《宋澤萊新著《天路拾穗》TOJ/台灣字版》

 | | | 轉寄

Chútê 2：Kì hó pêngiú Ông Sèhun sìn "Iésu síkhì kohoa̍h" ê kò͘sū

作者 Sòng Te̍klâi 2026.01.11

Tē it pō͘ Chhenggī titkiù
Chútê 2：Kì hó pêngiú Ông Sèhun sìn "Iésu síkhì kohoa̍h" ê kò͘sū

Ông Sèhun hiaⁿ pí góa tōa 1 hòe, chhaputto tī 1975 nî chóiū goán to̍h píchhú jīnbat à.

Hit sî, góa iáu tī Tâipak kokli̍p suhoān tāiha̍k teh tha̍kchheh, inūi tn̂gnî phòapēⁿ ê koanhē, góa khaisí siá siósoat lâi siautháu sinsim ê thòngkhó͘. Hit sî góa tāiha̍k sì nî, siá tn̂gphiⁿ siósoat "Hùi hn̂g", jîchhiáⁿ kā siósoat tâu hō͘ chúpian "Tâioân Bûngē" ê Chiong Tiāuchèng siansiⁿ. Hit tongsî, “Tâioân Bûngē” sī chi̍t pún huisiông sè ê khanbu̍t, chhaputto 50 ia̍h jîí, tongjiân bô hoattō͘ khanteng tn̂gphiⁿ siósoat tī téngbīn. Chiong Tiāuchèng siansiⁿ to̍h pàithok Âng Sénghu hiaⁿ kah Ông Sèhun hiaⁿ kā kókiāⁿ tòa tńglâi SuTāi hêng góa. He sī goán siōng chá ê jīnbat, tongsî, goán lóng iáu sī jīcha̍p hòe chhutthâu ê chhengliân lâng, tùi bûnha̍k chhiongmóa jia̍tchêng.

Chhúāu, i itti̍t tī pò kài chò kìchiá, goán mā itti̍t sī chin ū chhimkau ê pêngiú. Tī 1979 nî Bílētó sūkiāⁿ liáuāu, i ìgōa ta̍hji̍p chèngtī kài, chò Tâitiong chhī gīoân, iûkî sī tī 1986 nî chóiū, i kah goán kúiê pêngiú khaisí pān "Tâioân Sinbûnhòa Cha̍pchì", koh khah sī tôngchiu-kiōngchè. Tongsî sī "Bílētó Sūkiāⁿ"po̍khoat liáuāu ê tēchhit nî, koklāi hoán Kokbîntóng ê chengeng chhaputto lóng pī koaiⁿ ji̍pkhì kaⁿlô, púnthó͘ chèngtī ūntōng chìnji̍p huisiông "soksat" ê kaitōaⁿ, hoántùi le̍kliōng siū tio̍h khongchiân ê chhòchiat. "Tâioân Sinbûnhòa Cha̍pchì" siūⁿ beh phahphòa kìmkhī, iânsio̍k hoánkhòng ūntōng giânlūn, thang kóng sī pō͘pō͘ gûiki, chhaputto to̍h sī kiâⁿ tī lôga̍k ê pianiân, inūi tongsî Chiúⁿ Kengkok iáu oa̍h leh, pe̍hsek khióngpò͘ iáu bûsó͘-putchāi. Ông Sèhun hòngtáⁿ chhutjīm goán cha̍pchì ê siātiúⁿ, kású chiâⁿsi̍t jiá hō, tēit ê pī koaiⁿ ji̍pkhì kaⁿlô ê to̍h sī i!

Che chiāmchhiáⁿ mài the̍h. Iáu sī lâi tâm kóa goán ê chongkàu sìngióng, Ông Sèhun sī tī 2000 nî ê nîchhe khaisí sukhó "Iésu síkhì kohoa̍h" ê būntê, chiū ánne piànsêng Kitoktô ê lâng!

Tongsî, Ông Sèhun tú tùi li̍phoat úioân siàjīm, chúnpī kèsio̍k kohchài hùnchiàn 2004 nî ê li̍phoat úioân soánkí. Hit sî, A’píⁿ chóngthóng chò Kokka Bûnhòa Chónghōe ê hōetiúⁿ, phèngchhiáⁿ Ông Sèhun tamjīm hù pìsutiúⁿ.

