《陳雷文選》

| | || 轉寄

天使

1

雖然chēng 4、5年前伊tō無teh chhap代誌a,所有ê企業攏放hō͘ hit二個後生去hōaⁿ,m̄-kú tī伊身軀邊ê人,親像司機羊á攏猶稱呼伊董事長。Bē輸按呢叫,人才bē bē記得,這個王永來財團所有ê大企業攏是伊一個人空手拍拚起來ê,到taⁿ資產上無mā成千億。

不過人總是人,有歲了後,身體無病mā一年輸一年,有錢無錢ê攏仝款。特別是舊年狹心病入院了後,伊感覺人老lú緊。以前追求無限ê財富,若準人生是一項永遠ê代誌,chit-má才覺悟,世間上價值ê tō是「日子」這項物。若是所有ê財富會tàng換10冬、20冬ê少年,伊mā歡喜甘願。

醫生叫伊食bi-tha-min(vitamin),出門行路運動,bē使坐車。食清食chiáⁿ,好食ê油臊攏m̄通tam。有人教伊食仙丹秘方,會發嘴齒生烏頭毛,結果嘴齒落了了,頭鬃白白去。人老tō無效,事實bē計較得。

In kiáⁿ看伊規日憂頭結面,活kah無滋無味,想beh hō͘伊歡喜,去百貨公司買一條褲帶來送伊,講:「阿爸,你一世人錢thàn hiah chē,mā tio̍h-ài用hiah chē。」看he數單,一條褲帶一百萬,鑲一chōa金tak-tak ê鑽石,khian-á中央一粒大藍寶!伊心內hàiⁿ頭:「阮kiáⁿ a,你猶少年m̄ bat,世間tō是這項kap錢無關係!」

隔轉日叫羊á駛車載伊去永來百貨公司,電梯坐到3樓,來賣褲帶ê所在。顧店ê查某人當teh無êng,叫講:「美玉a,人客你先照顧一下。」一個查某gín-á笑gī-gī出來,好禮問:「阿伯,你愛啥?」bē輸金鈴á teh giang ê聲。Kā看,這個查某gín-á 21、2歲á,穿一領白色ê短衫,tha̍h一領ka-pi色有格á ê短裙。生作koân-koân,胸坎挺挺,像標準ê運動員。皮膚是日頭pha̍k過ê粉紅ê淺銅色,金koh幼。像lù kah光光ê大理石。王永來掠伊看,m̄知怎樣,面soah會燒,一句話講bē好勢:「這…條褲帶m̄知會使還一下無?」查某gín-á應:「阿伯,無要緊。你若無合意,我替你還掉。」十分溫純ê笑意,koh講:「失禮,hō͘阿伯加行一chōa。」王永來講:「阮後生買ê,che…咱老人khah無合lah。」查某gín-á講:「Bē lah,阿伯,你看起來比阮阿公khah少年。」「我83 a。」「Kap阮阿公平chē歲。」查某gín-á ná笑,王永來面soah燒hàng-hàng,心臟pho̍k-pho̍k跳,講:「換一條khah普通ê tō好。」另外kéng 一條5百kho͘ ê皮帶。查某gín-á講:「阿伯若是bē合,才koh the̍h來換。」

轉到厝,顧厝ê阿月á問伊:「董事長,你今á日tī外面作啥?一個面紅紅?」隔轉日,車坐leh又koh去百貨公司。來到3樓,hn̄g-hn̄g tō有人叫:「阿伯,你褲帶有合無?」仝款白色ê短衫,ka-pi色ê格á裙,hit個查某gín-á笑微微teh問。「有合lah 。」想想leh講:「Koh買一條。」查某gín-á講:「阿伯,koh買一條khah少年ê,好無?」Kéng 一條淺ka-pi色ê皮帶,邊a有tǹg花,khian-á頂面二尾鑲金ê金魚。王永來真歡喜,新褲帶hâ leh轉來。阿月á看著koh問:「董事長,你今á日去tó?一個面紅紅紅。」

過幾工,伊又koh去。先去二樓賣查甫人衫ê所在,買一領有花ê Ha-oah-i(Hawaii) ah-ló͘-hah ê絲á衫,配一領意大利「無啥錢」(Versace)ê長褲。舊ê衫褲換掉,規身軀新新,來到3樓。Hit個查某gín-á看著tō叫:「阿伯,chiah chē工無來?」仝款白色ê短衫,ka-pi色ê格á裙,規個烏金ê頭毛放來到肩胛頭,若清水洗過ê絲á,sìm一下sìm一下。「阿伯,你穿chiah新,差一sut á認bē出來。」王永來歡喜問:「你敢有khah少年一sut-a ê褲帶?」報伊看一排新新人類時行ê褲帶。圓ê扁ê,粗ê幼ê,五花十色ta̍k項有。Kéng一條ne-khu-tái hiah大板ê金鏈á,掛一個太空船ê khian-á。查某gín-á講:「 阿伯,你lú來lú少年。」

