《Kah陳小小做伙讀台語》

| | | 轉寄

啥物是活出見證?

陳小小踏話頭:


信望愛本期主打文討論「活出見證」Chit句話ê意義,進一步hō͘人反省究竟tio̍h活出啥物?

Tú好前幾工我歇睏ê時,聽tio̍h阿姊kah小弟兩人teh開講,講tio̍h某某人tī伊ê阿爸栽培下,明明是複製人,一个模á印出來。In teh討論這是好事á是pháiⁿ事。

是beh活出我?Á是活出父母ê ǹg望?活kah kah父母一模一樣?

做一个父母,我bē ǹg望姊弟兩人kah我kah tjm一模一樣。因為我無感覺阮夫婦有啥物好。我koh khah無希望姊弟兩人活出我,因為受罪惡污染ê「自我」,可惡至極。事實上,無論tīkhangkhòe場á是日常生活做伙,人人lóng討厭hit kóa凡事真「自我」ê人。真想beh對hit kóa自我中心ê人吐槽「chhòng啥,你認為你是上主hioh?地球teh se̍h你轉hioh?」

Ánne,我chit幾年究竟是án怎活?活出啥物?

回顧chit幾年,to̍h是óa靠耶穌來脫離罪惡,活出上主創造我chitê人ê原貌。

講起來,活出上主創造我chitê人ê原貌,有一點á ná親像活出我,m̄ koh,m̄是以罪惡ê「自我」做中心,卻是以基督做中心。因為若以基督做中心,ta̍k个「自我」無kā kakī當做上主,卻是盡力貢獻「自我」,互相起造。

Chabó͘ kiáⁿ成做公務員,tī疫情真ântáu ê時,連續加班,我真意愛。我感覺她jú來jú活出上主創造她chitê人ê原貌。她有機會tīkhangkhòe場頂面貢獻「自我」,起造社會國家。

Kiáⁿ兒á是大學生,暑假可能有機會去圖書館phah工。我祈禱,ǹg望伊mā ē tàng tī工作中chhōe tio̍h上主創造伊chitê人ê原貌。

脾氣、個性、工作能力、娛樂,咱lóng無仝款,mā無需要仝款。

【啥物是活出見證?】文/Virginia Yip

今á日社群平台ê發達,已經致使真chē基督徒差不多失去tùi傳統媒介增長智識、培育靈命ê能力,親像真正teh讀一本全面論述真理ê冊,á是tùi頭到尾完完整整上一系列系統性教導聖經ê課程,顛倒tiāⁿtiāⁿ tùi網路hit kóa kā聖經真理變成口號、標語等等,一下看起來to̍h真映目、真ē tàng引起人心ê半句話語,來吸收有關屬靈ê教導。

我bat看tio̍h面冊頂面有人轉發一張製作精美ê屬靈語錄海報,是啥物語錄?它講:

撒旦m̄驚啥物?M̄驚會友讀經、祈禱!M̄驚信徒敬拜讚美!M̄驚牧師有博士ê頭銜!M̄驚教會熱心宣教!

撒旦siōng驚啥物?基督徒活出見證!

[虛假ê命題]

頂面所講chit種被華人信徒當做金科玉律ê格言,你kám bat聽過?你kám有認同?kiámchhái你m̄ nā聽過,m̄ nā認同,koh khah可能對人傳講過,因為這to̍h是華人教會講台頂tiāⁿtiāⁿ聽tio̍h ê教導。

M̄ koh,為啥物beh kā「活出見證」kah讀經祈禱、敬拜讚美、熱心宣教對立起來?Tùi chit段話ê鋪排,咱ē tàng看出,講chit句話ê人掠準,讀經祈禱、敬拜讚美、熱心宣教,chiahê lóng是虛假ê、表面ê,是等於tī「博士頭銜」hit kóa無真實屬靈性命ê表現。

Ánne我beh問,到底啥物chiah算是「活出見證」?讀經祈禱、敬拜讚美、熱心宣教kám m̄是to̍h是「活出來」ê見證?Kám講活出見證to̍h kiámchhái bē包括為tio̍h追求tī聖經kah神學上koh khah精準認bat上主á進修,kám to̍h就ánne來取得koh khah koân ê學位?