Inūi chiôngsū chèngtī sī huisiông sinkhó͘ ê tāichì, te̍kpia̍t ohtit pībián tio̍h kaupôe limchiú. Tongsî, góa khòaⁿ chhut i ê sinsim chōnghóng kah íchêng ū kóa bô kângkhoán, íkeng hām lo̍hkhì chi̍tê huisiông chhámtām ê chōnghóng ni̍h. Lâng khòaⁿ khí lâi sī sán ê, bīnsek inūi tn̂gnî limchiú, khòaⁿ khí lâi "la̍h n̂g" bē khamtit.

Chìnchêng, i sī chi̍tê huisiông khiânsêng ê lāu Hu̍tkàu tô͘. I sèhàn ê sî to̍h tiāⁿtiāⁿ kah i ê lāubú chhutji̍p Tâitiong ê "Hu̍tkàu Liânsiā" lé Pu̍t thiaⁿ keng, āu lâi iû Lí Pénglâm kisū ūi i kíhêng kui’I ê gîsek, chiâⁿchò chèngsek ê Hu̍tkàu tô͘, hoathō "Hūikhîn", chiâⁿchò TāiSēng Hu̍tkàu ê sìntô͘.

I kui’i TāiSēng Hu̍tkàu ê goânin sī, chū sèhàn chhinba̍k khòaⁿ tio̍h jînsè seⁿ lāu pēⁿ sí ê bôpiⁿ thòngkhó͘, ǹgbāng chià tio̍h chôngpài Sekkhiamô͘nî, lâi káitû i tùi síbông ê kiaⁿhiâⁿ.

Ông Sèhun tùi TāiSēng Hu̍tkàu ê sìngióng huisiông jia̍tsim, tī i ê siang chhiúoán téngbīn, lâu lo̍hlâi pī lo̍kthih só͘ sio chhut lâi ê chi̍t chhoàn kàipa; tûliáu che ígōa, i tī kakī ê chhù ni̍h, to̍h sī gīoân ho̍kbū chhù ê piahtó͘ téng ū kòa chi̍t pak chin tōa ê Omîtôhu̍t siōng, lâi piáusī bûchīn ê kiongkèng.

1989 nî chóiū, góa kah chin chē ê pêngiú cho͘sêng "Kinpún（SióSêng）Hu̍tkàu thoânthé", sinthé le̍khêng goânsí Hu̍tkàu ê "Ngó͘im koanchhat siuhēng hoat", goán múi lâng kā kakī tāmpo̍h’á kú só͘ koanchhat ê simtek ēng ji̍tkì siá lo̍h lâi, chi̍tsut'á to bô chhìnchhái. Ông Sèhun sûisî kaji̍p goán ê thoânthé. Ū chi̍t pái, Ông Sèhun tī chhan toh chia̍hpn̄g gia̍p chhài ê sî, hutjiân hoatkiàn i ê “Góa" phahm̄kiàn khì, iā to̍h sī sinsim kah bānmi̍h suijiân kah kòekhì kângkhoán chiàusiông chûnchāi, thang kóng to̍h sī tī kakī ê sinsim kah gōachāi útiū tiong chhōe bē tio̍h kòekhì só͘ kámsiū ê hitê “Góa"; chiū ánne, i téchiām chèngji̍p "bô góa" tiong ū kúi kang kú, "bô bêng" sûisî téchiām pī sàu kah kngkngkng, tit tio̍h goânsí Hu̍tkàu só͘ kóng ê "sutôhoân kó ". Hit sî, i iáu tī chèngtôaⁿ téngbīn chin oa̍htāng, m̄koh, bô lâng ētàng khòaⁿ chhut chitê chèngtī jînbu̍t sī chi̍t ūi Hu̍tkàu sutôhoân kó ê Sèng chiá.

"Bô góa" ê théngō͘, khoàisok tòa lâi i tùi "Samhoat ìn" ê jīnti, káitû i tùi Omîtôhu̍t ê choa̍ttùi sìngióng, tùi TāiSēng Hu̍tkàu ê pètoan hutjiân ū chhimkhek ê bêngpe̍k, sûisî liáukái "TāiSēng Hu̍tkàu ê Pu̍t" pēng m̄ sī "Sekkhiamô͘nî Pu̍t". I thiàuthoat TāiSēng Hu̍tkàu ê bêbū, kiâⁿ ji̍pkhì kah Sekkhiamô͘nî púnlâng kângkhoán ê kéngkài tiong.

