《巴克禮普世版聖經(試讀本)》

| | | 轉寄

巴克禮普世版(試讀本) 路加福音第十二章

Kéng-kài Ké-hó ê Lâng (Mt 10:26-27)
1 Hit sî kúi-nā bān lâng chū-chi̍p óa-lâi, tì-kàu hō͘-siōng thún-ta̍h, Iâ-so͘ chiū tùi bûn-tô͘ kóng, " Lín tio̍h tî-hông Hoat-lī-sài-phài ê lâng ê kàⁿ, chiū-sī ké-hó." 2 Bô chi̍t-hāng khàm-ba̍t ê tāi-chì bē lō͘-hiān, múi chi̍t-hāng pì-bi̍t ê tāi-chì kàu-sî mā lóng ē hō͘ lâng chai-iáⁿ. 3 Só͘-í lín tī o͘-àm tiong só͘ kóng ê, ē tī kng-bêng tiong hō͘ lâng thiaⁿ-tio̍h; lín tī pâng-keng lāi hīⁿ-khang-piⁿ só͘ kóng ê, ē hō͘ lâng tī chhù-bóe-téng kong-khai soan-pò͘."

Tio̍h Kèng-ùi Siōng-Chú (Mt 10:28-31)
4 " Góa ê pêng-iú ah, Góa kā lín kóng, hāi-sí lín ê seng-khu liáu-āu bē-tàng koh tùi lín chò siáⁿ-mi̍h ê lâng, lín m̄-bián kiaⁿ. 5 Góa beh chí-sī lín tio̍h kèng-ùi siáⁿ-khoán lâng. Lín tio̍h kèng-ùi Siōng-Chú, I hō͘ lâng sí liáu-āu koh ū koân-pèng kā lâng hiat lo̍h-khì tē-ga̍k. Sī lah, Góa kā lín kóng, tio̍h kiaⁿ Hit-ūi! 6 " Gō͘ chiah chhek-chiáu-á kám m̄-sī bē nn̄g-kak gîn? tī Siōng-Chú ê bīn-chêng, liân chi̍t chiah to bô bē kì-tit. 7 Liân lín ê thâu-mn̂g to lóng ū sǹg kòe. M̄-bián kiaⁿ, lín pí hiah-ê chhek-chiáu-á koh-khah kùi-tiōng."

Kong-khai Sêng-jīn Ki-tok (Mt 10:32-33; 12:32; 10:19-20)
8 " Góa kā lín kóng, tī lâng ê bīn-chêng sêng-jīn Góa ê, Jîn-chú tī Siōng-Chú ê thiⁿ-sài bīn-chêng, mā ē kā i sêng-jīn. 9 M̄-koh tī lâng ê bīn-chêng bô sêng-jīn Góa ê, tī Siōng-Chú ê thiⁿ-sài bīn-chêng, mā bô beh kā i sêng-jīn." 10 " Lâng nā kóng-ōe kong-kek Jîn-chú ê, iáu ē tit-tio̍h sià-bián, m̄-koh nā sī siat-to̍k Sèng-Sîn ê, chiū bē tit-tio̍h sià-bián." 11 Lâng nā ah lín khì kàu hōe-tn̂g, á-sī thóng-tī-chiá kah koaⁿ-oân ê bīn-chêng, lín m̄-bián hoân-ló beh án-chóaⁿ piān-kái, á-sī tio̍h kóng siáⁿ-mi̍h. 12 In-ūi kàu sî Sèng-Sîn ē kà lín, tio̍h kóng siáⁿ-mi̍h ōe."

