《陳雷文選》

| | || 轉寄

太武山魂

Tī chia,全排灣散赤ê庄落,伊上蓋老,bē輸瑪家koh入去hit chōa禿頭ê舊山,老kah人bē記得伊ê名,攏叫伊“長老”niā -niā,古早番社時代tō按呢稱呼。無人知影確實幾歲,老一輩ê講,日本人森丑之助來北葉社訪問調查hit年,有hip著伊ê相。社頭阿助身邊,ku tī土腳hit個長頭鬃ê gín-á tō是伊。照按呢算來,上蓋無也有一百歲a。四kho͘圍散鄉ê山內,近近hn̄g-hn̄g,真chē人來請教伊,問生問死。減彩一方面是尊敬伊活一百年ê智慧,我想主要是有信仰伊,親像in有信仰山hit款。因為tī排灣ê庄落瑪家、泰武、春日chia、看會著ê攏是粘作一伙ê山嶺,一稜一稜thia̍p koân起lah,上內面入去神teh tòa,不時 tah霧、giâ雲ang,tī山頂尖hia。

“為啥物beh生肚臍?”伊攏總問二擺遍,因為m̄ bat聽過這款龜怪ê請求。阿妹khiā tī伊面前,裙掀起來hō͘伊看,講:“因為我無肚臍。”m̄信家己ê目睭,長老用火chhiō,用指頭á尾摸,pak肚皮若金瓜滑溜溜,無khî也無chōa。成實一世人m̄ bat看過這款無肚臍ê!

阿妹出世了,滿月才落肚臍蒂。Pak肚皮規粒金金滑滑,老母chhōe無肚臍,抱去問醫生。醫生講,無要緊,gín-á勇健tō好。Khah大漢ê時,看阿姊有肚臍,問老母:“阿姊pak肚thài破一空?”老母喜ā m̄愛伊問siūⁿ chē,chhìn-chhái應:“阿姊出世ê時,無細字去割著。”khah大漢了,kap隔壁錦a chhit-thô“老母生kiáⁿ”。阿妹問:“作老母beh按怎生kiáⁿ?”錦a講:“我生hō͘你看。”衫le̍k起來,比hit粒肚臍:“ùi chia生。”阿妹看pak肚中央一粒圓圓pok-pok,若糖kâm-á,問:“你細漢無細字割--著?”錦a應:“m̄是割著。Che是我ê肚臍。”“肚臍是啥?”“Tō是老母生kiáⁿ用ê。”阿妹講:“我無肚臍。”錦a罵伊:“你烏白講。大家mā有肚臍。來,我教你生kiáⁿ。”掀伊ê裙起來,chîn一晡,chhōe無肚臍,hoah:“你無肚臍!你bē生kiáⁿ!”Chông leh走,轉去tâu in老母,阿妹無肚臍。老母罵:“烏白講!ná有人無肚臍!”koh四界去宣傳,厝邊隔壁ê gín-á攏知影阿妹無肚臍,無人beh kap伊chhit-thô,kan-an創治伊。“無肚臍,無肚臍,阿妹ùi tó來?青狂bē記帶肚臍。…”kā伊笑。去學校讀冊了後,阿妹寫作文“我ê第一個願望”,tō是beh生一個肚臍。老師拍點數丙下,批一chōa字:“烏白想,烏白寫。”

阿妹愛唱歌,kā老母講,大漢beh表演唱歌,上台作歌星。老母知影阿妹有天份,chhōe一個老師kā教。第一課教發聲,老師講:“聲ài ùi肚臍發出來。”阿妹無肚臍,m̄敢koh去學唱歌。

伊kā老母講,beh生一個肚臍,老母講,che kan-na長老有發法度。因為伊有信伊,親像信山hit款。阿妹來瑪家chhōe長老,請求伊:“我愛beh生一個肚臍。”長老問二擺:“為啥物beh生肚臍?”因為m̄ bat聽過這款龜怪ê要求。阿妹掀pak肚hō͘伊看,講:“因為我無肚臍。”成實長老看無肚臍,摸也無肚臍,雄雄phak落去kā伊拜,嘴裡ki-ki ku-ku念一大堆,tō是排灣人祈禱敬拜ê話。阿妹聽無。問伊:“為啥物拜我?”長老才講:“我tī chia等真久a。我知影你會來。Chit-má你來a,請你chhōa我轉去。”阿妹問:“chhōa你轉去tó位?”“太武山。上內面tah霧、giâ雲ang hia。”阿妹問:“為啥物太武山?上內面tah霧giâ雲ang hia。”

