《Kah陳小小做伙讀台語》

 | | | 轉寄

名無被講出來ê「Hitê pháiⁿ ê」

作者 陳鳳翔，台譯：Lîm Chùn Io̍k 2022.07.24



處tī趨吉避凶ê華人文化環境下，對〈主禱文〉馬太福音6:13 ê「m̄ thang hō͘阮陷落tī擔當bē起ê試煉。求祢救阮脫離hitê pháiⁿ ê。」容易用「避凶」去理解「兇惡」，來求上主幫贊咱脫離一切ê「pháiⁿ事、衰運」。另外，讀者mā khah少去注意《和合本》後面有一个括號「（á是譯：脫離pháiⁿ ê）」。因為「pháiⁿ ê」已經被包含tī「pháiⁿ事、衰運」內面。「脫離pháiⁿ ê」通常ē hông理解做「防小人」，尤其是khangkhòe場頂面ê小人嘴舌陷害kah攻擊。

M̄ koh，絕大多數ê華語譯本《新譯本》《華語標準譯本》《回復本》《呂振中》《NET聖經》lóng紛紛棄sak「脫離兇惡」ê翻譯，選擇了「脫離hitê pháiⁿ ê」。《和合本修訂版》「不叫我們陷入試探；救我們脫離那惡者。」顯示大部分ê聖經學者掠準chit句m̄是「脫離pháiⁿ事、衰運」，卻是「脫離hitê pháiⁿ ê」。

《現代華語譯本》koh khah白話：「不要讓我們遭受承擔不起的考驗；要救我們脫離那邪惡者的手。」形容hitê邪惡者iáu有「手」，hō͘聖經讀者感受tio̍h「hitê pháiⁿ ê」帶有極大ê權勢，kahná有一隻看bē tio̍h ê烏手ē tàng kā人掠tiâutiâu，所以信徒tio̍h用〈主禱文〉來呼求上主出手，kā人tùi「hitê pháiⁿ ê」手裡搶救出來。

〈主禱文〉是耶穌教咱ê祈禱，是基督徒一切祈禱ê基礎。所以，咱有必要了解「hitê pháiⁿ ê」ὁ πονηρός究竟是啥人？馬太福音其它所在mā出現過chit字。頭一種意思是teh指pháiⁿ人、邪惡ê人，ná親像：「我kā lín講，m̄ thang『用pháiⁿ報pháiⁿ』。若有人siàn你正pêng ê嘴phóe，tio̍h連倒pêng mā oa̍t去hō͘伊siàn。」（太5:39）「Lín chiahê毒蛇，lín明明是pháiⁿ ê，ná ē講好話？….pháiⁿ人tùi所積聚ê pháiⁿ來顯出邪惡。」（太12:34-35）

Ὁ πονηρός第二種意思，「hitê pháiⁿ ê」指ê是魔鬼撒旦。耶穌ê〈掖種ê譬喻〉講：「聽tio̍h天國ê信息無明白ê人，ná親像掖tī路邊ê種籽；魔鬼一下到，to̍h kā掖tī伊心內ê種籽搶去。」（太13:19）〈麥á kah稗á ê譬喻〉講：「Hitê掖好種籽ê to̍h是人子； 38 園to̍h是世間；好種籽是teh指天國ê kiáⁿ兒；稗á是指魔鬼ê kiáⁿ兒； 39 掖稗á ê對敵，to̍h是指魔鬼；收成ê時是指今世ê末日，收割ê to̍h是指天使。」（太13:37-39）

新約其它冊卷mā指向「hitê pháiⁿ ê」是魔鬼撒旦。約翰福音記載耶穌kiông beh離開世間，牧者被phah，羊to̍h分散。耶穌為門徒祈禱，特別提起「脫離hitê pháiⁿ ê」：「我有kā祢ê道理傳hō͘ in；世間怨恨in，因為in無koh屬chit世間，親像我無屬chit世間。 15 我m̄是求祢chhōa in離開chit世間，是求祢保守in脫離hitê邪惡。」（約17:14-15）chia ê「世界」是teh指「kah上主敵對勢力ê總集合」，魔鬼撒旦持有世界ê權柄。

約翰一書mā 顯露全世界lóng倒tī魔鬼撒旦手下ê事實：「咱知上帝ê kiáⁿ兒bē繼續犯罪，因為有上帝ê Kiáⁿ teh kā伊保守，hitê魔鬼kha̍p伊bē tio̍h。 咱知咱是屬上帝，m̄ koh，全世間lóng受hitê魔鬼管轄。 」（約一5:18-19）M̄ koh，好消息是tùi上主生ê，m̄免驚被魔鬼撒旦害。

甚至，上帝ê道常常存在tī屬上主ê人心內，iáu ē tàng贏過魔鬼撒旦：「….少年人，我寫phoe hō͘ lín，因為lín已經贏過hitê邪惡。細kiáⁿ，我寫phoe hō͘ lín，因為lín認bat天父。父老序大，我寫phoe hō͘ lín，因為lín認bat hitê tùi源起頭to̍h存在ê hit位。青年人，我寫phoe hō͘ lín，因為lín勇健，mā有上帝ê道理tī lín心內，lín koh已經贏過hitê邪惡。」（約一2:13-14）

所以〈主禱文〉siōng尾一个祈禱項目：「M̄ thang hō͘阮陷落tī擔當bē起ê試煉。求祢救阮脫離hitê pháiⁿ ê。」「hitê pháiⁿ ê」，自然是teh指持有全世界權勢ê魔鬼撒旦！因為牠ē主動攻擊基督徒、迷惑基督徒。〈掖種ê譬喻〉mā指出，魔鬼撒旦siōng驚人ê所在是，牠ē kā聽過天國道理ê人心內一粒一粒福音ê種chí奪去。基督徒ta̍k禮拜lóng去教會主日崇拜聽講道，m̄ koh聽bē明白，koh無求深入了解，無請教牧師、長執，魔鬼撒旦「hitê pháiⁿ ê」to̍h來，kā掖tī心裡ê道奪去，性命永遠親像一个嬰á，一直無法度結出聖靈ê果chí。

幾nā年來，「hitê pháiⁿ ê」名無hông講出來，kiámchhái是親像電影《哈利波特》ê hitê「名無法度講出來ê pháiⁿ ê」仝款，牠非常hō͘人tio̍h驚。M̄ koh，我若一个人私底下使用〈主禱文〉，通常ē直接坦白kā「hitê pháiⁿ ê」ê名講出來：「M̄ thang hō͘阮陷落tī擔當bē起ê試煉。求祢救阮脫離魔鬼撒旦。」這是為tio̍h時刻警醒，m̄ thang陷落去牠帶來ê罪惡試探；mā提醒kakī審查上帝ê道理是m̄是有tiāⁿtiāⁿ khǹgtī心內，he ē tàng hō͘我贏過魔鬼撒旦。