《老人kah海》

 | | | 轉寄

《老人kah海》_30, Saⁿ sì kang lāi beh piànthiⁿ ā三四工內beh變天ā

作者 Ernest Hemingway, 台譯：宋麗瓊 林俊育 2019.11.10

I kóng, "Poeo͘hó͘ nā chú kòe chiah chia̍h, gōa hó leh, m̄ koh, chheⁿchia̍h si̍tchāi sī ū kàu pháiⁿ chia̍h. Āupái chhut hái, choa̍ttùi ài chah iâm á sī sng tèng."

I siūⁿ, góa nā ū thâunáu, ji̍tsî to̍h ē kui kang tī chûnthâu phoah chúi koh ho͘ i pha̍k ta, ánne góa to̍h ē ū iâm ā. M̄ koh, góa sī chhaputto itti̍t kàu ji̍t beh lo̍h hái ê sî chiah tiò tio̍h hit bóe poeo͘hó͘. Chóng ·sī, góa iáusī khiàm chúnpī, m̄ koh, góa ū kā i pō͘ chin nōa, jîchhiáⁿ bô kámkak péngpak.

Tang pêng ê thiⁿténg khaisí o͘hûn ba̍t pò͘, i bat ê thiⁿchheⁿ chi̍t lia̍p chi̍t lia̍p hoa ·khì. I chitmá khòaⁿ khí·lâi kahn á sī teh kiâⁿ ji̍p chi̍tê ke̍ktōa ê hûnkiapkok; hong khah sè à. I kóng,"saⁿ sìkang lāi beh piànthiⁿ ā; êngàm iáu bē, bîn'áchài mā bē. Lāulâng ah, thàn hî pêngchēng koh úntēng ê sî, chitmá kín chīnliōng sió khùn leh."

I ēng chiàⁿ chhiú kā hîsòaⁿ ni̍h ânân, ēng chiàⁿ pêng ê tōathúi khì tú tiâu chiàⁿ chhiú, koh kā kui sengkhu ê tāngliōng khò tī chûnthâu pang. Liáuāu, i kā kengkahthâu ê hîsòaⁿ sóa khah kē leh, koh ēng tò chhiú kā i thèⁿ.Leh.

I siūⁿ, chíiàu hîsòaⁿ ū tò chhiú thèⁿ.Leh, góa ê chiàⁿ chhiú to̍h ni̍h i ētiâu. Chiàⁿ chhiú nāsī tī khùnbîn tiong pàngsang, hō͘ hîsòaⁿ liu khì, góa ê tò chhiú to̍h ē kā góa kiò chhéⁿ. Chiàⁿ chhiú chin sinkhó͘, m̄ koh, i chia̍h khó͘ koànsì à. Góa nā ētàng khùn jīcha̍p pun á sī pòaⁿtiámcheng mā bē bái. I phak leh, kui sengkhu kā hîsòaⁿ gia̍p leh, kā i só͘ū ê tāngliōng lóng ah tī chiàⁿ chhiú, chiū ánne khùnkhì.

I bô bāngkìⁿ saiá, khiok sī bāngkìⁿ chi̍t tōatīn ê háitiá （porpoise）, liân mî puttoān, tī hái nih iânsin 1316 konglí. Che sī in kau phòe ê sîchūn, in ē koânkoân thiàu ji̍p khongtiong, chiah koh thiàu tńgkhì in thiàuchhut lâi ê kāng chi̍tê chúi tōng.

Sòa lo̍hlâi, i koh bāngkìⁿ i tī chng ni̍h, tó tī i ê bînchhn̂g téng, pakhong chin thàu, i kámkak chin kôaⁿ, jîchhiáⁿ i ê chiàⁿ chhiú lóng môa khì, inūi i ēng chhiú chò chímthâu.

Liáuāu, i khaisí bāng kiàntiông tn̂g ê n̂gsek soapo͘, koh khòaⁿ tio̍h tē chi̍t chiah saiá tī thiⁿ chho͘ àm ê sî lâi kàu hia, āu ·lâi kîtha ê saiá mā lâi ā. Chûn tī hia pha tiàⁿ, i kā i ê ēhoâi khò tī chûnthâu pang,, tī tùi hōaⁿténg chhoe hiòng háṳûⁿ ê àmsî hong tiong, i teh tán khòaⁿ sī m̄ sī iáu ū koh khah chē saiá ē lâi, simlāi kámkak huisiông hoaⁿhí. Goe̍hniû íkeng chá to̍h chhutlâi, m̄ koh i iáu teh khùn. Hî kèsio̍k únún á teh thoa, kā sió chûn thoa ji̍p hûn tiong ê pōngkhang.

