《陳雷文選》

| | || 轉寄

一面緣

(1)

一大陣人插插直直chiⁿ--來,雄雄後面有人大力kā伊chhia--一-下,tú-tú sak上車。這班m̄是伊beh坐--ê,伊teh等落南。趕緊beh跳落車,已經bē赴--a,車門關--起-來,車teh起行。窗á外一個查甫人,龜怪--a,tòe車teh走,hia̍h á拚汗,目睭gîn-ò͘ⁿ-ò͘ⁿ若鬼á火teh jiok--伊。面對中pit一大chōa,紅kì-kì,bē輸大枝西瓜刀phut--著,phīⁿ á siah一旁去。車內有人teh叫:「菊--a來chia坐。」oa̍t過來看,空空無半個人客,車尾hit頭一個老查某人teh ia̍t手,白頭毛,烏長liâu。歡喜kā叫:「阿媽,你thài也坐這班?…你家己一個beh去tó位?」老查某人chhìn-chhái-á笑:「阿媽專工來chhōa菊--a。」「Chhōa菊--a去tó位?」「來去hia行行看看--leh。」坐--落-來,so伊ê手tê,粗粗若桌布。問伊:「Hia是tó位?」老查某人tō無--去-a。對面位坐一個查甫人,moa一su舊西裝,面向外口the pok薰。好禮kā借問:「阿伯,這班車beh去tó位?」查甫人oa̍t頭過--來,hiohN一驚,tō是伊ê老pē。十外冬無看--著-a,面色紅膏chhiah-chhih攏無khah老--去。Khiā--起-來kā講:「好來--去-a。」查甫人tō無--去。Kha-chiah後soah有人大力teh kā chhia,beh sak伊行。Oa̍t頭看,也無半個人。著青驚,雙手椅á bán--leh,大聲hoah:「你mài kā我sak!我無beh去!」火車khīn-khōng hián ki-ki叫,雄雄pōng一聲若炸彈爆發,人掛車直直péng,烏天暗地,bē輸poa̍h入去pōng空底。驚一下精神--起-來,liàn tī眠床腳,頭殼hîn車車,規身軀chhìn汗。

明明是夢koh概成m̄是夢,lú想lú奇怪。Chēng in過身到taⁿ,攏猶m̄-bat夢--過,thài全無代無誌,夢kah chiah真?In二個攏講:「Chhōa你來去hia行行看看--leh。」定著有一個緣故,敢是伊ê悲憂症ê關係?最近khah厲害,睏bē好勢,頭殼內烏白想,藥á食也無效。成大hit個精神科醫生,生作少年koh緣投,叫伊hioh睏一chām,mài去上班,先去旅行chhìt-thô,行行--leh心情tō會khah好。所以伊旅館已經訂好--a,beh去台東知本洗溫泉,心情浸hō͘輕鬆。人講南迴鐵路風景真súi,下晡tú-chiah去thiah車票,thài會隨tō作這個龜怪ê夢?

Chit-má阿媽、阿爸叫伊去hia行行看看--leh。明á chài,坐hit班落南ê火車,敢tō是beh去hia,hit個所在,kap死約會?Lú想lú有影,lú確實che tō是伊chín ê運途,已經一切攏安排決定好勢--a,chiah-ni̍h清楚koh tú好,m̄免koh再chhiâu-chhek。

按呢決心了後,心情tō安定落--來,藥á停掉無koh食。Koh去國泰人壽紀太太hia買保險一千萬。指名受益者老母黃月嬌。阿母家己一個tī屏東,已經成半冬無轉去看--伊-a。Hit個紀太太上gâu招保險,公司業績連續三冬攏tho͘-puh。見若招人客買險,tō一半用ha2N--ê:「萬事人teh作,天teh chhiâu。明á chài會死會活,無人知--lah。」菊--a應:「M̄-kú我知影。」紀太太叫是伊teh講sńg--ê,指頭á指天,講:「Che,kan-na神明知。」

