|
Kásek
Sī chi̍t ki chin liúlia̍h ê chhiú
Tiàu gō͘ tiâu sisòaⁿ
Tèng lo̍h goán ê thâukhak sùki
|
|
Góa tī o͘àm tiong to̍k hêng
O͘sek ê hong, chiàⁿ khau tò siàn
Līkeng ê chhùi kháu, thunlo̍h liáujiân
Ji̍tthâu sī bô kiâmchiáⁿ ê peng
|
|
Kiâⁿji̍p oanoan khiaukhiau ê Kimmn̂g lāu ke
Chi̍t chiah thô͘káu’á hiòng lí pūi nn̄g siaⁿ seⁿhūn ê chioho͘
Lāu khì ê sòegoa̍t hiônghiông khiā khí‧lâi
Thí khui lia̍t âng hoehkng tiámto̍h làukau ê kìtî
|
|
Tùihōaⁿ iân phàulúi pêji̍p ba̍kchiu
Kimsek phah khui kong’êng ê chêng pòaⁿ sìlâng
Káⁿ sí koh sí bē khì ê oa̍h
Uikoân thiàuji̍p thihthang teh píⁿ kengkah
Pe̍hsek amkhàm oankhut ê āu pòaⁿ sìlâng
Siūⁿ sí koh sí bē khì ê sí
|
|
Hīⁿkhang lāi putsî thiaⁿtio̍h
Chi̍t chūn chi̍t chūn lóng lóng ê siaⁿim
Saⁿ bān gōa ē bô kuichek ê chiatchàu
Gō͘ cha̍p nî lâi kín koh tāng ê kiaⁿ sim lún miā
|
|
Chi̍t lia̍p chi̍t lia̍p iâm
Chi̍t tih chi̍t tih kōaⁿ
Chi̍t sûn chi̍t sûn jiâubûn
Chi̍t tǹg chi̍t tǹg jīnhūn
Sī pâipí
|
|
Hiankhui nâsek ê bīnse
Lí sī chi̍t tiâu gēsu̍t ê khioksòaⁿ
63 tiâu si hûn
78 lia̍p si chí
Ū chêng ū gī ê pah nî le̍ksú
|
|
Ngē kut ê mûikùi
1915 nî ê mn̂gsìⁿ phāng āupiah
Ji̍tpún peng liàmtn̄g Tâioân thâu
Tī lí káu hòe ê simkoaⁿ khut’á
Tâi lo̍h chi̍t lia̍p hoán-khòng ê chéngchí
Puh chhut ap bē píⁿ ê
Ngē kut ê mûikùi
|
|
Kōaⁿchúi thiàⁿsim chim sánchhiah ê chhânthô͘
Sánsán ê sìⁿmiā kiat pápá ê tiūsūi
Chi̍t pō͘ chi̍t pō͘ o͘ta ê khaìn
Siān tauhtauh ê ji̍tthâu khòaⁿtio̍h
Khunpin peh boánchiok ê chhiòiông
|
|
Tng hongchhia thâu kôankôan pháng khí
Chi̍t ki Iâmhūn tētài bûngē kî
Thêngthêng tèng lo̍h lâm Khunsin biōtiâⁿ
Bē iô bē khi hiòng kàigiâm chhiàng siaⁿ
|
|
Khòaⁿtio̍h lí ê tângsiōng
Góa chiah chaiiáⁿ lí
Tha̍ktio̍h lí ê si
Góa chiah se̍ksāi lí
|
|
Ūitio̍h tháukhui abú kiat kiû ê ba̍kbâi
Ngē jím gêchô khíhōaⁿ hoeh saisai
Ūitio̍h thè apa ê hoânló kiám pûi
Khíkin kā ân piàⁿsè lim pit chúi
|
|
Phāiⁿ chi̍t hù saⁿ kak la̍k khiau ê miāté
M̄ goān tèⁿ tiāmtiām kùchāi miāūn cheng
M̄ goān pī teh tiâu ê lênghûn bô siaⁿ
Khikhiau ê chéngthâu’á gīm ân sèⁿmiā chi pit
Gīgī chùn, la̍kla̍k chhoah
Thàumê thàu-ji̍t thò͘ ba̍k iô bē thêng
|
|
Thàu tiongtàu ê ji̍tthâu, kā lûn’í ê lián’á hang chhut hûn
Chi̍t sian tòkiu ê sin’iáⁿ, chi̍t siuⁿ gō͘ hoe chháikǹg ê ēkha
Nn̄g chat ta-pô͘ ê liân’ngāu thúi
"Lâi bé chháikǹg o͘h──"
|
|
Khangkhang thàulām io̍hchúi bī ê pângkeng
