《陳雷文選》

| | || 轉寄

Poa̍h kiáu出頭天

(1)

若是講起三斗ê過去,趣味事真chē,m̄-nā是王爺宮hia ê人bat伊bat kah有chhun,差不多規麻豆tō攏人人知影伊ê名。

原因大概有幾chân,其中一chân是伊tī王爺宮口砧皮鞋補雨傘,到taⁿ事業三十年,技術一流,這個成就有出名。若beh phēng工夫,上簡單是看伊hit雙鳥皮鞋,金生a穿m̄ tîⁿ,伊kā khioh來修理,後chan釘koân起來,上少一年一擺穿去看人ê新娘禮,結果看起來若新ê,無人認會出來。
過來一chân是關係著伊ê名,聽講是伊ê阿媽號ê。是按怎三斗tú tú好,無khah chē也無khah少,ah che咱tō m̄知lah。減彩三斗ê阿公舊時開米ká,伊ê老母生伊hit時,對對有人客來店裡tia̍h米三斗,按呢算是伊人生一開始tō有一個真好ê彩頭,號來作名?但是王爺宮hia bat伊bat kah有chhun ê人攏按呢生講,三斗ê祖先無人開米ká,所以我看,這個tia̍h米三斗ê理論是無法度成立。

最近有人拆破講,三斗ê一生注定兩個kiap:chhōa某一kiap,定期存款koh一個kiap。三斗ê chhōa好a進前,khang-khòe勤作,趁一kho͘ chhūn一kho͘,趁十kho͘ chhun十kho͘,要緊the̍h去合作金庫khǹg定期。 本來這項代誌無人知,就是三斗ê好朋友金生a,伊tī合作金庫食頭路作出納,kā伊iāng出去,講三斗tī金庫定期ê khǹg幾十萬tú幾十萬。我看這個風聲chē少好a in tau ê人有聽著,才會親chiâⁿ一講tō成。好a是咱chia替人種甘蔗出身ê,嫁來ê時kan-taⁿ一kho͘人,人甜嘴甜,嫁妝無半項。

(2)

若是講起金生a,趣味事也是真chē,mā是kap三斗ê chhōa某有關係。好a chhōa來了後,金生a定定來in tau坐,chē少畫一寡hō͘好a聽:chang-hng tī新營kap鴻a贏beh kah三、四十萬…cho̍h日tī台中kap旺a贏一、二百萬…。好a這個人,講是種甘蔗出身ê、但是厝裡有poa̍h-kiáu底,金生a chia ê話kap厝裡in pâ ê口氣koh真相像,對金生a自然tō有五分以上ê尊敬,對三斗ê tō有五分以上ê怨chheh:「平平按呢作人,in趁錢算萬ê,咱趁錢算kho͘ ê。」對砧皮鞋補雨傘ê事業漸漸失去傳統ê信心。三斗ê見若廟口轉來,伊飯無煮chàu腳無款,穿牛á褲pok一枝薰,tī門口tō kā亂:金生a kap鴻a tī新營贏三、四十萬…。

三斗ê bē堪得伊lō,作人反省,想過來想過去,這個種甘蔗ê講了也有理。我艱苦廟口作一年,khah輸金生a kiáu間poa̍h一暝。若金生a講ê,in teh ī kiáu,輸是小錢,贏是大錢,十擺贏一擺就算會和ah。…Ná行ná想,tú好點腳來到金á店,oat leh tō入去…金á店ê頭家三郎俗名號作龜,是咱街裡大家樂ê大枝thiāu á腳,頂面有小組頭,koh頂面有大組頭,koh起lih就無人知影是啥物頭。

龜a叫一聲「來坐」,心內想,你這個m̄ chiâⁿ斗a,自我開業以來,你看我這間店若賊siū,m̄ bat踏入來一腳步,今á日是啥物貴事?目睭小lió leh,這個米斗面ê頭殼頂有一chhok奇怪ê榮光,tòe伊身影來來去去,tō是人之初poa̍h-kiáu開殺戒ê氣色,這種症頭伊看真chē,算來是著錢siáu第一期。摸一枝薰出來請伊,講按呢:「咱chia ī大家樂,輸是小錢,贏是大錢,十擺贏一擺tō算會和ah!」siàⁿ- siàⁿ這句話kap金生a講ê仝款仝款,三斗ê心khah定,膽tō在,拜託龜a kéng一枝名牌,大心肝作一下tō kā簽三張。