(2)

伊行二步,koh oat倒轉去chhōe,有聽著niau-á kia2N teh叫,bih tī pùn-sò桶後壁,規身軀烏sô-sô,差一sut á看無,chhun二粒目睭金tok-tok,ku tī hia phi-phi-chùn。伸手kā抱,驚生分kiu入去壁phāng,抱bē tio̍h,kā叫也m̄出--來。無法度oat--leh koh行。又koh teh iauⁿ,soah tòe tī伊後面,一直tòe來到大樓門腳口,khiā tī hia siòng一晡。門開,雨落大--來,soah tòe--入-來。

Niau-á kia2N抱--leh來坐電梯。第一擺遇著這個查某gín-á,伊掠伊看--一-下,伊mā kā看--一-下。「你新搬--來?」「昨hng搬--來。」kā伊笑--一-下,伊mā笑--一-下。人sán-sán,面色白蒼蒼,一su白衫白裙,一頂大頂草帽á插紅花,坐tī輪椅頂面。「你幾樓?」二個同齊問,soah起愛笑。「我七樓。」「我mā七樓。」niau-á kia2N頭thóng出來看,iauⁿ一聲。「伊啥物名?」「我m̄知,tú-chiah路--裡khioh--來-ê。」「我ê niau kap伊仝款,攏烏--ê。…頂禮拜死--去…siuⁿ老--a。」電梯出--來,伊oat這旁,伊oat hit旁。查某gín-á比hit個門,講:「我tòa這間。」

巾á the̍h來拭,koh用吹頭毛ê電風kā吹ta,身軀phōng鬆--起-來,tō是長毛ê pho-su niau。Iauⁿ二聲叫pak肚iau。倒牛奶hō͘伊lim。食飽Ǹg來腳尾beh hō͘伊抱。「來,我hō͘你一個名。」抱起來坐腳腿:「你叫作無厝--ê。」無厝--ê目睭是咱台灣玉ê綠,a2N--leh呼呼叫。頭殼直直nòa,概成teh講:「多謝。」雄雄才去想--著,明á chài beh坐火車,過--來soah無人顧,taⁿ beh按怎?

Sa一罐牛奶,niau-á抱--leh去對面lòng門。門開,查某gín-á坐tī輪椅--裡,無帽á,規個頭殼光光,chhun無幾枝頭毛。HiahN一驚,bē輸看著查某gín-á thǹg光光無穿衫,趕緊會失禮,phai2N勢oa̍t頭beh轉--來。查某gín-á講:「無要緊。請你入來坐。」

講伊腦生瘤,chit-má teh作化療,頭毛落beh了。才注意--著,有影倒腳倒手無啥好勢。伊講chhun二禮拜化療完成,tō beh轉去成大讀冊,電機系第三年。「治療完成,tō仝像你按呢,m̄免koh坐輪椅。」Óa來抱niau,菊--a講:「伊ê名叫作無厝--ê。」查某gín-á kā niau-á講:「免煩惱,你chit-má有厝--a。」菊--a拜託伊照顧niau,因為明á chài beh去知本chhit-thô。查某gín-á講:「上蓋好,來kap我作伴。」Beh kā伊說多謝,才想著成實失禮,猶m̄知伊ê名。「我叫玉蘭。」菊--a心內bē定tio̍h,一直teh想hit個大事頂龜怪ê夢。「你敢有信夢?」伊搖頭,tòe伊ê目光看桌á頂chhāi hit張相片。少年家頭毛長長sôe到肩胛頭,倒旁hīⁿ-á掛一個hīⁿ鉤。「你ê查甫朋友?」伊tìm頭:「幾lōa擺夢著伊來。結果等規日攏無來。」想想--leh才koh搖頭:「我腦瘤,tō無koh來相chhōe--a。講是無緣。…我kap niau khah有緣。」「恁熟sāi外久--a?」「四冬外--a。」「緣phai2N講--lah,mā攏是人作--ê。」

