《巴克禮普世版聖經(試讀本)》

| | | 轉寄

巴克禮普世版(試讀本) 路加福音第十三章

Bô Hóe-kái Chiū Ē Bia̍t-bông
1 Tú hit sî ū kúi-nā lâng lâi, chiong Ka-lī-lī-lâng tī chè-tôaⁿ hiàn-chè hō͘ Pí-lia̍p-to sat-hāi ê tāi-chì kā Iâ-so͘ kóng. 2 Iâ-so͘ ìn kóng, " In-ūi chiah-ê Ka-lī-lī-lâng siū chit-chióng ê sat-hāi, lín siūⁿ-kóng in pí chèng Ka-lī-lī-lâng hoān khah tāng ê chōe , sī-bô? 3 Góa kā lín kóng, m̄-sī. Lín nā bô hóe-kái, lóng ē chhin-chhiūⁿ án-ne bia̍t-bông. 4 Á-sī lín siūⁿ-kóng, hō͘ Se-lô-a ê thah tó lo̍h-lâi teh-sí hit cha̍p-peh ê lâng, pí kî-tha tòa tī Iâ-lō͘-sat-léng ê lâng hoān khah tāng ê chōe , sī-bô? 5 Góa kā lín kóng, m̄-sī. Lín nā bô hóe-kái, lóng ē chhin-chhiūⁿ án-ne bia̍t-bông.

Bô Kiat Kóe-chí ê Bû-hoa-kó-chhiū
6 Āu-lâi Iâ-so͘ ēng chi̍t-ê phì-jū kā in kóng, " Ū chi̍t-ê lâng tī i ê phû-tô-hn̂g-ni̍h, chai chi̍t châng bû-hoa-kó-chhiū. I lâi hit châng chhiū chhōe kóe-chí, m̄-koh lóng chhōe bô. 7 I tùi kò͘-hn̂g ê kóng, ' Lí khòaⁿ, góa liân-liân saⁿ nî, lâi chit châng bû-hoa-kó-chhiū chhōe kóe-chí, chhōe lóng bô. Tio̍h kā i chhò khí-lâi! Ná-tio̍h lâu teh tìn só͘-chāi?' 8 M̄-koh kò͘-hn̂g ê ìn kóng, ' Chú-lâng ah, kin-nî chhiáⁿ koh kā i lâu chi̍t nî khòaⁿ māi. Góa lâi kā sì-chiu-ûi ku̍t-sang koh lo̍h-pûi. 9 Mê-nî nā kiat kóe-chí to̍h hó. Nā bô chiah kā i chhò khí-lâi.'"

Tī An-hioh-ji̍t I-hó Ún-ku ê Hū-jîn-lâng
10 Ū chi̍t-ê An-hioh-ji̍t, Iâ-so͘ tī chi̍t-ê hōe-tn̂g teh kà-sī lâng. 11 Ū chi̍t-ê hū-jîn-lâng hō͘ siâ-sîn hū-sin, tài-pēⁿ cha̍p-peh-nî kú, seng-khu ún-ku lóng chhun bē ti̍t. 12 Iâ-so͘ khòaⁿ-tio̍h chiū kiò i lâi, kā i kóng, " Hū-jîn-lâng, taⁿ lí ê pēⁿ hó khì à." 13 Iâ-so͘ ēng siang-chhiú kā i hōaⁿ. I ê seng-khu sûi-sî chhun ti̍t. I chiū chheng-chàn Siōng-Chú. 14 M̄-koh hōe-tn̂g ê chú-koán, in-ūi Iâ-so͘ tī An-hioh-ji̍t kā lâng i-pēⁿ chiū siū-khì, tùi kûn-chiòng kóng, " Ū la̍k ji̍t eng-kai tio̍h chò-kang, hit la̍k-ji̍t kan thang lâi i-pēⁿ. An-hioh-ji̍t m̄-thang án-ne chò." 15 M̄-koh Chú ìn kóng, " Ké-hó ê lâng ah, tī An-hioh-ji̍t, lín kám bô ta̍k-lâng tùi gû-tiâu tháu i ê gû, á-sī lî, khan-khì chia̍h chúi? 16 Chit-ê hū-jîn-lâng sī A-pek-la̍h-hán ê kiáⁿ-sun, hō͘ Sat-tàn sok-pa̍k í-keng cha̍p-peh nî kú, kám bô eng-kai tī an-hioh ê ji̍t kā i tháu-pàng?" 17 Iâ-so͘ kóng chiah-ê ōe ê sî, hiah-ê tùi-te̍k lóng kám-kak chin kiàn-siàu. Kûn-chiòng in-ūi Iâ-so͘ só͘ chò it-chhè kî-biāu ê tāi-chì, lóng-chóng chin hoaⁿ-hí.