過來伊ta̍k禮拜來百貨公司買褲帶。見若看著伊tō發面hông,心臟直直chhiáng,kap少年hit時,看著súi查某gín-á hit款ê反應仝款。漸漸ùi伊ê心khut á底有一個新ê奇怪ê要求,家己也想bē到ê慾望,lú來lú強。伊一直lún leh m̄敢講出來。

Lún到hit日才kā美玉講:「我有一項代誌beh拜託你,請你m̄通奇怪。」美玉講:「阿伯,阮tī chia tō是beh服務顧客,你m̄免細字」。王永來講:「這項代誌kan-na你有法度。」美玉講:「阿伯,是啥代誌?」「是按呢lah,…」王永來一句一句詳細講,驚伊聽了無真,又koh ùi頭講一遍。美玉lú聽目睭lú大蕾,千萬無想著,這個80外歲看起來chiah古意ê老歲á會有這款奇怪ê要求,比少年家á khah食力!M̄-kú伊講了hiah-nih頂真,hiah-nih誠意,hō͘伊少年ê心感動,一字「m̄」講bē出來,tō答應伊。

王永來真歡喜,講:「拜一車來kā你載。」美玉講:「阿伯,我ta̍k日攏tio̍h-ài來上班。」王永來講:「無要緊,我ta̍k項攏安排好勢a。」拍手機hō͘伊ê後生王金泰,tō是chit-má永來百貨公司ê大頭家董事長。講伊tī 3樓,叫伊馬上來。王金泰叫是啥物要緊ê代誌,隨tō到位。3樓ê主管看大頭家董事長到位,緊也chông來。王永來kā後生講:「這個店員真好心,拜一beh去我hia kā我鬥腳手。你hō͘伊m̄免來上班。」He後生想講,大概老父無伴愛人陪,kā主管交代,鄭美玉拜一m̄免來上班,薪水照發。

2

拜一羊á駛車來載伊去北投ê大厝,大大間ê別莊tī半山頂,紅hiā白牆,牆á頂規排白色野牡丹。鐵門入去,王永來tī hia teh等伊,chhōa伊入去一間大間房間,四圍全部是規大phiáⁿ ê玻璃窗,窗á外面看會tio̍h ê tō是一片青翠ê花園。窗á邊chhāi一tè大tè大理石,一個中年人掛目鏡teh斟酌看,用手teh摸。He石á差不多一個人koân,有lām淡薄粉紅ê淺銅色,專工按花蓮取來ê。王永來講:「這位tō是黃水牛先生。」這個黃先生目鏡thuh koân掠美玉一直看,按頭chîn到腳,koh按腳chîn到頭,親像beh kā伊看thàng過,teh看伊ê肉kap骨,一晡才tàm頭,講:「王先生,這位小姐kap這tè石頭tú tú好雙生一對。」王永來講:「請你盡你人所作會到ê,liâu-liâu-á是,m̄免趕狂。」Kā玻璃厝ê鎖匙交hō͘伊,oat leh tō出去。

伊khiā tī hia看tiām-tiām ê四邊,鞋á khǹg一旁,kā長長ê裙帶kap短衫ê liú á一粒一粒tháu開,he裙kap衫tō poa̍h落tī土腳。雙手thèⁿ koân,頭鬃póe一下,規個頭毛放開去,tú好phoa̍h來到肩胛頭。赤腳踏起li̍h台á頂,面向這旁,chhun ê內面攏總thǹg掉,規身軀光光,khiā tī玻璃厝ê中央,和平安靜,充滿自信。因為伊家己真知影,伊無穿衫ê美麗比有穿koh khah完全。外面日頭光經過有色ê大蕾花反射入來,照著伊siâⁿ人ê豐滿ê裸體,變作一領半通光ê薄衫,像彩虹kā伊掩leh,伊khiā tī hia bē輸是一身已經刻好ê美神ê石像。