(3)

金生a hit日tī台中輸hia ê錢,總數百外萬,m̄-kú m̄是伊ê錢。金生a tī金庫食頭路作出納,poa̍h-kiáu免本錢,自早tō有這個習慣,ī kiáu nā欠錢,tō是金庫先the̍h,poa̍h贏家己開,poa̍h輸m̄免還。Hit日錢輸了,頭殼ma-se ma-se,tō無啥通大煩惱ê代誌。無想著黃昏暗轉來到麻豆,街裡sap-sap teh落雨,行過金á店,一大堆人ká ká滾。Óa去kā看,亭á腳碰著這個阿婆,tō是鵝肉東a in老母khiām a,也tī hia ham人teh相kheh。金生問阿婆:「Khiām嫂a,ah你kap人teh kheh啥?」阿婆手kā giú leh:「金生a,是你hohN,緊入去kā我簽一枝來。」一把錢tō tu hō͘伊去。僥倖che好命阿婆,勇健食到七十八,厝裡錢一大堆,平時khiām kah魚肉m̄甘買,講好聽是食長年齋,按怎今á日來tī chia,chiah大路,錢tu hō͘金生a,也beh kap人大家樂?問落到底,才知影hit日龜a chia有人著大牌,幾百萬tú幾百萬,Khiām a in新婦報伊ê,趕緊tòe人來簽一枝,搶一個彩頭。

另外王爺宮這旁,三斗ê無想著頭一擺ī大家樂就著大牌,thiòng kah卵核á相kho̍k,che大家樂實在有心適,認真作一個心算:一張五十萬,三張百五萬,阿娘ôe,比定期ê koh khah chē!一時人有錢,命tō會曉beh惜,膽soah變小去,臨時著見笑病,驚去見熟sāi人,會beh kā伊借錢。趕緊生理收起來,入去廟內面bih,m̄敢出來。Bih到黃昏暗過了,天teh落雨,看來大街頂人khah稀ah,liam腳liam手按廟裡sô出來,頭chhih-chhih,oat入來巷á內,緊緊雙腳點土,tō beh轉去kā好a報消息,青猴行無三步,巷á底su̍t一下chông一隻青驚鬼來。「ah」一下叫一聲,頭碰頭,驚一下險破膽。He鬼á一下手kā chang leh,惡聲問:「老實講,贏幾萬?」三斗ê心狂,teh beh走,雄雄會認得伊ê聲,tu̍h-lān 雨衣kā掀起來,夭壽金生a tō是你!ah你是來chhòng啥?!金生a雙手kā掠leh m̄ hō͘走,二枝pok牙á哈哈笑hō͘看「連我你也teh驚啥?」一領青雨衣掛頭kā khàm leh,親像hap一隻雞母,掠過三條街,ngēⁿ-ngēⁿ giú去海產事a hia,掛鴻a掛旺a,四個人一桌,坐落來lim bi-luh。

鴻a kap旺a兩個烏皮,tō 是平時ham金生a tàu空ê poa̍h kiáu伴,三個作一擔,專門kap人軍目賊á拐錢。三斗ê一干bi-luh灌未了,就teh出酒話,che扮勢金生看在眼內,óa去身邊細聲kā問:「老實講,贏幾萬?」三斗ê一枝烏手無洗,chhun出來hō͘看,先比一枝大頭母,若腌腸烘好hiah大條,才koh五枝指頭á總出。金生a問:「十五萬?」三斗ê起愛笑,hit粒扁頭hàiⁿ過來hàiⁿ過去,gia̍t-siâu仝按呢比一擺hō͘看,金生a無拍青驚伊,koh問:「百五萬?」三斗ê無應伊,kan-na一直笑,gōng面歡喜kah親像hō͘紅目ū a khioh去作kiáⁿ婿。Hit兩ê烏皮嘴á開開,目睭gîn ò͘ⁿ-ò͘ⁿ chiah大kòng,hoah一聲「阿娘ôe,che百五萬咱那開會了lah?」Hō͘金生a桌á腳大力踢一下,嘴才合起來。

