīnchêng góa bô hoattō͘ amkhàm kakī tùi siaⁿ sek ê kah'ì, hō͘ góa lâi toānchoa̍t kah sèkài ê ónglâi, hō͘ góa lâi hongpì thong hiòng sèkài ê tōlō͘, ánne chò, SiōngChú chiah ē Khó͘ khó lah."

M̄ chai khùn liáu gōa kú, chóng kóng chi̍t kù, tī ībāng tiong, góa hoatkiàn kakī hông thêseng kàu chi̍tê chin koân chàn ê só͘chāi, kámkak kakī hôngkhǹg tī chi̍tê chin tōa kahná thangkng ê polê chhùni̍h, góa tú tó tī chi̍tê chin sóngkhoài ê tōa bînchhn̂g téng; hit sî ū chi̍t kó͘ le̍kliōng kàng tī góa ê sengkhu téng, liáuāu kahná po̍kchà, góa chùbo̍k khòaⁿ tio̍h kakī sengkhu ê piáubīn phôehu, lâu lo̍hlâ kāukāu ê chi̍t phiàn sekchhái bô hókhòaⁿ ê chúi, chi̍t chūn lâu hiòng chhù ê kak lo̍hkhì. Chit sî, góa kí ba̍k khòaⁿ thiⁿ, to̍h khòaⁿ tio̍h thiⁿ ni̍h ê kîkoan, kuiê thiⁿténg lóng sī chi̍t lia̍p chi̍t lia̍p ê chheⁿ, tī thiⁿténg móamóa sī, pe̍h kah chhinchhiūⁿ seh, múi chi̍t lia̍p lóng ū bó͘tan hoe hiahni̍h tōa, m̄koh kngbâng unjiû, chi̍t si'á to bô jīmhô siojoa̍h ê kámkak. I ê chōnghóng ná chhinchhiūⁿ lán tī joa̍hthiⁿ àmmê só͘ khòaⁿ tio̍h ê gînhô móa thiⁿ kénghóng, chísī lí suiàu kā gînhô chōnghóng hòngtōa kàu pah pōe lâi sióngsiōng to̍h ētànḡ. Góa chiônglâi lóng bô siūⁿkòe thiⁿténg ē chiahni̍h khòngkhoah bílē, tī bíkéng iáubōe siausit ê sî, pòaⁿ chhéⁿ tiong, góa kā piⁿ'á khùn iáubōe lo̍hbîn ê khanchhiú, góa kóng,"lí kám ū khòaⁿ tio̍h? thiⁿténg kèngjiân chiahni̍h súi!"hit sî thiⁿ íkeng kng ā, góa peh khíchhn̂g, hutjiân chi̍tsî kámkak sinsim lóng huisiông chhengkhì.

Chitê bāng hiánbêng Kitokkàu pēng m̄ sī chi̍tê kìmio̍k ê chongkàu. SiōngChú bêngbêng-pe̍kpe̍k kā lán kóng, bôlūn lí ū gōa lâsâm, tī lí lâi kàu SiōngChú Koktō͘ ê sî, SiōngChú ētàng tī tāmpo̍h’á kú chi kan, to̍h kā lí itseng ê lâsâm khìtû, hôe ho̍kgoân lâi ê chhengkhì, sèkan ê lâsâm kantaⁿ ētàng thêngliû tī piáubīn, bô hoattō͘ thêngliû tī chinchiàⁿ SiōngChú ê tiān（lán ê sengkhu）téng, lí ná tio̍h kìmio̍k?

Tôngsî, chitê thiⁿténg ê kéngsek chinchiàⁿ súi, góa m̄chai he sī m̄ sī"têngthiⁿ", chúnkóng m̄ sī têngthiⁿ hó lah, ánne lí mā ētàng tùi i thuisióng Páulô khì kàu ê"saⁿ têngthiⁿ"ū gōa súi, kohchài chhuisak khì kàu boa̍tji̍t íāu ê"sin thiⁿ sin tē"ū gōa súi, i káipiàn liáu góa tùi Kitokkàu ithiòng bô sekchhái ê koanliām, góa chaiiáⁿ Kitokkàu ni̍h únchông chi̍tê bôhān bílē ê thiantông.

