《耶穌言行錄》

Tē-9-chiuⁿ,Phok-sū

作者 Ko Kim-seng.

listen



（Má-thài 2：1-12）
Îa-so͘ chòe Eⁿ-á ê sî，i̍ah ū phok-sū lâi khòaⁿ I .Chiah ê phok-sū sī tùi hn̄g-hn̄g lâi，kíam-chhái sī tùi Pho-su kok，á-sī tùi tang-hngg ê só͘-chāi lâi.In chheng-chòe phok-sū，sī chhang-mîa，i̍ah ū sîong-sîong káng-kìu thian-bûn ê tāi-chì. In ū chi̍t hāng chin hó，chīu-sī kàen-ùi Îa-hô-hoa.

Sīong-tè thòe in siat chi̍t ê koh-īuⁿ ê hong-hoat，hō͘ in chai Kìu-chú lîm-kàu sè-kan，koh chhōa in khì ho̍k-sāi I；chīu-sī hō͘ in khìaⁿ-kìⁿ thiⁿ- téng ū chi̍t-li̍ap put-chí koh-īuⁿ ê chhiⁿ，sī píau-hīan Îa-so͘ chhut-sì，chiong hit li̍ap lâi ín-chhōa in khì kìⁿ-ti̍oh Îa-so͘.Phok-sū bêng-pe̍k chit ê tāi-chì，sim-lāi chin hoaⁿ-hí，lîam-piⁿ khì-sin khì Îa-lō͘-sat-léng pài Îa-so͘.Khì ê sî sòa tòa in kok só͘ chhut ê pó-mi̍h，n̂g-kim，jú-hiuⁿ，bu̍t-i̍oh lâi hìan hō͘ Îa-so͘.

Í-keng kàu Îa-lō͘-sat-léng，chīu mn̄g kóng，"Chhut-sì chòe Îu-thài lâng ê ông tī tah-lo̍h？góan tī tang-hngg khòaⁿ-kìⁿ I ê chhiⁿ，só͘-í beh lâi pài I . "

Lūn Îa-so͘ chin-chìaⁿ sī Ông，chīu-sī bān ông ê Ông，bān chú ê Chú，sī chíang-kóan lâng ê sim，hō͘ lâng hâng-ho̍k tī I.Hi-lu̍t ông thiaⁿ-lìⁿ phok-sū lâi chhē Îu-thài ông，i kap i ê peh-sìⁿ chin kiaⁿ，in-ūi kiaⁿ-líau cheng i ê ông-ūi，m̄-chai Îa-so͘ ê kok m̄-sī si̍ok tī sè-kan，chīu-sī si̍ok thiⁿ-téng.Hi-lu̍t ông kìo chè-si，tha̍k-chheh lâng mn̄g kóng，"Ki-tok eng-kai tī tah-lo̍h chhut-sì？"In chīu kóng，"Pek-lī-hêng，in-ūi Sèng-chheh ū án-ni kì-chài. "Yùi hit-ti̍ap Hi-lu̍t àm-chīⁿ tìau phok-sū sîong-sè mn̄g chhiⁿ chhut-hīan ê sî，mn̄g láiu chīu chhe in khì Pek-lī-hêng，kóng，"Lín ti̍oh khûn-khûn chhē Eⁿ-á，chhē-ti̍oh，ti̍oh lâi kā góa kóng，góa i̍ah beh khì pài I. "Hiah ê phok –sū thuaⁿ Hi-lu̍t ê bēng-lēng chīuⁿ kîaⁿ，hut-jîan tang-sì só͘ khòaⁿ-kìⁿ ê chhiⁿ chòe-thâu chhōa in kàu Eⁿ-á só͘ hioh ê só͘-chāi.

Phok-sū khòaⁿ-kìⁿ hit li̍ap chhiⁿ hoaⁿ-hí kàu bōe-kò͘-tit，chīu ji̍p chhù，khòaⁿ-ti̍oh Eⁿ-á kap lāu-bú Má-lī-a，phak-the pài Eⁿ-á，khui pó-a̍h，ēng n̂g-kim，jú-hiuⁿ，bu̍t-i̍oh lâi hìan hō͘ I.Lán tha̍k phok-sū ê tāi-chì，ū kúi-nā hāng lán thang o̍h.Chīu-sī ti̍oh khûn-khûn chhē Îa-so͘.M̄-sái kîaⁿ hn̄g lō͘ lâi chhe，in-ūi I sī ta̍k-ūi tī-the ê Sīong-tè.Lán i̍ah m̄-sái chi̍t-li̍ap chhiⁿ lâi chhōa，in-ūi ū chîau-chn̂g ê sèng-chheh，sī-pí chhiⁿ put-chí khah kngg，koh ū Sèng Sîn thang chìo kngg lán ê sim，chóng-sī lán ê sim kap seng-khu lóng-chóng hìan hō͘ Sīong-tè. Sèng-chheh kóng，"Góa ê kíaⁿ ti̍oh chiong lí ê sim hìan hō͘ góa，"koh kóng，"Ti̍oh hìan lí ê seng-khu chòe o̍ah ê chè. "

思羅安台語點字網站