《耶穌言行錄》

Tē-3-chiuⁿ,Sat-ka-lī-a，Í-lī-sa-pek

作者 Ko Kim-seng.

listen


（Lō͘-ka 1：1-23）Hi-lu̍t chòe ông ê sî，ū chi̍t ê chè-si mîa Sat-ka-lī-a，I ê bó͘ mîa Í-lī-sa-pek.Chí nn̄g lâng sī chìau Sīong-tè ê bēng-lēng lâi kîaⁿ，lóng bô thang hîam.Nn̄g ê í-keng lāu i̍ah bô kíaⁿ.Sat-ka-lī-a kîaⁿ chè-si ê chit，ū-sî sio-hiuⁿ，ū-sî hìan-chè，i ê hìan-chè sī chīn-sim，sîong-sîong kì-tit só͘ hisn3 ê cheng-siⁿ，sī koan-chìo Sīong-tè ê Îuⁿ-ko beh lâi si̍ok-hôe lâng ê chōe.

Ū chi̍t ji̍t，Sat-ka-lī-a tī Sīong-tè ê tīan sio-hiuⁿ，ū thiⁿ-sài chhut-hīan khīa tī hiuⁿ-tôaⁿ ê chìaⁿ-pêng，Sat-ka-lī-a khòaⁿ，chin kiaⁿ.Thiⁿ-sài kóng，"Sat-ka-lī-a ah，m̄-sái kiaⁿ，lí ê kî-tó í-keng thiaⁿ-kìⁿ lah，lí ê bó͘ Í-lī-sa-pek ōe siⁿ kíaⁿ，lí tit-beh hoaⁿ-hí khòai-lo̍k，chōe-chōe lâng i̍ah hoaⁿ-hí.I tit-ti̍oh Sèng Sîn móa-móa，ōe hō͘ Í-sek-li̍at lâng chōe-chōe tò-tńg lâi kui tī Chú.

"Sat-kak-lī-a thiaⁿ-kìⁿ chit ê siau-sit chin hoaⁿ-hí，chóng-sī ū gî-ngái kóng，"Cháiⁿ-īuⁿ ōe án-ni，in-ūi nn̄g lâng lāu？"Thiⁿ-sài ìn kóng，"Góa chīu-sī Ka-pek-li̍at，khīa tī Sīoang-tè ê bīn-chêng ê，hōng-chhe lâi chí-sī lí，pò lí chit ê hó siau-sit；taⁿ lí ōe é-káu bōe kóng-ōe，kàu chit ê tāi-chì chîaⁿ ê ji̍t chiah soah；in-ūi lí m̄-sìn góa só͘ kóng--ê；nā-sī hit ê ōe，sî kàu tek-khak èng-gīam. "

Thiⁿ-sài chīu khì；Sat-ka-lī-a lîam-piⁿ é-káu.Peh-sìⁿ tī gōa-bīn the thèng-hāu，kî-kòai i hiah kú tī tīan-lāi，kàu chhut-lâi bōe kóng-ōe，peh-sìⁿ chīu chai tī tīan-lāi tek-khak ū khòaⁿ-kìⁿ sím-mi̍h.

Taⁿ chit sî Sīoan-tè bô chhin-chhīuⁿ chá chhe thiⁿ-sài chí-sī lán，sī ēng Sèng-chheh.Só͘-í lūn Sèng-chheh só͘ kà-sī lán ê ōe，lán ti̍oh ēng khiam-pi ê sim，lâi kîu Sèng Sîn pang-chān lán ōe bêng，i̍ah ōe sìn，in-ūi só͘ èng-ún ê líng ōe chîaⁿ，i̍ah sī put-chí koan-si̍ap lán ê tāi-chì.

思羅安台語點字網站