我koh問,kám有可能一个自稱基督徒ê人,kui工kantaⁿ關心注意kakī是m̄是有tī人ê面前活出美好ê見證,結果顛倒變kah內外無一致
究竟啥物是「活出見證」?一个真正基督徒ê見證,kám有可能ē tàng無需要藉tio̍h讀經祈禱、敬拜讚美、熱心宣教á體現出來?Koh kám有可能,一个真正基督徒ê見證ē tàng m̄免建立tī對聖經kah神學有正確、全面、深入ê認bat頂面?Chit種聽起來真屬靈,m̄ koh實際上bē堪得一擊ê敬虔主義ê虛假命題,撒旦chiah m̄驚leh!

[換湯無換藥ê文字遊戲]

到底chit位hō͘人beh「活出見證」ê人,想beh講啥物?Kiámchhái kantaⁿ去問發明chit種屬靈術語ê人chiah知影。

有kóa屬靈術語,大家聽慣勢了後to̍h認為lóng了解是啥物意思à。有人講,「活出見證」to̍h是ài過聖潔生活。Ánne我beh koh再問,「過聖潔生活」koh是teh指啥物?華人信徒對「聖潔」一詞ê理解,往往kantaⁿ限tī道德行為ê層次,親像tio̍h誠實lah、謙卑lah、有疼心lah、歡喜來幫助人lah;koh á是講聖潔to̍h是根據基要派定出來ê一kóa律法主義ê行為規範,mài lim酒、mài pok薰、mài phah牌、mài poa̍hkiáu、mài跳舞、m̄看電影等等;koh再kám m̄是to̍h是teh指宗教行為:ta̍k日靈修、讀經、祈禱、聚會、什一奉獻、傳福音。

總ê來講,無論「活出見證」Chit句話做án怎解說,本質lóng是仝款ê:tio̍h「活出」,就是ài「做」kóa tāichì。敬虔主義反對ê to̍h是kantaⁿ有頭腦上ê智識,bē tàng kantaⁿ空談,「行動」chiah是真實ê。

Chitê講法,一下看起來無啥物問題。M̄ koh請大家詳細想看māi,án怎chiah ē tàng產生行動?Siōng起初,敬虔主義ê口號kám m̄是類似ánne?撒旦m̄驚你ē tàng答出正確ê教義,siōng驚你讀經祈禱、敬拜讚美!結果發見,有kóa人祈禱到一个地步,甚至教會ē tàng hō͘ 伊「祈禱勇士」ê好名聲;koh有kóa人聖經ē tàng背kah ē tàng倒頭唸,一開嘴to̍h是經文一句接一句;koh再有kóa人,敬拜比啥人lóng khah投入,kui工「感謝主」、「oló主」、「哈利路亞」、「阿們」!M̄ koh,chit種人kantaⁿ追求kakī ê屬靈經驗,而且無關心別人ê靈魂需要。

就ánne,in koh改口講:撒旦m̄驚你讀經祈禱、敬拜讚美,siōng驚你熱心傳福音!就ánne一間一間以傳福音、宣教為信徒siōng重要kah唯一使命ê教會紛紛興起,結果發見精通各式各種佈道法ê人,可能kakī ê道德生活都有問題,是所謂無「活出見證」ê。就ánne,in又ài koh改口à!

Chit種一工到暗kantaⁿ知影替換名詞、定義,換湯無換藥ê「屬靈智慧」,siōng chē kantaⁿ ē tàng收tio̍h一時ê效果。久久了後,m̄ nā ē kā人舞kah thiám kah倦tahtah,m̄知tio̍h án怎chiah好;koh khah嚴重ê 是,信徒連一kóa基本ê屬靈詞彙mā chhòng bē清楚究竟是啥物意思。

[你一定tio̍h「是」啥物,chiah ē tàng「行出」啥物]

Tī聖經中,「聖潔」是用來指上主ê屬性,á一个自出世to̍h lâsâm無清氣ê罪人,被聖靈重頭生了後,內面to̍h開始有一个新ê kah上主ê性情仝款ê性命,chitê新ê性命是意愛真理,無ài犯罪,渴慕聖潔。

Á chitê新ê性命,是栽種tī本來ê舊性命中。所以,一个基督徒ê性命一定ē有兩股相衝相爭ê勢力,一个是意愛聖潔ê,另外一个是ài犯罪ê。一个人做基督徒,伊siōng大ê驚喜,m̄是就ánne to̍h無koh犯罪,卻是tio̍h算猶原不時teh犯罪poa̍h倒,伊竟然ē呈現出另外一个種完全無仝ê性命素質。