Kā kakī khōng tòa pe̍hsek ê chhn̂gkin
Bián koh chhapsiâu ji̍tthâu ê chhiaiāⁿ
Bián koh thunlún hongthai ê hiaupai
Ánne, chiâⁿ hó
|
|
Mamĭ, góa chiok siūⁿ lí ê
Papa kóng sī góa bô koai, lí chiah ē cháu chhutkhì
Hāi góa háu kui mê
|
|
Kámsiā lí ê ba̍ksái
Tī lí chho͘ pêpê ê chhiútê līkhui góa iù mimi ê chhùiphóe liáu’āu
Lí ba̍kkho͘ kâm chúi, kóng lí ài góa
Góa goânliōng lí
|
|
Siān tauhtauh ê ji̍tthâu teh thoa âng hê ê sin’iáⁿ
Kúi lúi o͘ jîn lânglâng sangsang tiàu tī thiⁿténg bóe
Pehkhui kam’á sek ê hônghun
Khaisí chi̍t bān chi̍t bān thàngthiàⁿ ê thunlún
|
|
Góa bô koài lí
Tng góa tùi lí ê khachiahphiaⁿ, siak lo̍h
Góa thiaⁿkìⁿ sìⁿmiā chi̍t chat chi̍t chat, chhùi iûⁿiûⁿ
Lak lo̍h útiū khangkhak ê siaⁿim
Khinkhin khongkhong
M̄ sī lí chho͘ kha pūn chhiú
Sī góa miā tiong chùtiāⁿ
|
|
Koái’á, sô līkhui thóthàn ê lia̍hlêng pâng
Lângkheh khì-hiâm ê pháiⁿsiaⁿsàu
Iáu tī hīⁿkhang piⁿ, phōngphōng tân
Chi̍t tīn bîhong, khaukòe bīnphôe
Léngléng, tài sngbī
|
|
Kimsek ji̍tthâu kôankôan kòa thiⁿténg
Pe̍hsek hûnlúi sûi hong lōngliulian
Chiáuchiah tī chhiūki liu liulông
Hoaⁿhí ê chôaⁿchúi ti̍tti̍t tiòng
|
|
Góa thiaⁿkìⁿ chi̍t khek Bāng Chhunhong
Í Tekpò͘si ê chiatchàu
Tī lí simpâng mn̂gkháu
Tiûtû
|
|
12 goe̍h sngléng thiⁿ
Chiamchiam ê hong
Siā lo̍h sihsih chùn
Mā siā nńg chho͘ióng ê kutba̍k
|
|
Tùi phangchúi phoechóa ê khí-thâu
Siá lí ê miâ
Chi̍t keh chi̍t keh iù chōa chúihûn
Lóng sī lí siû‧ kòe ê chheng phang pho iáⁿ
|
|
Chi̍t châng lian‧ khì ê mûikùi
Oá tī bān chí chhian hông lûnhôe ê
Chhiûⁿ’á kak
Tiāmtiām ê hoe iáⁿ
Pa̍ktio̍h góa
Bô sînhûn ê ba̍kkng
|
|
Lí kiò góa kā ba̍kchiu kau hō͘ lí
O͘’àm sī lí ê sèkài
Gō͘ hoe cha̍p sek ê pò͘kéng
Lâu thòaⁿ o͘ kúikúi ê bū
|
|
Iāhêng kun ê sihsut’á pòsò͘ siaⁿ sàu
Ka tn̄g tù khíkôⁿ ê khùnbîn
Sô tī chhiûⁿá kak sûnlô ê siānthâng’á peng
Chha̍t thâu chha̍t hīⁿ, iōng hôe’ek ê lûita̍t
Sàubiô siûsek lāi ê góa
|
|
Tī chit tè khiónghat sī ha̍phoat
Chauthat sī chètō͘
khausé sī chèngtong ê
|
|
Phâng hûn lám goe̍h siàn chhiⁿ khian ji̍t
Hiâⁿ hoe chú chhiū hang soaⁿ chian hô
|
|
Kìchiá hóngbūn hoānlâng,
Chhiáⁿmn̄g lí ji̍p ga̍k ê kámsióng?
|
|
Lí ēng hoeh kap eng gán
Kā sánchhiah chhèngsat
Chhèngchì phùnchhut ê hóechheⁿ
Kā chhengchhun sio·sí
|
|
Chhekchiáu'á chhōe bô tiūchháu lâng ê kengkah
Tō͘kún’á suh bô kamchià hn̂g ê lengchúi
|
|
|