轉來家己ê房間,無張持已經天暗--a。電火無開,一個人坐tī窗á ki5N看,下面街á路ê燈火,青--ê、紅--ê、黃--ê,一pha一pha光ia3N-ia3N,bē輸gín-á teh sńg ê雞kui á。車kap人teh無êng來來去去,對面夜市á mā開始鬧熱。明á chài,明á chài chia ê燈、chia ê車、chia ê人kap夜市攏會無--去,因為伊beh去坐火車,去赴死ê約會。…明á chài新文會報,落南ê火車出事相pōng,阿母tī電視頂會看--著,國泰人壽會kā伊通知。…hit個老歲á koh來--a,ta̍k日攏準準這個時陣se̍h來到巷á口,tō phóng一大phóng花teh賣。有時khah oa3N下班,轉來到厝tō會tī大樓門口遇--著。「小姐,買一蕾súi花--lah!送hō͘男朋友…」伊m̄ bat kā買花,mā無查甫朋友…雄雄緊peh--起-來,chông--落-去樓腳大門口。今á日,老歲á無招伊買花,因為伊知影伊bē買。「阿伯,…」伊kā叫…老歲á停腳落--來…菊--a óa--去,hoah:「阿伯,我攏總kā你買。」規大phóng ê花攏kā mo͘h--來。錢chiⁿ tòa伊ê手--裡,oa̍t--leh tō走。老歲á gāng-gāng khiā hia,人去了才會記得kā叫:「小姐,買一蕾súi花!送hō͘你ê男朋友。」按呢今á日花攏銷了--a,概成肩胛頭一擔重擔也無--去,khiau-ku ê身軀soah khiā khah直--起-來。

規大phóng ê玫瑰紅--ê、黃--ê花貢貢,插tòa大個花干,規個phóng去chhāi tòa玉蘭ê門口,無beh lòng門,giap一張紙,寫二字「多謝。」

隔轉日無去坐火車,改坐ba-suh。因為伊有考慮一暝,決定無beh赴死ê約會。伊beh koh轉--來,看玉蘭化療完成,看街á路ê燈火,看車看人,抱無厝--ê…。這幾工睏無好勢人siān,車內ná想soah眠--去。M̄知睏外久,也m̄知ba-suh走外hn̄g,去到tó位--a,雄雄車內音樂大聲tân。精神--過-來,目睭thí金,tú好tī運chiàng頭殼頂ê後視鏡內底,看著運chiàng ê面。Ai-io-ôe!thài會面對中一chōa刀phut ê khî,紅ki-ki,phīⁿ-á siah一旁--去!雄雄會記--得,tō是夢--裡hit個!tī月台頂kā伊jiok,ùi後面kā伊chhia hit個查甫人!hiohN一大驚,hiu一聲跳--起-來,chông去車門大力一直lòng,一直hoah:「開門!開門!我beh落車!」

司機聽著後面人客大細聲hiu,m̄知啥物緊急ê代誌。Oa̍t一個頭過--來,tú-tú好面對面相siòng,目睭相拍電,驚一下膽破,pōng一大炸彈爆發,烏天暗地,m̄知人--去。尾--a公路局調查車禍ê原因,tō是車內真chē人客攏有看--著,攏講hit個查某gín-á雄雄起青狂,peh起來hoah hiu,司機顧oa̍t頭teh看,無注意頭前鐵路平交道,soāh be赴擋車,kap hit班落南ê火車相pōng。To也猶好佳哉,規ba-suh ê人客攏好好,kan-na hit個女性人客黃菊cheng一下重傷,現場死--去。玉蘭抱無厝--ê tī電視頂看著新聞,聽著黃菊ê名,坐ba-suh kap落南ê火車相tōng死--去。規個心肝碎糊糊,親像也cheng著火車。想起黃菊講ê hit個夢,敢成實有準算hahN?M̄-kú看he電視頂teh訪問司機,to也生作斯文斯文,面á四正無半chōa khî。