Tī上代先創始ê時, 山內面有百步蛇, 生活真艱苦。規日土腳sô,chhōe無食ê物。蛇kā創造者請求,hō͘伊作人,通好用二腳行,用雙手拍獵。創造者同情伊,hō͘伊作人。用雙腳行,m̄免用pak肚土腳chhê,用弓箭拍獵,M̄免pak肚iau。Koh kā伊吩咐:“你ài永遠會記得,你原本是蛇。”蛇問:“Beh按怎永遠會記得?”創造者講:“我hō͘你人ê名,叫你排灣,你永遠tio̍h會記得。”蛇講:“我ê名叫排灣。我永遠會記得。”創造者講:“我hō͘你無肚臍,因為蛇本來無肚臍。你永遠才會記得。”蛇應:“我永遠會記得。我無肚臍,因為蛇原本無肚臍。”創造者講:“我hō͘你太武山tòa,因為山是永遠ê。你tō是太武山ê靈。”蛇歡喜,感謝講:“Che tō是我今á日ê chiù-chōa。我永遠會記得。我ê名排灣,我無肚臍,我tō是太武山ê靈。”Tō是排灣ê開始。Hit個以後,排灣人tòa太武山嶺,用雙腳行,用雙手拍獵,看活過日。Soah漸漸bē記得in ê chiù-chōa,也離開太武山,也有生肚臍,kan-na chhun一個名排灣。

長老講:“單單你無bē記得。”阿妹問:“為啥物?” “因為你來a,你無生肚臍。”Koh kā伊拜,請求伊:“你ùi太武山來。請你chhōa我轉去。”阿妹想,taⁿ害a。我來求你hō͘我生肚臍,你soah kā我拜,叫我chhōa你去peh山。Lú想lú無妥當,著驚走,轉去kā老母講長老ê話。老母才想起,生阿妹進前,有夢去tī山內hō͘百步蛇kā著,無外久tō有身。心內鬱悶bē清景。想講大概長老siuⁿ老a。

入山聽著chhan-chhan ê水聲,頭前一chōa淺淺ê溪流,ùi koân-kiā ê山嶺出去,chông對下面ê坑(kheⁿ )谷。Tòe溪行,oat一個灣,頂頭溪岸一個查甫人,tîⁿ頭巾、hâ桶裙, poak一枝薰吹嘴, khiā tī hia teh等伊,叫:“我chhōa你去。”阿妹tòe伊行,lú peh lú koân,問查甫人:“Che是啥物溪?”查甫人應:“太武溪。山內出來ê。”koh行一chām,阿妹嘴ta。查甫人挽樹頂ê果子,紅口tìm 紫,芳貢貢,若火龍果hiah大粒。食落去,nâ喉甘,thàng心涼,嘴tō bē ta。阿妹問:“Che 啥物果子?m̄ bat看過。”“太武梨。Kan-na chia有。”Koh行半晡,中晝到,日當kiā。阿妹pak肚iau,查甫人liâu落去溪裡,伸手hô͘一尾魚,白siak-siak虱目魚hiah大尾。Liah魚肉hō͘阿妹食,幼koh tiⁿ-but,食了精神iû-ia̍h,人也bē thiám。阿妹問:“Che啥物魚?以前mā bat食過。”“太武魚。Kan-na這chōa溪有。”阿妹問:“Koh外久會到?”查甫人用薰吹比he清標ê溪流:“Tòe溪起--lih,koh半晡tō到。”阿妹tòe伊認真行,lú行lú敏掠。Bē記得行外hn̄g a,來到一tah koân-kia ê坑崁,雙旁石壁直直chhêng-koân tú到天。中間一chōa細phāng,e̍h-e̍h tú好一個人kheh會過。風sù-sù透,soah teh tah茫,四kho͘圍giâ雲ang,白茫茫無看路。臨時ùi山壁ê空phāng日生腳nǹg過來,照著霧,tō清去。頭前一tah平坦ê空地,已經是山頂尖òaⁿ-òaⁿ ê黃昏a,滿天雲霞豔彩牽金絲,若新娘房ê網罩kún-kún iaⁿ-iāⁿ。He日ùi天尾斜過來,對對照著石像,一身紅赤赤khiā-khiā chhāi tī空地中央,二個人koân,頭頂tîⁿ二隻百步蛇,hīⁿ á一旁掛一隻羊,親像teh等伊。阿妹問:“伊是啥人?”查甫人講:“伊是排灣。”Kā伊拜一下,查甫人tō無去a。這時兩旁有日落ê歌聲,四個勇壯ê查甫人,tîⁿ頭巾,頂面插一排山雞ê毛,胸前phāiⁿ闊闊ê肩帶,掛銀掛珠。Koh四個查某人紅彩烏裙,tì大帽,胸前一大排phoa̍h鍊,mā是掛銀掛珠,óa來牽伊ê手,圍tī伊中央,se̍h kho͘ á ná唱ná跳。In一個人唱一款,八款歌tîⁿ作一伙若虹,liâm-mi飛koân hō͘鳥聽,liâm-mi落kē hō͘魚聽。阿妹m̄ bat聽過這款歌,m-kú感覺真熟似,soah也會曉唱,kap八個人跳舞。查某人捧酒出來,攏lim酒koh唱koh跳,唱到日無去,月出來。山頂尖ê月lú近lú白,bē輸水底ê玉,伸手摸會著。Iā tī土腳ê soān 石tō是大細粒ê星無人khioh。Soah酒醉睏去。