Gōng Châi-chú ê Phì-jū
13 Chèng-lâng tiong-kan ū chi̍t-ê châi-chú kā Iâ-so͘ kóng, " Lāu-su, chhiáⁿ Lí kiò góa ê hiaⁿ-tī kah góa pun ke-hóe." 14 M̄-koh Iâ-so͘ kā i kóng, " Lí chit-ê lâng, siáⁿ-lâng siat-li̍p Góa chò lín ê sím-phòaⁿ-koaⁿ, á-sī chò pun ke-hóe ê kong-chhin?" 15 Iâ-so͘ chiū tùi kûn-chiòng kóng, " Tio̍h kín-sīn, tio̍h iok-sok ka-kī, tio̍h tî-hông kok-chióng ê tham-sim, in-ūi lâng ê oa̍h-miā kè-ta̍t m̄ sī kài-chāi tī i só͘ chek-chū ê châi-sán." 16 Jiân-āu Iâ-so͘ ēng phì-jū tùi in kóng, " Ū chi̍t-ê hó-gia̍h-lâng, i ê chhân-hn̂g chin hong-siu. 17 I siūⁿ-lâi siūⁿ-khì kóng, ' Góa bô kàu só͘-chāi thang tún góa ê ngó͘-kok, taⁿ beh án-chóaⁿ?' 18 Koh kóng, ' Góa tio̍h án-ne chò, góa beh kā chhek-chhng thiah-tiāu koh khí khah tōa-keng, thang lâi kā góa ê ngó͘-kok kah châi-bu̍t lóng tún tòa hia. 19 Jiân-āu mā beh tùi góa ê lêng-hûn kóng, ' Lêng-hûn ah, lí ū chek-chū chin-chē châi-bu̍t, thang chò chin-chē nî ê lō͘-ēng. Taⁿ chheng-êng ā, lâi lim-chia̍h, lâi hióng-siū!' 20 M̄-koh Siōng-Chú kā i kóng, ' Gōng lâng ah, Kim-mê beh tùi lí thó lí ê sèⁿ-miā. Lí só͘ chek-chū ê châi-sán beh lâu hō͘ siáⁿ-lâng?' 21 Án-ne ūi-tio̍h ka-kī chek-chū châi-pó, bô hō͘ Siōng-Chú khòaⁿ-chò hó-gia̍h ê lâng, mā sī kāng-khoán."

Sìn-khò Siōng-Chú (Mt 6:25-34)
22 Koh tùi bûn-tô͘ kóng, " Só͘-í Góa kā lín kóng, m̄-thang ūi-tio̍h sèⁿ-miā chhau-hoân beh chia̍h siáⁿ-mi̍h, á-sī ūi-tio̍h lín ê seng-khu chhau-hoân beh chhēng siáⁿ-mi̍h. 23 In-ūi sèⁿ-miā pí chia̍h-mi̍h khah tiōng-iàu, seng-khu pí saⁿ-khò͘ khah kè-ta̍t. 24 Lín khòaⁿ o͘-a, in sui-jiân bô chèng-choh bô siu-sêng, mā bô chhng-khò͘ bô chhek-chhng, Siōng-Chú iáu-koh teh kā in ióng-chhī. Lín kám bô pí hiah-ê chiáu-á khah kùi-tiōng? 25 Lín kám ū-lâng siūⁿ-kóng, chhau-hoân ē-tàng hō͘ ka-kī ê sèⁿ-miā ke oa̍h chi̍t-sî-á kú? 26 Taⁿ lín kì-jiân liân chiah-ni̍h sè-hāng tāi-chì to bô hoat-tō͘ chò, ná-tio̍h chhau-hoân kî-tha ê tāi-chì? 27 Lín sió siūⁿ khòaⁿ māi lè, pek-ha̍p-hoe án-chóaⁿ teh tōa châng? In bô lô-khó͘ mā bô pháng-chit, m̄-koh Góa kā lín kóng, tng Só͘-lô-bûn siōng êng-hôa hù-kùi ê sî, i só͘ chhēng ê saⁿ to bô pí chiah-ê hoe ê chi̍t lúi khah súi. 28 Taⁿ soaⁿ-ni̍h ê chháu, kin-á-ji̍t teh oa̍h, bîn-á-chài to̍h hō͘ lâng hiat lo̍h-khì hóe-lô͘. Siōng-Chú iáu-koh án-ne teh kā in táⁿ-pān. Lín ná-ē chiah-ni̍h bô sìn-sim? 29 Só͘-í lín m̄-thang kan-tāⁿ teh siūⁿ-beh chia̍h siáⁿ-mi̍h beh lim siáⁿ-mi̍h, mā m̄-thang chhau-hoân. 30 In-ūi chiah-ê lóng sī chit sè-kan ê bī-sìn-chiá só͘ teh kiû ê. Lín ê Thiⁿ-Pē mā chai lín su-iàu chiah-ê mi̍h-kiāⁿ. 31 Tian-tó tio̍h tāi-seng tui-kiû Siōng-Chú Kok-tō͘, chiah-ê mi̍h-kiāⁿ ē sūn-sòa siúⁿ-sù hō͘ lín."