Kòa-chhài-chí ê phì-jū (Mt 13:31-32; Mk 4:30-32)
18 Iâ-so͘ chiū kóng, " Siōng-Chú Kok-tō͘ chhin-chhiūⁿ siáⁿ-mi̍h? Góa tio̍h ēng siáⁿ-mi̍h lâi pí-phēng? 19 Sī chhin-chhiūⁿ chi̍t-lia̍p kòa-chhài-chí, lâng the̍h khì iā tī hn̂g-ni̍h, chiū tōa châng khí-lâi chiâⁿ-chò chhiū, khong-tiong ê poe-chiáu mā lâi tī chhiū-ki chò siū."

Kàⁿ-bó ê Phì-jū (Mt 13:33)
20 Iâ-so͘ koh kóng, " Góa beh ēng siáⁿ-mi̍h lâi pí-phēng Siōng-Chú Kok-tō͘? 21 Sī chhin-chhiūⁿ kàⁿ-bó, hū-jîn-lâng the̍h khì hē tī saⁿ táu ê mī-hún lāi chhiau-chhiau lè, chòe-āu lóng hoat khí-lâi."

E̍h ê Mn̂g (Mt 7:13-14; 21-23)
22 Iâ-so͘ ǹg Iâ-lō͘-sat-léng teh kiâⁿ, keng-kòe hiah-ê siâⁿ-chhī kah chng-siā, iân-lō͘ kà-sī lâng. 23 Ū chi̍t-ê lâng lâi mn̄g Iâ-so͘ kóng, " Chú ah, ē tit-tio̍h kiù ê lâng chin chió , sī-bô?" 24 Iâ-so͘ ìn kóng, " Tio̍h chīn-la̍t tùi e̍h mn̂g ji̍p-khì. Góa kā lín kóng, ū chin-chē lâng kiû beh ji̍p-khì, mā bē-tàng ji̍p-khì. 25 Chú-lâng khí-lâi koaiⁿ mn̂g liáu-āu, lín chiah khiā tī gōa-bīn phah mn̂g, kóng, ' Chú-lâng ah, chhiáⁿ kā goán khui mn̂g.' I ē ìn lín kóng, ' Góa m̄-bat lín sī tùi tó-ūi lâi ê lâng.' 26 Hit sî lín ē kóng, ' Goán bat kah lí chò-hóe lim-chia̍h, Lí mā bat tī goán ê ke-lō͘ kà-sī goán.' 27 M̄-koh I ē kóng, ' Góa kā lín kóng, Góa m̄-chai lín tùi tó-ūi lâi. Lín chiah-ê chò put-gī tāi-chì ê lâng lóng tio̍h lī-khui Góa.' 28 Lín khòaⁿ-tio̍h A-pek-la̍h-hán, Í-sat, Ngá-kok kah chèng sian-ti tī Siōng-Chú Kok-tō͘ lāi-bīn, ka-kī khiok siū kóaⁿ chhut-khì gōa-bīn. Hit sî, lín ē tī hia thî-khàu, kā-gê chhiat-khí. 29 Lâng ē tùi tang-sai lâm-pak lâi Siōng-Chú Kok-tō͘, chò-hóe chē-toh lim-chia̍h. 30 Lō͘-bóe ê lâng ē chò tāi-seng, tāi-seng ê lâng mā ē chò lō͘-bóe."

Ūi Iâ-lō͘-sat-léng Pi-siong (Mt 23:37-39)
31 Hit sî ū kúi-nā-ê Hoat-lī-sài-phài ê lâng lâi kā Iâ-so͘ kóng, " Lí tio̍h lī-khui chia khì pa̍t ūi, in-ūi Hi-lu̍t ài beh kā Lí thâi." 32 Iâ-so͘ ìn kóng, " Lín khì kā hit chiah hô͘-lî kóng, ' Lí khòaⁿ, kin-á-ji̍t, bîn-á-chài Góa kóaⁿ-kúi, i-pēⁿ, kàu tē-saⁿ ji̍t oân-sêng Góa ê kang-chok.' 33 Sui-jiân án-ne, kin-á-ji̍t, bîn-á-chài kah āu-ji̍t, Góa tio̍h kè-sio̍k kiâⁿ, in-ūi sian-ti bô eng-kai tī Iâ-lō͘-sat-léng í-gōa ê só͘-chāi, hō͘ lâng hāi-sí." 34 Iâ-lō͘-sat-léng ah, Iâ-lō͘-sat-léng ah, lí thâi-sí sian-ti, ēng chio̍h-thâu tìm-sí Siōng-Chú chhe-phài kàu tī lín chia ê sù-chiá. Góa jōa-chē pái ài-beh chū-chi̍p lí ê kiáⁿ-jî, chhin-chhiūⁿ ke-bó chū-chi̍p i ê koe-á-kiáⁿ tī si̍t-ē, m̄-koh lín bô ài. 35 Lí khòaⁿ, lín ê chhù ē hong-hòe. Góa koh kā lín kóng, lín choa̍t-tùi bē-tàng khòaⁿ-tio̍h góa, ti̍t-kàu lín kóng, ' Hōng Chú ê miâ lâi ê Hit-ūi eng-kai tit-tio̍h o-ló.'"