目睭thí金,已經天光,日頭iāⁿ-iāⁿ。石像khiā tī空地中央,無半滴聲。才注意著hit頭一間kē厝,石板thia̍p ê。正面一tè大石壁,頂面畫八身ang-á,kap伊平koân。四個查甫、四個查某,攏tì súi帽穿súi衫,掛銀掛珠,kap昨暗唱歌跳舞ê仝款。厝邊一個棚,kē-kē mā是石板tah ê。頂面齊齊一chōa人頭殼骨,日pha̍k kah白siak-siak,雨洗kah清氣氣。雄雄人頭開嘴講話:“你來a!”著一驚soah精神起來。

倒tī病院四工,大睏bē醒,m̄知病因。第五工才雄雄退燒,精神過來。伊kā老母講,山頂尖八身ang-á跳舞唱歌。老母想,可憐我這個阿妹,bē堪得大病五工,頭殼燒pháiⁿ去a。

M̄知啥物原因,這個以後,阿妹soah真gâu唱歌。He歌真無仝款,瑪家、泰武、春日ê人m̄ bat聽過,m̄-kú攏真熟似,概成早tō會曉唱。Mā有時一條歌八個人唱、一人唱一款,和聲tîⁿ作一伙nā配色ê彩虹,別位m̄ bat有這款唱法。Lú來lú時行、連市內屏東、高雄也唱阿妹ê歌。無外久,電視台請伊去唱,一下手大成功,少年ê上蓋愛。阿妹tī電視台唱,大舞台大樂隊,koh穿斷一koe̍h ê té衫,làu一節ê牛褲,e̍h-e̍h cha̍t-cha̍t,美國歌星ê場面,超現代ê打扮。Hit chām台灣tòe美國á kha-chhng流行,新型牛á褲làu肚臍,褲頭làu到kha-chhng頭齊齊。肚臍現現,肉感、皮感兼骨感,人講是三感,bē輸目睭食三層(sam-châm)。阿妹台á頂唱歌,熱情放火燒,青春無teh惜,胸前烏白hàiⁿ,kha-chhng chhin-chhái搖。M̄-kú肚臍hia攏tah一尾ia̍h-á,金金sih-sih,有時tah紅ê,有時tah綠ê,有時tah花ê。少年ê m̄知hit個原因,誤會是Bretney Spears ê新打扮,Hollywood ê好出頭,結果人tī台á頂tah肚臍,咱tī台á腳tòe流行。Hia ê穿làu肚臍牛á ê少年輩,大家街á行,無彩一個肚臍好好攏tah起來,也有tah尾ia̍h,也有tah田嬰,也有khàm花,也有khàm草…。

