《當上帝開嘴講台語》

 | | | 轉寄

4.2.1 《巴克禮譯本》ê詞彙特色-4

作者 梁淑慧 2007.02.04

4.2.1.3有真chē「重疊」ê構詞

「重疊」是指重複kāng一個語位ê構詞方法，台語ê重疊詞因為詞類無仝所以有無kāng ê重疊方式kap形態（楊秀芳，1991；盧廣誠，1999），在chia咱kan-taⁿ就《巴克禮譯本》中siōng tiāⁿ出現ê AA形態來討論。
台語ê單音節形容詞通常用雙疊形式AA來弱化詞義，用三疊形式AAA來強化詞義（楊秀芳，1991；盧廣誠，1999）。若是用「燒」做例，程度tùi強到弱是：燒燙燙 > 燒燒燒 > 真燒 > 燒 > 燒燒。AA形容詞tī詞組抑是句中ê作用有四種：（1）做謂語。譬如：「衫白白」。（2）加上附加詞‘ê’ 囥tī名詞頭前修飾名詞，做定語。譬如：「白白ê衫」。（3）做動詞ê補語。譬如：「衫漂kah白白」。（4）囥tī動詞頭前修飾動詞，做狀語。譬如：「白白食一頓」。（1）、（2）、（3）ê詞性iáu是屬於形容詞。M̄-koh（4）ê詞性已經變成副詞，有一寡詞ê詞義mā改變ah。譬如：「白白食一頓」ê「白白」是免費ê意思。
咱將《巴克禮譯本》中ê AA形容詞對照原文kap其他譯本（註68），發現伊ê用法雖然mā有以上四種，m̄-koh伊ê詞義並m̄是弱化，反tńg khah接近華語（註69），有‘強化’ê作用。AA疊字詞tī《巴克禮譯本》中有相當chē ê數量，除了頂面所講ê「單音節形容詞重疊」以外，iáu有一寡是原本ê詞型就是疊字形態ê「疊字副詞」。Tī chia咱kan-taⁿ列出現代台語中khah罕見--ê。

表4.2.1.3 《巴克禮譯本》中ê疊字詞
（a）單音節形容詞重疊

＃巴克禮譯本台語漢字本華語解說做「謂語」做「定語」做「補語」做「狀語」
1 bêng-bêng 明明清楚、明白 講話~、看逐項物到~~看見、~講、~指示in
2chōe-chōe多多很多財物~、囝孫~~人、~牛、~日
3giâm-giâm嚴嚴嚴格 ~ê責備、~ê管轄 ~責備、~吩咐、~咒誓
4hn̄g-hn̄g遠遠很遠 ~ê所在、~ê海嶼、~ê兄弟離開~、四散t„ ~、傳到~~teh看、~teh khiä、~隨伊
5jia̍t-jia̍t熱熱灼熱心~、心志~~ê風、~ê火炭、~ê怨妒
6khang-khāng空空一無所有、空虛、徒然伊ê著磨~、心志~~ê事、~ê話、~ê禮物拂（pōaⁿ）到 ~~撒種、~安慰 我、~過日
7kín-kín緊緊趕緊 ~離開、~走、~幫助我
8kiong5kiong5強強用強迫ê手段 ~the̍h去、~留伊、~掠阮
9kng-kng光光明亮 ~ê雲、~ê啟明星、~ê石磐剃~、落~、褪~【華譯：「V.光了」】
10kú-kú久久很久 哭~、住（tòa）~、談論~~拋荒、~無食、~無穿衫
11 móa-móa滿滿滿滿的歡喜~、憂悶~、水~~ê向望、~ê受氣貯（tóe）醋~、賞賜咱到~~受凌辱、~得著
12pe̍h-pe̍h白白潔白 洗衫到~、清氣到~、腫~~得著、~賞賜、~hō͘人【華譯：免費】
13piān-piān便便準備好災禍~、我lóng~ 備辦~、排設~~beh救我、~仆落、~teh 聽候
14si̍t-si̍t實實實實在在 ~ê憑據干證到~~kā你講
15 tāng-tāng重重嚴厲~ê刑罰 ~傷伊、~刑罰伊、~報應
16thiám-thiám 殄殄疲累 拍in~、拍我ê身軀到~
17tn̂g-tn̂g長長長長的 伸~、發~~活、~睏、~t„ teh【華譯：長時間地】
18tōa-tōa大大大大（地）~ê安穩、~ê好心~寬容、~歡喜、~敬畏

（b）疊字副詞
＃巴克禮譯本台語漢字本華語解說做「狀語」
19chhiat-chhiat切切懇切、迫切~欣慕、~吩咐、~求、~相疼（saⁿ-thiàⁿ）
20éng-éng永永永遠~[勿會]嘴乾（bōe chhùi-ta）、~來苦楚我、~睏、~tī-teh
21piàn-piàn遍遍到處~看、~走、~報揚、~發
22ta̍uh-ta̍uh沓沓一再地~重（têng）、~禁食、~跋落火、~跋落水
23toaⁿ-toaⁿ單單只~服事伊、~ kap 伊講話、~為家己求
24toàn-toàn斷斷絕對~m̄通、~m̄是
25to̍k-to̍k獨獨只~服事伊、~hō͘伊、~行大路

