《台語荒漠甘泉(全羅版)》

| | | 轉寄

"Chiàu Lí ê èng-ún chòe"

listen

Saⁿ ge̍h chhoe-poeh (Saⁿ ge̍h poeh ji̍t)

"chiàu Lí só͘ kóng lâi kiâⁿ. Goān Lí ê miâ éng-oán kian-kò͘," (I Lia̍t-tāi-chì-lio̍k 17:23,24)

Chin-sêng ê kî-tó sī chi̍t ê siōng siū hok-khì ê. Lán siông-siông kî-tó iau-kiû ê sū bô sím-mi̍h kū-thé èng-ún, só͘-í lán bōe thang khéng-tēng só͘ kiû ê sī-m̄-sī ha̍p tī Chú ê chí-ì, ti̍t-kàu kian-chhî chi̍t-chām ê kî-tó chiah ōe bêng-pe̍k. Kàu chi̍t ê sî-chūn, lán oân-choân liáu-kái só͘ kiû ê, ha̍h tī Siōng-tè ê chí-ì. Thiⁿ-pē siông-siông ín-chhōa lán tī sèng-keng tiong khì soán-te̍k, khì kiû chi̍t ê èng-ún, chin kín lán beh chheng-chheng chhó-chhó hoat-hiān tī sèng-keng lāi ū chi̍t ê sìn-sit sī hō͘ lán ê. Chit-sî, lán thang móa-móa chū-sìn kóng, "Chiàu Lí só͘ kóng ê khì chòe."

Tng lí chiong lí ê chhiú àn-hōaⁿ tī sèng-keng tiong Thiⁿ-pē ê chi̍t ê èng-ún ni̍h, jiân-āu chhéng-kiû I khì si̍t-hiān; sè-kan bô ū pí che khah súi, khah ū-la̍t, khah khó-khò. Án-ni chòe, bô tú-tio̍h khó͘-thàng, cheng-chha, chí sī thê chhut chi̍t tiuⁿ chi-phiò, iau-kiû tūi-hiān. Kán-kán tan-tan kun-kù só͘ èng-ún iau-kiû si̍t-hiān, tùi só͘ kiû ê, bô hoâi-gî, iā bô hâm-hô͘. Nā-sī só͘ kiû ê lóng sī chiah-ni̍h bêng-khak, lâng beh tùi kî-tó chiū tōa-tōa ū chhù-bī lah. Thê chhut chi̍t nn̄g ê kū-thé ê iau-kiû, pí chòe jī-saⁿ-cha̍p ê hâm-hâm hô͘-hô͘ ê chhéng-kiû ke chin hó. --- F.B. Meyer

Sèng-keng tiong múi chi̍t ê èng-ún chiū sī Siōng-tè ê múi chi̍t tiuⁿ phoe, kà-sī lán thang ǹg I thê-chhut che ha̍p-lí ê chhéng-kiû, "Chiàu Lí ê só͘ kóng khì chòe". Chō-bu̍t-chú bōe khi-phiàn lán chiah-ê siong-sìn I ê sìn-si̍t ê siū-chō-bu̍t. Ōaⁿ-ōe kóng, Lán ê Thiⁿ-pē éng bōe tùi I ê kiáⁿ-jî si̍t-giân, bô chiàu só͘ kóng ê ōe khì chòe.

"Kiû Lí kì-tit tùi Lí ê lô͘-po̍k só͘ èng-ún ê ōe, in-ūi Lí bat hō͘ góa ū ǹg-bāng." (Si-phian 119:49) Che sī chi̍t ê chin phó͘-thong ê chhéng-kiû, ū nn̄g ê lí-iû, in-ūi he sī "Lí ê ōe." Lí kiám ōe si̍t-giân? Ká-sú Lí bô beh si̍t-chiān, á-bô Lí tong-chho͘ ūi-hô beh kóng neh? Lí kiò góa ǹg-bāng, Lí kiám ōe hō͘ góa sim-lāi ê ǹg-bāng sit-khì mah? --- Charles H. Spurgeon

"Sìn chiū ná ióng-kiāⁿ, lâi kui êng-kng Siōng-tè;" (Lô-má 4:21)

Siōng-tè éng-éng bōe-piàn ê sìn-si̍t hō͘ sèng-keng ê èng-ún "ū pó-pòe kap ke̍k tōa." (Ṳ Pí-tek 1:4) Sè-kan lâng ê èng-ún siông-siông chhin-chhiūⁿ chi̍t tiuⁿ chóa jî-í, siông-siông bōe thang tūi-hiān, hō͘ lâng siong-sìn. Tān-sī Siōng-tè chū chhòng-chō sè-kài í-lâi, I m̄ bat tùi it-sim khò I ê kiáⁿ-jî "kóng-ōe bô sǹg-siàu."

Ah! Chi̍t ê khó-lîn ê ki-tok-tô͘ tī thòng-khó͘ ê àm-mî, khiā tī èng-ún ê mn̂g chêng, khiok m̄-káⁿ khì chūn hit ê mn̂g-pìⁿ-thâu lâi khui mn̂g, bô chhin-chhiūⁿ kiáⁿ-jî hòng-sim chìn-ji̍p i pē ê chhù lâi hioh-khùn, sī jōa-chiâⁿ siong-pi ê sū. --- Gurnal

Thiⁿ-pē ê múi chi̍t ê èng-ún lóng sī kiàn-li̍p tī sì ki thiāu-á. Chêng nn̄g ki thiāu chiū-sī I ê kong-gī kap sèng-kiat. Che éng-oán bô iông-ún I khi-phiàn lán. Tē saⁿ ki thiāu sī I ê un-tián á-sī jîn-chû, sī hō͘ I bô bōe-kì-tit. Tē sì ki thiāu sī I ê chin-si̍t, hō͘ I bōe piàn-keng. Só͘-í I beh chiâⁿ I múi chi̍t ê só͘ èng-ún.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:book@pctpress.com