Thiⁿ-téng ê Châi-hù (Mt 6:19-21)
32 Lín chiah-ê sè-sè ê iûⁿ-kûn, m̄-bián kiaⁿ, in-ūi lín ê Thiⁿ-Pē hoaⁿ-hí kā I ê Kok-tō͘ hō͘ lín. 33 Tio̍h bē lín ê châi-sán lâi chín-chè sàn-chhiah-lâng. Tio̍h ūi lín ka-kī chún-pī bē phòa ê chîⁿ-tē-á, lâi chek-chū ēng bē liáu ê châi-pó tī thiⁿ-téng. Tī hia bô chha̍t-á ē lâi thau-the̍h, mā bē ū thâng chiù. 34 In-ūi lín ê châi-pó tī tó-ūi, lín ê sim mā ē khì tī hia."

Kín-sīn Thèng-hāu ê Lô͘-po̍k
35 Lín ê saⁿ tio̍h chhēng hó-sè, lín ê teng tio̍h tiám hō͘ to̍h. 36 Lín tio̍h chhin-chhiūⁿ lâng teh thèng-hāu in ê chú-lâng tùi hun-iàn tńg-lâi. Chú-lâng tńg kàu-ūi, chi̍t-ē phah mn̂g thang sûi-sî kā i khui. 37 Chú-lâng tńg-lâi khòaⁿ-tio̍h in chhéⁿ-chhéⁿ, hiah-ê lô͘-po̍k chin ū hok-khì. Góa si̍t-chāi kā lín kóng, chú-lâng ē ka-kī saⁿ chhēng hó-sè, hō͘ in chē toh, lâi kā in sū-hāu. 38 Kiám-chhái chú-lâng ē tī pòaⁿ-mê á-sī thiⁿ-phú-kng ê sî tńg-lâi, khòaⁿ-tio̍h in chhéⁿ-chhéⁿ, hiah-ê lô͘-po̍k chin ū hok-khì. 39 Chú-lâng nā chai chha̍t-á tang-sî-chūn ē lâi, i chiū tiuⁿ-tî, it-tēng bē hō͘ chha̍t-á ji̍p-lâi i ê chhù. Che sī lín chai-iáⁿ ê tāi-chì. 40 Só͘-í lín mā tio̍h chún-pī piān-piān, in-ūi Jîn-chú ē tī lín siūⁿ bē kàu ê sî-chūn lâi-lîm."

Tiong-si̍t kah Bô Tiong-si̍t ê Koán-ke (Mt 24:45-51)
41 Pí-tek kóng, " Chú ah, Lí chit-ê phì-jū sī teh tùi goán kóng, á-sī mā tùi kûn-chiòng?" 42 Chú kóng, " Siáⁿ-lâng sī chīn-tiong koh ki-khiáu ê koán-ke? Chiū sī chú-lâng kau-tài i lâi koán-lí kî-tha ê lô͘-po̍k, chiàu sî hun-phòe chia̍h-mi̍h hō͘ in hit-ê lâng. 43 Chú-lâng tńg-lâi khòaⁿ-tio̍h i ū chiàu kau-tài khì chò, hit-ê lô͘-po̍k chin ū hok-khì! 44 Góa si̍t-chāi kā lín kóng, chú-lâng ē phài i lâi koán-lí i só͘-ū ê châi-sán. 45 Hit-ê lô͘-po̍k nā sim-lāi siūⁿ-kóng, góa ê chú-lâng ē khah bān chiah tńg-lâi, chiū phah kî-tha ê lô͘-po̍k kah lú-pī, lim-chia̍h koh chiú-chùi. 46 Chú-lâng tī i siūⁿ bē kàu ê sî-chūn tńg-lâi. Chú-lâng ē tāng-tāng kā i hêng-hoa̍t. Hō͘ i kah hiah-ê bô tiong-si̍t ê lâng siū kāng-khoán ê hêng-hoa̍t. 47 Lô͘-po̍k chai-iáⁿ chú-lâng ê ì-sù khiok bô khì chún-pī, á-sī bô chiàu chú-lâng ê ì-sù khì chò. I it-tēng ē hō͘ chú-lâng phah kah chin thiám. 48 M̄-koh nā m̄-chai chú-lâng ê ì-sù khì chò eng-kai siū phah ê tāi-chì, i ē siū phah khah chió ē; hō͘ i khah-chē ê lâng, ē tùi i the̍h khah-chē; kau-thok i khah-chē ê lâng, ē kā i iau-kiû khah-chē."