M̄koh, Sekkhiamô͘nî ê "bô góa" kéngkài kám chiū ánne káitû i só͘ū ê thòngkhó͘ kah kiaⁿhiâⁿ? Tapàn sī, bô! Hit sî, i sîsiông kā góa kóng, "bô góa" ê kéngkài sī chiāmsî ê, ūtangsî'á chiah ē chhuthiān, hit sî to̍h sī chengsîn huisiông chhengbêng ê sî; m̄koh bô chhuthiān ê sî, “Góa" koh chhengchhó sánseng chhut lâi, chōnghóng iáu sī chin hāi.

Ông Sèhun ê chitê khùnkéng, góa mā kengle̍k kòe; m̄koh, inūi 1990 nî chóiū góa bānbān choánpiàn sìngióng ê honghiòng, tī sìn "Iésu síkhì kohoa̍h" liáuāu, bô hó ê chōnghóng káisiān bē chió. Góa ê chōnghóng sūsi̍t siōng pí i khah hó chin chē.

Góa iáu ēkìtit, 2000 nî goán bat tī kiàntio̍k ka Ông Tēngkok khoahkhoah ê Koksèng hiong ê chhù ni̍h kìⁿbīn. Hit sî, góa tùi I "la̍hn̂g" ê bīnsek khòaⁿ chhut i ê khùnlân. I kóng i iûgoân puttoān limchiú, kantaⁿ iáu huisiông khiânsêng pài Omîtôhu̍t, sīmchì sī cháu piàn choân Tâioân ê biōsī khì pài kok chióng ngó͘siōng, sīmchì iáu siūⁿ beh kā Gîlân ê chi̍t chun "kim Máchó͘" chhiáⁿ tńglâi chhù ni̍h kiònghōng, m̄koh i iáu sī puttoān limchiú, bô hoattō͘ kìmchoa̍t tùi kakī ê pháiⁿ si̍pkoàn, jú pài ngó͘siōng chiú to̍h lim jú hiông, sinsim ê chōnghóng jú lâi jú bē khamtit!

Góa chaiiáⁿ, i huisiông hoânló limchiú ē hō͘ i sitkhì sèⁿmiā!

Tongsî, góa to̍h tùi i kóng, "Ánne lah! Putjû tha̍k "sèngkeng" khòaⁿ māi, kái sìn Iésu khòaⁿ māi, bô ittēng chōnghóng to̍h ē káipiàn."
I kóng, “Góa bô sèngkeng."

Góa kóng, “Góa kià hō͘ lí!"
Chiū ánne, 2000 nî Chiaⁿ Goe̍h, góa kā chi̍t pún "sèngkeng" kià khì i ê chhù ni̍h.

I tha̍k “sèngkeng” liáuāu, bētàng bêngpe̍k lāibīn ê ìsù.
Chiū ánne mn̄g góa kóng, "Ánchóaⁿ sìn Iésu?" Góa kóng, "Chin kántan, tio̍h khòaⁿ lí kám ētàng siongsìn 'Iésu síkhì kohoa̍h'. Kinkì “sèngkeng” kìchài, Iésu seng pī tèngsí tī si̍pjīkè téng, bûntô͘ kā i chhú lo̍h lâi, chòng tī hûnbōng ni̍h, m̄koh saⁿ kang liáuāu, i koh oa̍h khí lâi. Lí seng tha̍k “sèngkeng” ê “Sù Hokim Su” khòaⁿ māi, chi̍t khòaⁿ kohchài khòaⁿ, chhìkhòaⁿ kám ētàng chhōe tio̍h siongsìn I síkhì kohoa̍h ê líiû, jîchhiáⁿ kā líiû kā góa kóng, he to̍h ēsái tit à!"

Góa koh kā Ia̍p Kongbêng bo̍ksu ê chi̍t thò "kṳàu chinlí" ê chheh mā kià hō͘ i.

Chi̍t kò gōa goe̍h liáuāu, i kā góa kóng, “Góa oânchoân ētàng sìn Iésu síkhì kohoa̍h!"

