《巴克禮普世版聖經(試讀本)》

| | | 轉寄

巴克禮普世版(試讀本) 腓立比書第四章

Pó-lô ê Khoàn-bián
1 Só͘-í góa só͘ thiàⁿ só͘ siàu-liām ê hiaⁿ-tī chí-mōe, lín sī góa ê hoaⁿ-hí, góa ê êng-kng, tio̍h óa-khò Chú khiā-chāi. 2 Góa khó͘-khǹg Iú-o-tia kah Sûn-to͘-ki nn̄g-ūi chí-mōe, lín tī Chú ê lāi-bīn tio̍h tâng-sim. 3 Tiong-si̍t ê tâng-phōaⁿ ah, góa mā kiû lí pang-chō͘ chit nn̄g-ê chí-mōe, in-ūi in tī hok-im ê kang-chok siōng, bat kah Kek-lī-bián í-ki̍p kî-tha ê tâng-kang, kah góa chò-hóe chhut-la̍t, in ê miâ í-keng kì-chài tī Siōng-Chú ê oa̍h-miā-chheh. 4 Tio̍h siông-siông kah Chú kiat-liân lâi hoaⁿ-hí. Góa koh kóng chi̍t-pái, tio̍h hoaⁿ-hí! 5 Tio̍h hō͘ chèng-lâng khòaⁿ-chhut lín ê sûn-liông. Chú teh-beh chài-lîm ā. 6 Lóng m̄-thang chhau-hoân sím-mi̍h, bān-sū tio̍h ēng kám-siā ê sim kî-tó lâi khún-kiû, chiong lín só͘ kiû ê hō͘ Siōng-Chú chai. 7 Án-ne, lâng só͘ liāu-sióng bē-kàu ê Siōng-Chú ê pêng-an, ē thong-kòe Ki-tok Iâ-so͘ lâi pó-siú lín ê sim-su ì-liām. 8 Hiaⁿ-tī chí-mōe ah, chóng-kóng chi̍t-kù, hiah-ê chin-si̍t ê, khó-kèng ê, kong-gī ê, chheng-kiat ê, thang thiàⁿ ê, hó miâ-siaⁿ ê, hó tek-hēng ê, thang o-ló ê, lín lóng tio̍h sî-sî khek-khek tì-ì tī sim-lāi. 9 Lín tùi góa só͘ ha̍k-si̍p, só͘ niá-siū, só͘ thiaⁿ-tio̍h, só͘ khòaⁿ-tio̍h-.ê, lóng tio̍h kè-sio̍k lâi si̍t-hiān. Siúⁿ-sù pêng-an ê Siōng-Chú chiū kah lín tông-chāi.

Kám-siā ê Ōe
10 Góa tī Chú ê lāi-bīn tōa-tōa hoaⁿ-hí, in-ūi lín siàu-liām góa ê sim-chì taⁿ ū koh puh-íⁿ. Kî-si̍t lín ū teh siàu-liām góa, m̄-koh lín bô ki-hōe thang piáu-sī. 11 Án-ne m̄-sī kóng góa bô kàu-ēng, in-ūi góa í-keng ha̍k-si̍p ē-hiáu, bô-lūn sím-mi̍h kéng-gū lóng ti-chiok. 12 Góa chai-iáⁿ án-chóaⁿ kòe pi-chiān ê seng-oa̍h, mā chai-iáⁿ án-chóaⁿ kòe hù-jū ê seng-oa̍h. Bô-lūn sī pá á-sī iau, sī hù-jū á-sī khiàm-khoeh, góa ê pì-koat chiū-sī ta̍k-hāng ti-chiok. 13 Góa óa-khò siúⁿ-sù góa khùi-la̍t ê Ki-tok, góa ū khùi-la̍t thang èng-hù kok-chióng kéng-gū. 14 M̄-koh lín ū lâi hun-tam góa ê khùn-kéng, án-ne si̍t-chāi chin hó. 15 Hui-li̍p-pí-lâng ah, lín ka-kī mā lóng chai, tī góa thoân hok-im ê khí-thâu, góa lī-khui Má-kî-tùn ê sî, kan-taⁿ lín ê kàu-hōe ū chi-oân góa ê seng-oa̍h hùi-iōng. 16 Liân góa tī Thiap-sat-lô-nî-ka ê sî, lín mā kúi-nā pái chhe lâng lâi kiong-kip góa ê su-iàu. 17 M̄-sī góa teh kiû lâng sàng mi̍h-kiāⁿ, sī teh kiû lín kiat khah-chē kóe-chí lâi kì lo̍h-khì lín tī thiⁿ-téng ê siàu-phō͘. 18 Lín hō͘ góa ê mi̍h í-keng kàu-gia̍h koh ū chhun. Góa ū tùi Í-pa-hut-thê siu-tio̍h lín kià-lâi ê mi̍h, chhin-chhiūⁿ hoat-chhut phang-phang ê bī, chiâⁿ-chò Siōng-Chú só͘ hoaⁿ-hí ê chè-mi̍h. 19 Góa ê Siōng-Chú ē chiàu I êng-iāu ê hong-hù, thong-kòe Ki-tok Iâ-so͘ lâi pó͘-chiok lín it-chhè ê su-iàu. 20 Goān êng-iāu kui tī lán ê Siōng-Chú lán ê Thiⁿ-Pē, kàu tāi-tāi bô-chīn. Amen.

Chòe-āu ê Chhéng-an
21 Chhiáⁿ thè góa kā sio̍k Ki-tok Iâ-so͘ só͘-ū ê sìn-tô͘ chhéng-an. Kah góa tī-chia ê hiaⁿ-tī chí-mōe mā beh kā lín chhéng-an. 22 Tī chia só͘-ū ê sìn-tô͘, te̍k-pia̍t sī Lô-má hông-kiong lāi ê sìn-tô͘, lóng beh kā lín chhéng-an. 23 Goān Chú Iâ-so͘ Ki-tok ê un-tián kah lín tông-chāi!