四人chhōa去鴻a in相好ê hit個阿súi a hia poa̍h目賊á,三個軍伊一個,規暝ī落來,無停到天beh光,百五萬軍kah光光光,才放伊soah。三斗ê錢輸了了,酒才醒,天曉轉來到厝,隔壁阿月á in飼ê chhio雞teh啼,in某倒tī眠床目睭金金規暝無睏teh等伊,一腳踏入門,放牛聲就kā lé:「幹恁娘!去tó死!真實有兩仙錢tō會去kā恁pē lim燒酒開查某,有才調,好膽你tō mài轉來。」

(4)

罵一大睏才罵到khùi,hioh一下喘,又koh罵:「恁pē kā你講,he目賊á你m̄ bat,m̄驚死才koh去!」真實是賢妻良言,三斗ê自按呢tō無koh去poa̍h目賊á,專門ī大家樂。見若拜二、拜四去龜a hia,tō是像入去九深迷魂洞,身軀邊現金開了了,才有歡喜甘願倒轉來。三斗ê面色入去時紅kòng-kòng,出來時青筍筍,龜a斷定這個砧皮鞋ê著錢siáu第二期,勸伊講:「你一期幾千kho͘按呢ī,那有khah choa̍h,」咱chia ī大家樂,贏攏是大錢,一期加簽幾張,贏落才會緊。」三斗ê轉去照chia ê話講hō͘好a聽,賢妻講:「恁查甫人ná會才gōng?作啥生理mā tio̍h一把錢。Ah你金庫hia ê定期ê,khǹg leh hō͘ êng,soah bē曉領出來用,贏了才koh khǹg倒轉去。」

三斗a去合作金庫領一張定期ê,金生a看伊手裡ê銀票,一tha̍h chhiⁿ-chhiⁿ tú-chiah金庫領出來,手尾心ngiauⁿ-ngiauⁿ,kā三斗ê講:「你chia ê現金,若無beh買啥…,咱koh來去招鴻a kap旺a ī目賊á,錢ká錢,用贏ê才會緊」佳哉三斗ê hīⁿ á內猶會記幾句賢妻ê話,含á糊應伊一句,錢mo͘h leh tō走,khah停換搬去金á店hia,規tha̍h簽hō͘龜a去。

總是過來he大家樂tō常常差一字,有真óa ê扮勢,但是m̄ bat koh贏。三斗ê日日火狂熱,拜一等拜二、拜三等拜四,開獎ê日,若像teh giàn燒酒,砧皮鞋補雨傘手會chhoah,著錢siáu第三期。但是龜a估計,三斗ê定期領猶未了,koh勸伊:「咱chia若是beh ī長ê,khah常ài chhōe一個來相óa。若是ham神明共家,技術合作,贏著khah有底tì。」三斗ê照按呢轉去講hō͘好a聽,好a罵伊:「真實步步tō 來問?ah你kap王爺三十年ê交情,soah bē曉去王爺宮睏一暝,上無mā報你一枝贊ê。」三斗ê去問王爺,tòa王爺宮睏暝好m̄好?王爺大概暗時無伴,一下tō 三個上杯答應伊。暗頭á到,山斗ê草蓆á捲leh,kā某講:「我來去」,he某應講:「作你去」。歡歡喜喜蓆á mo͘h leh tō來,土腳鋪leh tō睏。那知he廟裡,烏暗ê中間báng釘niáu-鼠咬,吵鬧規暝,睏bē去,péng過來péng過去,一目nih tō beh天光,好a來拍門,未踏入門來tō問:「Ah是幾號?」

按呢生舞弄幾nā工,睏bē去tō是睏bē去,想無步,好a去藥房買愛睏藥á。死好眠」來hō͘吞,又koh身軀邊排一枝筆kap一張紙,kā吩咐:「有tō 緊寫起來,m̄通hō͘ bē記得。」可惜che「死好眠」吞落去,一暝好睏到天光,無作夢,也是無結果。起初好a早時攏有照起工來廟裡lóng門,問伊「幾號?」尾a問無,橫直tō無koh來;放三斗ê睏到tàu tàu,據在伊去。三斗ê ta̍k暝來廟裡,早眠òaⁿ眠無某吵,久來tō也真慣勢去。結局日子一過三個月,熱人去了秋入來,有一暗,真實三斗ê夢著一個奇巧ê好夢,in厝彩色電視ê大銀幕出現1,2,3,4…ê數字,一排齊齊,邊a一大pû狗屎,看起來若像一堆黃金條…趕緊tō精神起來,眠眠中間筆gia̍h起來,像teh舞關刀,照按呢tòa紙頂畫,一遍koh一遍。