Góa to̍h mn̄g, "Sī ánchóaⁿ?"
I kóng, “Góa khòaⁿ tio̍h “Sùtô͘ Hêngtoān” tē it chiuⁿ, Iésu teh beh sengthian ê sî, bat hoanhù bûntô͘ kóng, ' Mài līkhui Êlúsalèm …… kòe bô kúi ji̍t, lín ài tī Sènglêng ni̍h siū chìm …… Sènglêng kànglîm tī lín ê sengkhu téng, lín to̍h ittēng ē tit tio̍h lêngle̍k, jîchhiáⁿ ài tī Êlúsalèm, Iûthài choân tē, Samálīa, ti̍tkàu tēke̍k, chò góa ê kiànchèngjîn. ' Lí siūⁿ khòaⁿ māi leh, nāsī Iésu m̄ sī SiōngChú, I ánchóaⁿ ētàng chaiiáⁿ Kitokkàu bīlâi ē thoân kàu sèkài kok tē? Tio̍hsǹg chitmá ê lâmpak ke̍k, chíiàu ū lâng, lóng ū lâng sìn I. Kìjiân I sī SiōngChú, ánchóaⁿ bô hoattō͘ kiò kakī síkhì kohoa̍h?!"

Ông Sèhun chiū ánne sìn "Iésu síkhì kohoa̍h" chit hāng tāichì, líiû tônghông!

Góa púnlâi lia̍hchún Ông Sèhun ê sìngióng chísī kháuthâu ê, tāikhài bē chhinchhiūⁿ góa ánne siu tio̍h hāukó. Siáⁿlâng chaiiáⁿ, chi̍t tōaⁿ sîkan íāu, i khaisí ū ībāng, Sènglêng ínchhōa bāng tiong ê i se̍h kho͘’á tī khongtiong poe, sinsim kámsiū tio̍h bôpí ê khoàilo̍k khinsang. Siōng līhāi ê sī, Sènglêng khaisí kā i koánkà, kā hóesio tēga̍k ê mn̂g phahkhui, hō͘ i khòaⁿ tio̍h sin hām hóesio tēga̍k ê lâng ê thòngkhó͘, jîchhiáⁿ giâmlē kā i kéngkò, nāsī kèsio̍k limchiú, chionglâi tiāⁿtio̍h ē hām lo̍hkhì hóesio tēga̍k tiong khì hō͘ hóe sio. Ông Sèhun siū tio̍h kéngkò, suijiân iáu sī ohtit kàitû chiú giàn, m̄koh limchiú ê hêngûi sûisî siuliám bē chió.

2004 nî Gō͘ goe̍h, i kah i ê khanchhiú, nn̄gê kiáⁿjî, ti̍t’á, ti̍t simpū, chòhóe tī Tâitiong chhī Tāilí Sìngī kàuhōe siūsé, chiâⁿchò chèngsek ê Kitoktô.

Tī hit nî ê nîbóe, Tâitiong chhī li̍phoat úioân ê kēngsoán huisiông keklia̍t, Ông Sèhun chhamka kēngsoán, inūi phàihē ê būntê, Ông Sèhun hām lo̍hkhì khó͘chiàn, kó͘kè nāsī ētàng tòngsóan, khólêng sī tòthâu sǹg ê chi̍t, nn̄g miâ, chōnghóng hō͘ lâng chin kankhó͘ sim. M̄koh Sènglêng hō͘ Ông Sèhun chi̍tê ībāng, kóng i ē í tējī miâ tòngsóan, tāike lóng jīnûi bô khólêng. M̄koh phiò khui chhut lâi liáuāu, i kójiân í tējī miâ tòngsóan, só͘ū ê lâng lóng liāusióng bē kàu.

Ông Sèhun só͘ niásiū ê ê Sènglêng insù sī hiahni̍h bênghián, chiū ánne sengkhu chōnghóng káisiān chin chē. I tī kokhōe li̍phoat úioân ê pānkongsek piahténg khǹg chi̍tê tōa si̍pjīkè, lâi piáusī tùi Iésu ê chunkèng kah kámsiā.

Chiū ánne, chin chē lâng lóng lâi chhéngkàu i ê sìngióng kenggiām, i mā ínchhōa chin chē lâng khì siūsé.

M̄koh, i ê chiúkông ê chōehêng kám ū oânchoân káitû? Tapàn sī, iáubōe!

Chitê goânin sī, Sènglêng iáubōe oânchoân tòa tī i ê sengkhu ni̍h chi̍t sîkhek to bē līkhui.