In-ūi Iâ-so͘ Ín-khí ê Hun-lia̍t (Mt 10:34-36) 49 " Góa lâi sī beh ēng hóe tàn tī tē-chiūⁿ. Hóe nā to̍h khí-lâi, m̄-chai gōa-ni̍h-á hó? 50 Góa ū eng-kai siū ê sé-lé. Hit-ê sé-lé iáu-bōe oân-sêng í-chêng, Góa tio̍h kan-khó͘ kah siáⁿ-mi̍h thêng-tō͘? 51 Lín siūⁿ-kóng Góa lâi sī beh hō͘ tē-chiūⁿ hô-pêng? Góa kā lín kóng, m̄-sī, tian-tò sī oan-ke. 52 Tùi taⁿ í-āu, chi̍t ke gō͘ lâng ē oan-ke, saⁿ-ê kah nn̄g-ê oan-ke, nn̄g-ê kah saⁿ-ê oan-ke. 53 Pē kah kiáⁿ, kiáⁿ kah pē, lāu-bú kah cha-bó͘-kiáⁿ, cha-bó͘-kiáⁿ kah lāu-bú, ta-ke kah i ê sim-pū, sim-pū kah ta-ke, in lóng ē oan-ke.

Liáu-kái Hit-ê Sî ê Tiāu-thâu (Mt 16:2-3)
54 Iâ-so͘ koh tùi kûn-chiòng kóng, " Lín khòaⁿ-tio̍h hûn tùi sai-pêng khí-lâi, lín chiū kóng, ' Beh lo̍h-hō͘'. Kó-jiân chiū lo̍h-hō͘. 55 Lín khòaⁿ-tio̍h thàu lâm-hong ê sî, lín chiū kóng, ' Beh sio-joa̍h ā.' Chiū chin-chiàⁿ sio-joa̍h khí-lâi. 56 Lín chiah-ê ké-hó ê lâng, lín to ē-hiáu phòaⁿ-toàn thiⁿ kah tē ê kéng-siōng, ná bē-hiáu phòaⁿ-toàn chit-ê sî-kî?"

Tio̍h Kah Khòng-kò Lí ê Lâng Hô-kái (Mt 5:25-26)
57 " Lín ná-ē bô beh ka-kī phòaⁿ-toàn sī-hui? 58 Nā ū-lâng kā lí kò khì kìⁿ koaⁿ-hú, iáu tī lō͘-ni̍h ê sî, tio̍h siat-hoat kah i hô-kái. Nā bô i ē thoa lí khì kìⁿ sím-phòaⁿ-koaⁿ, sím-phòaⁿ-koaⁿ ē kā lí kau hō͘ hoat-kéng, sòa lo̍h-khì hoat-kéng ē kā lí koaiⁿ lo̍h-kaⁿ. 59 Góa kā lí kóng, chòe-āu ê chi̍t-sián-gō͘-lî nā bô hêng chheng-chhó, lí choa̍t-tùi bē-tàng tùi kaⁿ-ni̍h chhut-lâi."