《巴克禮普世版聖經(試讀本)》

| | | 轉寄

巴克禮普世版(試讀本) 哥林多前書第四章

Ki-tok ê Sù-tô͘
1 Lín tio̍h kā goán khòaⁿ-chò sī Ki-tok ê chhe-ēng, chò Siōng-Chú ò-biāu chin-lí ê koán-ke. 2 Tùi koán-ke ê iau-kiû sī tùi chú-lâng tio̍h chīn-tiong. 3 Góa hō͘ lín á-sī pa̍t-lâng phoe-phêng, lóng khòaⁿ-chò sī sió-khóa tāi-chì, liân góa mā bô phoe-phêng ka-kī. 4 Góa lóng m̄-bat chek-pī ka-kī, m̄-koh m̄-sī án-ne chiū chèng-bêng góa bô chōe, in-ūi kā góa sím-phòaⁿ ê sī Chú. 5 Só͘-í sî-ki iáu-bōe kàu, lín m̄-thang phoe-phêng lâng, tán-kàu Chú chài-lîm ê sî, I ē ēng kng chiò o͘-àm ún-ba̍t ê pì-bi̍t, kā ún-chông tī sim-lāi ê kè-bô͘ hián-lō͘ chhut-lâi. Hit sî, ta̍k-lâng ē tùi Siōng-Chú tit-tio̍h I ê o-ló. 6 Hiaⁿ-tī chí-mōe ah, ūi-tio̍h lín góa chiah ēng pún-sin kah A-pho-lô chò-lē lâi kóng-khí chiah-ê tāi-chì, hō͘ lín thang tùi goán lâi ha̍k-si̍p "M̄-thang chhiau-kòe Sèng-keng só͘ kì-chài" chit-kù ōe ê ì-sù. Lín tiong-kan bô-lūn sím-mi̍h lâng to m̄-thang kiau-ngō͘, chun-tiōng chit-ê, khòaⁿ-khin hit-ê. 7 Sím-mi̍h lâng hō͘ lí siūⁿ-kóng lí pí pa̍t-lâng khah-gâu? Lí só͘ ū ê kám m̄-sī lóng tùi Siōng-Chú niá-siū-.ê? M̄-koh lí ná-ē khoa-kháu, ná chhin-chhiūⁿ m̄-sī tùi Siōng-Chú niá-siū-.ê? 8 Lín í-keng ta̍k-hāng lóng ū, í-keng hó-gia̍h, lín í-keng pàng-sak goán khì chò ông. Góa chin-chiàⁿ ài lín chò ông, hō͘ goán mā thang kah lín chò-hóe chò ông. 9 Góa teh siūⁿ, Siōng-Chú chiong goán chiah-ê sù-tô͘ pâi tī bé-liu, chhin-chhiūⁿ sí-hêng-hoān hō͘ lâng thoa chhut-lâi, hō͘ sè-kan, thiⁿ-sài kah lâng khòaⁿ chit-chhut hì. 10 Goán ūi-tio̍h Ki-tok ê iân-kò͘ chò gōng-lâng, lín kah Ki-tok kiat-liân chò khiáu-lâng. Goán loán-jio̍k, lín ióng-chòng; lín siū chun-tiōng, goán hō͘ lâng khin-sī. 11 Kàu chit sî, goán iáu-koh teh iau, chhùi-ta, thǹg-pak-theh, hō͘ lâng phah, sì-kè teh liû-lōng. 12 Goán khò siang-chhiú thoa-bôa tō͘ ji̍t-chí. Goán hông mē tian-tò kā in chiok-hok; siū lâng pek-hāi, goán jím-nāi. 13 Goán siū húi-pòng iáu-koh hó-chhùi ìn-tap. Taⁿ goán kèng-jiân hō͘ lâng khòaⁿ-chò sī sè-kan ê pùn-sò, bān-bu̍t ê pùn-sò-tui. 14 Góa siá chiah-ê m̄-sī beh hō͘ lín kiàn-siàu, sī kā lín khòaⁿ-chò góa só͘ thiàⁿ ê kiáⁿ-jî teh kā lín kà-sī. 15 Lín kah Ki-tok kiat-liân, lāu-su sui-jiân ū kui-bān-ê, m̄-koh lāu-pē kan-taⁿ chi̍t-ê. Góa bat thong-kòe hok-im tī Ki-tok Iâ-so͘ ê thiàⁿ ê lāi-bīn chiâⁿ-chò lín ê lāu-pē. 16 Só͘-í góa khǹg lín tio̍h o̍h góa. 17 In-ūi án-ne, góa chhe-phài Thê-mô͘-thài khì lín hia. Tī Chú ê lāi-bīn, i sī góa só͘ thiàⁿ koh chīn-tiong ê kiáⁿ, i ē chiong góa kah Ki-tok kiat-liân ê bô͘-hoān, chiū-sī góa tī ta̍k só͘-chāi, tī ta̍k kàu-hōe só͘ kà-sī ê tāi-chì, kóng hō͘ lín chai. 18 Ū-lâng siūⁿ-kóng góa bē khì lín hia, chiū kiau-ngō͘ chū-tāi. 19 M̄-koh Chú nā ín-chún, góa liâm-piⁿ to̍h ē khì lín hia. Hit sî, góa to̍h ē chai hiah-ê kiau-ngō͘ chū-tāi ê lâng teh kóng sím-mi̍h ōe, mā ē chai in ē-tàng chò sím-mi̍h. 20 In-ūi Siōng-Chú ê Kok-tō͘ m̄-sī khò kóng-ōe, sī khò koân-lêng. 21 Lín ài tó chi̍t-hāng? Góa khì lín hia ê sî, lín ài góa gia̍h chhôe-á khì á-sī tòa thiàⁿ-sim kah un-jiû ê sim khì?