不過經理講,若是beh唱也beh跳,猶是肚臍現現才會大成功,像美國大歌星Madonna按呢。阿妹ê老母有時想起,夢著蛇有身ê代誌,心內悶悶不安,mā勸伊,你chit-má有名有錢,tō是欠一個肚臍。Hit年寒人,暗靜kap老母二人去美國,tī Hollywood hia chhōe一個phu-la-su-ti-khuh塑膠整容醫生,手術作肚臍。Pak肚中央ó͘一空,thīⁿ一個新肚臍。歡歡喜喜願望完成得著寶,轉來台灣,上台演唱。Mā是穿牛á làu肚臍,第一回pak肚無tah彩,規粒肚臍現現,圓圓膨膨,金龜á hiah大個。雙旁掛一對鑽石hīⁿ鉤,台á頂燈光照著,金金閃閃,五彩kún-iāⁿ。少年ê看kah tah心sahN khùi,青狂火燒chông,kho͘ si-á ná peh起來跳,khiā起來chàm,也hoah也hiu,koh háu koh笑,厝kòa beh giâ去,歌也無顧聽,會使講比美國 Jennifer Lopez khah“khu” khah siáu。Tō是這chām見若台á頂演唱,tō會看著一身石像,頭頂二尾蛇,hîⁿ á一隻羊,khiā tī伊面前nā像beh kā伊講話,阿妹心內知影。專工轉來瑪家,家己一人入山,chhōe著hit chōa chhan-chhan ê溪流,無看著咬薰吹ê查甫人。溪岸樹頭頂koân-koân hioh一隻飄撇ê lāi-hio̍h,看伊來,phia̍t 一si̍t ,叫一聲tō飛走--去。Tòe溪行,lú peh lú koân,來到hit位坑崁,雙旁石壁直直tú到天。Mā是teh tah霧giâ雲-ang。報頭風透,人行風頂,bē輸lāi-hio̍h 掠起來飛。雄雄霧清--去,頭前一tè平坦ê空地,已經是山頂尖òaⁿ-òaⁿ ê黃昏,四界ê雲湧若多情ê台灣海洋kún-iāⁿ。天尾日斜西過--來,照著石像,面紅赤赤,雄雄講大聲話,若雷tân:“你bē使來chia!”阿妹驚一tiô,問伊:“為啥物bē使來?”石像應:“有肚臍eb5ë使來。”“為啥物?”“因為bē記得a。”“Bē記得啥?”阿妹koh問。石像無koh應,也無聽著人唱歌。行去石厝hia,八身ang-á穿súi衫、tì súi帽khiā tī壁頂,也無跳舞。斟酌看,上邊á hit身查某ang-á,pak肚中央mā有一粒肚臍,金龜hiah大。Kan-na伊有,chhun-ê ang-á攏無。阿妹問伊:“為啥物kan-na你有?”Ang-á無應,二粒kian凍ê水珠ùi ang-á面滴落來。又koh聽著有人大聲嚷,若雷tân:“你bē使來chia!”Nih一個目,八身ang-á攏無去 ,厝也無去。Iā tī土腳幾lōa粒圓圓ê人頭殼骨,liàn來liàn去。緊oa̍t頭看, 石像猶tī hia,走去kā拜,已經bē赴a。即時雷公tân,he古老ê石像雄雄phia̍k一下,ùi面到pak肚pit作二旁。才聽著查甫人、查某人又koh和聲唱歌, he歌lām著太武山頂ê彩霞, se̍h山尖一liàn,變作一chhok烏雲飛無去。

阿妹轉來見長老,長老會認得伊,講:“請你唱歌hō͘我聽。”阿妹唱電視頂上時行ê“搖頭á歌”,ná唱ná siak頭,hàiⁿ kha-chhng。長老講:“M̄是che。”阿妹挺胸khiā直,改唱太武山頂ê歌,歌聲chhèng-koân起lih, 若lāi-hio̍h teh飛,lú飛lú koân,強beh tú 著天。唱了,長老搖頭講:“Che歌死去a。”阿妹驚一tiô,問:“為啥物歌死去?”長老雙目kheh,身軀坐直,念:“…上蓋代先天地創始ê時,山內有百步蛇,生活艱苦,用pak肚chhê土腳,…”阿妹會記得這節排灣ê傳說,也祈禱敬拜, tòe伊續落去念:“…我hō͘你作人,…我hō͘你人ê名,叫作排灣,你tio̍h永遠會記得。 …我hō͘你無肚臍,因為蛇原本無肚臍,你著永遠會記得。…我hō͘你太武山tòa,因為山是永遠ê。你tō是太武山ê靈。…”念了,阿妹問:“為啥物bē使轉去太武山?”長老流目屎,若凍露ê水珠滴落來。阿妹àⁿ 頭,看家己ê pak肚,滑溜溜中央一粒塑膠整容ê肚臍,圓圓膨膨,雙旁掛一對鑽石金hīⁿ鉤。到這時,真正chhun一個名排灣,因為in ê歌死去a,唱bē出來,太武山魂無tī hia。