《陳雷文選》

| | | 轉寄

謀殺者

Hit個gín-á hō͘人按圳溝救起來hit日,in老母kā伊lám leh meh-meh-khàu m̄放,bē輸真知影,若放去tō會koh無去。按呢mo͘h一暝,隔轉早chông去仙公廟燒金,kā神明chiù-chōa下願,ùi這日起ta̍k日敬神拜佛食長齋。In老pē chhoân一副豬心豬肝,一隻蕃面鴨角,koh一擔官田ê菱角去金印a in tau,kā伊拜kā伊謝。“這個國生a我生ê,m̄-kú是你才有ê 。”這句話講四、五遍,招伊結拜換帖作兄弟。

Hit日sit頭作soah按hia過,tú-tú聽著溝á底人teh hoah救命,無顧看tō跳落去,順he水勢一手kā伊chang起來,抱起來溝á頂。Kā看,僥倖a,tō是磅嬸a in後生。這個國生a灌一肚水,直直吐,佳哉猶有khùi,險險tō無死!抱轉去in厝,磅嬸a看he kiáⁿ一身軀死人色,bē 輸死豬á thâi好倒tī hia,叫是已經去a,mo͘h leh大聲khàu :“我kiáⁿ ôe!我ê心肝á kiáⁿ ôe!…”

這個國生a kap春a仝歲,二個不時結作伙,相好若兄弟。金印a in查某人量a,hit日看國生a hō͘人抱轉來,目睭仁吊吊,規身軀死人色,bē輸陰間轉來ê水鬼,心內tō無歡喜,迷信koh kāu khiàn-sńg,七念八念:“這個gín-á有帶(tài)命底lah!”金印a罵伊:“查某人這枝嘴!你無看人gín-á乖乖,冊攏讀第一名。咱春a敢tòe伊會著?”

M̄-kú人講日時想鬼,暗時作夢。這個金印a前a罕得作夢,hit日soah作一個bái夢。夢見in春a坐tī灶腳teh thó͘大khùi,煩惱kah一個面jiâu-jiâu,目睭皮kōaⁿ水。三、四十歲a,看起來比伊khah老。Tú想beh問,tō精神a。連續二日仝hit個夢。Hiàng時人khah khiām,m̄甘去問拆(thiah)夢ê,孤孤悶悶khǹg tī心頭。

隔幾工又koh夢著春a,mā是憂頭結面,beh khàu beh khàu,問伊啥代,應講:“pōng-pōng ta̍uh-ta̍uh beh tó sa chiah chē錢?”金印a問:“外chē 錢?”春a應:“五百萬lah!”“Chiah chē錢beh創啥?”“國生a teh討!”驚一tiô,bē赴問tō koh精神a。天已經光iāⁿ-iāⁿ,國生a phāiⁿ一個冊包tī門口teh等。春a伸手kā老pē討sí-siù-á錢,金印a想起tú-chiah夢裡ê代誌,順嘴罵:“討chiah chē錢beh創啥?”春a應:“Ham國生a去買冰枝。”金印a看he國生a,衫褲穿kah清氣清氣,手裡一本冊teh讀,心內講:“夢bóng夢,m̄通烏白想!”

嘴按呢講,心koh放bē落去,隔二日又koh作夢,問in春a:“國生a討錢beh創啥?”春a應:“國生a poa̍h大kiáu輸人錢。”“我to知知,細漢乖乖gâu讀冊,大漢khioh-ka̍k作pháiⁿ kiáⁿ。看會出來lah!看會出來lah!”罵:“Mài chhap伊!這款pháiⁿ kiáⁿ mài hiù-lān伊!伊輸kiáu kap咱無代。”春a搖頭:“阿爸你m̄知。國生a chit-má大尾a。”“按怎大尾?”“咱chia兄弟攏伊teh hoah起hoah落。若無錢去,放tiāu beh掠銀印a tú數。”“銀印a?”“阿爸,我kan-na這個kiáⁿ,你kan-na這個孫!”soah醒起來,國生a來tī門口,狗teh吠。春生a伸手討冰枝錢,金印a手kā掠leh,罵:“Mài chhap伊,這款pháiⁿ-kiáⁿ mài hiù-lān伊!”

