《Kah陳小小做伙讀台語》

 | | | 轉寄

《摩西kah焚而不燬ê刺phè》

作者 陳小小，台譯：Lîm Chùn Io̍k 2022.11.06

《摩西kah焚而不燬ê刺phè》

陳小小

摩西牧羊往曠野koh遠ê所在何烈山。伊看見刺phè teh tio̍h火，卻無燒燒去。心內想講怪事，是án怎chiahni̍h容易to̍h ê刺phè竟然bē燒滅？ǹg前去看māi leh。無想tio̍h he是上主！上主自我紹介：「我是lín老父ê上主，是亞伯拉罕ê上主，以撒ê上主，雅各ê上主。」

老父（אָב）包含ê意義真闊，它m̄ kantaⁿ是老父，mā有「老父ê老父」意思，to̍h是阿公；「老父ê老父ê老父」，to̍h是曾祖父；「老父ê老父ê老父ê老父」，to̍h是阿太，一直起lí。Chit句話ê涵意是「我是lín老父ê上主，是lín阿公ê上主，是lín阿祖ê上主，……亞伯拉罕ê上主，以撒ê上主，雅各ê上主。」希伯來文簡潔有力用一个字אָב，ē tàng隱含相連續ê祖先。

續落來上主講：「我已經看見我ê子民tī埃及受虐待；我已經聽見in渴望掙脫奴役ê哀哀háu。我知影in ê痛苦，所以落來beh tùi埃及人ê手頭kā in拯救出來，領in到肥koh廣闊、流奶kah蜜ê所在。我的確有聽見我子民ê哀哀háu，mā看tio̍h埃及人án怎壓迫in。Chitmá我差你去埃及法老王hia去；你去kā我ê子民以色列人tùi埃及領出來。」

摩西聽tio̍h驚一tiô，隨時對上主講：「我是啥物人？怎樣ē tàng去埃及王hia，kā以色列人領出來？」Chitmá ê摩西kantaⁿ是一个sàn鄉（華語ê「窮鄉僻壤」）ê牧羊人，伊beh án怎kah強koh好額ê埃及領袖對抗？上主回答：「我（אהיה）ē kah你同在。你領以色列人出埃及了後，lín ài tī chitê山頂敬拜我。這to̍h是我差遣你ê憑證。」

上主ê意思是，摩西你是啥物人，一點á都無重要，重要ê是「我」，而且「我（אהיה）beh kah你同在。」Chia ê「我」非常特別，用ê m̄是一般用ê我「אנכי」，是chitê特殊ê我「אהיה」，而且續落來連續出現三pái。

摩西請教上主ê名是án怎。上主對摩西講：「我是tùi有永有ê（אהיה אשׁר אהיה）」；koh講：「你beh對以色列人ánne講：『Hitê自有ê（אהיה）發落我來到lín chia。』」（出3:13-14）

容允我m̄免用學術ê方式來說明「我」（אהיה）。簡單來講，上主ê名to̍h是一个字：「我」！Chitê「我」連接動詞ê時態未完成式，表示chitê「我」過去to̍h有、chitmá mā有chitê「我」，未來mā繼續、一直有chitê「我」。意思是講tī時間、空間iáu未被創造chìn前，chitê「我」就存在。時間、空間kui个宇宙tio̍h算受毀滅，chitê「我」猶原存在。Chitê「我」tī時間、空間之上！Chitê「我」創造時間、空間！Chitê名ê本質說明祂是創造者！上主ê名ê意思，實在是宇宙無敵ê超級霹靂強。Mā因為ánne，翻譯ē譯做「我是」á是「我ē是」，祝英台帶出chitê「我」連接動詞ê時態未完成式。

到chia，讀者kiámchhái to̍h ē有一个疑問，聖經記載ê上主ê名，kám m̄是耶和華（יהוה）？簡單來講，יהוה kah אהיה是一體ê兩面אהיה。是tùi上主ê角度自稱，to̍h是「我是」，耶和華（יהוה）是tùi以色列人ê角度稱呼上主做「祂是」。To̍h親像我做一个老母，kah gín’á講話ê時，lóng是用gín'á ê角度來使用稱謂。向gín'á講tio̍h阮翁ê時，稱伊為「阿爸」。Ná親像，我對gín'á講：「阿爸今á日暗時ē khah慢chiah tńg來厝裡食飯。」Gín'á lóng知影chitê阿爸，m̄是我ê阿爸（in ê外公），卻是in ê阿爸。

因為ánne，咱人提起耶和華（יהוה）ê時，其實不知不覺teh頌讚chitê「祂」過去to̍h有、chitmá mā有；chitê「祂」，未來mā繼續、一直有chitê「祂」。時間、空間、kui个宇宙tio̍h算受毀滅，chitê「祂」猶原存在。Chitê「祂」tī時間、空間之上！Chitê「祂」創造時間、空間！Chitê名ê本質說明，祂是創造者！因為ánne，翻譯thang譯做「祂是」á是「祂ē是」。

人生ê路裡，有各種困難kah考驗。我mā tiāⁿtiāⁿ kah摩西仝款，對上主講：「我是啥物人？怎樣ē tàng辦好勢chit項tāichì？」M̄ koh，chit段經文提醒tio̍h hitê創造、掌管時間kah空間ê「我是」（אהיה）kah我同在，就ánne我轉念做：「祂是啥人？有啥物tāichì，祂kám做bē到？」

Sàn鄉（華語ê「窮鄉僻壤」）ê 80歲老牧羊人摩西，完全bē tàng kah有軍隊、武器、體力ê法老王匹敵，m̄ koh上主差派ê任務，祂kah摩西同在。Á若是上主派hō͘我ê任務，我chitê第一代基督徒，大學chiah信耶穌，真chē lóng m̄ bat，智慧mā無chē，身軀有大細毛病，各種ê困難kah考驗，我kantaⁿ需要ē記得祂kah我同在。我ài做ê只有忠心，盡力做奴僕應該做ê。「我是啥物人？」無重要，「祂是啥人？」siōng重要。