《巴克禮普世版聖經(試讀本)》

| | | 轉寄

巴克禮普世版(試讀本) 腓立比書第三章

Chin-chiàⁿ ê Kong-gī
1 Góa ê hiaⁿ-tī chí-mōe ah, kiat-bóe lâi kóng, lín tio̍h khò Chú lâi hoaⁿ-hí. Góa koh siá chiah-ê ōe hō͘ lín, tùi góa lâi kóng bē hùi-khì, tùi lín khiok ū pang-chō͘. 2 Tio̍h chù-ì hit-tīn káu-tóng, thê-hông hiah-ê pháiⁿ-lâng, liû-sim hiah-ê kian-chhî kat-lé ê lâng. 3 Kî-si̍t lán chiah sī chin-chiàⁿ siū kat-lé ê lâng. Lán thong-kòe Sèng-Sîn lâi kèng-pài Siōng-Chú, khoa-kháu kah Ki-tok Iâ-so͘ kiat-liân, bô óa-khò gōa-piáu ê lé-gî. 4 Nā kóng beh óa-khò lé-gî, góa mā ē. Nā ū-lâng siūⁿ-kóng ē-tàng óa-khò lé-gî, góa koh-khah ē-tàng. 5 Góa chhut-sì tē-peh ji̍t to̍h siū kat-lé, sī Í-sek-lia̍t-lâng, sio̍k Piān-ngá-bín chi-cho̍k, sī sûn-chhùi ê Hi-pek-lâi-lâng. Chiàu lu̍t-hoat lâi kóng, góa sī Hoat-lī-sài-phài ê lâng. 6 Góa in-ūi kòe-thâu jia̍t-sim soah chiâⁿ-chò pek-hāi kàu-hōe ê lâng. Nā kóng chun-siú Mô͘-se lu̍t-hoat chiū ē-tàng hō͘ lâng kiò-chò gī-lâng, góa lóng bô thang chí-chek ê só͘-chāi. 7 M̄-koh í-chêng tùi góa ū lī-ek ê, chit-má in-ūi Ki-tok ê iân-kò͘, góa kā i khòaⁿ-chò sī sún-sit. 8 M̄-nā án-ne, góa chin-chiàⁿ kā bān-sū lóng khòaⁿ-chò bô lī-ek, in-ūi góa kā bat góa ê Chú Ki-tok Iâ-so͘ khòaⁿ-chò siōng pó-pòe. Góa ūi-tio̍h I pàng-sak it-chhè, kā hiah-ê lóng khòaⁿ-chò pùn-sò, sī ài beh tit-tio̍h Ki-tok, 9 lâi kah Ki-tok oân-choân kiat-liân, m̄-sī ka-kī khò lu̍t-hoat lâi tit-tio̍h gī. Góa chit-má ū ê gī sī tùi sìn-khò Ki-tok ê gī, sī Siōng-Chú ūi-tio̍h góa ê sìn só͘ siúⁿ-sù-.ê. 10 Góa só͘ ì-ài ê sī jīn-bat Ki-tok koh thé-giām I koh-oa̍h ê koân-lêng, kah I chò-hóe siū-khó͘, keng-giām I ê sí, 11 ǹg-bāng ka-kī mā ē-tàng tùi sí koh-oa̍h.

Ǹg Bo̍k-phiau Ti̍t-cháu
12 Án-ne m̄-sī kóng góa í-keng sêng-kong, á-sī í-keng oân-choân. Góa kè-sio̍k hiòng-chêng cháu, khòaⁿ ē-tàng tit-tio̍h siúⁿ á-bē. Kî-si̍t Ki-tok Iâ-so͘ í-keng tit-tio̍h góa. 13 Hiaⁿ-tī chí-mōe ah, góa bô siūⁿ-kóng ka-kī í-keng tit-tio̍h siúⁿ, chí-ū choan-sim chi̍t hāng, chiū-sī bē kì-tit āu-bīn ê tāi-chì, tì-ì thâu-chêng ê tāi-chì, 14 ǹg bo̍k-phiau ti̍t-ti̍t cháu, kàu tit-tio̍h ûi-chí. Chiū-sī Siōng-Chú thong-kòe Ki-tok Iâ-so͘ tiàu góa khì niá-siū hit-ê tùi téng-bīn lâi ê oa̍h-miā. 15 Só͘-í lán tiong-kan lêng-sèng sêng-se̍k ê lâng tio̍h ū kāng-khoán ê sim-chì. Lín tiong-kan nā ū bô kāng-khoán ê sim-chì, Siōng-Chú mā ē ēng chit-ê tāi-chì kā lín khé-sī. 16 Bô-lūn jû-hô, lán tio̍h chiàu í-keng kiâⁿ-kòe ê lō͘-sòaⁿ kè-sio̍k kiâⁿ. 17 Hiaⁿ-tī chí-mōe ah, lín tio̍h o̍h góa. Goán í-keng ū chò hó bô͘-hoān hō͘ lín. Lín tio̍h ha̍k-si̍p hiah-ê chiàu chit-ê bô͘-hoān teh kiâⁿ ê lâng. 18 Góa í-keng kā lín kóng chin-chē pái, taⁿ góa koh lâu ba̍k-sái kā lín khó͘-khǹg, ū chin-chē lâng ê hêng-ûi chiâⁿ-chò Ki-tok si̍p-jī-kè ê tùi-te̍k. 19 In ê kiat-kio̍k sī tîm-lûn, in kā in ê pak-tó͘ tòng-chò sîn-bêng, in kā kiàn-siàu khòaⁿ-chò sī êng-kng, in kan-taⁿ tì-ì tē-chiūⁿ ê tāi-chì. 20 M̄-koh lán sī thian-kok ê kok-bîn, mā teh ǹg-bāng Kiù-sè-chú tùi hia lâi, chiū-sī Chú Iâ-so͘ Ki-tok. 21 I ē ēng hō͘ bān-bu̍t khut-ho̍k ê koân-lêng lâi kái-piàn lán pi-chiān ê jio̍k-thé, hō͘ lán chiâⁿ-chò kah I kāng-khoán êng-iāu ê thé.