Ta̍k禮拜一美玉來hō͘黃先生刻像,時間一禮拜一禮拜過。按呢beh 2冬了後,王永來85歲a,hit一日,黃先生才kā伊講:「明á早起,日頭出來了後,你才入去。」kā鎖匙交還伊。隔日早起,日頭大出。伊kā玻璃厝ê門拍開,內面tiām 靜靜,中央chhāi一個人像,一tè大tè烏絨布khàm leh 。行o̍a去,輕輕á kā烏布giú開,無想著下面一個thǹg光光ê美玉。伊ê面hō͘早時ê日頭光照著,淡薄粉紅,頭毛拍開若絲á網,胸前ê乳koân-koân挺起來,飽飽ê乳水teh beh tin出來。伊一腳踏半步,身軀àⁿ前teh beh跳舞。He優美ê大腿肉感親像會sìm,伸手kā摸,滑滑koh幼mī-mī。He美玉笑微微,開嘴teh beh講話,差一sut á叫伊名出來!這時外面厝角鳥chhih-chhiak叫,kā伊叫醒過來。Se̍h一個頭看,to也m̄是teh作夢,是歡喜teh醉。窗á外四圍白色、紫色、紅色ê九重葛,tī日頭下bē輸五彩ê大尾ia̍h-á teh飛,teh無êng in熱人短短ê生命…。忽然間,伊單獨一人khiā tī I-tong (Edon) ê花園,tī hia美神kā伊ê少年又koh交還伊lah。

伊kā人像chhāi tòa大門入來ê大廳中央,厝頂吊一pha kám-ō͘-á大ê三chàn ê水晶燈。每一遍按hia過,tō khiā leh kā看,kap伊講話。Hit一暗,伊睏bē去,koh來人像頭前,khiā tòa hia看真久,he人像bē輸teh kap伊講話。伊一時擋bē tiâu,行óa去,雙手kā人像lám leh,面phak tòa伊ê胸前,ù tòa伊ê乳頂面,大聲講:「你tō是我teh chhōe無ê青春。」

雄雄聽著thih-tho̍k thih-tho̍k ê聲,按人像ê胸坎內面出來。想講是家己頭殼teh作怪,耳á ù khah ân kā聽,又koh thih-tho̍k thih-tho̍k ê聲音,清清楚楚,明明是心臟teh跳,著驚退一步看,he人像猶teh笑,一腳踏半步teh beh跳舞,親像開嘴teh kā伊講:「我hō͘你這個祕密,kan-na你知影,m̄通講出去。」

伊kā這個祕密保守leh,攏無講hō͘人知。Ta̍k暗落來kap人像約會,kā燒hut-hut ê面phak tòa清涼ê胸坎,ù tī伊ê乳頂面,聽伊心跳,thih-tho̍k thih-tho̍k,thih-tho̍k thih-tho̍k..。伊若跳緊,伊tō tòe伊跳緊;伊若跳慢,伊tō tòe伊跳慢,tī無聲ê大廳跳風流優美ê oa-lu-chuh。

但是hit一暗,雄雄oa-lu-chuh ê音樂無去,kan-na有phok-phok-phok,phok-phok-phok ê聲。Lú跳lú緊,bē輸火車teh chông,緊kah伊tòe bē著,khùi喘bē lī,差一sut á poah倒昏去。隔轉日mā是仝款,音樂攏無去a,kan-na phok-phok-phok ê聲,hō͘伊頭殼會hîn。

伊心內感覺奇怪,叫羊á駛車載伊去百貨公司,來到3樓,chhōe無美玉。問顧店ê小姐,小姐講:「阿伯,你是伊ê啥人beh chhōe伊?美玉昨暗車禍,入去tī病院。」趕去病院看,he美玉倒tī白床巾ê病床,看起來人好好,目睭kheh-kheh teh睏。美玉ê老母透暝ùi新營小腳腿拚來kā顧,講:「醫生講,攏無傷,kan-na腦震動,睏bē醒。」王永來tī耳á邊叫:「美玉,美玉。」mā是bē醒。

伊包一間特等病房,koh chhiàⁿ三班特別護士24小時輪流看顧。家己一日來幾nā遍,坐tòa病床邊,講話hō͘伊聽:「你趕緊精神,我有一個祕密beh講hō͘你知影。…」

這暗,伊kā耳á ù tòa人像ê胸坎認真聽he聲,phok-phok-phok,phok-phok-phok,漸漸lú跳lú慢,lú來lú弱,像細隻掠魚船出港ê時,he phòng-phuh-á phok-phok-phok ê聲,lú去lú遠,lú走lú細聲,尾a規個攏tiām去。雄雄伊心肝頭一支尖刀tu̍h入去,痛kah胸坎強beh piàng破,擋bē tiâu un落去土腳,phiang tī人像ê腳邊,tō m̄知人去a。

這時美玉倒tī特等病房ê病床,伊ê心臟lú跳lú慢,lú來lú弱,tī護士無注意ê中間,呼吸停止。伊年輕美麗ê面和平溫純,看起來概成是咱人類幻想中ê天使,chit-má m̄知啥物原因hō͘天頂ê主人叫轉去a。暫時倒tī hia hō͘人hip相起來teh欣賞,印tī大張相紙頂面仝款,清清楚楚,最後kan-na留一個真súi ê,充滿生命ê熱情ê印象niā-niā。