《台灣另類牧師.醫師─謝緯》

| | | 轉寄

7-01 山kap海ê醫療樂章

除了tī南投大同病院看診以外,具有「拓荒者」精神,koh勇敢接受挑戰ê謝緯,開始參與真chē醫療kap宣教事業ê推展工作。包括1955年協助開拓中寮佈道所、籌畫kap興建埔里基督教肺病療養院、埔里基督教山地病院;1960年開始到北門免費診所義診,成做第一位替烏腳病患開刀ê外科醫生;1964年創辦二林基督教病院等,tī埔里、台南北門以及彰化二林ta̍k所在留落伊súi ê足跡。

● 開拓中寮佈道所

南投教會tī 1909年設立,經過四、五十年了後,教勢擴展到附近鄉鎮,中寮鄉(舊名鄉親寮)mā有bē少會友。中寮鄉距離南投鎮約有10公里,屬偏遠山區,當地ê會友前往南投教會做禮拜路途tiàu遠,koh交通不便。禮拜日信徒tùi中寮山區行路到南投教會做禮拜,往往chi̍t-choā就ài兩點鐘以上。謝緯非常體諒會友ê辛苦,禮拜日中晝lóng會留in tī大同病院做伙吃中晝。

1865年馬雅各醫師來台宣教,台灣基督長老教會為tio̍h紀念chit擺有意義ê宣教歷史,tī 1954年通過設教百週年紀念「教會倍加運動」(P.K.U.)案,建議全教會應該把握時機,盡全力傳道kap開拓教會,向望(ǹg-bāng)教會、信徒會當倍增,來當做10年後設教百週年紀念大典ê奉獻禮物。謝緯kap小弟謝綸tùi án-ne 就kap吳天賜牧師同齊去中寮開拓教會。

1954年10月中,謝緯就kap吳坤淵、陳梓和專工到中寮鄉租一間店來做臨時ê佈道所。Koh tī 1955年1月聘台中中會巡迴牧師呂春長舉辦連續5工ê佈道會,這成做南投教會分設「中寮佈道所」之開始,mā是台中中會tī倍加運動中設立ê第一間教會,若tī全總會是排名第二。1956年3月由黃麗川(縣警局長)、陳國亮(縣府民政局指導員)kap吳天賜牧師向南投糖廠買土地興建禮拜堂,tī 12月27日落成,舉行獻堂感恩禮拜。續落來,除了謝緯前往義務講道以外,南投教會ê謝綸長老、李慶耀長老kap陳梓和長老等人mā前往協助教會事務。長期當做南投教會支會ê中寮佈道所,tī 2006年1月17日升格為獨立堂會。



● 謝緯(前排左五)kap中寮教會領洗禮ê信徒合照。(1960年)
前排右二為南投教會陳梓和;右四為張溫柔。


謝緯除了協助開拓中寮教會以外,伊mā長期tī hia義務傳道、參加週間ê聚會。當時南投kap中寮間,暗時無公車thang坐,中寮只靠一條猶未khōng tiám-a-ka ê石頭á路對外聯絡,彎來彎去,真chē所在peh崎koh落崎。謝緯常常為tio̍h參加拜五暗ê家庭禮拜,家己tùi南投騎鐵馬到中寮。聚會soah,謝緯kap會友phò-tāu,關心in ê生活狀況。有時,雖然信徒一再留伊tī in tau過暝,但是為tio̍h隔工iáu有真chē tāi-chì ài做,伊猶原家己透暝騎一點外鐘ê鐵馬,chiah tńg來到南投。