Ūi tio̍h bô ài hō͘ kakī ê chiúkông ê chōehêng kèsio̍k, i āu lâi chhōe tio̍h ētàng káisiān i ê hêngûi ê N̂g Kimtiân bo̍ksu, tòe N̂g bo̍ksu ha̍ksi̍p “sèngkeng” ê tōlí. N̂g bo̍ksu chhutsin tī sèngkiat kàuhōe, tùi sìntô͘ ê hêngûi iaukiû huisiông giâm, i ētàng hō͘ Ông Sèhun koh khah tōa ê khoànkài, te̍kpia̍t kautài i tio̍h chù’ì “sèngkeng” ni̍h “Iâkop Su” ê lōeiông, tī hêngûi siōng kìmchí kiâⁿ ok, lâi bánkiù kakī ê lêngmiā. Ông Sèhun kintòe lāu bo̍ksu ê kàutō, chin ū sêngchiū; te̍kpia̍t sī kúinā pái khì Êlúsalèm tiâusèng, āu lâi chhutpán "Tùi Saikáng kàu Êlúsalèm" chit pún tiōngiàu ê suchek.

2017 nî chit nî, góa kā i kóng Sènglêng ētàng úntēng éng chū tī chi̍tê lâng ê sengkhu ni̍h, hō͘ lâng tit tio̍h thiatté sántû chōehêng ê tōa le̍kliōng. I "simsim-sioìn" chiàu ánne chò, kójiân hoatkiàn Sènglêng lāi chū tī i ê hengpak ni̍h, bô koh līkhui. I itchài koanchhat, hutjiân hoatkiàn hitê bih tī i lōechāi ê "ài limchiú ê góa" siausit khì à, kái chiú piàn kah chin iông’ī, chiū ánne to̍h bô koh siū tio̍h chiú giàn ê khòngchè. Chit sî, Sènglêng íkeng tī i ê lōechāi chò chúlâng, lâng íkeng piànsêng "Sènglêng ê tiān", i beh kohchài sûipiān limchiú íkeng bô gōa khólêng ā; sīmchì i beh tit tio̍h Iésu ê “Góa sī alfa, Góa sī omega, Góa sī chho͘, Góa sī chiong" ê sèⁿmiā, íkeng kahná sī tohténg ni kam à.

Ísiōng to̍h sī Ông Sèhun ê sìn "Iésu síkhì kohoa̍h" ê kò͘sū.
Ông Sèhun thang kóng sī góa itseng ê hó pêngiú, píchhú huisiông se̍ksāi, iûkî sī tī sìngióng siōng, píchhú thêhê, hō͘siong ha̍ksi̍p, siūek chin tōa.

I ê chongkàu thianhūn kah insù lóng pí góa khah koân, siōng tōa ê te̍ktiám sī i hêngtōng kókoat koh ūla̍t. Chánî i ēng sìcha̍pgō͘ kang ê sîkan to̍h ētàng chìnji̍p "bô góa" tiong, bô chhinchhiūⁿ góa tio̍h khò chēngchē chhamsiân chin chē nî chiah ētàng tùi "bô góa" ū kóa líkái. Āu lâi i mā sī iōngkong sìcha̍p gō͘ kang, to̍h ētàng káichong sìn "Iésu síkhì kohoa̍h", só͘ tit tio̍h ê sio̍klêng insù mā pí góa khah tōa, iûkî sī Sènglêng kànglîm tī i sengkhu téng, sûisî tio̍kchhiú káisiān i ê chiúkông ê pháiⁿ si̍pkoàn; bô chhinchhiūⁿ góa chiokchiok hùisî 23 nî, Sènglêng chiah khaisí lāi chū tī góa ê sengkhu, hō͘ góa liáukái kakī sī chōeok kui sengkhu ê lâng. Chióngchióng chiahê lóng hō͘ góa chūthàn putjû.

M̄koh, m̄kóan ánchóaⁿ kóng, goán lóng kokchū ū chi̍t thò sìn "Iésu síkhì kohoa̍h" ê kàugia̍h líiû, goán to̍h ittēng ētàng kiâⁿ tī SiōngChú ê chiokhok tiong, che sī éngoán bô piàn ê. Ánne kóng khí lâi, lí ná ē bô beh sìn "Iésu síkhì kohoa̍h" ê chi̍t thò líiû leh?

──2017, 08, 11 tah tī "Kitokkàu Thongsìn"