《巴克禮普世版聖經(試讀本)》

| | | 轉寄

巴克禮普世版(試讀本) 哥林多前書第三章

3 Siōng-Chú ê Tâng-kang Hiaⁿ-tī chí-mōe ah, góa chêng kah lín kóng-ōe, bē-tàng kā lín tòng-chò lêng-sèng ê lâng, sī tòng-chò sio̍k-sè ê lâng, tùi Ki-tok ê sìn-gióng lâi khòaⁿ sī kah-ná eⁿ-á. 2 Góa ēng leng kā lín chhī, bô ēng pn̄g, in-ūi lín iáu bē-tàng chia̍h pn̄g. Kàu chit-má iáu sī án-ne. 3 In-ūi lín iáu-koh sio̍k-sè ê lâng. Lín tiong-kan ū chi̍t-tò͘, ū hun-cheng, án-ne kám m̄-sī chèng-bêng lín sī sio̍k-sè, chiàu sè-kan-lâng ê khoán-sit teh seng-oa̍h? 4 Lín tiong-kan ū-lâng kóng, "Góa sio̍k Pó-lô", mā ū-lâng kóng, "Góa sio̍k A-pho-lô", án-ne lín kám m̄-sī kah sè-kan-lâng kāng-khoán? 5 A-pho-lô sǹg siàⁿ? Pó-lô sǹg siáⁿ? Goán put-kò sī Chú ê chhe-ēng, ín-chhōa lín sìn Chú, chiàu Chú só͘ hō͘ goán ê chit-hūn teh chò. 6 Góa iā-chéng, A-pho-lô ak-chúi, m̄-koh sī Siōng-Chú hō͘ i tōa-châng. 7 Iā-chéng ê kah ak-chúi ê lóng bô tiōng-iàu, hō͘ i tōa-châng ê Siōng-Chú chiah tiōng-iàu. 8 Iā-chéng ê kah ak-chúi ê lóng kāng-khoán, Siōng-Chú ē chiàu ta̍k-lâng ê kang-chok kā in pò-siúⁿ. 9 In-ūi goán sī Siōng-Chú ê tâng-kang, lín sī Siōng-Chú ê chhân-hn̂g, mā sī Siōng-Chú ê kiàn-tio̍k-bu̍t. 10 Chiàu Siōng-Chú siúⁿ-sù hō͘ góa ê un-tián, góa chhin-chhiūⁿ chi̍t-ê láu-liān ê sai-hū-thâu, góa hē tē-ki, pa̍t-lâng tī hit téng-bīn khí-chhù, m̄-koh ta̍k-lâng tio̍h chù-ì khòaⁿ ka-kī án-chóaⁿ teh khí-chō. 11 In-ūi Siōng-Chú í-keng hē Iâ-so͘ Ki-tok chò î-it ê tē-ki, í-gōa bô pa̍t-ê tē-ki. 12 Tī chit-ê tē-ki téng-bīn, lâng nā ēng kim, gîn, pó-chio̍h, chhâ, chháu, á-sī tiū-kó lâi khí-chō. 13 Ta̍k-lâng ê kang-hu khí-liáu hó-bái, tī Ki-tok chài-lîm ê ji̍t-chí, ē hō͘ hóe kā i hián-hiān chhut-lâi, in-ūi hóe ē chhì-giām chhut ta̍k-lâng ê kang-hu sī sím-mi̍h khoán. 14 Lâng só͘ khí-chō ê kang-thêng nā bô hō͘ hóe sio-khì, chiū ē tit-tio̍h pò-siúⁿ. 15 Lâng só͘ khí-chō ê kang-thêng nā hō͘ hóe sio-khì, chiū bē tit-tio̍h pò-siúⁿ, m̄-koh i pún-sin ē tit-tio̍h kiù, ná chhin-chhiūⁿ tùi hóe-tiong tô-miā chhut-lâi. 16 Lín kám m̄-chai lín sī Siōng-Chú ê tiān, Siōng-Chú ê Sèng-Sîn tiàm-tī lín lāi-bīn? 17 Lâng nā húi-hoāi Siōng-Chú ê tiān, Siōng-Chú ē kā i húi-bia̍t, in-ūi Siōng-Chú ê tiān sī sîn-sèng, lín chiū-sī hit-ê tiān. 18 Lín m̄-thang khi-phiàn ka-kī. Lín tiong-kan nā ū-lâng ēng sè-kan ê phiau-chún kā ka-kī khòaⁿ-chò ū tì-hūi, i tian-tò tio̍h chò gû-gōng ê lâng chiah ē-tàng chiâⁿ-chò chin-chiàⁿ ū tì-hūi. 19 In-ūi chit sè-kan ê tì-hūi chiàu Siōng-Chú khòaⁿ khí-lâi sī gû-gōng, in-ūi Sèng-keng ū kì-chài: Hō͘ tì-hūi ê lâng tiòng-tio̍h in ka-kī ê khúi-kè.( chù: IPK 5:13) 20 Sèng-keng pa̍t-ê só͘-chāi koh kóng: Chú chai ū tì-hūi ê lâng ê sim-su bô-lō͘-ēng.( chù: SPh 94:11) 21 Só͘-í m̄-thang khoa-kháu lâng ē-tàng chò ê tāi-chì, in-ūi bān-bu̍t lóng sī lín-.ê. 22 Bô-lūn Pó-lô, A-pho-lô á-sī Pí-tek, bô-lūn chit sè-kài sī oa̍h-teh á-sī sí-bông, hiān-kim á-sī chiong-lâi, che it-chhè lóng sī lín-.ê. 23 Lín sī Ki-tok-.ê, Ki-tok sī Siōng-Chú-.ê.