《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第五章

作者 巴克禮普世版小組 2015.02.01

Kàu-hōe Tiong Ū Îm-loān
1 Góa khak-si̍t thiaⁿ-tio̍h lín tiong-kan ū îm-loān ê tāi-chì, hit-khoán ê îm-loān liân kàu-hōe-gōa mā bô, chiū-sī ū-lâng siu-liû āu-bú chò bó͘. 2 Lín ná-ē iáu-teh kiau-ngō͘ chū-tāi? kèng-jiân bô kám-kak ai-siong, chiong chò chit-chióng tāi-chì ê lâng tùi lín tiong-kan kóaⁿ chhut-khì! 3 Góa lâng sui-jiân bô tī lín hia, sim khiok kah lín chò-hóe. Góa í-keng hōng Chú Iâ-so͘ ê miâ kā hoān chit-chióng chōe ê lâng phòaⁿ-chōe. 4 Chiū-sī lín chū-hōe ê sî, góa ê sim-lêng kah lín chò-hóe, khò lán ê Chú Iâ-so͘ ê koân-lêng, 5 chiong hit-chióng lâng ê seng-khu kau hō͘ Sat-tàn khì húi-hoāi i ê jio̍k-thé, thang hō͘ i ê lêng-hûn tī lán ê Chú Iâ-so͘ chài-lîm ê ji̍t-chí tit-kiù. 6 Lín ê khoa-kháu chin m̄-hó. Lín kám m̄-chai tām-po̍h-á kàⁿ-bó ē kā kui-sn̂g ê mī-hún-chhè hoat khí-lâi? 7 Kū ê kàⁿ tio̍h tû hō͘ chheng-khì, hō͘ lín chiâⁿ-chò sin ê mī-hún-chhè, kî-si̍t lín sī bô kàⁿ ê chhè, in-ūi lán Pôaⁿ-kòe-cheh ê iûⁿ-ko, Ki-tok í-keng ūi lán hi-seng ā. 8 Só͘-í lán m̄-thang ēng pháiⁿ-sim ok-to̍k ê kū kàⁿ-bó, tio̍h ēng sûn-choân chin-si̍t ê bô-kàⁿ-piáⁿ chò chè-mi̍h lâi siú-cheh. 9 Chêng góa kià hit-tiuⁿ phoe hō͘ lín, ū kā lín kéng-kài m̄-thang kah îm-loān ê lâng lâi-óng. 10 Góa m̄-sī teh chí sè-kan hiah-ê îm-loān, tham-sim, chà-khi, á-sī pài ngó͘-siōng ê lâng. Nā sī án-ne, lín soah tio̍h lī-khui sè-kan chiah ū khó-lêng. 11 M̄-koh taⁿ góa siá chit-tiuⁿ phoe hō͘ lín sī kóng, m̄-thang kah hiah-ê chū-chheng Ki-tok-tô͘ khiok sī îm-loān, tham-sim, pài ngó͘-siōng, húi-pòng, hò͘ⁿ-chiú, chà-khi ê lâng lâi-óng. Liân kah chit-chióng lâng kāng-toh chia̍h-pn̄g mā m̄-thang. 12 In-ūi phoe-phòaⁿ kàu-hōe-gōa ê lâng m̄-sī góa ê tāi-chì, Siōng-Chú ē kā in sím-phòaⁿ. 13 Lín kám m̄-sī tio̍h phoe-phòaⁿ kàu-hōe-lāi ê lâng? Sèng-keng ū kì-chài: Lín tio̍h kā siâ-ok ê lâng tùi lín tiong-kan kóaⁿ chhut-khì.( chù: SBK 17:7; 19:19; 22:21, 24; 24:7)