I chiàⁿ chhiú ê kûnthâubú hutjiân khì lòng tio̍h i ê bīn, hō͘ i chhéⁿ khí lâi, jîchhiáⁿ hîsòaⁿ tùi chiàⁿ chhiú itti̍t liu chhutkhì, chhiú ná chhiūⁿ hō͘ hóe sioto̍h hiahni̍h chhìthiàⁿ. I ê tò chhiú lóng bô kámkak, só͘í i ēng chiàⁿ chhiú piàⁿmiā chó͘tòng, m̄ koh hîsòaⁿ iáusī itti̍t liu bô thêng. Āu ·lâi, tò chhiú mā giú tio̍h hîsòaⁿ à, i sengkhu tò hiaⁿh kiong hîsòaⁿ, só͘í chitmá i ê khachiahphiaⁿ kah tò chhiú mā ná hóe teh sio; iûkî sī sêngsiū itchhè giú la̍t ê tò chhiú, hō͘ hîsòaⁿ koah kah chin līhāi. I oa̍t thâu khòaⁿ hîsòaⁿ khún, in sūnsūn á teh liu chhutkhì. Hit sî, háṳûⁿ piak li̍h, hî thiàuchhut chúibīn, koh tāngtāng siak lo̍hkhì. Liáuāu, i chi̍t pái koh chi̍t pái thiàuchhut chúibīn, suijiân hîsòaⁿ itti̍t khoàisok liu chhutkhì, m̄ koh sió chûn iáusī hō͘ i thoa kah kiâⁿ chin kín; lāulâng mā sī chi̍t pái koh chi̍t pái, itti̍t kā hîsòaⁿ giú kah kiōngbeh tn̄g khì. I íkeng khì ho͘ hî giú tó tī chûnthâu, bīn ah tī hit phìⁿ poeo͘hó͘ bah téngbīn, oânchoân bô hoattō͘ tíntāng.


伊講：「飛烏虎若煮過chiah食，gōa好leh，m̄ koh，生食實在是有夠pháiⁿ食。後pái出海，絕對ài chah鹽á是酸橙。」

伊想：我若有頭腦，日時to̍h ē kui工tī船頭潑水koh ho͘ 它pha̍k ta，ánne我to̍h ē有鹽ā。M̄ koh，我是差不多一直到日beh落海ê時chiah釣tio̍h hit尾飛烏虎。總是，我iáu是欠準備，m̄ koh，我有kā它pō͘ 真爛，而且無感覺péng腹。

東pêng ê天頂開始烏雲密布，伊bat ê天星一粒一粒hoa去。伊chitmá看起來kahná是teh行入一个極大ê雲峽谷；風khah細à。 伊講：「三四工內beh變天ā；êng暗iáu bē，明á載mā bē。老人ah，趁魚平靜koh穩定ê時，chitmá緊盡量小睏leh。」

伊用正手kā魚線ni̍h ânân，用正pêng ê大腿去抵tiâu正手，koh kā kui身軀ê重量靠tī船頭枋。了後，伊kā肩胛頭ê魚線徙khah kē leh，koh用倒手kā它thèⁿ.leh。

伊想：只要魚線有倒手thèⁿ.leh，我ê正手to̍h ni̍h它ētiâu。正手若是tī睏眠中放鬆，hō͘ 魚線溜去，我ê倒手to̍h ē kā我叫醒。正手真辛苦，m̄ koh，伊食苦慣勢à。我若ētàng睏二十分á是半點鐘mā bē bái。伊仆leh，kui身軀kā魚線夾leh，kā伊所有ê重量lóng押tī正手，就ánne睏去。

伊無夢見獅á，卻是夢見一大陣ê海豬á（porpoise），連綿不斷，tī海裡延伸1316公里。這是in交配ê時chūn，in ē koânkoân跳入空中，chiah koh跳tńg去in跳出來ê仝一個水洞。

續落來，伊koh夢見伊tī庄裡，倒tī伊ê眠床頂，北風真透，伊感覺真寒，而且伊ê正手lóng麻去，因為伊用手做枕頭。

了後，伊開始夢見長長ê黃色沙埔，koh看tio̍h第一隻獅á tī天初暗ê時來到hia，後來其他ê獅á mā來ā。船tī hia拋碇，伊kā伊ê下頦靠tī船頭枋，，tī tùi岸頂吹向海洋ê暗時風中，伊teh等看是m̄是iáu有koh khah chē獅á ē來，心內感覺非常歡喜。 月娘已經早to̍h出來，m̄ koh伊iáu teh睏。魚繼續穩穩á teh拖，kā小船拖入雲中ê pōng孔。

伊正手ê拳頭母忽然去lòng tio̍h伊ê面，hō͘ 伊醒起來，而且魚線tùi正手一直溜出去，手ná像hō͘ 火燒tio̍h hiahni̍h刺痛。伊ê倒手lóng無感覺，所以伊用正手拚命阻擋，m̄ koh魚線iáu是一直溜無停。後來，倒手mā giú tio̍h魚線à，伊身軀倒hiaⁿh弓魚線，所以chitmá伊ê kha脊phiaⁿ kah倒手mā ná火teh燒；尤其是承受一切giú力ê倒手，hō͘ 魚線割kah真厲害。伊oa̍t頭看魚線綑，in順順á teh溜出去。Hit時，海洋piak裂，魚跳出水面，koh重重siak落去。了後，牠一pái koh一pái跳出水面，雖然魚線一直快速溜出去，m̄ koh小船iáu是hō͘ 牠拖kah行真緊；老人mā是一pái koh一pái，一直kā魚線giú kah kiōngbeh斷去。伊已經去ho͘ 魚giú倒tī船頭，面押tī hit片飛烏虎肉頂面，完全無法度振動。