《耶穌言行錄》

Tē-13-chiuⁿ,Îa-so͘ nía sóe-lé

作者 Ko Kim-seng.

listen

（Má-thài 3：13-17；Má-khó 1：9-11；Lō͘-ka 3：21，22）
Hit sî Îa-so͘ tùi Ka-lī-lī lâi Iok-tàn hô，chīu-kūn Iok-hān beh nía sóe-lé，Iok-hān m̄-káⁿ I kîaⁿ sóe-lé，sî i kóng，"Góa eng-kai ti̍oh sīu Lí ê sóe-lé，Lí hóan-tńg lâi chīu-kūn góa mah？"Îa-so͘ ìn kóng，"Taⁿ chhíaⁿ îong-ún góa，in-ūi lán ti̍oh án-ni lâi chīn lé-sò͘. "Iok-hān chiah kā I kîaⁿ sóe-lé.Îa-so͘ nía sóe-lé líau tùi chúi khí-lâi，thiⁿ khui，ū Sīong-tè ê Sîn chhin-chhīuⁿ chíⁿ-á kàng-lîm tī I ê téng-bīn，i̍ah ū siaⁿ kóng，"Che sī Góa thìaⁿ ê Kíaⁿ，Góa só͘ hoaⁿ-hí ê. "Án-ni hían-bêng ū Sam-ūi-it-thé，chóng-sī chit hō ê tō-lí sī chin ò-bīau，lán bōe-ōe lóng bêng-pe̍k.Chìau Sèng-chheh só͘ kì-chài Pē Sīong-tè chhe Îa-so͘ lâi sè-kan chòe Kìu-chú，hō͘ sìn-khò I ê lâng ōe tit-ti̍oh sìa-bían chōe.Kíaⁿ Sīong-tè hōng-chhe lâi sè-kan thòe lán sīu kan-khó͘，kîaⁿ cha̍p-chn̂g ê gī；án-ni ēng I ê kong-lô jia-khàm sìn I ê lâng.Sèng Sîn Sīong-tè sī têng-thâu-siⁿ lâng ê sim，hō͘ lâng ōe híau-tit sìn-khò Îa-so͘，ho̍k-sāi Sīong-tè.

思羅安台語點字網站