Ísiōng sī chit cha̍p kúi nî tiongkan tú chiapchhiok tio̍h Kitokkàu sî ê chho͘kî kúiê kenggiām. Góa tînsu̍t chiahê sūsi̍t, pēng m̄ sī thiaukò͘ì ēng lâi tián hongsîn lán ê SiōngChú, á sī beh kā pa̍tlâng kóng, chiahê lóng sī Kitoktô ê pêngsiông kenggiām, tio̍hsǹg sī iáubōe chiap siūkà ē chìmlé ê Kitoktô （chiahê kenggiām lóng hoatseng tī góa iáubōe siūsé chìnchêng ）, lí mā ētàng ū chiahê kenggiām. Cha̍p kúi nî chêng, ūi tio̍h beh ìnchèng chiahê kenggiām lóng sī pêⁿ si̍t ê Kitoktô kenggiām, góa bat sìkè siuchi̍p"Gō͘sûncheh kàuphài"kah"Lêngunphài"ê chheh, tōaliōng oa̍ttho̍k, chaiiáⁿ Sènglêng tī tēkiû téngbīn ê ūnhêng chōnghóng, Sènglêng tī saⁿ tōa iûⁿ kah gō͘ tōa 洲 chiâⁿ chhengbān ê sìntô͘ sengkhu téng só͘ hiánsī ê īlêng kîchek, kah góa pí khílâi koh khah sī hiânbiāu bān pōe, góa ê kenggiām tōapō͘hūn iáu lóng sī chi̍ptiong tī"ībāng"téngbīn, á koh khah chē ê kàutô͘ sī hiánsī tī ētàng kóng īgiân, kóng honggiân, ētàng i pēⁿ, ētàng koankhòaⁿ īsiōng ê chióngchióng hongbīn. Góa tī 1995 nî chhutpán " hoehsek iāpô kànglîm ê siâⁿchhī " chit pún Kitokkàu siósoat, lāibīn só͘ siá ê kîchek īlêng, to̍h sī sèkài ta̍k chióng kîchek īlêng ê sok iáⁿ. Che tú ènggiām Kūiok " Iôel su " nn̄g chiuⁿ 28─29 cheh, sianti Iôel īgiân só͘ kóng,"íāu, góa beh kā góa ê lêng piàⁿ lo̍h khì hō͘ ta̍k lâng, Lín ê kiáⁿjî beh soankò góa ê sìnsit; lín ê lāulâng chò kîī ê bāng; lín ê siàuliânlâng khòaⁿkìⁿ īsiōng. Hit sî, góa sīmchì ài kā góa ê lêng piàⁿ lo̍h khì hō͘ lô͘po̍k kah lúpī."chhiáⁿ chù’ì, SiōngChú beh piàⁿ lo̍h I ê lêng hō͘ múi chi̍tê lâng, m̄ sī kantaⁿ hō͘ bó͘ mih lâng. Chíiàu sī sìn Iésu ê lâng tiāⁿtio̍h chin iông’ī to̍h ētànḡ tit tio̍h kaitit ê un ko kah khésī, lán engkai m̄ kiaⁿ mô͘kài ê kiôngtāi kah kùilê, mài himbō͘ sèkài ê ênghôa hùkùi, lán engkai tiāmtiām’á sìn lán só͘ sìn ê, siútiâu SiōngChú ê tō, ti̍tkàu sin thiⁿ sin tē ê lâilîm!

Chòekīn Martin Luthur kàuphài ēbīn ê Sìngīhōe ê chímōe hiaⁿtī lâi góa ê chhù, tāike hō͘siong tâmlūn kah chin hoaⁿhí; in kàutō góa chin chē sèngkeng ê tìsek, hō͘ góa huisiông kámkek. Tī chit cha̍p kúi nî chi kan, góa mā ū chiapchhiok tio̍h chin chē ê kàuphài, góa mā iōngkong oa̍ttho̍k chiahê kàuphài ê chúiàu tùchok, in tōatosò͘ lóng chin hó, in ūsî lânbián ē tu̍tjiân kóng chhut sèngkeng chin chē ê ōegí, the̍h lâi tòngchò in kàuhōe ê piauchhiam, che lóng sī chèngsiông ê hiānsiōng; nā bô, in to̍h bô hoattō͘ tu̍thián kakī ê te̍ksek, khióngkiaⁿ sìntô͘ to̍h ē cháu khì à. Îit ê khoattiám sī, In ē ēng kakī ê te̍ktiám lâi kongkek kîtha ê kàuphài, sīmchì bô sioh kóng pa̍tê kàuphài sī"siâ kà". Ánne chò to̍h m̄ tio̍h khì ah, che sī chē chéⁿ koan thiⁿ ê hêngûi. Sèngkeng ê káitho̍k sī to bīn ê, ūsî bó͘ só͘chāi ê chi̍t kù ōe sīmchì tī kîtha só͘chāi sī hông hó͘ⁿtēng. Chhiūⁿkóng ū bó͘ chi̍tkóa chákî ê kàutô͘ kah góa, lóng kianchhî"m̄ chia̍h chèpài mi̍h"ê kuichek, m̄koh tī Páulô ê giânlūn to̍h hō͘ Páulô hó͘ⁿtēng. Lán tio̍h kóng siáⁿmi̍h chiah sī chèngkhak leh? chin oh kóng. Kású lí tu̍tchhut bó͘ chi̍tê koantiám soah bô kò͘ tio̍h kîtha ê koantiám, lí to̍h ē chiâⁿchò kàuhōe ê húihoāi chiá. Lán engkai chaiiáⁿ, só͘ū ê kàuhōe lóng sio̍k tī kâng chi̍tê kithé, sio̍k tī Iésu ê koánhat hā kha, kongkek kîtha ê kàuphài, téng'î sī chū húi kithé, ē chin ohtit sêngsiū boa̍t āu ê chōechek. Khoat tek ê tāichì chóng sī bô engkai chò. Sìngīhōe ê chímōe hiaⁿtī khiok bô chitê khoattiám, in chin choânbīn tek ētàng hâmkhàm só͘ū ê koantiám, kóng bêng kakī ê koantiám ê sî mā bē lī " sèngkeng " só͘ piáusī, in"chin ū ha̍kbūn", sī góa só͘ tú tio̍h ê" sèngkeng " sò͘ióng chin koân ê kàuphài, hō͘ lâng kámkak huisiông hoaⁿhí.

Só͘í tng Tân Jînchong bo̍ksu kóng tio̍h beh ūi góa kiâⁿ sélé ê sî, góa mā the̍h bē chhut kīchoa̍t ê líiû. Iésu bat tī Ioktàn Hô siūsé, I ê khiampi thêchhéⁿ ta̍kê Kitoktô lóng ū gībū lâi iânsio̍k chitê chètō͘, só͘í góa kin'áji̍t tōgī siōng bē cháusiám tit, sóngkhoài chiapsiū chìmlé. Kámsiā Tân bo̍ksu, kámsiā Sìngīhōe chin chē ê chímōe hiaⁿtī, kámsiā lán ê Chú Iésu!

──2010, 05, 17 tah tī " Kitokkàu thongsìn "