《Kah陳小小做伙讀台語》

 | | | 轉寄

《若有ê人beh hō͘伊koh khah chē》

作者 陳小小，台譯：Lîm Chùn Io̍k 2022.11.13


《若有ê人beh hō͘伊koh khah chē》

陳小小


Chitê句話竟然tī無仝ê福音書lóng出現，馬太福音kah路加福音；tī chit兩卷福音書koh重複出現兩pái，甚至這koh是耶穌講ê話，你看重不重要？「因為見若有ê人beh hō͘伊koh khah chē；無ê人連伊kakī 掠做有ê，mā beh kā伊搶去。」（馬太福音13:12，25:29；路加福音8:18，19:26）

Chit句話tī耶穌傳道ê前期出現。Hit時jú來jú chē ê人tùi各城裡出來，聚集聽耶穌講道。耶穌講了一个譬喻：「有一个掖種ê出去掖種；掖ê時，有lak tī路邊ê，hō͘ 人thún踏，飛鳥來食了了；有lak tī土淺石頭á地ê，土肉無深，puh芽siuⁿ緊，日頭出來一曝（pha̍k），因為無根，to̍h枯乾去；有lak tī刺phè裡ê，刺phè長大起來，kā它擠（chiⁿ）leh；koh有lak tī好土裡ê，生長起來，to̍h結實，有一百倍ê，有六十倍ê，有三十倍ê。」

跟tòe耶穌ê好處to̍h是，若一pái聽m̄ bat，iáu ē tàng繼續問老師，直到bat為止。結果，竟然m̄是kantaⁿ一个門徒聽m̄ bat，幾nā个門徒lóng m̄ bat，in請教耶穌「掖種ê譬喻」是啥物意思？特別是因為老師講了chiahê話，iáu大聲講：「有耳thang聽ê，to̍h應當聽！」Kahná chitê譬喻無chhòng kah bat bē sái得。仝款ê，兩千年後做一个ê現代讀者ê咱，mā應該感受tio̍h chitê譬喻何等重要。

原來chitê譬喻是teh教咱人án怎聽道理！耶穌ê解說，聽講有四種狀況：有kóa人聽信息，魔鬼來ā，tùi in心內kā chitê信息奪去，hō͘ in無法度因信來得救；有kóa人聽信息，意愛接受，m̄ koh信息tī in心內釘根無深；in一時相信，m̄ koh一tú tio̍h考驗to̍h khiā bē在；有kóa人聽信息，m̄ koh生活上ê煩惱，財富kah享樂ê引誘，kā chit个信息ê生機hip死去，無法度結出成熟ê果chí；有kóa人聽道，以良善kah誠實ê心來持守，耐心等待，直到它結出果chí。

耶穌講ê chit四種情境mā 當teh好映照tī COVID-19疫情威脅下ê台灣「線頂集會」情景。心思堅定ê會眾，夠額利用線頂集會ê強點，重複注意聽錄製ê講道，一遍koh一遍直到聽bat，收成比實體集會koh khah chē，「見若有ê人beh hō͘伊koh khah chē」。心思軟chiáⁿê會眾，kā電腦連上教會網站，m̄ koh是teh poeh手機，á是做kakī ê tāichì，「凡若無ê，連伊kakī認為有ê，mā tio̍h奪去。」所以咱一定tio̍h學習門徒熱誠ê聽道精神，若是m̄ bat，tio̍h問講道者，堅持問到bat為止。

「見若有ê人beh hō͘伊koh khah chē；」tī馬太、路加福音書第二pái出現，是發生tī耶穌聖靈受苦ê siōng尾一禮拜前，祂講soah hitê譬喻，to̍h上耶路撒冷。耶穌講有一个貴族到遠遠ê所在去，beh被封做王，了後koh再tńg來。起身前，伊召來十个奴僕，每人hō͘伊一个金幣去做senglí。Á伊本國ê人一向恨伊，無ài伊做in ê王。

後來，chitê貴族被封做王tńg來了後，審視奴僕ê成果。用金幣thàn錢ê忠心奴僕，王to̍h賞賜相對應成果ê管理權。有一个奴僕，lánsi到連kā金幣the̍h去生利息lóng m̄做，就ánne王kā chitê金幣the̍h走，賞hō͘ hitê管理錢財能力siōng強ê奴僕，而且講：「我kā lín講，nā已經有ê，beh hō͘伊koh khah chē；nā無ê，連伊所有ê mā tio̍h奪去。講tio̍h boài我做in ê王ê hit kóa敵人，kā in押來，tī我面前kā in thâi死！」

耶穌chit个譬喻，是teh指偤太人恨祂、敵對祂，boài耶穌做in ê王，á耶穌beh上十字架赴死、koh活、上天，siōng尾以王ê身分榮光koh再臨。耶穌道成肉身來到人間，to̍h是beh來做王。M̄是祂愛做王，是罪人需要耶穌做in性命ê王，chiah ē tàng解決心內底ê罪惡。耶穌救世主ê意義，to̍h是「祂beh kā kakī ê人民tùi罪惡裡救出來」。咱真容易忽略「人民」兩字，kantaⁿ看tio̍h「tùi罪惡裡救出來」。人beh ē tàng hông tùi罪惡裡救出來，出烏暗入光明，一定tio̍h做耶穌ê人民， to̍h是hō͘耶穌做王。

Chìn前為kakī活，我認為kakī ē tàng做kakī ê王，所有tāichì kakī做主。卻發見為kakī活，顛倒頭家長官成做我ê王，牽手、父母、gín'á成做我ê王，甚至連工作、休閒、娛樂lóng ē tàng主宰我。我tiāⁿtiāⁿ無法度對in講m̄是！直到我hō͘耶穌做我ê王，頭家、長官、牽手、父母、gín'á、工作、休閒、娛樂，to̍h各自tńg來到正確ê位置。我漸漸得tio̍h自由，ē tàng照上主ê心意，該講yes ê時講yes，該講no ê時講no。

耶穌是咱ê王，siōng尾以王ê身分榮光koh再臨。耶穌已經kā自由賞賜hō͘祂ê奴僕，而且賞賜相對應忠心ê管理權，「見若有ê人beh hō͘伊koh khah chē；無ê人連伊kakī lia̍h做有ê，mā beh kā伊搶去。」咱to̍h是忠心teh管理祂ê託付，為咱ê王服事chit代ê人。