《耶穌言行錄》

Tē-12-chiuⁿ,Kîaⁿ sóe-lé Iok-hān

作者 Ko Kim-seng.

listen

（Má-thài 3：1-12；Lō͘-ka 3：1-20）
Kîaⁿ sóe-lé Iok-hān ka-kī khīa tī Îu-thài ê khòng-ía，sī ài choan-sim ho̍k-sāi Sīong-tè.In-ūi sī chòe Chú ê sian-hong，só͘-í Îa-so͘ bē chhut-thâu ê sî，i tāi-seng chhut-lâi kóng tō-lí.Só͘ chhēng ê ，sī lo̍k-tô mn̂g；só͘ hâ ê ，sī phê ê tòa；só͘ chi̍ah ê，sī chháu-meh，ía-bi̍t.Iok-hān chhut siaⁿ kóng，"Thian-kok kūn lah，lín ti̍oh hóan-hóe. "

Chōe-chōe lâng thiaⁿ i só͘ kóng，jīn ka-kī ê chōe，tùi i nía sóe-lé.Ū lâng phah-sǹg i sī Ki-tok，Iok-hān kā in kóng，"Góa m̄-sī Ki-tok，ū chi̍t ê pí góa khah tōa ê，chīu-sī Ki-tok；I lâi m̄-sī chhin-chhīuⁿ góa ēng chúi kiann4 sóe-lé，sī ēng Sèng Sîn kā lâng sóe. "

Hit-ti̍ap ū lâng bô bêng-si̍t hóan-hóe lâi kîu sóe-lé.Iok-hān chek-pī kóng，"Lín ti̍oh ēng chin-si̍t ê sim hóan-hóe kiat hó ê ké-chí. "In ū chi̍t hāng tōa chhò-gō͘，chīu-sī khò ka-kī chòe A-pek-li̍ap-hán ê kíaⁿ-sun，só͘-í Iok-hān kà in m̄-thang án-ni，ti̍oh o̍h A-pek-li̍ap-hán ê sìn，sūn thàn Sīong-tè ê ì-sù；chīu ēng phì-jū kóng，"Hōan-nā chhīu bô kiat chōe-chōe hāng hó ê ké-chí，chīu-sī jîn-ài，hô-pêng，sīan-lîong，chīn-tiong，sìn-si̍t，khiam-pi，jîn-chû，thun-lún，un-jîu，chiah ê ké-chí；án-ni ōe hían-bêng senf5-si̍t hóan-hóe thìaⁿ Sīong-tè.Nā-sī chit hō m̄-sī lán ka-kī ōe，chīu-sī tùi Sèng Sîn.Lán ka-kī sim-lāi ê ké-chí ta̍k hāng sī pháiⁿ，chhin-chhīuⁿ chhì-phè；só͘-í ti̍oh kîu Sīong-tè ēng Sèng Sîn tìam lán ê sim，hō͘ lán tû-khì ta̍k hāng ê pháiⁿ，ōe chîaⁿ ta̍k hāng ê hó，hō͘ Sīong-tè hoaⁿ-hí.

思羅安台語點字網站