Tùi表4.2.1.3(a)所舉chiah-ê疊字詞ê短句，咱會tàng看出in kap現代台語ê無仝主要有以下幾點：
（1）Tī語義上：《巴克禮譯本》中ê AA疊字詞是表示語義ê強化；現代台語是用來表示普通級ê輕微形容（楊秀芳，1991：245），若翻成華語是「有點兒……」ê意思。咱比較＃4「遠遠」、＃6「空空」、＃9「光光」、＃12「白白」、＃15「重重」、＃17「長長」等詞ê語義to̍h會tàng看出in kap現代台語ê差異。
（2）Tī用法上：《巴克禮譯本》習慣tī及物動詞加賓語以後直接koh加補語，如上表＃1「明明」、＃11「滿滿」、＃12「白白」、＃16「殄殄」ê詞當「補語」ê例。但無論現代台語抑是華語，及物動詞加賓語以後若iáu有補語，通常會tī補語頭前koh重覆一擺動詞，抑是將賓語the̍h到動詞前（鄭良偉，1987a）。譬如＃11「滿滿」，咱會tàng說：「貯（tóe）醋貯kah滿滿」抑是「醋貯kah滿滿」，m̄-koh若說：「貯醋到滿滿」to̍h不合現代語感ah。
（3）一般來講，現代台語tī形容模糊ê色彩抑是性質ê時，tiāⁿ-tiāⁿ用雙疊式；若是說明人ê感覺抑是品質ê時，往往tī單音節形容詞頭前借助程度副詞來說明伊ê程度（楊秀芳，1991：247）。M̄-koh咱會tàng看tio̍h上表ê＃1「明明」、＃3「嚴嚴」、＃5「熱熱」、＃10「久久」、＃11「滿滿」、＃14「實實」、＃15「重重」、＃16「殄殄」、＃18「大大」卻用雙疊ê形式來形容感覺ê強烈。
（4）另外，有一寡詞型tī現代台語裡有無仝ê語義kap用法。＃1「明明」做狀語的時，現代台語是【顯而易見的】之意，kap華語ê語義、用法相仝。＃7「緊緊」tī現代台語通常做動詞ê補語，指動作ê速迅、急迫。譬如：「欠伊50箍niâ伊to̍h討緊緊」。＃8「強強」tī現代台語裡無kāng款ê用法，lóng用單音節做狀語，如：「強留伊」、「強the̍h去」。＃10「久久」tī現代台語裡通常用「久久仔」做時間副詞加tī動詞詞組前。＃11「滿滿」tī現代台語裡通常用「滿滿是」來做謂語、補語。＃13「便便」tī現代台語裡無做狀語ê用法。＃14「實實」tī現代台語裡無kāng款ê用法，lóng用同義詞「實實在在」來代替。＃17「長長」做狀語的時，tī現代台語裡無chit款ê用法，必須改用其他講法來代替。
表4.2.1.3(b)所舉ê疊字副詞lóng是現代台語無常用--ê，m̄-koh猶原保留tī長老教會ê牧師講道抑是年長一輩信徒ê口語裡。
其中＃22「沓沓」是【一再地、經常重覆發生】ê意思，例句「沓沓重」是指「一再重覆地講」，chit個講法現在已經真少聽tio̍h。現代台語另外有一個常用詞「沓沓仔」是【慢慢地】ê意思，如：「沓沓仔來」【慢慢來】、「沓沓仔講」【慢慢講】。
＃23「單單」tī《巴克禮譯本》讀成「toaⁿ-toaⁿ」，m̄-koh現代台語有另外一個讀音「tan-tan」，直接囥tī名詞前限制名詞ê數量kap對象。譬如：「單單（tan-tan）伊一人」，chit兩個用法lóng等於＃25 ê「獨獨」。「獨獨」tī《巴克禮譯本》裡除了做副詞以外，khah常見ê用法是做連詞使用，有兩種意義：a)表示唯一ê條件，非此不可，相當於華語【惟有、惟獨】。如馬太7:21：「見若稱呼我講：『主啊，主啊』ê，無一盡入天國；獨獨行我佇(t„)天裡ê父ê旨意ê才會。」b)表示轉折語氣，相當於華語【但是、然而】。如路加22:42 ：「父啊！你若肯，著將此個杯離開我；獨獨呣是我ê意思，是你ê意思著成。」
Tī《巴克禮譯本》中出現ê重疊詞形態iáu有ABB kap AAB兩種。其中ABB是單音節形容詞加上疊字補語，譬如：phòa-kô͘-k ô͘（破糊糊）；AAB是以疊字修飾語加單音節動詞所構成，譬如：nga̍uh- nga̍uh-liām（耦耦唸）。Chit兩類重疊詞ê主要功能lóng是beh增加生動感，tī台語裡ê造詞現象非常活潑。《巴克禮譯本》tī這兩類重疊詞中保留一寡現在khah少聽到ê說法，譬如：用kng-kō-kō或kng-khō-khō來形容【光禿禿的樣子】；用iù-boa̍h- boa̍h（幼末末）來形容【細碎的樣子】。又如：用ngia̍uh- ngia̍uh-chhoah（愕愕惙）、gī-gī-chhoah、khe̍h- khe̍h-tiō來形容【害怕得發抖的樣子】，現在lóng用phi̍h-phi̍h-chhoah來形容。

註68：「信望愛信仰與聖經資源中心」網站http://bible.fhl.net/ 會tàng tī在線頂對照《中文和合本》、《英王欽定本》（K.J.V.）kap希伯來文（舊約）、希臘文（新約）。「台灣聖經公會」網站http://www.biblesociety-tw.org/會tàng tī線上對照《現代中文譯本》、《新標點和合本》、《英王欽定本》（K.J.V.）。

註69：《實用現代漢語語法》頁118：單音節形容詞按AA式重疊做狀語、補語的時，表示程度深。做定語ê時一般無表示程度深，m̄-koh伊ê描寫作用koh-khah強。《漢語語法》頁31：當形容詞重複做名詞修飾語ê時，語意效果會tàng hō͘形容詞ê原來意義愈khah生動。