透早chông去合作金庫排第一號,kā金生a講:「定期ê總領!」He金生a食人頭路pháiⁿ勢得失伊,笑笑a應:「三斗ê,táⁿ你mā mài滾笑,七早八早tō來創治。Ah你頂禮拜上尾a hit張領去ah,那猶有啥定期ê通好領?你看阮金庫chiah大間,是會生錢hioh?」停一下koh講:「若愛錢,咱koh來去招鴻a kap旺a ī目賊á,用贏ê khah緊lah。」三斗聽伊講beh招鴻a kap旺a ī目賊á,頂回hō͘ in教示了有乖猶會記得,足緊紙the̍h leh oa̍t頭tō走,出來pha̍k著大街頂ê日頭,親像肉體上兼精神上打擊過頭,現場chôaⁿ按呢頭殼小寡kò樣去,一路神神thōng轉來到厝,好a倒tī眠床頂猶未起身,身軀一koe̍h無穿衫,像電影名星性感暴露。三斗ê頭毛散iā iā,一對siáu狗目掠伊若佛á一直看。好a罵伊:「M̄ bat看過hioh!ah你chiah早轉來chhòng啥?」手裡hit張紙kā搶來看,又koh m̄ bat字,紙面畫kah若天書,問伊:「Che是啥?」三斗ê thu̍h一晡,講:「…王…王爺簽這支…」好a hoah一聲「定期ê總領!」ùi眠床頂跳起來,身軀光光一koe̍h,像一身食肥肥ê菩薩,三斗ê看kah gōng-gōng,雄雄才講:「Ah taⁿ你mā mài滾笑,七早八早tō來創治。…你看he金庫hiah大間,是會生錢hioh?」一手kā三斗ê khiú leh,一透來到金á店,沿路罵:「真實chiah無路用,連王爺mā牽成你bē起…」踏入店來,叫「頭家來!」chhāi tī龜a面前,一kho͘人兩kho͘大,一腳金手指kap一條金phoa̍h-鍊pak--落-來,cho̍h tòa玻璃櫃á頂:「現金總換!」Taⁿ這旁這個金生a,注死有偷看著三斗ê牌,記tī 頭殼內,想pháiⁿ 心:「若是王爺共家有份,咱mā來一份,包贏ê。」又koh去金庫偷領錢,sut三斗ê後炮,來金á店chhōe龜。

(5)

結果hit期開獎出來,著無半字,好a kap三斗ê冤家,隔壁阿月á有聽著,大細聲,連王爺mā罵參落:「幹恁娘!你講王爺簽這支,ah taⁿ咱麻豆這個王爺m̄ tō是目睭屎kô͘ leh,青瞑ê lah?」過無外久,金生a偷合作金庫ê代誌爆發,偷走去bih。差不多仝hit個前後,好a也失蹤去,規麻豆chhōe透透,對對就是欠in兩個。鴻a in相好ê hit個阿súi,普通時ham好a上界熟,以前平平種甘蔗出身ê,kāu話四界去iāng,講好a tòe金生a走。結果王爺宮hia,bat三斗ê bat kah有chhun ê人攏同情三斗ê,因為好a常常去tâu人,hiâm三斗ê無路用…又koh三個月以來,隔壁阿月á有聽著,三斗ê暗頭á若到,kā好a講:「我來去。」好a tō攏歡喜應伊:「作你去!」過一時á久,金生a作尾tō來,sut三斗ê後炮,bih入去in厝kap好a作伴,隔壁阿月á常常有看著。關係這點,近來拆字仙ê有評論,三斗ê一生有兩個kiap,chhōa某這個 kiap,kap定期ê這個kiap。Taⁿ chit má為著大家樂,he某kap定期ê攏ī無去ah,koh過來,不管che kiáu有poa̍h無poa̍h,我看三斗ê也mā該是差不多teh beh出頭天ah才tio̍h。