過來規禮拜心悶悶。暗時倒leh,目睭金金m̄敢睏,驚去夢著春a。眠床頭翻來péng去,in某問,才講he夢hō͘伊聽。“我to知知leh,這個gín-á有帶命底leh lah!”起來泡牛滂茶hō͘伊lim ,lim落tō會睏,夢著春a teh khàu,“去a lah!去a lah ?”“啥人去a?”“銀印a hō͘國生a掠去a lah。無錢tō beh hō͘死!”金印a講:“救gín-á khah要緊,錢先hō͘伊才講。”家己身軀邊ê錢khêng-khêng leh,鬥鬥五百萬,布袋袋leh tō去chhōe國生a。

Che國生a坐tī路邊teh等伊,四kho͘圍是koân-koân kē-kē ê草埔,邊a一間細細ê有應公祠,li-li làu-làu,漆攏落無去a。這個國生a看起來原在十三、四歲,kan-na hit個面ê hia̍h-á kap鼻頭一大jiah lù破去。金印a罵:“國生a,你好膽死!掠阮銀印a beh創啥!”國生a講:“阿伯,pok一枝。”tu一枝薰hō͘伊。金印--a罵:“你這個豬狗精牲,無情無義!若m̄是恁pē kā你救,你猶有今á日這條命!”He薰大下suh一嘴,頭殼hîn se̍h lin-long。“哈!哈!tō是這條命你救ê,chit-má攏你ê!好bái你擔當!”póe一枝短刀出來,大大力ùi土裡tu̍h落去。He刀直直插tī土裡,深深深chhun一枝柄,kā看,he土soah流血出來。雄雄國生a身軀soah無去,chhun一粒頭浮leh沉leh,親像tī水裡teh beh淹去a…“救命lah!…救命lah !…”。著驚hoah:“錢攏tī chia!”布袋piaⁿ leh,錢chhia-chhia出來。Kā看,規土腳一tha̍h一tha̍h死人用ê金紙,那是錢!Chhoah一tiô醒醒起來。

一身軀chhìn汗,腳尾手尾冷ki-ki,嘴內猶有臭薰味,taⁿ m̄知是醒猶未?Kā看,外面風透,窗á門si-si soáiⁿ-soáiⁿ,猶是半暝暗眠摸niau。坐起來喘大khùi,想講taⁿ怪a,若m̄是人死,那有hiah chē金紙錢?Lú想lú無自在,耳空內ki-ki叫,有聽著國生a尖尖ê聲teh hiu:“這條命攏你ê,好bái你擔當…”

目睭金金m̄敢koh睏,等到天光狗吠,國生a來tī門口,phāiⁿ一個冊包,the̍h一本冊teh看,金印a念:“這個gín-á有帶命底leh lah!”Tī hia tō下一個決心。

Hit一工國生a又koh按圳溝hia過,金印a kā叫:“國生a,你家己一個beh tó去?”國生a應:“我teh liam田嬰。”金印a kā ia̍t手:“來,你來kap我掠水雞。”國生a kap伊peh起溝頂,hit時西北雨tú soah,圳溝ê水kòng-kòng流。國生a驚水,講:“阮阿母吩咐,溝á水大,m̄通óa去。”金印a講:“阿伯tī chia kā你顧,無要緊。”Khiā tī koân-koân ê溝á頂,四圍一大片ê稻á青青綠綠,已經齊齊一尺koân。這時日頭tú tú落去,田裡攏無人,kan-na幾隻大隻白鴒鷥hō͘五彩ê天照kah紅hóaⁿ紅hóaⁿ,tī hia行來行去。雄雄出一下大力,kā chhia落去。國生a bē曉siû水,身軀沉落去,chhun hit粒頭tū tī水裡浮leh浮leh,koh liòng二下,bē赴哀tō無去a。

伊khiā tòa溝á頂等,久久無koh浮起來,才大聲hoah:“救人o͘h!救人o͘h!”掛衫掛褲跳落去,tī溝á底sa著國生a ê腳,hô͘起來khǹg tī溝á頂,kā看,已經早tō死去a。Hit個十三、四歲ê gín-á面,hia̍h-á kap鼻頭一大jiah lù破去,kap夢裡ê仝款仝款。抱轉去in厝,磅嬸a看he kiáⁿ一身軀死人色,目睭金金,嘴á開開,水也無吐,知影已經去a,lám leh大聲khàu:“我kiáⁿ ôe!我ê心肝á kiáⁿ ôe!…”

法醫來驗屍,鑑定是淹水死ê。出山hit日,金印a燒足chē金紙錢hō͘國生a,kā in pē母講:“我若早一步tō好lah!”He老pē講:“這個gín-á該去ê,第一擺救有著,第二擺也tio̍h去。”而且庄裡相命ê阿有a講,陳國生有帶命底,in老母食長齋也無彩工。磅嬸a khàu kah有目睭無目屎,怨家己長齋食無清,hit日偷tam一tè麻油炒豬肝。