《台灣諺語鹹酸甜》

 | | | 轉寄

爸.一頭，母.三擔。（獻hō͘偉大ê母親）

作者 Lahjih 2007.07.15

自從hit工父母創造我生命， 十月懷胎，lóng tòa-tī阿母ê子宮內， 病囝真厲害，腹肚chiah大kâi， 心情鬱卒，偷偷流目屎； 阿爸kan-nā會曉歡喜我beh來，恬恬期待。 ôaⁿ-á一聲來到世界，阿母thiám-kah嘴á裂鰓鰓， 為tio̍h幼chiN2e5紅嬰，一目nih都m̄敢離身邊， beh睏àⁿ-tī keh-lang-kha,食奶惜tiàm胸前， chhōa尿、溢奶，放屎、洗浴，hō͘阿母真無閒； 阿爸chhāi-tiàm阿母身邊聽命令，心情清清。 一歲兩歲手裡抱，三歲四歲土腳sô， iah-beh洗衫，iah-beh煮食， iah-beh顧chit-ê金囝，阿母m̄-bat講一句「厭」， 拖磨mā好，快樂mā好，為tio̍h金囝，阿母lóng真心適； 阿爸kā我抱chhit-thô，lóng tī心情好。 五歲六歲beh讀冊，學校那leh行灶腳， 驚我tòe人be7tioh8，逐日陪leh讀冊， 驚我bē大，送飯包koh陪我食， ùi入學到出業，學校有i chiâⁿ chē腳跡； 阿爸關心--ē是「習題有寫抑無寫？」 十一二歲beh tńg大，生理、心理lóng要緊， cha-po͘會變聲，愛相扑，莽莽撞撞tio̍h-ài教， cha-bó͘囡á ê ta̍p-tih tio̍h-ài thōa，知影M.C是啥？ tīm補、營養，裝súi、買奶裌á，tio̍h阿母chiah知影； 阿爸ê任務，付出錢銀，以外--ê可以免聽。 升學競爭，阿母上犧牲， 早起款飯包，送出門，一分一秒等，期待平安入門， 為tio̍h考大學，讀到一半暝，阿母仝款等到三更， 拴茶湯、泡牛奶，驚我寒，隨時kā我添衫； 阿爸為tio̍h一家會生活，已經入眠準備明á載koh拚。 ùi細漢kā阮chhiâⁿ，chhiâⁿ kah大漢beh嫁娶， 阿母iáu原bē放心，不sám時都leh kā我問， 你有快樂無！恁翁á某tio̍h-ài和好！ 知影阿母m̄是leh lô-so,因為阮mā已經是人ê父母； chit-chūn ê阿爸，阿母好，i就好，好好好！bē lô-so。 「爸.一頭，母.三擔」，講去無têng-tâⁿ， 生囝、飼囝、chhiâⁿ囝，lóng是靠父母， 阿爸是山，hō͘阮倚靠， 阿母ê疼，阿母ê惜，âⁿ阮大漢，是心靈ê水泉， 偉大ê母親，永遠是阮阿娘。

【註解】： 1.爸.一頭，母.三擔：一擔分兩頭，三擔是一頭ê六倍。 2.thiám-kah嘴á裂鰓鰓：雖然生囝艱苦，但是心內歡喜。 3.幼chíⁿ：幼嫩。 4.àⁿ-tī keh-lang-kha：[在胳肢窩下呵護]。 5.溢奶：ek-leng。 6.洗浴：sé-e̍k。 7.chhāi-tiàm：[站在]。 8.iah-beh：[又要，也要]。 9.厭：ià，討厭，厭倦。 10.心適：sim-sek,趣味。 11.那leh行灶腳：[像出入廚房那樣，時常。] 12.tòe人be7tioh8：[跟不上別人]。 13.tńg大：進入青春期。 14.ta̍p-tih：lô-so代誌。 15.tio̍h-ài thōa：需要學習。 16.tīm補：煮補品。 17.裝súi：[打扮]。 18.M.C：月經（menstrualcycle）。 19.奶裌á：leng-kah-á，[乳罩]。 20.添衫：thiⁿ-saⁿ。 21.chhiâⁿ：養育栽培。 22.不sám時：隨時，常常。 23.無têng-tâⁿ：無m7tioh8。 24.âⁿ：[呵護]。 25.出業：似為日語「卒業」之轉；畢業也。