舉一个例,她á是伊kiámchhái猶原ē發脾氣,kah翁婿á是牽手冤家,m̄ koh chitmá ē意識tio̍h kakī ê罪性,koh khah ē看tio̍h kakī ê m̄ tio̍h,koh khah知影mā koh khah有能力主動向對方承認m̄ tio̍h。In做基督徒ê日子久了後,m̄ nā jú來jú bē吵,而且koh khah知影欣賞、肯定對方ê優點,體諒、忽略對方ê缺點。換句話來講,基督徒ê成長to̍h是hō͘ chitê新ê、來自上主ê聖潔性命不斷壯大,hō͘舊ê tùi kakī私慾ê罪性性命不斷被醫治。所以,過聖潔个生活,重點無在tī「做」(do)聖潔ê tāichì,乃是tio̍h「做」(be)聖潔ê人。人一生ê效果是tùi心發出ê(箴言4章23節),kantaⁿ當一个人「是」啥物,伊chiah ē tàng「行出」啥物。

[律法kah恩典ê無仝進路]

所以,若是有非基督徒看tio̍h基督徒mā ē犯罪to̍h指責咱,咱應當án怎回應?你若是一个律法主義者,你ê回應一定是ài大家tī人个面前努力做出美好ê見證,免得hō͘耶穌無面子。(Oh!失禮,應該講免得「kā主卸面子」,屬靈ê話是ánne講ê。)

M̄ koh,若是你是明白恩典ê人,你聽tio̍h世間人指責基督徒án怎lóng teh犯chit種ê罪,你ê反應ē是:Tú是因為咱lóng是ē犯罪ê罪人,所以咱chiah需要基督ê救贖,chiah beh成做基督徒ah!

活tī今生ê基督徒,是無可能完全bē犯罪ê。問題是,當咱看tio̍h kakī kah其他信徒犯罪ê時,beh án怎辦?你kiámchhái ē行法利賽人ê律法主義道路,強調行為上ê改變,結果to̍h一定bē tàng逃脫頂面所講hit大堆對聖潔生活ê行為規範,你ē列出一大堆應當守ê律法,企圖tùi改變人ê外在行為來改變人ê本質。這是所有宗教teh行ê道路。

若無,你tio̍h接受基督恩典ê福音,mā to̍h是承認tī你內面一屑á都無行善ê本質kah能力,你kantaⁿ ē tàng接納tī你以外tùi基督所賞賜ê義。Kantaⁿ有當一个人真正認bat chit點,伊chiah ē棄sak一切,建立kakī ê義,用kakī ê氣力做中心(kiámchhái koh加上一kóa上主賞賜ê扶助力!)來活出聖潔生活ê企圖。

Á一个認bat koh體會tio̍h kakī是領受不配恩典ê人,伊定tio̍h ē kā目chiu金金看tī拯救伊ê上主身chiūⁿ,因為ánne ē用謙卑ê心kah感恩ê心來回應上主。而且伊關心注意ê焦點,m̄是一大堆ê道德行為á是宗教行為ê聖潔,卻是上主祂hitê聖潔ê屬性án怎ē tàng tī伊kakī身chiūⁿ反射出來。

[活出見證kám kantaⁿ hit kóa?]

Ánne,chit時chitê「聖潔生活」ê定義to̍h真廣闊à。親像:上主是聖潔ê,祂恨無公義ê tāichì,所以基督徒對社會無公義ê tāichì一定mā bē ka信táu,所以歷世歷代真chē基督徒對孤兒寡婦、老弱殘疾、受壓迫、受欺壓ê邊緣人、kē階層,總ē無惜氣力去幫贊;對無公平ê法制kah政權,mā ē m̄驚強權、無惜犧牲去糾正。

Koh親像:上主是聖潔ê,祂既然無kā祂ê榮光歸hō͘假神,mā無容允人看輕照祂形像所造ê人類,所以,愛慕聖潔ê基督徒,對一切有形無形ê偶像崇拜lóng ē非常敏感,mā ē極力抵制一切侵犯人ê尊嚴ê tāichì,包括男女性別上ê無平等對待、種族上ê歧視;ē反對一切kā人ê地位kah價值建立tī生產力、出世背景、財富chē少、地位高kē、學歷深淺等等ê制度、文化、觀念á是作風上;koh á是,伊ē極力反對墜胎行為,á特別支持領養無依無靠ê兒童。

對「聖潔性命」chit種幅度ê理解,m̄知華人教會有幾个?Koh有gōa chē部分是用本文一開始hit種列舉規例hoah口號ê方式來涵蓋?「撒旦m̄驚......?Siōng驚......?」大家kakī來來填寫!